Ucu̱xẽgüchiga 3
3
Ucu̱xẽgü i cua̱x tüxna ãxü̃
1Pa Chaunex ¡taxṹ i nüxü̃ icuyarüngümaxü̃ i chorü ucu̱xẽgü i cumaxã nüxü̃ chixuxü̃! ¡Rü mea cugüãẽgu namaxã nanguxü̃ i ñaa chorü ucu̱xẽgü!
2Ngẽmaãcü tá nama̱x i curü maxü̃ rü aixcüma tá cutaãxẽ.
3¡Taxṹ i nüxü̃ curüxoxü̃ nax Tupanaxü̃ cungechaxü̃xü̃ rü quixaixcümaxü̃! ¡Rü nagu namaxü̃ i ngẽma nacümagü, rü guxü̃guma cugüãẽwa nagu rüxĩnü ñoma wüxi i nachagü i yigünaawa inga̱xcuchixü̃rüxü̃!
4Rü ngẽxguma ya Tupana rü tá cuxü̃ narüngü̃xẽxẽ rü cumaxã nataãxẽ, rü ngẽxgumarüxü̃ ta i duü̃xü̃gü rü tá cumaxã nataãẽgü.
5¡Guxü̃ne ya curü maxü̃nemaxã nüxna rüyoe ya Cori ya Tupana, rü taxṹ i nüxna curüyoexü̃ i curü cua̱x!
6¡Guxü̃ma i ta̱xacü icuxüxü̃wa rü Tupaname̱xẽgu naxǘ, rü nüma rü tá cumaxã inacua̱x rü mea tá cuxü̃́ ínanguxuchi i ngẽma cuxüxü̃!
7¡Rü taxṹ i cugü nüxü̃ ícurücuáã̱xü̃xü̃! ¡Rü narümemae nixĩ nax Tupanaga cuxĩnüxü̃ rü nüxna quixũgachixü̃ i ngẽma chixexü̃!
8Ngẽma nixĩ i üxüxü̃ i aixcüma mexü̃ nax cuporaxü̃ca̱x.
9¡Rü curü ngẽmaxü̃gümaxã Tupanaxü̃ icua̱xüxü̃, rü nüxna naxã i ngẽma nüxíraxü̃xü̃ i curü nanetügüarü o!
10Ngẽxguma ngẽmaãcü cunaxü̱xgu rü tá nimu i curü nanetügüarü o nax ngẽmaãcü mea yaxããcuxü̃ca̱x i curü naxpataü̃gü rü mea napagüxü̃ca̱x i curü bínupáxü̃gü.
11Pa Chaunex ¡taxṹ i nüxü̃ cuxoxü̃ i ngẽxguma Cori ya Tupana cuxü̃ iyarüwe̱xãchixẽẽgu! ¡Rü ngẽxguma cuxü̃ naxucu̱xẽgu, rü taxṹ i cunuxü̃!
12Erü nüma ya Cori ya Tupana rü tüxü̃ naxuxcu̱xẽ ya yíxema tüxü̃ nangechaxü̃xẽ ñoma wüxi i papa nane ya nüxü̃ nangechaü̃cüxü̃ naxucu̱xẽxü̃rüxü̃.
13-14Tataãxẽ ya yíxema tümaãẽxü̃ cuáxe rü nüxü̃ iyanga̱u̱xe i cua̱x, erü ngẽma cua̱x rü diẽruarü yexera, rü úiruarü yexera mexü̃ tüxna naxã.
15Rü ngẽma cua̱x rü ngã̱xãẽruxü̃ i nutaxacügüarü yexera narümemae, rü taxuacüma ñoma i naanearü mexü̃gu tanangu i ngẽma cua̱x.
16Ngẽma cua̱x rü norü tügüneme̱xẽmaxã tüxna nanaxuaxü̃ i maxü̃ i máxü̃, rü norü to̱xowemaxã tüxna nanaxuaxü̃ i ngẽmaxü̃gü rü cua̱xüxü̃gü.
17Ngẽxguma nagu imaxẽgu i ngẽma cua̱x rü tataãẽgü, rü ngẽxguma nacümagu ixĩxgu rü taãẽgu tamaxẽ.
18Ngẽma cua̱x rü tüxna nanaxã i maxü̃ ya yíxema nayaxúxe, rü tataãxẽ ya yíxema nüxü̃ cuáxe nax nagu tixũxü̃ i ngẽma cua̱x.
19Nüma ya Cori ya Tupana rü norü cua̱xmaxã nanaxü ga daxũguxü̃ i naane rü ñoma i naane.
20Rü norü cua̱xmaxã Tupana nanango̱xẽxẽ ga már, rü ñu̱xũchi caixanexü̃gu nayayauxye. Rü yema caixanexü̃wa nanayixẽxẽ ga cherena.
21Pa Chaunex ¡mea cugüãẽgu namaxã nanguxü̃ i ñaa ucu̱xẽgü, rü taxṹ i nüxü̃ curüngü̃maxü̃ nax nagu cumaxü̃xü̃!
22Erü ñaa ucu̱xẽgü rü maxü̃ tá cuxna naxã, rü ñoma wüxi i cuchagürüxü̃ curü nga̱xãẽruxü̃ tá nixĩ.
23Ngẽxguma mea naga cuxĩnügu i ngẽma ucu̱xẽgü rü taxuca̱xtama cumuü̃, rü tagutáma ta̱xacügu quipucutü.
24Ngẽxguma icurüngüxgu rü taxuca̱xma tü̱xcüü̃ cumuü̃ rü ngẽxguma icucaxgu rü mea tá cupe.
25Taxũtáma naxca̱x cumuü̃ i ngẽma ãũcümaxü̃gü i ngürüãchimare ínguxü̃ rü ngẽma chixexü̃ i naxca̱x ínguxü̃ i ngẽma duü̃xü̃gü i chixexü̃gu maxẽxü̃.
26Erü nüma ya Cori ya Tupana rü guxü̃gutáma cuxü̃tawa nangẽxma nax taxuca̱xma cumuü̃xü̃ca̱x, rü tá cuxna nadau nax tama ngürüãchi ta̱xacürü chixexü̃gu cunguxü̃ca̱x.
27Ngẽxguma texé curü ngü̃xẽẽca̱x ícaxgu, rü tama name i tüxna cunachu̱xu ega cuxü̃́ nangẽxmagu i ngẽma naxca̱x ítaca̱xaxü̃.
28Tama name i moxü̃ca̱x ícunaxǘxüchi i ngẽma ngü̃xẽxẽ i ñu̱xma cuxü̃́ tauxchaxü̃ nax cunaxãxü̃.
29Rü tama name i nagu curüxĩnü i ta̱xacürü chixexü̃ tümaca̱x cuxü ya yíxema cuxna rüyoexe.
30¡Taxṹ i texémaxã nuca̱x cudauxü̃ ega taxúema chixexü̃ cuxca̱x üxgu!
31¡Rü taxṹ i cuxü̃́ nangúchaü̃xü̃ i nacüma i ngẽma yatü i máxwa̱xexü̃ rü taxṹ i nüxü̃ cuyadauxü̃xü̃!
32Erü nüma ya Cori ya Tupana rü nüxü̃ naxo i ngẽma chixexü̃gu maxẽxü̃, natürü tümamaxã naxãmücü ya yíxema mexü̃gu maxẽxe.
33Nüma ya Cori ya Tupana rü chixexü̃ namaxã naxuegu i napatacüã̱x i ngẽma chixexü̃ i duü̃xü̃, natürü mexü̃ tümapatacüã̱xmaxã naxuegu ya yíxema nape̱xewa mexü̃ üxe.
34Rü nüma ya Cori rü nüxü̃ nacugü i ngẽma dauxcüraxü̃wa̱xegüxü̃, natürü tümamaxã namecüma ya yíxema tama tügü icua̱xüü̃güxe.
35Erü nüma ya Tupana rü tümamaxã nataãxẽ ya yíxema tümaãẽxü̃ cua̱xgüxe, natürü nüxü̃ naxo i ngẽma tama naãẽxü̃ cua̱xgüxü̃.
Currently Selected:
Ucu̱xẽgüchiga 3: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.