Iraétanüxü̃arü muxchiga 2
2
Mea nügü ininu ga Iraétanüxü̃ ga ínapegüxü̃wa
1Rü nüma ga Cori ya Tupana rü Moichéxü̃ rü Aróü̃xü̃ ñanagürü:
2—Rü ngẽma Iraétanüxü̃ rü nanaxwa̱xe nax chopataarü yáxü̃guxüra nügü yanuxü̃. Rü wüxichigü i natücumü rü tá nüxü̃́ nangẽxma i norü wonera, rü wüxichigü ya ĩpatacüã̱x rü tá nüxü̃́ nangẽxma i norü cua̱xruxü̃.
3-4Rü chopataarü éstewaama tá nangẽxmagü i ngẽma churaragü i Yudátanüxü̃arü woneratüxü̃wa ngẽxmagüxü̃. Rü ngẽma Yudátanüxü̃arü churaragü rü 74,600 nixĩ i norü mu. Rü ngẽma namaxã icuáxü̃ rü Nachóü̃ i Aminadá nane nixĩ.
5-6Rü ngẽma Yudátanüxü̃cüwawa tá nangẽxmagü i Ichacátanüxü̃arü churaragü. Rü 54,400 nixĩ i norü mu. Rü ngẽma namaxã icuáxü̃ rü Natanaé i Chuá nane nixĩ.
7-8Rü ngẽxgumarüxü̃ ta Yudátanüxü̃cüwawa tá nangẽxmagü i Chaburóü̃tanüxü̃arü churaragü. Rü 57,400 nixĩ i norü mu. Rü ngẽma namaxã icuáxü̃ rü Eriá i Eróü̃ nane nixĩ.
9Rü ngẽmaãcü i ngẽma tomaepü̱xtücumü i churaragü i Yudáarü woneratüxü̃wa ngẽxmagüxü̃, rü 186,400 nixĩ i norü mu. Rü nümagü tá nixĩ i naxüpe̱xegüãxü̃ namaxã i natanüxü̃ i Iraétanüxü̃.
10-11Rü chopataarü súrwaama tá nangẽxmagü i ngẽma churaragü i Rubéü̃tanüxü̃arü woneratüxü̃wa ngẽxmagüxü̃. Rü ngẽma Rubéü̃tanüxü̃arü churaragü rü 46,500 nixĩ i norü mu. Rü ngẽma namaxã icuáxü̃ rü Erichú i Chedeú nane nixĩ.
12-13Rü ngẽma Rubéü̃tanüxü̃cüwawa tá nangẽxmagü i Chimeóü̃tanüxü̃arü churaragü. Rü 59,300 nixĩ i norü mu. Rü ngẽma namaxã icuáxü̃ rü Cherumié i Churichadái nane nixĩ.
14-15Rü ngẽxgumarüxü̃ ta Rubéü̃tanüxü̃cüwawa tá nangẽxmagü i ngẽma Gáxtanüxü̃arü churaragü. Rü ngẽma Gáxtanüxü̃arü churaragü rü 45,650 nixĩ i norü mu. Rü ngẽma namaxã icuáxü̃ rü Ereachá i Reué nane nixĩ.
16Rü ngẽmaãcü i ngẽma tomaepü̱xtücumü i churaragü i Rubéü̃tanüxü̃arü woneratüxü̃wa ngẽxmagüxü̃, rü guxü̃wama rü 151,450 nixĩ i norü mu. Rü nümagü tá nixĩ i ngẽma Yudáarü woneratüxü̃wa ngẽxmagüxü̃ i churaragüweama yaxĩxü̃tanüxü̃.
17Rü Rubéü̃tanüxü̃weama tá nixĩxü̃tanü i ngẽma Lebítanüxü̃ i Tupanapata ingegüxü̃. Rü norü woneramaxãchigü rü Yudátanüxü̃arü churaragüwe tá nixĩxü̃tanü i ngẽma Rubéü̃tanüxü̃arü churaragü.
18-19Rü chopataarü oéstewaama tá nangẽxmagü i ngẽma churaragü i Efraíü̃tanüxü̃arü woneratüxü̃wa ngẽxmagüxü̃. Rü ngẽma Efraíü̃tanüxü̃arü churaragü rü 40,500 nixĩ i norü mu. Rü ngẽma namaxã icuáxü̃ rü Erichamá i Amiúx nane nixĩ.
20-21Rü ngẽma Efraíü̃tanüxü̃cüwawa tá nangẽxmagü i Manachétanüxü̃arü churaragü. Rü ngẽma Manachétanüxü̃arü churaragü rü 32,200 nixĩ i norü mu. Rü ngẽma namaxã icuáxü̃ rü Gamarié i Pedachú nane nixĩ.
22-23Rü ngẽxgumarüxü̃ ta Efraíü̃tanüxü̃cüwawa tá nangẽxmagü i Bẽyamíü̃tanüxü̃. Rü ngẽma Bẽyamíü̃tanüxü̃arü churaragü rü 35,400 nixĩ i norü mu. Rü ngẽma namaxã icuáxü̃ nixĩ i Abidáü̃ i Yedeoní nane.
24Rü ngẽmaãcü i ngẽma tomaepü̱xtücumü i churaragü i Efraíü̃tanüxü̃arü woneratüxü̃wa ngẽxmagüxü̃, rü guxü̃wama rü 108,100 nixĩ i norü mu. Rü nümagü tá nixĩ i norü tomaepü̱xchimüü̃ yaxĩgüxü̃.
25-26Rü chopataarü nórtewaama tá nangẽxmagü i ngẽma churaragü i Dáü̃tanüxü̃arü woneratüxü̃wa ngẽxmagüxü̃. Rü ngẽma Dáü̃tanüxü̃arü churaragü rü 62,700 nixĩ i norü mu. Rü ngẽma namaxã icuáxü̃ rü Aiéche i Amichadái nane nixĩ.
27-28Rü Dáü̃tanüxü̃cüwawa tá nangẽxma i Achétanüxü̃arü churaragü. Rü ngẽma Achétanüxü̃arü churaragü rü 41,500 nixĩ i norü mu. Rü ngẽma namaxã icuáxü̃ rü Paguié i Ocráü̃ nane nixĩ.
29-30Rü ngẽxgumarüxü̃ ta Dáü̃tanüxü̃cüwawa tá nangẽxmagü i Netarítanüxü̃arü churaragü. Rü ngẽma Netarítanüxü̃arü churaragü rü 53,400 nixĩ i norü mu. Rü ngẽma namaxã icuáxü̃ nixĩ i Airá i Enáü̃ nane.
31Rü ngẽmaãcü i ngẽma tomaepü̱xtücumü i churaragü i Dáü̃tanüxü̃arü woneratüxü̃wa ngẽxmagüxü̃, rü guxü̃wama rü 157,600 nixĩ i norü mu. Rü ngẽma churaragü rü ngẽma togütücumüarü wixweama tá nixĩxü̃tanü —ñanagürü ga Tupana.
32Rü yexguma yaxugügu ga Iraétanüxü̃arü churaragü rü guxü̃wama rü 603,550 nixĩ ga norü mu.
33Natürü tama nayaxugü ga yema Lebítanüxü̃, yema Cori ya Tupana Moichémaxã nüxü̃ ixuxü̃rüxü̃.
34Rü nüma ga Iraétanüxü̃ rü nanaxügü ga guxü̃ma ga yema Cori ya Tupana Moichémaxã nüxü̃ ixuxü̃. Rü wüxichigü ga natücumü rü natanüxü̃maxãchigü norü woneratüxü̃gu nixĩxü̃tanü.
Currently Selected:
Iraétanüxü̃arü muxchiga 2: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.