O SAMUEL MAHINOTOKA 2
2
O Daud iwi goraka wodadi o Yehuda manga koano
1I böto gënanga o Daud wïleha ma Jouika, ”Boteka Jou kano modeke ngohi toiki takuaha o kota moi o Yehudaka?”
”Iya,” ma Jou wohaluhu.
”O kota kiaka?” o Daud woleha.
Ma Jou wohaluhu, ”O Hebron.” 2#1Sam. 25:42-43 Daha o Daud woiki o Hebronika imakinïki deʼ ngoi hekata yahinoto: o ngo Ahinoam o Yizreel ma ngohaka, deʼ o ngo Abigail o Nabal ngoi fao enagënanga o Karmel mangoheka. 3Hoko genangö ainyawa deʼ manga tau manyawa moi-moi ima kinïki deʼ o Daud, daha önanga gënanga yotatapu o Hebronoka deʼ magilolitino. 4#1Sam. 31:11-13 Ipaha hagala o Yehuda manyawa yaika o Hebronika, deʼ iwi tede o Daud wodadi o Yehuda manga koano.
Maöraha o Daud woihene hagala o Yabesh manyawa o Gileadoka iwi lungunoka o Saul ai mayeti, 5ünanga wahidingoto ai huhuloko dokengoka deʼ ihiädono o behehongo, ”Tanu ma Jou wihi barakati ngini, karana ngini nihidumutoka niasetia niakoanoika deʼ nia lungunu ai mayeti. 6Hababu gënanga, tanu ma Jou wohi dumutu Ai dora deʼ Ai setia nginika. Ngohiö aha tini hidiai ngini deʼ kaya oa-oa karana nia manarama gënanga. 7Nia tongohono nia hininga deʼ nidiai hokä o nyawa yonau-nauru! O Saul, nia koano igoungu wohonengoka, ma hagala o Yehuda manyawa ihi tedeoka ngohi toönanga manga koano.”
O Isyboset wihidadi o Israeloka manga koano
8O Saul aitentara manga baluhu, enagënanga o Abner o Ner aingohaka, wohioaroka aidiri ima kinïki o Isyboset o Saul aingohaka, o Mahanaimika o Yordan ma Ngairi mahonongaka. 9Dokengoka o Abner wigoraka o Isyboset wodadi o koano madaera-daera o Gilead, o Asyuri, o Yizreel, o Efraim deʼ o Benyamin de, o Israel ingödumu. 10O Isyboset ai umuru o taongo moruata maöraha iwihi dadi o Israeloka manga koano, deʼ ünanga wapareta o taongo hinoto madekana.
Mä o Yehuda aihöana kahirahi yosetia o Daudika, 11deʼ o Daud wopareta o Hebronoka mangale o Yehuda, o taongo tumidi deʼ mahononga madekana.
O Israeloka deʼ o Yehudaka manga hidogoronaka o parangi
12O wange moiuku o Abner woiki o Mahanaim deʼ waino o Gibeon makotaika, ima kinïki deʼ o Isyboset ainyawa. 13O Yoabö (ngoi ayo ami romanga o ngo Zeruya), ima kinïki o Daud ainyawa yongodumu o kotaika gënanga. O duduono hinoto imakoka lawani gënanga ima teke rori himanga o Gibeon malupungoka; o Abner deʼ unangino yoboa-boa yogogeruku nengino mahononga, o Yoab deʼ unangino yoboa-boa dokena ma honongaka. 14Daha o Abner witemo o Yoabika, ”Ika, ngone hahuloko tongone nanga nyawa imaka tadingi!”
O Yoab wohäluhu, ”Kayaoa.”
15Daha yotagi yaika ya ngimoi deʼ yahinoto o Benyamin ai hoanino o Isyboset ai dagali, deʼ o nyawa yangimoi deʼ yahinoto o Daudino ainyawa. 16Onanga moi-moi imaku utukika manga tadauru deʼ ima kotopoko manga haturu manga mamataoko, hiädono önanga yohonenge kamamoiuku. Hababu gënanga mangï o Hebronoka gënanga yahetongo o ”Oworo ma Dumule.”
17Iböto gënanga idadi o parangi kohagiria, deʼ o Daud ainyawa yahihangoka o Abner deʼ o Israeloka manga tentara. 18O ngo Zeruya ami ngohaka yaruange naga genangoka, enagënanga o Yoab, o Abisai deʼ o Asael. O Asael woma popata ai japati hokä maijanga, 19daha wiginïki o Abner kahoko genangika. 20O Abner womalega ai poretoka deʼ wileha, ”Ngona gënanga o Asael?”
”Iya,” wohaluhu.
21”Uha nohiginïki ngohi!” o Abner wato. ”Beika nitagoko womatengo o tentara gënanga deʼ nal̄ë ai daë!” Mä o Asael hoko genangika dika wiginïki ünanga. 22Mä moioli o Abner witemo unangika, ”Uha nohiginïki ngohi! Done deʼ mapakisa toni toma ngona. Hoʼ, sarakia ngohi takunu tolega o Yoab ai biono ani riaka gënanga?” 23Maöraha o Asael kahirahi woluku woma togumu, o Abner wituduku wohidoporetoko, deʼ yakorona o Asael ai mamataoko hiädono o kuama gënanga itotara ai poretoko. O Asael woruba kai riouku deʼ wohonenge ongioka gënanga. O nyawa mata-mata yobö böa böa o ngï ika ünanga worö ruba-rubauku gënanga, ima togumu genangoka.
24Mä o Yoab deʼ o Abisai ihi gila-gila iwi ginïki o Abnerika. Maöraha o wange itumunu, önanga ima hiädono o Ama ma Doporonoka, naga o Giah o wange mahiwaröko idaduoka, o Gibeon matonaka makokakaha yohimangika. 25Dokengoka hagala o nyawa o Benyamin ai hoanino imako dogoli deʼ o Abner, daha yatatoro toönanga manga duduono moi o doporono matubuoka. 26Dokengino o Abner wiböaka o Yoabika, ”Kokiani ngone homa teke parangi kahoko genangika? Namaoua ngona, o parangi nënanga duga-duga inagao o huha? Ngomi nënanga nia riadodoto o hoana moi. Hokokiahi madekanaoli ngona nomau notamä nahi paretaua ani nyawa hupaya ima togumu imiginïki ngomi?”
27O Yoab wohaluhu, ”De ma Jou Madutu wowö wango-wango, hohi ade ngona itaitua mulaenge notemo, maraioka ahi nyawa aha gila-gila ini ginïki ngini hiädono yahere o ngorumino.” 28Daha o Yoab wawuwu o trompet hokä manonako ai nyawaika hupaya ima togumu yaginïki o Israeloka manyawa, daha itogumu o parangi gënanga.
29O Abner deʼ ainyawa o hutu moi yahaiwatiki ima tuduono yanonu o Yordan mawai, daha yatobongo o Yordan ma Ngairi, de ima dagi yogila-gila maginitarino o wange moi madodagi iahumu ibötino, ima hiädono önanga o Mahanaimika.
30O Yoab wiginïki o Abner woma togumu ibötino, ünanga wätoomu mata-mata ainyawa. Ma homoa deʼ o Asael inyata yangimoi deʼ yahiwo yohihanga onangino. 31O Daud ainyawa yatomaka yaratuhu hange deʼ yamori butanga o Abner ai duduono manyawa o Benyamin ai hoanino. 32Iböto gënanga o Yoab deʼ ainyawa yagoraka o Asael ai mayeti deʼ yalungunu ai tau manyawa manga jere magoronaka o Betlehemoka. Daha önanga ima dagi o hutu moi deʼ ima hiädono o Hebronoka maöraha idaduika i tebini.
Currently Selected:
O SAMUEL MAHINOTOKA 2: TLB
Highlight
Copy
Compare
Share
Want to have your highlights saved across all your devices? Sign up or sign in