O NGO ESTER 9
9
O Yahudi manyawa yalawani hagala manga haturu
1Mabaha yadono mawange ngimoi deʼ hange o Adar mamede, enagënanga o wange ihitotatapu mangale yadiai ma koano aipareta mangale hagala o Yahudioka manyawa. O wange gënanga yodämaoka o yahudi manyawa manga haturu-haturu mangale yakuaha o hoana gënanga. Mä inyata o Yahudi manyawa yautumoka önanga. 2O kota yogetongo, hagala o Yahudi manyawa imatoomu deʼ imatekerimoi mangale yaparangi mata-mata o nyawa manga niata itotorou onangika. Hagala o hoana kiaka dika idadi yamodongo onangika hiädono moiua yobarani yahimanga önanga. 3Koaholi mata-mata o propinsioka yoloago-agomo, o gubernur-gubernur, o daera mabaluhu deʼ o pareta mapangka-pangkati yäriwo o Yahudi manyawa karana mata-mata iwimodongo o Mordekhaika. 4O pareta magilolitino o nyawa ihi öriki o Mordekhai duru wokuaha o kadatoka deʼ kaiholoi wokuahaoli. 5Hoko gënanga o Yahudi manyawa yakunu yadiai manga hininga mahuka deʼ toönanga manga haturü, önanga yaparangi deʼ o oworo daha yätoma.
6O Susanoka, o negara makota matiti, o Yahudi manyawa yätoma yaratuhu motoa. 7-10Manga hidogoronaka naga o Haman o Hamadata aingohaka, aingohaka o nauru yangimoi, o Yahudioka manyawa manga haturu ilöamo-amoko. Onanga gënanga ganga: o Parsandata, o Dalfon, o Aspata, o Porata, o Aridata, o Parmasta, o Arisai, o Aridai deʼ o Waizata. Mä o Yahudi manyawa yodiaiua yaora.
11O wange gënanga dika o nyawa ihingahu ma koanoika manga ngöe hagala o nyawa yätoma o Susanoka. 12Ma Jou Koano womitemo ma Jou Boki o ngo Esterika, ”O Susanoka dika o Yahudi manyawa yatoma o nyawa yaratuhu motoa, yodogoika o Haman aingohaka yangimoi. Okia hongoli o propinsi-propinsioka! Hohi orikua okia önanga yodiai dokengoka! Ya, kiahongoli nogögaho-gahoko öraha nënanga? No temo dika, ngona maraioka aha namake!”
13O ngo Ester mohaluhu, ”Nako Jou Koano nomodeke, kokiani o Yahudi manyawa yogögogere o Susanoka nënanga iyarehe o ngorumino nahigumal̄a yogilioli okia yadödodiaioka o wange nënanga. Ikali, kokiani o Haman aingoha-ngohaka manga mayeti gënanga yanuneuku o liate yaliko-likoukuoka.” 14Daha ma koano wohi döaka o pareta mangale yadiai o ngo Ester amigogahoko; o pareta mahurata mangale o Susan makota wohihupu deʼ o Haman aingohaka yangimoi manga mayeti yalikouku. 15Ho, mawange ngimoi deʼ iatoka o Adar mamede, hagala o Yahudioka manyawa o Susanoka ima toomuoli de yätoma o nyawa yaratuhu hangeoli o kotaka gënanga. De moi nënangaö önanga yooraua. 16Hagala o Yahudioka manyawa yogö gogere o propinsi-o propinsiokaö ima toomuoka deʼ yoriwo toönanga manga diri, önanga yautumu manga haturu de yätoma yaribuhu mori tumidi de yamotoa yadödoha-dohata önanga. Mä önanga yooraua. 17Idödadadi gënanga idadi mawange ngimoi de hangeoka o Adar mawangeoka. O wange yaino, mawange ngimoi deʼ iatoka, önanga yätomaua o nagonaö, mä ihimulia o wange gënanga de manga morene. 18Mä o Yahudioka manyawa naga o Susanoka ihimulia o wange mangimoi deʼ motoaoka, hokä o wange ma ago-agomo, hahabu önanga yätomaoka manga haturu mawange ngimoi de hangeoka de ngimoi deʼ iatoka, daha imatogumu mawange ngimoi deʼ motoaoka. 19Genanga hababu o Yahudioka manyawa yogögogere o kota maiyetekoka yohininga mawange ngimoi deʼ iatoka o Adar mamede hokä manga morene mawange, o wange mangale yorame yomore-morene ikali imahikodöaka o hadia marupa o inomo.
O Purim ihi mulia
20Iböto gënanga o Mordekhai wätulihi hagala idödadadi gënangaa deʼ wohidingoto o hurata o Yahudi manyawaika mata-mata o Persia ingodumu, yaoa ikurutika, yaoa itigino. 21O hurata gënanga madol̄a enagënanga o pareta mangale ihimulia mawange ngimoi deʼ iata deʼ ngimoi deʼ motoa o Adar mamedeʼ o taongo ihigetongo. 22Hababu mawange-wange genangala önanga yautumoka toönanga manga haturu-haturu, hiädono manga hininga mahuha de manga hininga mahiri ingali idadi o morene deʼ o utumu. Ma hababu gënanga önanga kiani ihimulia hagala o wange gënanga, de o rameanga deʼ o jamuanga ikali ima hikodöaka o inomo deʼ ihikodoku o hadaka o mihikini manyawaika. 23O Yahudi manyawa ihingounu o Mordekhai aipareta gënanga deʼ hoko gënanga o rameanga gënanga idadi manga biaha ma adati o taongo ihigetongo.
Mabobaha
24 #
Est. 3:7
O Haman Hamedata aingohaka, o Agag aidifauku, o Yahudioka manga haturu ilamo-amoko, yodiaioka o Yahudioka o undi ya hetongo ”o Purim” mafaida ihitatapu mawange mangale yätoma o Yahudioka manyawa; ünanga wätatoroka mangale wä hohonenge önanga wamata-mataka. 25Mä o ngo Ester mihimanga ma koano, de ma koano wohidöaka o pareta ituli-tulihi idadi hababu o datoro itotorou wadodiai o Haman yatapal̄u ai diri mahirete, hiädono ünanga de ai ngoha-ngohaka yälikouku o liate yaliko-likoka. 26Hababu gënanga o wange ma ago-agomo gënanga yahetongo o Purim. O Mordekhai ai hurata deʼ hagala yamömao-maoka o Yahudi manyawa, 27mahasili önanga yodiai moi o datoro mangale toönanga manga diri mahirete, mangale toönanga manga difauku deʼ mangale mata-mata o nyawa aha yodadi o Yahudioka manyawa. Imamoteke o datoro gënanga o taongo ihigetongo önanga kiani ihimulia o wange hinotoino wohitö tatapuoka o Mordekhai. 28Wohi tatapuö mangale kahi ädo-ädonika o Purim mawange gënanga kiani yohininga de ihimulia o Yahudi manga tau manyawa magetongo hagala o gögö o propinsi magetongo magoronaka deʼ o kota magetongo.
29Ma datekoka gënanga, imakinïki deʼ o Mordekhai ai hurata, ma Jou Boki Ester o Abihail ngoi ora motulihi o hurata mahinotoka, mohi kuata o Mordekhai ai hurata madol̄a yakorona o Purim gënanga. 30O hurata gënanga ihidingoto o Yahudi manyawaika mata-mata, deʼ madulihi nia uti-utiuku nihidingoto o Persia ma pareta mapropinsi o ratuhu moi deʼ monaoko de tumidika. O hurata gënanga nihidomoteke o niata hupaya o Yahudioka manyawa hokogenangika yamake o lola deʼ yorïdi. 31O hurata gënanga ihigaro hupaya önanga deʼ toönanga manga difauku yohininga o Purim mawange maöraha yakokorona, hokä sarakia önanga yohininga o puaha maöraha deʼ o duka manonako mapakeanga maöraha. Genangala o Mordekhai deʼ o ngo Jou Boki Ester manga hurata madol̄a. 32O ngo Ester ami pareta ihitö tatapu o Purim madatoro-datoro yatulihi o buku magoronaka.
Currently Selected:
O NGO ESTER 9: TLB
Highlight
Copy
Compare
Share
Want to have your highlights saved across all your devices? Sign up or sign in