O YESAYA 3
3
I ruaeuku o Yerusalemoka
1I gou-goungu, ma Jou Woko Kuaha aha wal̄ë o Yerusalemino deʼ o Yehuda hagala imahidodiaiukuoka manga inomo deʼ manga ngokere. Mata-mataö o nyawa önanga yangö ngaku-ngaku: 2yoböbarani deʼ o tentaraka, o hakimi, o nabi, yomai-maihi deʼ yononasihati, 3o tentara manga balu-baluhu, o nyawa kayaheto-hetongo deʼ yanonako-nako o negara, yogogumatere deʼ yototailako. 4Ma Jou aha wägoraka o ngoha-ngohaka o gogoduru yodadi o kawaha manga tutuda, deʼ önanga aha yäpareta de manga hininga mahuka. 5Hagala o nyawa aha imakutuku. O nyawa o gogoduru yalegaikaua o nyawa yobalu-baluhu, deʼ o nyawa manga hohumujuru ya legaikaua o nyawa manga pako-pako.
6O öraha gënanga o nyawa aha iwitumutu womatengo airiadodoto deʼ iwitemo unangika, ”Sawaliua ngona anipakeanga i patutu; hababu gënanga nodadi tongomi miatutuda maöraha i omanga de o huha nënanga.”
7Mä ünanga aha wohaluhu, ”Ngohi yohou-hourua! Ngohi o koiwa ahiinomo deʼ ahipakeanga. Uha nihihuloko todadi o hoana deo berera matutuda!”
8Igoungu, o Yerusalem irubaka! O Yehuda ikiliangoka! Hababu hagala toönanga manga demo deʼ manga manarama iwilawani ma Jou deʼ yatatoko Ai kuaha. 9Toönanga manga jako yoedenge ihidumutu toönanga manga dorou. De ihitotararonuku önanga yobaradoha hokä o Sodom manyawa mahira. Onanga yobodito! Onanga yodotagao o bodito toönanga manga diriuku mahirete.
10Ma Jou wotemo, ”Nahiadono o nyawa ihihingou-ngounika Ngohino önanga aha youtumu deʼ yohalamati. Onanga aha yajame manga kangela mahasili. 11Mä yobodito o nyawa madorou! Onanga aha yahidiai hokä önanga yähidiaioka o nyawa mahomoa.
12Ahi umati aha yätuku o rente yol̄ë iamo-amoko deʼ yateo-teo o nyawa.
Ahi umati aha yahirehene manga tutuda-tutuda hiädono yanakookaua o ngekomo kokiani önanga yanonu.”
Ma Jou wajuruhakimi Ai umati
13Ma Jou womahidadioka mangale wakalaki deʼ wajuruhakimi Ai umati. 14Ma Jou wodiai hokä o hakimi Ai umati manga tutuda-tutudaika. Nenanga ma Jou Aigalaki onangika: ”Ngini niaora o angguru madumule mahasili; niatau iomanga okiahonanga ngini niaora-ora o mihikini manyawaino. 15Yadodoa ngini niatuku Ahi umati deʼ niateo o mihikini manyawa? Ngohi, o Jou Toko Kurutil̄e deʼ Tokö Kokuaha totemooka.”
O hohininga mangale o Yerusalem mangongoheka
16Ma Jou wotemo, ”Yerusalem mangongoheka igoungu niedenge! Onanga imasusumere, yoigo manga lako ihiole-olete deʼ imädagi de manga hininga magurutil̄e. Manga aguru yadodiai, deʼ mailingi magerenge hagala o gogoli mangal̄ouino. 17Mä Ngohi aha tahukumu önanga; toönanga manga häeke aha iomanga o ngako-ngako deʼ ipalala.”
18Aha iboa maöraha ma Jou wal̄e o Yerusalem mangongoheka hagala o poromu önanga ihi o amo-amoko: manga häeke maliliko, mangal̄ouino magogoli, manga gule, 19manga giamino magogoli, 20manga biono madadatoko, manga häeke makokudu, manga röehe mapareta manga giamino deʼ manga goronaino, 21manga ali-ali deʼ manga ngunungu manga nganti-nganti, 22o rameanga mapakeanga mahohailoa, manga mantele, manga dompet 23manga baju mangina-ngina, manga pakeanga o lenan, manga tomara maliliko deʼ manga baju maporetino magogurutuku.
24O örahanënanga önanga yapake o minya mabou-bounu, daha önanga manga bounu imela. Toönanga manga gorona maninikutu maaluhu aha yatagali deo dewili hatoli mapako-pako. Toönanga manga häeke matadauru mahohailoa aha yapalala. Toönanga manga pakeanga marorahai aha yatagali dema käkakahi. O öraha nënanga önanga yohailoa; dama toönanga manga rupa itorou karana ihidöaka manga capu.
25O nyawa o nau-nauru, yoko kua-kuatö, aha yohonenge o parangi magoronaka. 26O kota mangorana ma amo-amoko o nyawa aha imahinoa o duka mapakeanga deʼ yododora, deʼ o kota gënanga mahirete aha hokä o ngoheka imihekonoka mogogeruku o tonakoka.
Currently Selected:
O YESAYA 3: TLB
Highlight
Copy
Compare
Share
Want to have your highlights saved across all your devices? Sign up or sign in