Iraétanüxü̃arü muxchiga 26
26
Wena nügü nixugü ga Iraétanüxü̃
1Rü nawena ga yema da̱xaweane ga nawa nayuexü̃ ga duü̃xü̃gü rü nüma ga Cori ya Tupana rü Moichémaxã rü chacherdóte ga Aróü̃ nane ga Ereachámaxã nidexa, rü ñanagürü:
2—Nügütanüxü̃chigü peyaxugü i guxü̃ma i Iraétanüxü̃ i 20 ya taunecü rüe̱xna yexera nüxü̃́ ngẽxmagüxü̃ i marü mexü̃ nax daiwa naxĩxü̃ —ñanagürü.
3Rü Moiché rü chacherdóte ga Ereachá rü Moáanewa ga natü ga Yudáü̃arü ngaicamana ga ĩane ga Yericúarü to̱xma̱xtawa meama nayanu ga yema Iraétanüxü̃.
4Rü yemaacü ga Iraétanüxü̃ rü yema Cori ya Tupana Moichémaxã nüxü̃ ixuxü̃ãcü poperagu nanaxümatüéga ga guxü̃ma ga yatügü ga 20 ga taunecü rüe̱xna yexera nüxü̃́ yexmagüxü̃. Rü yemagü nixĩ ga yema Iraétanüxü̃ ga Equítuanewa íchoxü̃xü̃.
5-6Rü yema Acóbu nane ga yacü ga Rubéü̃ nanegü nixĩ ga Enóx, rü Farú, rü Eróü̃ rü Camí. Rü yema nanetanüxü̃ nixĩ ga ixugüxü̃.
7Rü yexguma yaxugügüãgu ga Rubéü̃tanüxü̃ rü 43,730 ga yatügü nixĩgü.
8Rü Farú nane nixĩ ga Eriá.
9Rü Eriá nanegü nixĩ ga Nemué, rü Datáü̃ rü Abiráü̃. Rü Datáü̃ rü Abiráü̃ nixĩ ga Corémücügü ga yexguma Cori ya Tupanamaxã rü Moichémaxã rü Aróü̃maxã nanuegu.
10Rü yemaca̱x ga waixü̃müane rü ninge̱x, rü yemagu nayicu ga yema taxre wüxigu Corémaxã. Rü yema íyaxügüxü̃ ga 250 ga Corémücügü rü üxüemagu nixae. Rü yema ngupetüxü̃ rü wüxi ga cua̱xruxü̃ nixĩ naxca̱x ga yema togü ga Iraétanüxü̃.
11Natürü ga Coré nanegü rü tama nayue.
12-13Rü yema Chimeóü̃ nanegü rü Nemué, rü Yamíü̃, rü Yaquíü̃, rü Chéra rü Chaú nixĩgü. Rü yema nataagü nixĩ ga Nemuétanüxü̃, rü Yamíü̃tanüxü̃, rü Yaquíü̃tanüxü̃, rü Chératanüxü̃, rü Chaútanüxü̃.
14Rü yexguma yaxugügüãgu ga yema Chimeóü̃tanü̃xü̃ rü 22,200 ga yatügü nixĩ.
15-17Rü yema Gáx nanegü nixĩ ga Chefóü̃, rü Aguí, rü Chuní, rü Oní, rü Erí, rü Aróx rü Arelí. Rü yema nataagü nixĩ ga Chefóü̃tanüxü̃, rü Aguítanüxü̃, rü Chunítanüxü̃, rü Onítanüxü̃, rü Erítanüxü̃, rü Aróxtanüxü̃, rü Arelítanüxü̃.
18Rü yexguma yaxugügüãgu ga yema Gáxtanüxü̃ rü 40,500 ga yatügü nixĩgü.
19-20Rü yema Yudá nanegü ga Canaáü̃anegu yuexü̃ rü Éx rü Onáü̃ nixĩ. Rü yema togü ga Yudá nanegü rü Cherá, rü Fáre rü Chéra nixĩ. Rü yema nataagü ga Yudá nixĩ ga Cherátanüxü̃, rü Fáretanüxü̃, rü Chératanüxü̃.
21Rü yema Fáre nanegü rü Eróü̃ rü Amúx nixĩgü. Rü yema nataagü ga Fáre rü Eróü̃tanüxü̃ rü Amúxtanüxü̃ nixĩgü.
22Rü yexguma yaxugügüãgu ga yema Yudátanüxü̃ rü 76,500 ga yatügü nixĩgü.
23-24Rü yema Ichacá nanegü nixĩ ga Torá, rü Pubá, rü Yachúx, rü Chimróü̃. Rü yema nataagü ga Ichacá rü Torátanüxü̃, rü Pubátanüxü̃, rü Yachúxtanüxü̃, rü Chimróü̃tanüxü̃ nixĩgü.
25Rü yexguma yaxugügüãgu ga yema Ichacátanü̃xü̃ rü 64,300 ga yatügü nixĩ.
26Rü yema Chaburóü̃ nanegü nixĩ ga Chérex, rü Eróü̃ rü Yareé. Rü yema nataagü ga Chaburóü̃ rü Chérextanüxü̃, rü Eróü̃tanüxü̃, rü Yareétanüxü̃ nixĩgü.
27Rü yexguma yaxugügüãgu ga yema Chaburóü̃tanüxü̃ rü 60,500 ga yatügü nixĩ.
28Rü yema Yúche nanegü nixĩ ga Manaché, rü Efraíü̃. Rü yema Yúche nanegüwa nixĩ ga nangóexü̃ ga Manachétanüxü̃ rü Efraíü̃tanüxü̃.
29Rü Manaché nane ga Maquíwa nixĩ ga nangóexü̃ ga Maquítanüxü̃. Rü Maquí nane ga Garaáxwa nixĩ ga nangóexü̃ ga Garaáxtanüxü̃.
30-32Rü Garaáx nanegü nixĩ ga Yéche, rü Élex, rü Arié, rü Chiquéü̃, rü Chemidá rü Éfe. Rü Yéchewa nangóe ga Yéchetanüxü̃. Rü Élexwa nangóe ga Élextanüxü̃. Rü Ariéwa nangóe ga Ariétanüxü̃. Rü Chiquéü̃wa nangóe ga Chiquéü̃tanüxü̃. Rü Chemidáwa nangóe ga Chemidátanüxü̃. Rü Éfewa nangóe ga Éfetanüxü̃.
33Rü Éfe nane nixĩ ga Cherofáx. Rü Cherofáx rü nataxuma ga nane, rü naxacügü ga ngexü̃güxicatama nüxü̃́ iyexma. Rü ngĩmagü iyixĩ ga Maará, rü Noá, rü Oxlá, rü Milcá rü Tirchá.
34Rü yexguma yaxugügüãgu ga Manachétanüxü̃ rü 52,700 ga yatügü nixĩgü.
35Rü yema Efraíü̃ nanegü nixĩ ga Chutéra, rü Béque, rü Taáü̃. Rü Chutérawa nangóe ga Chutératanüxü̃. Rü Béquewa nangóe ga Béquetanüxü̃, rü Taáü̃wa nangóe ga Taáü̃tanüxü̃.
36Rü Chutéra nane ga Eráü̃wa nangóe ga Eráü̃tanüxü̃.
37Rü yexguma yaxugügüãgu ga Efraíü̃tanüxü̃ rü 32,500 ga yatügü nixĩgü. Rü yema nixĩ ga Yúchetanüxü̃chigü.
38-39Rü yema Bẽyamíü̃ nanegü nixĩ ga Béra, rü Abéx, rü Ayiráü̃, rü Chufáü̃, rü Yufáü̃.
40Rü Béra nanegü nixĩ ga Ár rü Naamáü̃. Rü Árwa nangóe ga Ártanüxü̃. Rü Naamáü̃wa nangóe ga Naamáü̃tanüxü̃.
41Rü yexguma yaxugügüãgu ga Bẽyamíü̃tanüxü̃ rü 45,600 ga yatügü nixĩgü.
42Rü Dáü̃ nane nixĩ ga Chuáü̃. Rü Chuáü̃wa nangóe ga Chuáü̃tanüxü̃. Rü yexicatama nixĩ ga Dáü̃tanüxü̃.
43Rü yexguma yaxugügüãgu ga Chuáü̃tanüxü̃ rü 64,400 ga yatügü nixĩ.
44Rü yema Aché nanegü rü Iná, rü Ichuí, rü Beriágu nixĩgü. Rü Ináwa nangóe ga Inátanüxü̃, rü Ichuíwa nangóe ga Ichuítanüxü̃, rü Beriáwa nangóe ga Beriátanüxü̃.
45Rü yema Beriágu nanegü rü Ébe rü Maquié nixĩgü. Rü Ébewa nangóe ga Ébetanüxü̃, rü Maquiéxwa nangóe ga Maquiétanüxü̃.
46Rü Aché nüxü̃́ iyema ga wüxi ga naxacü, rü Chéra nixĩ ga ngĩéga.
47Rü yexguma yaxugügüãgu ga Achétanüxü̃ rü 53,400 ga yatügü nixĩ.
48-49Rü yema Netarí nanegü rü Yacheé, rü Guní, rü Yéche, rü Chiléü̃ nixĩgü. Rü Yacheéwa nangóe ga Yacheétanüxü̃, rü Guníwa nangóe ga Gunítanüxü̃, rü Yéchewa nangóe ga Yéchetanüxü̃, rü Chiléü̃wa nangóe ga Chiléü̃tanüxü̃.
50Rü yexguma yaxugügüãgu ga Netarítanüxü̃ rü 45,400 ga yatügü nixĩ.
51Rü yexguma yaxugüãgu ga yema Iraétanüxü̃ rü guxü̃wama 601,730 ga yatügü nixĩ.
Mugü naxca̱x nax ñuxãcü tá nügü yanuaxü̃ ga naane
52Rü Cori ya Tupana rü Moichémaxã nidexa rü ñanagürü:
53—¡Ñu̱xma rü nüxü̃ yanu i naane nüxü̃ i ngẽma natücumüchigü i duü̃xü̃gü i marü poperagu iwǘgüxü̃!
54Rü ngẽma natücumügü i rümumaexü̃ rü tá nüxna cunaxã i ngẽma naane i rütamaegüxü̃. Rü ngẽma natücumügü i rünoxremaegüxü̃ rü tá nüxna cunaxã i ngẽma naane i rüxíxramaegüxü̃. Rü nae̱xpü̱x i norü mu i poperagu cuxümatüxü̃ i wüxitücumüchigü, rü ngẽxgumaepü̱x tá nixĩ i nüxna cunaxãxü̃ i norü naane.
55Rü sortéuãcü tá nixĩ i nüxü̃ cuyanuxü̃ i ngẽma naane. Rü ngẽma naane i nagu yanguchigüxü̃ i wüxichigü i natücumü, rü ngẽma tá nixĩ i nüxna cuxãxü̃. Rü ngẽma naane i wüxichigü i natücumü nagu nanguxü̃ rü ngẽmawa rü wüxichigü i natanüxü̃ tá nanayaxu i norü naane.
56Rü ngẽxguma cuyanuxgu i ngẽma naane, rü woo i natücumü i taxü̃ rü natücumü i íxraxü̃ rü tá sortéuãcü nanayauxgü i norü naane —ñanagürü.
Nixugü ga Lebítanüxü̃
57Rü yema Lebítanüxü̃ ga yaxugügüxü̃ nixĩ ga Guerchóü̃tanüxü̃, rü Queáxtanüxü̃ rü Merarítanüxü̃.
58Rü togü ga Lebítanüxü̃ nixĩ ga yema Lixnítanüxü̃, rü Ebróü̃tanüxü̃, rü Máritanüxü̃, rü Muchítanüxü̃, rü Corétanüxü̃. Rü guxü̃ma ga yemagü rü Lebítanüxü̃ nixĩgü. Rü Queáx rü Amráü̃ nanatü nixĩ.
59Rü Amráü̃ rü Lebítanüxü̃xacü ga Yocabémaxã naxãxma̱x. Rü ngĩma ga Yocabé rü Equítuanegu ibu ga yexguma nüma ga Lebí Equítuanewa yexmagu. Rü Amráü̃ nixĩ ga nanatü ga Aróü̃, rü Moiché rü María. Rü Yocabé iyixĩ ga naé.
60Rü Aróü̃ nanegü nixĩ ga Nadáx, rü Abiú, rü Ereachá rü Itamá.
61Natürü ga Nadáx rü Abiú rü nayue ga yexguma Cori ya Tupanape̱xewa yagugüãgu i pumarate̱xe i tama Tupanaca̱x mexü̃.
62Rü yexguma yaxugüãgu ga guxü̃ma ga yatügü ga Lebítanüxü̃ ga wüxi ga tauemacü rüe̱xna yexera nüxü̃́ yexmagüxü̃ rü 23,000 nixĩ ga norü mu. Rü yemagü rü tama togü ga Iraétanüxü̃rüxü̃ iwǘgüéga, yerü taxuxü̃ma ga norü naane nüxna naxãgü.
63Rü yema nixĩ ga norü mu ga guxü̃ma ga yema Iraétanüxü̃ ga yexguma Moiché rü chacherdóte ga Ereachá yaxugügu ga duü̃xü̃gü ga Moáarü doxanexü̃wa ga natü ga Yudáü̃cutüwa ga Yericúarü to̱xma̱xtawa.
64Rü yema duü̃xü̃gütanüwa rü nataxuma ga bai ga wüxi ga yema Iraétanüxü̃ ga Moiché rü Aróü̃ íxugügüxü̃ ga yexguma Chinaíarü chianexü̃wa nayexmagügu.
65Yerü Cori ya Tupana rü nanaxuegu nax guxü̃táma ga yema duü̃xü̃gü rü tá yema chianexü̃gu nayuexü̃. Rü yema Caréx ga Yeponé nane, rü Yochué ga Núü̃ nanexicatama nixĩ ga íyaxüxü̃, rü nataxuma ga wüxi ga to ga íyaxüxü̃.
Currently Selected:
Iraétanüxü̃arü muxchiga 26: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
