O YOSUA 2
2
O Yosua wähüloko o berera yotötailako o Yerikhoika
1 #
Ibr. 11:31; Yak. 2:25 Deʼ ipaha o tau-tau madoomu o Sitim madaeraka, deʼ o Yosua wä hüloko yähinoto o berera ya tö tailako o Kanaan matonakika. O nyawa yahinoto gënanga wahipareta mangale ya tailako o Kanaan maberera deʼ ka i ma ngiu-ngiunu, yömoholoi o Yerikho makota. Done önanga yöiki o kotaika gënanga, deʼ ima hidodogumu momatengo o ngoheka ami röehe mahuku-hukunu amitau oka amiromanga o ngo Rahab. 2O Yerikho makota ma koano wo ihene o hutu gënanga naga o Israel manyawa yahinoto yoböa yotötailako o Yerikho madaera. 3Done ma koano wähüloko o nyawa o ngo Rahabika mangale ihiädono o pareta nënanga, ”Nahihupu o nyawa imahidododogumu anitauoka gënanga. Onanga ganga o berera yotötailako yoböa mangale yatailako o Yerikho madaera mata-mataika!”
4-6”Igoungu naga o nyawa yoböa tongohi ahi tauino,” o ngo Rahab mohäluhu, ”mängohi tohiorikua önanga kiaino. Onanga yoikoka kangano maöraha imulaenge ihuhutu o kota mangorana maämo-ämoko koibeno owahi. Deʼ ngohi kotälëhaua kiaika önanga yöiki, mänako önanga itai-taiti yaginïki kayakunohi ya daene.” (Enahioko o ngo Rahab maiunoka yahinoto o berera ya tötailako gënanga o rukiti makai madoomu matimioka ami tau ma lotengoka).
7Done ma koano aihuhüloko gënanga imäjöbo yamal̄a o kota. Onanga deʼ yohupuoka, o kota mangorana ma ämo-ämoko yabeno. Onanga yälingiri o nyawa yahinoto gënanga hiädono o hohora ika o Yordan ma Ngairoka.
8O hutu gënanga o Israeloka yähinoto o berera yotötailako gënanga koimaiduowahi, o ngo Rahab möiki o lotengil̄e, 9deʼ mä temo onangika, ”Ngohi tohiöriki ma Jou wohidöakoka o berera nënanga nginiika. O nyawa mata-mata nenangokadau inï mödongo nginika. 10#Kel. 14:21; Bil. 21:21-35 Ngomi mi ihenoka o abari yakorona mangale sarakia ma Jou wadüdungu o Gelaga ma Ngöto niahimangoka, maöraha ngini niamal̄a o Mesir. Ngomiö mi ihenoka sarakia ngini niä toma o Sihon deʼ o Og, o Amori manyawa manga koano yahinoto gënanga o Yordan ma Ngairi o wange mahiwaröko idaduoka. 11Hoko gënanga ngomi miihene o jarita-jarita gënanga, ngomi duru mihawanoka. Tongomi mia nyawa mata-mata manga nauru i hihangoka karana ngini. Ma Jou nia Jou Madutu iigoungu o Jou Madutu Duru Wo Kokuaha o dihangoka deʼ o duniaka. 12-13Ngohi to nganono ngini nimau niköboto deʼ to Unanga airomanga ngini aha niahidiai tongohi ahi tau manyawa kaya oa-oa hokä ngohi todiaioka nginika. Nijaji tongohi ahi ama deʼ ngohi ayo, tongohi ahi röriadödoto, deʼ yongodumu toönanga manga tau manyawa aha koniä tomaua duga-duga aha ngini niäpaliara. Deʼ mangale gënanga nihidöaka moi o roriwo manonako yakunu ngohi tinï ngaku ngini!”
14Done o nyawa yahinoto gënanga yohäluhu, ”Ngomi mijaji nako ma Jou wohilapahi ngomino o berera nënanga, ngomi aha minihidiai nginika irorahai, itiyakunu ngona kamoikaö ma nohijaritaua mangale ngomi. Mal̄aikala ma Jou womïlolai ngomi mia tötomua o jaji gënanga.”
15Karana o ngo Rahab ami tau ihigoko o kota mabebenoka, done o ngo Rahab o jangelaka de mäwora o nyawa yahinoto gënanga deʼ o gumini. 16”Niöiki o daera il̄oku-l̄okuika,” o ngo Rahab nä temo onangika. ”Hupaya hagala o nyawa ma koano wähülo-hüloko yakunua i nï tägoko ngini. Ni ma ngiunika genangokadau o wange hange madëkana hiädono önanga i ma kilioro, dahaö ngini yakunu nihigila-gila niadodagi.”
17O nyawa yahinoto yotötailako o berera gënanga i mi temo o ngo Rahabika, ”Kayaoa, ngomi aha miatötomo o jaji nogaho-gahokoka ngomino. 18Duga-duga kokiani ngona nadiai nënanga. Nako ika-ika ngomi miö ngohama aniberera, kokiani o gumini madoka-dokara nënanga ngona nohilikoika o jangelaika nënanga nomï hia-hiaruku ngomi. Aniama deʼ ngoniayo, aniröriadödoto, aniama airöria dödoto yongodumu kokiani ngona nätoomu ani tauoka nënanga. 19Nako önanga i ma tengoani ani yo hupu o tauino nënanga deʼ yätoma, ai hönenge ganga aihowono mahirete; ngomi mimahi tagongua o hali gënanga. Mä nako naga yamake o bodito o tau nënanga magoronaka, ngomi mimahitagongo. 20I iduluyaino, nako ngona nohingahu tongomi miahali o nyawa moikani, done ngomi imï likokaua o jajiika nogaho-gahokoka ngomiino.” 21O ngo Rahab mohimöteke o hali gënanga deʼ mä mal̄a önanga yöiki. Deʼ ipaha münanga mohiliko o gumini madoka-dokara gënanga ami jangelaika.
22Done o nyawa yahinoto o berera yotötailako gënanga yöiki o daera il̄oku-l̄okuika deʼ dokengoka imangiunu. O wange hange madëkana ma koano aihuhüloko yälingiri önanga kiaika honanga o daera gënanga yamöde-mödeke, mä yämäkeua önanga. Ma baha o huhüloko-huhüloko gënanga yolio o Yerikhoika. 23De de o Israeloka manyawa yahinoto o berera yotötailako gënanga il̄oku-l̄okuoka deʼ youti deʼ yatöbongo o ngairi, deʼ ipaha imakilioro o Yosuaika. Mata-mata önanga ya mäke-mäke deʼ yo ihe-ihene, önanga i hingahu unangika. 24Deʼ ipaha önanga yato, ”Marai wo hi döaka ngoneino o berera nënanga mata-mataika; o nyawa mata-mata dokengoka i nä mödongo ngone ino.”
Currently Selected:
O YOSUA 2: TLB
Highlight
Copy
Compare
Share
Want to have your highlights saved across all your devices? Sign up or sign in