Yesus 'ai so-soma'a 27
27
Paulus 'o sidete toma limau Roma
1Wakutu gubernur Festus 'a putusu ḏua ngomi balasu mi sidete toma nagara Italia, 'a Paulus re 'ai ḏagilomu ngowa'a bui nga muḏuo i'a ya'u pula'a ra Yulius, Roma manga sordado ma sae'e, ma balangu ya si'aro'o “Resimen Kaisar.” 2Ngomi mi mabalene toma kapala rimoi, enanga da'a toma limau Adramitium ino, sa'i sidete toma bo-balene—bo-balene toma daeraha Asia. 'Age rema ngowa'a matengo 'ai lomanga Aristarkhus, ngowa'a Makedonia da'a limau Tesalonika ino. Unanga 'o sidete mamete'e ra ngomi.
3Ma ḇiḇini ino, ngomi mi ngadolo toma limau Sidon re 'a Yulius 'u de-de'oso 'a Paulus rousu masala: Paulus sanga watasa 'o tutumu 'ai ḏagilomu, la ananga 'aḏi pula'a 'oru Paulus 'ai paralu. 4Toma ngi'i gena-ge, ngomi mi dowanga minga ḏo-ḏagi. Mada'a kapala re karawiana ma ḏo-ḏagi ma'u dagana, singadolo ngomi mi sidete toma pulo Siprus ma ngoloto ma 'uḏu. Toma ngi'i gena-ge karawiana 'i siḏi ua, sababu 'i taku. 5Gena ḏua, ngomi mi tola'a ngoloto lamo'o mi talaḏi daeraha Kilikia re Pamfilia, kara mi ngadolo toma limau Mira toma daeraha Likia. Toma limau Mira, ngomi mi 'uci toma kapala. 6Toma ngi'i gena-ge, sordado ma sae'e 'o sanga kapala rimoi toma limau Aleksandria ino ga'a sa'i sidete si'a nagara Italia. Ḏua unanga 'u sibalene ngomi toma kapala gena-ge. 7Toma wangere muḏuo ma dara ngomi sidete kangela masala 'i tagi kolo'a madutu, sababu karawiana ma'u caḏiona'a singadolo minga kapala 'i ngadolo toma limau Knidus. Ngomi mameta-meta i'a toma nagara Italia ge, 'i yoḏu'u. Mada'a mi sidete toma kore mie toma pulo Kreta mi tola'a Salmone ma dere, la mi wiḏi karawiana sababu 'i taku. 8Ngomi mi sidete mete'e ngoloto ma 'uḏu toma pulo gena-ge 'i kangela madutu. Ma ḏo-ḏogumu tala ngomi mi ngadolo toma ngi'i rimoi ma lomanga Bo-balene Rousu, 'i ma'u kiḏanga ua toma limau Lasea.
9Toma 'orasa gena-ge, taminga ḏo-ḏagi ma dara 'i oromo 'orasa singadolo ngowa'a Yahudi manga wangere lamo'o (Puasa ma Wangere) 'i palisi'i ḏua. Dadi wo sidete 'i kangela masala sababu 'orasa momoku sa'i ri ngadolo. Sababu gena-ge, Paulus 'o sidodato ra ananga rema betongo so'o ne: 10“Ioronongoḏu, mete'e ngoi 'ari 'akala ma sanga, na'o wo sidete turusu tananga ngo'omo ma golona, ngene wa sanga ma 'alangana. Pa'i nanga kapala ḇato ua re kapala ma gina ḇato ua wa upa'a, mada'a ya tuḏu nanga nyawa ḏi'i.” 11Mada'a sordado ma sae'e unanga lebe ngaku kapala ma dutu re kapala ma nyanyasele, 'u sibilangana ua 'a Paulus ga'a siajele nange-ge. 12Sidogo ḏi'i, bo-balene gena-ge gasa rousu ua di'a kapala 'i matapu lai ti'ara, na'o 'orasa momoku. Sababu gena-ge, kapala ma dotomo manga repe ananga ya site'e ya dowanga manga ḏo-ḏagi re ya sieanga bo-balene gena-ge. Dadi ananga 'aḏi makutale mau 'aḏi ngadolo toma bo-balene Feniks, la 'aḏi matahana gena-ge 'orasa momoku. Bo-balene Feniks gena-ge 'i talaḏi barat daya re barat laut toma pulo Kreta.
Rato toma ngoloto
13Toma 'orasa gena-ge, kore sara 'i hoa dadi kapala ma dotomo ya sibasono tala 'aḏi sidete ri nyengara. Dadi ananga ya iḏala kapala ma tapu, re 'aḏi sitede mete'e pulo Kereta ma 'uḏu. 14Mada'a 'aḏi sidete ti'ara nyangu, kage-kage rato 'i sapolo da'a wangere ma la'o ino. 15Ngomi mi dowanga ḏo-ḏagi yoḏu'u sababu tomo karawiana re momoku ya wa'ala minga kapala. Dadi ngomi ma sieanga i'a kapala gena-ge 'i rarini mete'e karawiana ya gasa. 16Wakutu ngomi mi sidete tola'a i'a pulo Kauda ma ngowa gena-ge papolo kore sara, ngomi basono gasa taku ceka'a ua. Kalaha so'o gena-ge, ananga sa'i nga'unu ua ya sibere manga sekuci toma kapala sababu kangela masala. 17Ananga ya sibere kapala ma sekuci toma kapala togumu i'a, ananga ya agutu reo gumi toma kapala, sababu ananga 'aḏi mojongo awa-awa kapala 'i tirini toma donga toma ngi'i ma lomanga Sirtis co-cori ngoloto ma 'uḏu. Sababu gena-ge, ananga ya siguci manga sidete, la manga kapala 'i ra-rarini mete'e karawiana. 18Ngoloto ganapu mangamo singadolo ma ḇiḇini ino siḏa-siḏa gina toma kapala ma dara ananga ya upa'a toma ngoloto. 19Ma ḇiḇini ino ḏi'i, kapala ma dotomo ya upa'a ḏi'i 'o pakakasa 'oru ḇato toma kapala ma dara. 20Toma wangere muḏuo ma dara, ngomi kama oḏi'i wangere ma la'o re mumuḏungu mai ua re ngoloto ganapu mangamo. Ma ḏo-ḏogumu tala, ngomi singanono riwara di'a mi 'ahu moju.
21Toma wangere muḏuo ma dara, kapala ma dotomo gena-ge kama oromo ua, ḏua 'a Paulus 'o te'oso ra ananga manga biono re 'o kanau, “Ioronongoḏu, na'o ngini na mete'e ngoi 'ari dodato ngene wo sidete ua toma pulo Kereta ngene wa sanga ma 'alangana re ma rugi so'o nena-ne ua. 22Mada'a nange-ne ngoi to golo'o ra ngini, na site'e tala ninga 'akala re sinyingara. Kalaha ma kapala nena-ne 'i iranga, matengo i'a mai ua ngini ni sengene. 23'Au utu, Ma Jou'ongu Madutu ga'a ngoi to silamo'o re siḏubuso 'O soma'a 'Ai mala'ekata 'o sapolo ra ngoi. 24Mala'ekata gena-ge 'o kanau, ‘Paulus no mojongo awa. Ngana balasu no talaḏi ra Kaisar Roma. Re sababu Ma Jou'ongu Madutu 'ai mura re dadalara ra ngana, ngowa'a mo-moini ga'a 'aḏi sidete mamete'e ra ngana, ananga gena-ge 'aḏi salamata ḏi'i.’ 25Sababu gena-ge, ioronongoḏu balasu na site'e ninga 'akala re sinyingara. Ngoi to ngaku mo-moini nena-ne 'i dadi ma tero sa'olo Ma Jou'ongu Madutu 'o siajele ra ngoi. 26Mada'a ḏuanga i'a ngomi mi sisabi toma pulo rimoi i'a.”
27Toma utu nyagi moi re rata ma dara, ngomi ra-rarini toma Ngoloto Adria. Ḏa utu golona i'a, kapala ma dotomo ya sibasono tala sa'i mi co-cori toma tana'a du-dudungu. 28Ananga 'aḏi tobe maḏi di'a disa waro ngoloto ma ngido. Ma nyonyata ngi'i gena-ge ma ngido sa'i metere nyagi rata. Palisi'i i'a ti'ara ua, ananga dadunu ya tuga re ya sanga metere nyagi ro'ange. 29Sababu gena-ge, ananga 'aḏi mojongo awa-awa kapala gena-ge 'i tirini toma maḏi. Dadi ananga ya siguci tapu ngai rata toma kapala ma lasere re 'aḏi nganono nga'unu gari'a capati ḇiḇini. 30Mada'a kapala ma dotomo saḏi wiḏi. Dadi ananga 'aḏi siguci sekuci toma kapala 'aḏi masigo-gogoro ma tero sa'olo siguci kapala ma tapu. 31Dadi 'a Paulus 'o kanau i'a ra ma sordado ma sae'e re sordado-sordado toma kapala gena-ge, “Na'o kapala ma dotomo 'aḏi wiḏi sisoi'i tala kapala nena-ne, ngini ni sanga salamata ua.” 32Sababu gena-ge, sordado-sordado ya tola'a sekuci ma gumi, singadolo enanga 'i rarini.
33Ma ḇiḇini nyota-nyotara, Paulus sigaro'o jobilaha ananga 'aḏi oromo re 'o kanau, “Ma di'ara wangere nyagi moi re rata ḏua, ngini pa'i ni mamojongo-mojongo re ni masioromo mai ua. 34Sababu gena-ge, ngoi to golo'o ni oromo ceka'a i'a si, la ni lamahana awa. Sababu ngini mo-moini ni sanga salamata, kama kuranga ua.” 35Paulus 'o kanau togumu i'a, 'o 'oro roti re 'o sibere ie murasa ma la ra Ma Jou'ongu Madutu ra ananga mo-moini manga biono. Ḏua 'a sibalangu, kara unanga 'a oromo. 36Ḏua ananga mo-moini manga 'akala re sinyingara 'i te'e moju re 'aḏi oromo ḏi'i. 37Ananga mo-moini toma kapala gena-ge nga latu ḏiḏi re nga nyagi tumudingi re nga ḏurama. 38Ananga 'aḏi oromo singadolo wunusu. Togumu i'a, kapala ma gina gandum ananga ya upa'a toma ngoloto di'a sikare kapala.
Kapala 'i tirini
39Wakutu da-daini i'a, kapala ma dotomo 'aḏi oḏi'i tana'a du-dudungu mada'a ya waro ma lomanga ua. Mada'a ananga 'aḏi oḏi'i otolo rimoi rema dongi. Dadi ananga 'aḏi mau ya disa waro na'o nyengara ya sisabi isa manga kapala gena-ge. 40Ḏua ananga ya tola'a tapu-tapu ma gumi, ya sieanga ma tapu 'i jala. So'o gena ḏi'i, ya pasala 'o nyanyasele ma gumi. Gena ḏua, ananga ya sibere manga sidete toma kapala ma remanga, la na'o karawiana ya wusu kapala gena-ge 'i isa toma dongi. 41Mada'a kapala gena-ge ma remanga 'i tirini toma ngi'i dongi re ri ogoro i'a, kara ma lasere 'i perego momoku ya wa'ala.
42Sordado-sordado toma kapala ma dara 'aḏi matai mojongo, awa-awa ngowa'a bui 'aḏi tobongo sisa du-dudungu. Dadi jobilaha wa'u sisengene simoini. 43Mada'a sordado ma sae'e ya'u ḇangata sababu unanga 'o mau sisalamata 'a Paulus. Unanga 'o soma'a ananga mo-moini ga'a nga'unu tobongo 'aḏi maḏupaka re 'aḏi tobongo sisa dongi. 44Mamuni'a waro tobongo ua 'aḏi macako'o toma papanga-papanga di'a manga ri-riono sisa dina du-dudungu, re ngo'omo gena-ge ngomi mi salamata mo-moini ngadolo du-dudungu.
Currently Selected:
Yesus 'ai so-soma'a 27: SNT
Highlight
Share
Copy
Want to have your highlights saved across all your devices? Sign up or sign in
2015 © Indonesian Bible Society
Yesus 'ai so-soma'a 27
27
Paulus 'o sidete toma limau Roma
1Wakutu gubernur Festus 'a putusu ḏua ngomi balasu mi sidete toma nagara Italia, 'a Paulus re 'ai ḏagilomu ngowa'a bui nga muḏuo i'a ya'u pula'a ra Yulius, Roma manga sordado ma sae'e, ma balangu ya si'aro'o “Resimen Kaisar.” 2Ngomi mi mabalene toma kapala rimoi, enanga da'a toma limau Adramitium ino, sa'i sidete toma bo-balene—bo-balene toma daeraha Asia. 'Age rema ngowa'a matengo 'ai lomanga Aristarkhus, ngowa'a Makedonia da'a limau Tesalonika ino. Unanga 'o sidete mamete'e ra ngomi.
3Ma ḇiḇini ino, ngomi mi ngadolo toma limau Sidon re 'a Yulius 'u de-de'oso 'a Paulus rousu masala: Paulus sanga watasa 'o tutumu 'ai ḏagilomu, la ananga 'aḏi pula'a 'oru Paulus 'ai paralu. 4Toma ngi'i gena-ge, ngomi mi dowanga minga ḏo-ḏagi. Mada'a kapala re karawiana ma ḏo-ḏagi ma'u dagana, singadolo ngomi mi sidete toma pulo Siprus ma ngoloto ma 'uḏu. Toma ngi'i gena-ge karawiana 'i siḏi ua, sababu 'i taku. 5Gena ḏua, ngomi mi tola'a ngoloto lamo'o mi talaḏi daeraha Kilikia re Pamfilia, kara mi ngadolo toma limau Mira toma daeraha Likia. Toma limau Mira, ngomi mi 'uci toma kapala. 6Toma ngi'i gena-ge, sordado ma sae'e 'o sanga kapala rimoi toma limau Aleksandria ino ga'a sa'i sidete si'a nagara Italia. Ḏua unanga 'u sibalene ngomi toma kapala gena-ge. 7Toma wangere muḏuo ma dara ngomi sidete kangela masala 'i tagi kolo'a madutu, sababu karawiana ma'u caḏiona'a singadolo minga kapala 'i ngadolo toma limau Knidus. Ngomi mameta-meta i'a toma nagara Italia ge, 'i yoḏu'u. Mada'a mi sidete toma kore mie toma pulo Kreta mi tola'a Salmone ma dere, la mi wiḏi karawiana sababu 'i taku. 8Ngomi mi sidete mete'e ngoloto ma 'uḏu toma pulo gena-ge 'i kangela madutu. Ma ḏo-ḏogumu tala ngomi mi ngadolo toma ngi'i rimoi ma lomanga Bo-balene Rousu, 'i ma'u kiḏanga ua toma limau Lasea.
9Toma 'orasa gena-ge, taminga ḏo-ḏagi ma dara 'i oromo 'orasa singadolo ngowa'a Yahudi manga wangere lamo'o (Puasa ma Wangere) 'i palisi'i ḏua. Dadi wo sidete 'i kangela masala sababu 'orasa momoku sa'i ri ngadolo. Sababu gena-ge, Paulus 'o sidodato ra ananga rema betongo so'o ne: 10“Ioronongoḏu, mete'e ngoi 'ari 'akala ma sanga, na'o wo sidete turusu tananga ngo'omo ma golona, ngene wa sanga ma 'alangana. Pa'i nanga kapala ḇato ua re kapala ma gina ḇato ua wa upa'a, mada'a ya tuḏu nanga nyawa ḏi'i.” 11Mada'a sordado ma sae'e unanga lebe ngaku kapala ma dutu re kapala ma nyanyasele, 'u sibilangana ua 'a Paulus ga'a siajele nange-ge. 12Sidogo ḏi'i, bo-balene gena-ge gasa rousu ua di'a kapala 'i matapu lai ti'ara, na'o 'orasa momoku. Sababu gena-ge, kapala ma dotomo manga repe ananga ya site'e ya dowanga manga ḏo-ḏagi re ya sieanga bo-balene gena-ge. Dadi ananga 'aḏi makutale mau 'aḏi ngadolo toma bo-balene Feniks, la 'aḏi matahana gena-ge 'orasa momoku. Bo-balene Feniks gena-ge 'i talaḏi barat daya re barat laut toma pulo Kreta.
Rato toma ngoloto
13Toma 'orasa gena-ge, kore sara 'i hoa dadi kapala ma dotomo ya sibasono tala 'aḏi sidete ri nyengara. Dadi ananga ya iḏala kapala ma tapu, re 'aḏi sitede mete'e pulo Kereta ma 'uḏu. 14Mada'a 'aḏi sidete ti'ara nyangu, kage-kage rato 'i sapolo da'a wangere ma la'o ino. 15Ngomi mi dowanga ḏo-ḏagi yoḏu'u sababu tomo karawiana re momoku ya wa'ala minga kapala. Dadi ngomi ma sieanga i'a kapala gena-ge 'i rarini mete'e karawiana ya gasa. 16Wakutu ngomi mi sidete tola'a i'a pulo Kauda ma ngowa gena-ge papolo kore sara, ngomi basono gasa taku ceka'a ua. Kalaha so'o gena-ge, ananga sa'i nga'unu ua ya sibere manga sekuci toma kapala sababu kangela masala. 17Ananga ya sibere kapala ma sekuci toma kapala togumu i'a, ananga ya agutu reo gumi toma kapala, sababu ananga 'aḏi mojongo awa-awa kapala 'i tirini toma donga toma ngi'i ma lomanga Sirtis co-cori ngoloto ma 'uḏu. Sababu gena-ge, ananga ya siguci manga sidete, la manga kapala 'i ra-rarini mete'e karawiana. 18Ngoloto ganapu mangamo singadolo ma ḇiḇini ino siḏa-siḏa gina toma kapala ma dara ananga ya upa'a toma ngoloto. 19Ma ḇiḇini ino ḏi'i, kapala ma dotomo ya upa'a ḏi'i 'o pakakasa 'oru ḇato toma kapala ma dara. 20Toma wangere muḏuo ma dara, ngomi kama oḏi'i wangere ma la'o re mumuḏungu mai ua re ngoloto ganapu mangamo. Ma ḏo-ḏogumu tala, ngomi singanono riwara di'a mi 'ahu moju.
21Toma wangere muḏuo ma dara, kapala ma dotomo gena-ge kama oromo ua, ḏua 'a Paulus 'o te'oso ra ananga manga biono re 'o kanau, “Ioronongoḏu, na'o ngini na mete'e ngoi 'ari dodato ngene wo sidete ua toma pulo Kereta ngene wa sanga ma 'alangana re ma rugi so'o nena-ne ua. 22Mada'a nange-ne ngoi to golo'o ra ngini, na site'e tala ninga 'akala re sinyingara. Kalaha ma kapala nena-ne 'i iranga, matengo i'a mai ua ngini ni sengene. 23'Au utu, Ma Jou'ongu Madutu ga'a ngoi to silamo'o re siḏubuso 'O soma'a 'Ai mala'ekata 'o sapolo ra ngoi. 24Mala'ekata gena-ge 'o kanau, ‘Paulus no mojongo awa. Ngana balasu no talaḏi ra Kaisar Roma. Re sababu Ma Jou'ongu Madutu 'ai mura re dadalara ra ngana, ngowa'a mo-moini ga'a 'aḏi sidete mamete'e ra ngana, ananga gena-ge 'aḏi salamata ḏi'i.’ 25Sababu gena-ge, ioronongoḏu balasu na site'e ninga 'akala re sinyingara. Ngoi to ngaku mo-moini nena-ne 'i dadi ma tero sa'olo Ma Jou'ongu Madutu 'o siajele ra ngoi. 26Mada'a ḏuanga i'a ngomi mi sisabi toma pulo rimoi i'a.”
27Toma utu nyagi moi re rata ma dara, ngomi ra-rarini toma Ngoloto Adria. Ḏa utu golona i'a, kapala ma dotomo ya sibasono tala sa'i mi co-cori toma tana'a du-dudungu. 28Ananga 'aḏi tobe maḏi di'a disa waro ngoloto ma ngido. Ma nyonyata ngi'i gena-ge ma ngido sa'i metere nyagi rata. Palisi'i i'a ti'ara ua, ananga dadunu ya tuga re ya sanga metere nyagi ro'ange. 29Sababu gena-ge, ananga 'aḏi mojongo awa-awa kapala gena-ge 'i tirini toma maḏi. Dadi ananga ya siguci tapu ngai rata toma kapala ma lasere re 'aḏi nganono nga'unu gari'a capati ḇiḇini. 30Mada'a kapala ma dotomo saḏi wiḏi. Dadi ananga 'aḏi siguci sekuci toma kapala 'aḏi masigo-gogoro ma tero sa'olo siguci kapala ma tapu. 31Dadi 'a Paulus 'o kanau i'a ra ma sordado ma sae'e re sordado-sordado toma kapala gena-ge, “Na'o kapala ma dotomo 'aḏi wiḏi sisoi'i tala kapala nena-ne, ngini ni sanga salamata ua.” 32Sababu gena-ge, sordado-sordado ya tola'a sekuci ma gumi, singadolo enanga 'i rarini.
33Ma ḇiḇini nyota-nyotara, Paulus sigaro'o jobilaha ananga 'aḏi oromo re 'o kanau, “Ma di'ara wangere nyagi moi re rata ḏua, ngini pa'i ni mamojongo-mojongo re ni masioromo mai ua. 34Sababu gena-ge, ngoi to golo'o ni oromo ceka'a i'a si, la ni lamahana awa. Sababu ngini mo-moini ni sanga salamata, kama kuranga ua.” 35Paulus 'o kanau togumu i'a, 'o 'oro roti re 'o sibere ie murasa ma la ra Ma Jou'ongu Madutu ra ananga mo-moini manga biono. Ḏua 'a sibalangu, kara unanga 'a oromo. 36Ḏua ananga mo-moini manga 'akala re sinyingara 'i te'e moju re 'aḏi oromo ḏi'i. 37Ananga mo-moini toma kapala gena-ge nga latu ḏiḏi re nga nyagi tumudingi re nga ḏurama. 38Ananga 'aḏi oromo singadolo wunusu. Togumu i'a, kapala ma gina gandum ananga ya upa'a toma ngoloto di'a sikare kapala.
Kapala 'i tirini
39Wakutu da-daini i'a, kapala ma dotomo 'aḏi oḏi'i tana'a du-dudungu mada'a ya waro ma lomanga ua. Mada'a ananga 'aḏi oḏi'i otolo rimoi rema dongi. Dadi ananga 'aḏi mau ya disa waro na'o nyengara ya sisabi isa manga kapala gena-ge. 40Ḏua ananga ya tola'a tapu-tapu ma gumi, ya sieanga ma tapu 'i jala. So'o gena ḏi'i, ya pasala 'o nyanyasele ma gumi. Gena ḏua, ananga ya sibere manga sidete toma kapala ma remanga, la na'o karawiana ya wusu kapala gena-ge 'i isa toma dongi. 41Mada'a kapala gena-ge ma remanga 'i tirini toma ngi'i dongi re ri ogoro i'a, kara ma lasere 'i perego momoku ya wa'ala.
42Sordado-sordado toma kapala ma dara 'aḏi matai mojongo, awa-awa ngowa'a bui 'aḏi tobongo sisa du-dudungu. Dadi jobilaha wa'u sisengene simoini. 43Mada'a sordado ma sae'e ya'u ḇangata sababu unanga 'o mau sisalamata 'a Paulus. Unanga 'o soma'a ananga mo-moini ga'a nga'unu tobongo 'aḏi maḏupaka re 'aḏi tobongo sisa dongi. 44Mamuni'a waro tobongo ua 'aḏi macako'o toma papanga-papanga di'a manga ri-riono sisa dina du-dudungu, re ngo'omo gena-ge ngomi mi salamata mo-moini ngadolo du-dudungu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
2015 © Indonesian Bible Society