O NGO ESTER 8
8
O Yahudi manyawa yahi pareta yalawani manga haturu
1Mawange gënanga dika ma Koano Ahasyweros womihidöaka ma Jou Boki o ngo Esterika hagala ai arata o Haman, o Yahudioka manyawa manga haturu ma amo-amoko gënanga. O ngo Ester mihi ngahu ma koanoika o Mordekhai ami iranga o ete moi, done mulaenge gënanga o Mordekhai iwihidöaka o haku mangale wihimanga ma koano ihira deʼ iwi ahokuahi. 2Ma koano wahuputu ai ali-ali wa l̄ë l̄ë inokaoli o Hamanino deʼ wihidöaka o Mordekhaika. De o ngo Ester migoraka o Mordekhai wodadi wakokuaha o Haman ai arata.
3Iböto gënanga o ngo Ester mihimangoli ma koano. Munanga momahi tudukuku ikali moari de mogahoko ma koano wahohihanga ai datoro itotorou wadodiai o Haman o Yahudi manyawaika. 4Ma koano womihi tumutika ai diki-diki o gurasi o ngo Esterika, daha o ngo Ester momaoko deʼ motemo, 5”Nako Jou Koano nomodeke deʼ nohihayanga ngohino, kokiani Jou Koano nohihupu o pareta mahurata mangale wakilioli o Haman ai hura-hurata ma dol̄a o pareta yabinaha mata-mata o Yahudi manyawa o paretaka nënanga. 6Sarakia yakunu ngohi ahihininga yaika tapulo-pulono tongohi ahi hoana deʼ ahi roriadodoto yatoma yamata?”
7Daha ma Koano Ahasyweros womitemo ma Jou Boki o ngo Esterika deʼ o Mordekhaika, ”Igoungu, ngohi tilikoka o Haman karana ünanga womau wabinaha o Yahudioka manyawa, deʼ ai arata tohidöakoka o ngo Esterika. 8Mä o hurata itulihoka deʼ ma koano ai romanga de yogelengaka ma koano ai sapu, yakunokaua i kilioli. Mä ngini tinihigumal̄a nitulihi o hurata mangale o Yahudi manyawa, okia dika ngini nia pulono yaoa. Nitulihi o hurata gënanga deʼ ahi romanga de niogelenga o pareta masapu.”
9Mawange genangö, enagënanga o wange monaoko de hangeoka o mede mahange, o Siwan mamede, o Mordekhai wa ahoko ma koano ai sösekretaris de wäpareta önanga yotulihi o hurata o gogubernurika, o daera manga balu-baluhika deʼ o nyawa yolölago-agomo o propinsi o ratuhu moi deʼ monaoko deʼ tumidika, o India deʼ yaino hiädono o Sudanika. O hura-hurata gënanga yatulihi o propinsi-propinsi manga demo deʼ manga dulihi magoronaka gënanga moi-moi. Unangö wohidingoto o hurata gënanga o Yahudi ma nyawaika o Yahudi manga demo deʼ manga dulihi magoronaka. 10O hura-hurata gënanga o Mordekhai watanda deʼ ma Koano Ahasyweros ai romanga deʼ wogelenga deʼo pareta masapu. Daha o Mordekhai wähuloko o huhuloko-huhuloko yototaka o hura-hurata gënanga o pareta ma propinsi-propinsika deʼ yobarene toma koano ai kuda-ai kuda itö tai-taiti.
11O hura-hurata gënanga ihinyata ma koano wahigumal̄a o Yahudioka manyawa o kota yogetongo mangale yorimoi deʼ yodemo manga diri. Maöraha okia önanga yaparangi hagala o nyawa deʼ manga dae-daeoka o hoana deʼ o propinsi okiainö dika, önanga yakunu yalawani deʼ yätoma yapoparangi gënanga kamamoi manga hekata deʼ manga ngoha-ngohaka; önanga yakunu yätoma hagala manga haturu gënanga hiädono yomata ikali yaora manga arata. 12O pareta gënanga kiani yadiai o Persia mapareta yamode-modekika mawange wohitotatapuoka o Haman mangale yätoma hagala o Yahudioka manyawa, mawange ngimoi deʼ hange mamede ngimoi deʼ hinoto, o Adar mamede. 13O pareta mahurata gënanga kiani ihihupu hokä o tita ihingahu o nyawa mata-mataika o propinsioka mata-mata hupaya o Yahudi manyawa imagoa-goana yalawani manga haturu nako mawange gënanga yadono. 14Done ima goraka yahulo-huloko gënanga de yobarenea toma koano ai kuda. O Susanokaö o negara makota matitioka, o pareta gënanga yadabasa.
15Iböto gënanga o Mordekhai wamal̄a o kadato deʼ womahinoa o pakeanga imomulia marupa mabihi-bihi de magare-garehe, o juba maguguhurungu o lenan maaluhino de o makota o gurasi duru kohä hailoa. O kota Susan imauli-ulili karana imorene. 16O Yahudi manyawa imamao manga hininga iworo deʼ isanangi, youtumu deʼ imahil̄e. 17O kota yogetongö deʼ o propinsi, kiakaö dika ma koano aipareta mahurata yabasa, hagala o yahudi manyawa yomorene, imahisosanangi deʼ yorameanga. Koaholi maberera manyawaino manga ngöe dadi o Yahudi manga hoana manyawa, karana önanga yamödongo o hoanika gënanga.
Currently Selected:
O NGO ESTER 8: TLB
Highlight
Copy
Compare
Share
Want to have your highlights saved across all your devices? Sign up or sign in