Ore i mexü̃ ga Matéu ümatüxü̃ 12

Ngechuchuarü ngúexü̃gü rü trigu nicauetanü ga ngü̃chigaarü ngunexü̃gu

(Mr. 2.23-28; Lc. 6.1-5)

1Rü wüxi ga ngü̃xchigaarü ngunexü̃gu rü Ngechuchu rü norü ngúexü̃gümaxã trigunecüwa nachopetü. Rü yema norü ngúexü̃gü rü nataiyae, rü yemaca̱x inanaxügüe nax trigu yacãũetanüxü̃ rü yangṍetanüãxü̃.

2Rü yexguma yemaxü̃ nadaugügu ga Parichéugü rü ñanagürügü Ngechuchuxü̃: —Dücax i curü ngúexü̃gü rü chixexü̃ naxügü. Erü ngü̃xchigaarü ngunexü̃gu nanaxügü i ngẽma ngü̃chigaarü ngunexü̃gu chu̱xuxü̃ —ñanagürügü.

3Rü Ngechuchu nanangãxü̃, rü ñanagürü: —¿Taguma ẽ̱xna poperawa nüxü̃ pedau ga yema naxüxü̃ ga ãẽ̱xgacü ga Dabí ga yexguma nataiya̱xgu ga nüma rü namücügü?

4Rü Tupanapatagu naxücu rü nanangõ̱xgü ga yema paũ ga üünexü̃ ga Dabíca̱x rü namücügüca̱x chu̱xuxü̃. Yerü yema paũ rü chacherdótegüca̱xicatama nixĩ.

5Rü pemax, Pa Parichéugüx ¿taguma ẽ̱xna nawa pengúe ga yema ore ga mugüpanegu Moiché ümatüxü̃ ga ñaxü̃: “Tama pecadu naxügü i chacherdótegü i ngẽxguma ngü̃xchigaarü ngunexü̃gu Tupanapata ya taxü̃newa napuracüegu?” ñaxü̃.

6Natürü pemaxã nüxü̃ chixu rü nua petanüwa nangẽxma i wüxi i Tupanapata ya taxü̃nearü yexera ixĩxü̃ i Tupanape̱xewa.

7Natürü pema rü tama nüxü̃ pecua̱x i ñuxũ ñaxü̃chiga nixĩ i ngẽma Tupanaarü ore i ümatüxü̃ i ñaxü̃:

“Choma rü tama chanaxwa̱xe i cha̱u̱xca̱x penadai rü peyagu i carnérugü, natürü ngẽma chanaxwaxexü̃ nixĩ nax duü̃xü̃gü pexü̃́ nangechaü̃tümüxü̃güxü̃”,

ñaxü̃. Rü ngẽxguma chi aixcüma nüxü̃ pecua̱xgu i ngẽma ore, rü taxũchima chixri nachiga pidexagü i ñaa chorü ngúexü̃gü i taxuxü̃ma i chixexü̃ ügüxü̃ i Tupanape̱xewa.

8Rü Tupana Nane ya duü̃xü̃xü̃ ixĩcü, rü aixcüma ngü̃xchigaarü yora nixĩ —ñanagürü ga Ngechuchu.

Wüxi ga yatü ga yumécüchiga

(Mr. 3.1-6; Lc. 6.6-11)

9Rü yexguma yema nachicana yaxũgachigu ga Ngechuchu, rü guma ĩanearü ngutaque̱xepataü̃gu naxücu.

10Rü yéma nayexma ga wüxi ga yatü ga wüxichacüüwa yumécü. Rü nümagü ga Parichéugü rü naxca̱x nadaugü ga ñuxãcü norü ãẽ̱xgacügüxü̃tawa Ngechuchuxü̃ nax ínaxuaxü̃güxü̃. Rü yemaca̱x Ngechuchuna nacagüe, rü ñanagürügü: —¿Namexü̃ yixĩxü̃ nax texé naxca̱x yataanexẽẽxü̃ i wüxi i da̱xawexü̃ i ngü̃xchigaarü ngunexü̃gu? —ñanagürügü.

11Rü Ngechuchu nanangãxü̃, rü ñanagürü: —¿Texé i petanüwa rü ngẽxguma chi ngü̃xchigaarü ngunexü̃gu wüxi i perü carnéru puchugu nguxgu, rü taux ẽ̱xna i ngẽxgumatama ípeyadaugüxü̃ rü ípenatúxuchixü̃ woo ngü̃xchigaarü ngunexü̃ yixĩxgu?

12Natürü Tupanape̱xewa rü wüxi i duü̃xü̃ rü poraãcüxüchima wüxi i carnéruarü yexera nixĩ. Rü ngẽmaca̱x name nixĩ i mexü̃ taxü i woo ngü̃xchigaarü ngunexü̃ yixĩxgu —ñanagürü.

13Rü ñu̱xũchi ga Ngechuchu rü ñanagürü nüxü̃ ga gumá yatü ga yumécü: —¡Iyarüwe̱xãchime̱xẽ! —ñanagürü. Rü gumá yatü rü inayarüwe̱xãchime̱xẽ, rü yexgumatama narümeme̱x, rü nai ga naxme̱x ga mexü̃nerüxü̃ nixĩ.

14Rü yexguma yemaxü̃ nadaugügu ga Parichéugü, rü ínachoxü̃ ga yéma. Rü inanaxügüe nax naxca̱x nadaugüxü̃ nax ñuxãcü tá Ngechuchuxü̃ yama̱xgüxü̃.

Ichaíaarü ore ga Ngechuchuchiga

15Rü yexguma Ngechuchu nüxü̃ cuáchigagu nax Parichéugü yama̱xgüchaxü̃xü̃, rü ínaxũxũ ga guma ĩanewa. Rü muxü̃ma ga duü̃xü̃gü nawe narüxĩ. Rü nüma ga Ngechuchu rü nanameexẽxẽ ga guxü̃ma ga yema duü̃xü̃gü ga ida̱xaweexü̃.

16Rü duü̃xü̃güna naxãga nax tama nüxü̃ yaxugüexü̃ca̱x nax texe yixĩxü̃ ga nümax.

17Rü yemaacü nanaxü ga Ngechuchu nax yanguxẽẽãxü̃ca̱x ga yema ore ga Tupanaarü orearü uruxü̃ ga Ichaía nüxü̃ ixuxü̃ ga ñaxü̃:

18“Daa nixĩ ya chorü duü̃ ya chomatama nüxü̃ chaxunetacü rü nüxü̃ changechaü̃cü rü namaxã chataãẽxü̃chicü.

Rü nüxna tá chanamu i Chauãxẽ i Üünexü̃.

Rü nüma rü ngẽma duü̃xü̃gü i tama Yudíugü ixĩgüxü̃maxã tá nüxü̃ nixu i ore i mexü̃ i aixcüma ixĩxü̃.

19Rü tagutáma texémaxã niporagacüü rü tama texémaxã nipura.

Rü tagutáma ĩanearü namagüwa nüxü̃ taxĩnü nax natagaxü̃.

20Rü yimá dexne ya ibüyecü rü taxũtáma nayabüyexüchi.

Rü ngẽma omü i íxrarüwatama ngéma icaixquexü̃ rü taxũtáma nayaxoxẽẽxü̃chi.

Rü mea tá duü̃xü̃gümaxã inacua̱x ñu̱xmatáta guxü̃ i chixexü̃xü̃ naporamae.

21Rü guxü̃ma i duü̃xü̃gü i ñoma i naanecüã̱x rü tá naxca̱x naxĩ nax nayauxgüãxü̃ca̱x i norü maxü̃ i taguma gúxü̃”,

ñanagürü ga Ichaía.

Parichéugü rü Ngechuchuxü̃ nixugüe nax ngo̱xoarü poramaxã napuracüxü̃

(Mr. 3.20-30; Lc. 11.14-23; 12.10)

22Rü Ngechuchuxü̃tawa nanagagü ga wüxi ga yatü ga ngexetücü ga tama idexacü ga ngo̱xo nawa yexmacü. Rü Ngechuchu nayadauuchixẽxẽ rü nayadexaxẽxẽ.

23Rü guxü̃ma ga duü̃xü̃gü rü naba̱i̱xãchiãẽgü ga yexguma yemaxü̃ nadaugügu. Rü ñanagürügü: —¿Taux ẽ̱xna daa yixĩxü̃ ya Dabí nane ya Cristu? —ñanagürügü.

24Natürü yema Parichéugü ga yéma yexmagüxü̃ rü yexguma yemaxü̃ naxĩnüegu, rü ñanagürügü: —Ñaa yatü i Ngechuchu, rü ngo̱xogünatü i Beechebúarü poramaxã nixĩ i ínawoxü̃ãxü̃ i ngo̱xogü —ñanagürügü.

25Natürü nüma ga Ngechuchu rü nüxü̃ nacua̱xama ga ta̱xacügu nax naxĩnüexü̃. Rü yemaca̱x ñanagürü nüxü̃: —Ngẽxguma chi wüxi i nachixü̃anecüã̱x i duü̃xü̃gü nügü itoyegu rü nügütanüwa chitama nügü nadaixgu, rü nügü chitama nagu̱xẽxẽ. Rü ngẽxguma chi wüxi ya ĩanecüã̱x rüe̱xna wüxi ya ĩcüã̱x nügümaxã itoyegu rü nügü nadaixgu, rü nügü chitama nagu̱xẽxẽ.

26Rü ngẽxguma chi Chataná nügütama ítaxüchigu rü nügütama yama̱xgu, ¿rü ñuxãcü chi poracüecha yixĩxü̃?

27Rü pemax, Pa Parichéugüx, rü choxü̃ pixuxgu rü Beechebúarü poramaxã íchanawoxü̃ i ngo̱xogü. Natürü ngẽxguma chi Beechebúarü poramaxã íchanawoxü̃gu i ngo̱xogü, ¿rü texéarü poramaxã nixĩ i perü ngúexü̃gü rü ínawoxü̃ãxü̃ i ngo̱xogü? Rü dücax, rü ngẽma perü ngúexü̃gütama nixĩ i pexca̱x nango̱xẽẽxü̃ nax ípetüexü̃.

28Natürü pemaxã nüxü̃ chixu rü aixcüma Tupanaãxẽ i Üünexü̃arü poramaxã nixĩ i íchanawoxü̃xü̃ i ngo̱xogü. Rü ngẽmawa pexü̃ nüxü̃ chacua̱xẽxẽ nax marü núma petanüwa nanguxü̃ ya Tupana, nax perü ãẽ̱xgacü yixĩxü̃ca̱x.

29¿Rü ñuxãcü texé wüxi ya yatü ya poracüpatagu taxücu nax tanapuxü̃xü̃ca̱x i norü ngẽmaxü̃gü, ega tama tayana̱i̱xíragu i noxrix? Rü ngẽxguma tayana̱i̱xíraguxicatama nixĩ i nüxna tanapuxü̃xü̃ i norü ngẽmaxü̃gü ya yimá yatü ya poracü.

30Rü yíxema tama choxü̃ ngechaü̃xe rü chauxchi taxai. Rü yíxema tama choxü̃ rüngü̃xexẽ́xẽ nax Tupanaca̱x tananutaque̱xexü̃ i duü̃xü̃gü rü cha̱u̱xchawa tanangianexẽxẽ.

31Rü ngẽmaca̱x pemaxã nüxü̃ chixu rü Tupana tá nüxü̃́ nüxü̃ narüngüma i guxü̃ma i pecadugü i duü̃xü̃gü ügüxü̃ rü guxü̃ma i norü dexagü i chixexü̃. Natürü yíxema Tupanaãxẽ i Üünexü̃maxã ta̱xacü ixugüxe, rü Tupana rü tagutáma tüxü̃́ nüxü̃ narüngüma i ngẽma chixexü̃.

32Rü guxãma ya texé ya chixexü̃ namaxã ixugüxe ya Tupana Nane ya duü̃xü̃xü̃ ixĩcü rü Tupana tá tüxü̃́ nüxü̃ narüngüma i ngẽma. Natürü texé ya Tupanaãxẽ i Üünexü̃maxã chixexü̃ ixugüxe, rü Tupana rü tagutáma tüxü̃́ nüxü̃ narüngüma i ngẽma, rü bai i ñoma i naanewa, rü bai i daxũguxü̃ i naanewa.

Wüxi i nanetü rü norü owa nixĩ i nüxü̃ icuáxü̃ nax ta̱xacürü nanetü yixĩxü̃

(Lc. 6.43-45)

33Rü ngẽxguma wüxi i nanetü rü namexgu, rü norü o rü ta name. Natürü ngẽxguma wüxi i nanetü rü nachixegu, rü norü o rü ta nachixe. Rü wüxi i nanetü rü norü owa nixĩ i nüxü̃ icuáxü̃ rü aixcüma name rüe̱xna tama.

34Pa Ãxtapearü Duü̃xü̃güx, ¿ñuxãcü i mexü̃ i orexü̃ pixuxü̃ ega pematama rü pichixecümagu? Erü ngẽma ore i pea̱xmaxã nüxü̃ pixuxü̃ rü peãxẽwa nixĩ i ne naxũxü̃.

35Wüxi ya mecü ya yatü rü mexü̃ i orexü̃ nixu, erü naãxẽwa rü aixcüma mexü̃gu narüxĩnü. Natürü wüxi i yatü i chixecümaxü̃ rü chixexü̃ i orexü̃ nixu, erü naãẽwa rü chixexü̃gu narüxĩnü.

36Rü choma pemaxã nüxü̃ chixu rü ngẽma ngunexü̃ ya Tupana duü̃xü̃güxü̃ nagu icagüxü̃ rü tá guxü̃ i duü̃xü̃güna naca naxca̱x i guxü̃ma i ore i chixexü̃ i nüxü̃ yaxuxü̃ i ñoma i naanewa.

37Erü curü dexa i mexü̃ca̱x rü Tupana tá cumaxã nanaxuegu nax tama chixexü̃ cuxüxü̃, natürü curü dexa i chixexü̃ca̱x rü tá cuxü̃ napoxcu —ñanagürü ga Ngechuchu.

Parichéugü naxca̱x ínacagü ga to ga cua̱xruxü̃ ga Tupanaarü poramaxã üxü̃

(Mr. 8.12; Lc. 11.29-32)

38Rü ñuxre ga Parichéugü rü Yudíugüarü ngúexẽẽruü̃gü ga ore ga mugüwa ngu̱xẽẽtaegüxü̃ rü ñanagürügü Ngechuchuxü̃: —Pa Ngúexẽẽruxü̃x, cuxü̃ tadauxchaü̃ nax cunaxüxü̃ i wüxi i cua̱xruxü̃ i Tupanaarü poramaxã cuxüxü̃ —ñanagürügü.

39Rü Ngechuchu nanangãxü̃, rü ñanagürü: —Ñaa duü̃xü̃gü i chixecümagüxü̃ i tama yaxõgüxü̃ rü naxca̱x ínacagü i wüxi i cua̱xruxü̃ i Tupanaarü poramaxã üxü̃. Natürü yema cua̱xruxü̃ ga Tupanaarü orearü uruxü̃ ga Yonáwa üxü̃xicatama nixĩ i tá nüxü̃ chawéxü̃. Rü taxuxü̃táma i to i cua̱xruxü̃ tá nüxü̃ chadauxẽxẽ i ñaa duü̃xü̃gü.

40Rü yexgumarüxü̃ ga Yoná ga tomaepü̱x ga ngunexü̃ rü tomaepü̱x ga chütaxü̃ choxni ga taxü̃ãnüwa nax nayexmaxü̃ rü ngẽxgumarüxü̃ tá ta nixĩ ya Tupana Nane ya duü̃xü̃xü̃ ixĩcü i tomaepü̱x i ngunexü̃ rü tomaepü̱x i chütaxü̃ naxma̱xü̃ i nagu yaxǘcuchixü̃wa nangẽxmaxü̃.

41Rü ngẽxguma Tupana duü̃xü̃güna caxgux i norü pecaduchiga, rü nüma i Nínibecüã̱xgü rü tá inachigü rü Tupanape̱xewa tá ínanaxuaxü̃gü i ñaa duü̃xü̃gü i ñu̱xma maxẽxü̃. Yerü nümagü ga Nínibecüã̱x rü nüxü̃ narüxoe ga nacümagü ga chixexü̃ ga yexguma Yoná namaxã nüxü̃ ixuxgu ga Tupanaarü ore. Natürü ñu̱xma nua petanüwa nangẽxma i wüxi i Yonáarü yexera ixĩcü.

42Rü ngẽxguma Tupana duü̃xü̃güna caxgux i norü pecaduchiga, rü ngĩma ga súr-anewa ãẽ̱xgacü ixĩcü rü tá íirüda, rü tá pexü̃ íixũãxü̃. Yerü ngĩma rü yáxü̃wa ne ĩxü̃ nax ãẽ̱xgacü ga Charomóü̃xü̃ íyadauxü̃ca̱x rü nüxü̃ naxĩnüxü̃ca̱x ga norü ngu̱xẽẽtae ga cua̱xmaxã nüxü̃ yaxuxü̃. Natürü pemaxã nüxü̃ chixu rü nua petanüwa nangẽxma i wüxi ya Charomóü̃arü yexera ixĩcü.

Ngo̱xo i taeguxü̃chiga

(Lc. 11.24-26)

43-44Rü ngẽxguma wüxi i ngo̱xo rü wüxi ya yatüwa ínaxũũxgu, rü dauxchitawa i ngextá taxúema íxãpataxü̃wa rü nu ne nanaxũmare. Rü naxca̱x nadau nax ngexta nax nangü̃xü̃ca̱x. Rü ngẽxguma taxuguma nüxü̃ iyangauxgu nax ngexta nangüxü̃, rü nagu narüxĩnü nax wena nataeguxü̃ naxca̱x ya yimá yatü ga noxri nawa ínaxũxũchirécü. Rü ngẽxguma nataeguxgu, rü nüxü̃ inayangau ya yimá yatü nax ñoma wüxi ya ĩ ya ingeãcune rü mexẽéne rü mea nabixichinerüxü̃ nax yixĩxü̃.

45Rü ngẽma ngo̱xo rü ínixũ rü naxca̱x nayadau i to i 7 i ngo̱xogü i norü yexera chixexü̃. Rü guxü̃ma i ngẽma rü yimá yatügu nayachocu, rü ngẽxma naxãchiü̃gü. Rü ngẽxguma ya yimá yatü rü noxriarü yexera nachixe. Rü ngẽxgumarüxü̃ tá ta nüxü̃ naxüpetü i ñaa duü̃xü̃gü i chixecümaxü̃ —ñanagürü ga Ngechuchu.

Ngechuchuarü mama rü naenexẽgüchiga

(Mr. 3.31-35; Lc. 8.19-21)

46Rü yexguma duü̃xü̃gümaxã íyadexayane ga Ngechuchu, rü yéma tangu ga naé rü naenexẽgü, erü Ngechuchumaxã tidexagüchaü̃. Rü ĩpataarü düxétügu tarücho.

47Rü wüxi ga duü̃xü̃ Ngechuchumaxã nüxü̃ nixu, rü ñanagürü: —Yéa düxétüwa tangexma ya cué rü cuenexẽgü, rü cumaxã tidexagüchaü̃ —ñanagürü nüxü̃.

48Natürü Ngechuchu nanangãxü̃ ga yema duü̃xü̃ ga namaxã nüxü̃ ixuxü̃ ga yema ore, rü ñanagürü nüxü̃: —¿Texé tixĩ ya chaué? ¿Rü texégü tixĩ ya chauenexẽgü? —ñanagürü.

49Rü yexguma ga Ngechuchu rü norü ngúexü̃güxü̃ naxuneta, rü ñanagürü: —Dücax, daxe tixĩ ya chaué, rü daagü nixĩ ya chauenexẽgü.

50Erü guxãma ya texé ya naxǘxe i Chaunatü ya daxũgucüarü ngúchaü̃, rü yíxema tixĩ ya chauenexẽ rü chaueya̱x rü chaué —ñanagürü ga Ngechuchu.

Currently Selected:

Ore i mexü̃ ga Matéu ümatüxü̃ 12: tcaP

Highlight

Compare

Copy