Iraétanüxü̃arü muxchiga 28
28
Ãmaregü i wüxichigü i ngunexü̃gu ixãxü̃
(Éx. 29.38-46)
1Rü nüma ga Cori ya Tupana rü Moichémaxã nidexa rü nüxü̃ ñanagürü:
2—¡Iraétanüxü̃maxã nüxü̃ ixu rü ngẽxguma nawa nanguxgu i ngẽma petagü i pemaxã nüxü̃ chixuxü̃ rü chanaxwa̱xe i guxü̃guma choxna nanaxãgü i paũ rü ãmaregü i cha̱u̱xca̱x ínaguxü̃! Rü ngẽma naema rü choma rü tá namaxã chataãxẽ.
3¡Rü ñu̱xũchi namaxã nüxü̃ ixu i ta̱xacü tá nixĩ i ãmaregü i wüxichigü i ngunexü̃gu choxna naxãgüxü̃! Rü tá cha̱u̱xca̱x nanadai rü ínanagu i taxre i carnérugü i taxuwama chixexü̃ i wüxi ya taunecü nüxü̃́ ngẽxmaxü̃.
4Rü wüxi tá nixĩ i pa̱xmama yagugüxü̃ rü ngéma to tá nixĩ i yáuanecü yagugüxü̃.
5Rü wüxigu ngẽma carnérugümaxã rü tá choxna penaxã i taxre i quíru i arína i mexẽchixü̃ i wüxi i litru i oribuarü chíxü̃maxã ñumüxü̃ —ñanagürü ga Tupana.
6Rü yema nixĩ ga ãmaregü ga guxü̃ma ga ngunexü̃gu Chinaíarü̃ ma̱xpǘnewa yagugüxü̃ nax naemamaxã nataãẽxü̃ca̱x ga Cori ya Tupana.
7Rü ñanagürü ga Tupana: —Wüxichigü i carnéru rü wüxi ya litru ya bínu tá nagu yabagüchigüãcüma nayagugü. Rü yimá bínu rü chanaxwa̱xe nax chopatawa chopexegu nanabagü nax namaxã chataãẽxü̃ca̱x.
8Rü ngẽma norü taxre i carnéru i yáuanecü tá yagugüxü̃, rü ngẽma carnéru i pa̱xmama yagugüxü̃rüxü̃ tátama arínamaxã, rü bínumaxã nayagugü. Rü ngẽma ãmare i cha̱u̱xca̱x yagugüxü̃, rü naema rü Chauãẽgu tá nayatãũxü̃.
Ãmaregü i wüxichigü i Ngü̃chigaarü ngunexü̃gü ixãgüxü̃
9Rü wüxichigü i ngü̃chigaarü ngunexü̃gu rü tá cha̱u̱xca̱x penadai rü peyagu i taxre i carnérugü i taxuwama chixexü̃ i wüxi ya taunecü nüxü̃́ ngẽxmaxü̃. Rü wüxichigü i ngẽma carnérugü rü bínumaxã rü 4 quíru i arína i mexẽchixü̃ i chíxü̃maxã ñumüxü̃maxã tá choxna penaxã.
10Rü ngẽma ãmare i wüxichigü i ngunexü̃ choxna pexaxü̃ rü ngẽmaétü rü wüxichigü i ngü̃xchigaarü ngunexü̃gu tá ãmare cha̱u̱xca̱x piguxü̃, rü bínumaxã tá choxna penaxã.
Ãmaregü i wüxichigü ya tauemacügu ixãgüxü̃
11Rü ngexwacaxü̃cü ya tauemacü nagu ngóxü̃ i ngunexü̃gu rü Cori ya Tupanaca̱x tá penadai rü peyagu i taxre i wocaxacügü i iyatüxü̃ rü wüxi i carnéru i yatüxü̃ rü 7 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama chixexü̃.
12-13Rü wüxichigü i wocaxacü i yatüxü̃maxã tá peyagu i 6 quíru i arína i mexẽchixü̃ i chíxü̃maxã ñumüxü̃. Rü wüxichigü i carnéru i yatüxü̃maxã tá peyagu i 4 quíru i arína i chíxü̃maxã ñumüxü̃. Rü wüxichigü i carnéruxacü i yatüxü̃maxã tá peyagu i taxre quíru i arína i chíxü̃maxã ñumüxü̃. Rü ngẽma ãmare i cha̱u̱xca̱x ípeguxü̃ rü chauãẽgu tá nayatãũxü̃ i ngẽma naema.
14Rü wüxichigü i wocaxacügu tá penaba i taxre ya litru ya bínu. Rü wüxichigü i carnérugu tá penaba i wüxi ya litruarü ngãxü̃ ya bínu. Rü wüxichigü i carnéruxacügu tá penaba i wüxi ya litru ya bínu. Rü ngẽma tá nixĩ i ãmare i guxcüma ya taunecüarü tauemacügügu ipexãgüxü̃.
15Rü ñu̱xũchi ngẽma ãmaregü i wüxichigü i ngunexü̃gügu ipexãgüxü̃ rü naétü chanaxwa̱xe nax cha̱u̱xca̱x peyamáxü̃ i wüxi i chíbu nax ngẽmaãcü penaxütanüxü̃ca̱x i ngẽma perü chixexü̃. Rü ngẽma chíbu rü bínumaxã tá peyagu.
Ãmaregü i Üpetüchigaarü petagu ixãgüxü̃
(Lv. 23.5-8)
16Rü wüxichigü ya taunecüarü nüxíraü̃cü ya tauemacüarü 14 gu rü tá chauégagu penaxüchiga i ngẽma Üpetüchiga.
17Rü moxü̃ãcütama i 15 gu rü chauégagu tá penaxüchiga i ngẽma Üpetüarü peta. Rü 7 i ngunexü̃ tá nixĩ i penangṍxü̃ i paũ i ngearü pu̱xẽẽruü̃ã́xü̃.
18Rü ngẽma ngunexü̃ i nagu penaxügüxü̃ i ngẽma peta rü tá cha̱u̱xca̱x pengutaque̱xegü. ¡Rü ngẽma ngunexü̃ rü taxuxü̃táma i puracü pexüe!
19Rü ngẽma ngunexü̃ i nagu penaxügüxü̃ i ngẽma peta rü Cori ya Tupanaca̱x tá penadai rü peyagu i taxre i wocaxacügü rü wüxi i carnéru rü 7 i carnéruxacügü i wüxi ya taunecü nüxü̃́ ngẽxmagüxü̃ i taxuwama chixexü̃.
20-21Rü wüxichigü i wocaxacü rü 6 quíru i arína i mexẽchixü̃ i chíxü̃maxã ñumüxü̃maxã tá peyagu. Rü wüxichigü i carnéru rü 4 quíru i arína i chíxü̃maxã ñumüxü̃maxã tá peyagu. Rü wüxichigü i carnéruxacü rü taxre quíru i arína i chíxü̃maxã ñumüxü̃maxã tá peyagu.
22Rü ñu̱xũchi cha̱u̱xca̱x tá peyama̱x rü peyagu i wüxi i chíbu nax ngẽmaãcü pexü̃́ nüxü̃ charüngümaxü̃ca̱x i perü chixexü̃gü.
23Rü ngẽma ãmaregü tá nixĩ i ípeguxü̃ naétü i ngẽma ãmaregü i guxü̃ i ngunexü̃arü pa̱xmama cha̱u̱xca̱x ípeguxü̃.
24Rü ngẽma 7 i ngunexü̃ i nagu penaxüchigaxü̃ i ngẽma peta rü ngẽmaãcü tá penaxü i wüxichigü i ngẽma ngunexü̃gügu. Rü ngẽma tá nixĩ i ãmare i chauégagu ípeguxü̃, rü ngẽma naema rü tá chauãẽgu nayatãũxü̃. Rü ngẽma ãmaregü rü norü bínumaxãchigü tá choxna penaxã. Rü ngẽma tá nixĩ i ãmaregü i choxna pexãxü̃ naétü i ngẽma ãmaregü i guxü̃ i ngunexü̃gu cha̱u̱xca̱x ípeguxü̃.
25Rü ngẽma petaarü 7 i ngunexü̃gu rü tá cha̱u̱xca̱x pengutaque̱xegü. ¡Rü ngẽma ngunexü̃gu rü taxuxü̃táma ta̱xacürü puracü pexüe!
Nüxíraxü̃xü̃ i nanetügüarü ochiga
(Lv. 23.9-22)
26Rü ngẽxguma penaxüchigagu i nüxíraxü̃xü̃ i penetüarü o rü tá Cori ya Tupanana penaxã i ngẽma nüxíraxü̃xü̃ i perü tríguarü ogü. Rü ngẽma peta i Yüxügüarü Petagu ãégaxü̃gu tá cha̱u̱xca̱x pengutaque̱xegü. ¡Rü ngẽma ngunexü̃gu rü taxuxü̃táma ta̱xacürü puracü pexüe!
27Rü ngẽma ngunexü̃ i nagu penaxügüxü̃ i ngẽma peta rü Cori ya Tupanaca̱x tá ípenagu i taxre i wocaxacügü i iyatüxü̃, rü wüxi i carnéru i yatüxü̃, rü 7 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃. Rü ngẽma ãmare i ípiguxü̃ rü chauãẽgu tá nayatãũxü̃ i ngẽma naema. Rü choma rü tá ngẽma naemamaxã chataãxẽ.
28-29Rü wüxichigü i wocaxacümaxã tá peyagu i 6 quíru i arína i mexẽchixü̃ i chíxü̃maxã ñumüxü̃. Rü wüxichigü i carnérumaxã tá peyagu i 4 quíru i arína i chíxü̃maxã ñumüxü̃. Rü wüxichigü i carnéruxacümaxã tá peyagu i taxre quíru i arína i chíxü̃maxã ñumüxü̃.
30Rü ñu̱xũchi cha̱u̱xca̱x tá peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃gü.
31Rü guxü̃ma i ngẽma ãmaregü i cha̱u̱xca̱x ípeguxü̃ rü norü arínamaxã rü norü bínumaxã tá choxna penaxã. Rü ngẽma tá nixĩ i ãmaregü i choxna pexãxü̃ naétü i ngẽma ãmaregü i guxü̃ i ngunexü̃gu cha̱u̱xca̱x ípeguxü̃. Rü ngẽma naeü̃gü i choxna pexãgüxü̃ rü nanaxwa̱xe nax taxuwama nachixexü̃.
Currently Selected:
Iraétanüxü̃arü muxchiga 28: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
