Ore i mexü̃ ga Luca ümatüxü̃ 6
6
Ngechuchuarü ngúexü̃gü rü trigu nicauetanü ga ngü̃xchigaarü ngunexü̃gu
(Mt. 12.1-8; Mr. 2.23-28)
1Rü wüxi ga ngü̃xchigaarü ngunexü̃gu rü Ngechuchu rü norü ngúexü̃gümaxã trigunecüwa nachopetü. Rü norü ngúexü̃gü rü inaxĩãcüma yoxocüne trigu nicãũtanü. Rü naxme̱xmaxã nanadaxi ga trigu rü nayangṍẽtanü.
2Rü ñuxre ga Parichéugü rü yema ngúexü̃güna nacagü, rü ñanagürügü: —¿Tü̱xcüü̃ ngü̃xchigaarü ngunexü̃gu penabuxu i trigu? Erü ngü̃xchigaarü ngunexü̃gu rü nachu̱xu nax texé puracüxü̃ —ñanagürügü.
3Rü Ngechuchu nanangãxü̃, rü ñanagürü: —¿Taguma ẽ̱xna poperawa nüxü̃ pedau ga yema naxüxü̃ ga ãẽ̱xgacü ga Dabí ga yexguma nataiyagu ga nüma rü natanüxü̃
4rü Tupanapatagu naxücu rü nanayaxu ga yema paũ ga üünexü̃ ga chu̱xuxü̃ nax ngexerüxemare nangṍxü̃? Rü chacherdótegüca̱xicatama nixĩ. Natürü ga Dabí rü nanayaxu ga yema paũ rü nanangõ̱x rü natanüxü̃maxã nangau —ñanagürü ga Ngechuchu.
5Rü ñanagürü ta: —Tupana Nane ya duü̃xü̃xü̃ ixĩcü rü ngü̃xchigaarü ngunexü̃maxã inacua̱x —ñanagürü.
Wüxi ga yatü ga yumécüchiga
(Mt. 12.9-14; Mr. 3.1-6)
6Rü to ga ngü̃xchigaarü ngunexü̃gu rü Ngechuchu rü ngutaque̱xepataü̃gu naxücu. Rü inanaxügü nax nangu̱xẽẽtaexü̃. Rü yéma nayexma ga wüxi ga yatü ga norü tügünewa yumécü.
7Rü yema ngúexẽẽruü̃gü ga Moichéarü mugüwa ngu̱xẽẽtaegüxü̃ rü yema Parichéugü, rü Ngechuchuxü̃ nangugügü rü tá ngü̃xchigaarü ngunexü̃gu gumá yumécüxü̃ namexẽxẽ, yerü naxca̱x nadaugü nax ãẽ̱xgacügüxü̃tawa ínaxuaxü̃güãxü̃.
8Natürü nüma ga Ngechuchu rü nüxü̃ nacua̱x ga yema naãxẽwa nagu naxĩnüexü̃ ga yema yatügü. Rü yemaca̱x gumá yumécüxü̃ ñanagürü: —¡Írüda rü nuxã ngãxü̃tanügu yachi! —ñanagürü. Rü gumá yumécü rü inachi rü norü ngãxü̃tanügu nayachi.
9Rü yexguma ga Ngechuchu rü nüxna naca ga yema Parichéugü rü yema mugüwa ngu̱xẽẽtaegüxü̃, rü ñanagürü nüxü̃: —¿Ta̱xacü nixĩ i mexü̃ nax naxüxü̃ i ngü̃xchigaarü ngunexü̃gu? ¿Mexü̃ rü ẽ̱xna chixexü̃? ¿Rü pexca̱x namexü̃ nax namaxẽxẽxü̃ rü ẽ̱xna yamáxü̃? —ñanagürü.
10Rü yexguma Ngechuchu nüxü̃ nidaugüãchi ga yema duü̃xü̃gü ga nüxü̃ íchomaeguãchixü̃. Rü gumá yumécüxü̃ ñanagürü: —¡Iyanawe̱xãchixẽxẽ ya cuxme̱x! —ñanagürü. Rü gumá yatü rü nügü inayarüwe̱xãchime̱xẽxẽxẽ, rü narümeme̱x.
11Natürü nümagü ga yema Parichéugü rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü poraãcü nanue. Rü nügü nixucu̱xẽgü nax ñuxãcü tá Ngechuchuxü̃ ínaxuaxü̃güxü̃.
Ngechuchu nanade ga yema 12 ga norü ngúexü̃gü nax tóxnamana namugüãxü̃ca̱x
(Mt. 10.1-4; Mr. 3.13-19)
12Rü yexguma ga Ngechuchu rü wüxi ga ma̱xpǘnewa naxũ nax yéma yayumüxẽxü̃ca̱x. Rü guxü̃ ga yema chütaxü̃gu rü norü yumüxẽwa Tupanamaxã nidexa.
13Rü yexguma yangóonegu, rü Ngechuchu norü ngúexü̃güca̱x naca. Rü natanüwa nayadexechi ga 12. Rü orearü ngeruü̃gügu nanaxüéga.
14Rü yema yatügü ga nadexü̃ rü Chimóü̃ ga Pedrugu nanaxüéga nixĩ ga wüxi. Rü to nixĩ ga André ga Chimóü̃ naenexẽ, rü Chantiágu rü Cuáü̃, rü Ferípe, rü Barturumé,
15rü Matéu, rü Tumáchi, rü Chantiágu ga Arupéu nane rü Chimóü̃ ga Poraãẽxü̃,
16rü Yúda ga Chantiágu nane, rü Yúda ga Icharióte ga yixcama Ngechuchuxü̃ íxuaxü̃xü̃.
Ngechuchu rü muxü̃ma ga duü̃xü̃güxü̃ nangúexẽxẽ
(Mt. 4.23-25)
17Rü Ngechuchu rü yema yatügü ga nadexü̃maxã ínarüxĩgü nawa ga guma ma̱xpǘne. Rü wüxi ga nachica ga ínametachinüanexü̃wa nayachaxãchitanü. Rü yéma nayexmagü ga muxü̃ma ga duü̃xü̃gü ga guxü̃ ga Yudéaanewa ne ĩxü̃, rü Yerucharéü̃wa ne ĩxü̃, rü Márcutüwa ga Chidóü̃wa rü Tíruwa ne ĩxü̃. Rü yéma naxĩ yerü Ngechuchuxü̃ naxĩnüechaü̃, rü nanaxwa̱xegü nax nameexẽẽãxü̃ ga norü da̱xawegüwa.
18Rü yema duü̃xü̃gü ga chixexü̃ ga naãxẽ nawa yexmagüxü̃ rü ta naxca̱x nitaanegü.
19Rü guxü̃ma ga duü̃xü̃gü rü Ngechuchuxü̃ ningõgügüchaü̃, yerü nawa ixũxü̃xü̃ ga poramaxã nanameexẽxẽ.
Duü̃xü̃gü i taãẽgüxü̃chiga rü duü̃xü̃gü i ngechaü̃güxü̃chiga
(Mt. 5.1-12)
20Rü yexguma Ngechuchu rü norü ngúexü̃güxü̃ nadawenü, rü ñanagürü nüxü̃: —¡Petaãxẽgü i pemax ya ingearü diẽruã̱xgüxe! Erü Tupana ãẽ̱xgacü ixĩxü̃wa rü pexü̃́ nangẽxma i pechica.
21¡Rü petaãxẽgü i pemax i ñu̱xma taiyaexe! Erü yixcama rü tá meama pingãxcharaü̃gü. ¡Rü petaãxẽgü i pemax i ñu̱xma ngechaü̃güxe! Erü yixcama rü tá taãẽãcüma pecugüe.
22¡Rü petaãxẽgü i pemax i ngẽxguma duü̃xü̃gü pexchi aiegu, rü pexü̃ ínawoxü̃gu, rü chixexü̃ pemaxã yaxugüegu, rü Tupana Nane ya duü̃xü̃xü̃ ixĩcügagu chixri pechiga yadexagügu!
23Rü ngẽxguma ngẽma pexü̃ üpetügu, rü ¡petaãxẽgüama rü tama pexoegaãẽgü! Erü daxũguxü̃ i naanewa rü tá penayauxgü i wüxi i perü ãmare i mexẽchixü̃. Rü dücax, ñaa duü̃xü̃gü i ñu̱xma pexchi aiexü̃arü o̱xigü rü yexgumarüxü̃ ta nixĩ ga naxchi nax naxaiexü̃ ga Tupanaarü orearü uruü̃gü.
24Natürü wüxi i ngechaü̃ tá nixĩ i pexca̱x i pema ya muarü diẽruã̱xgüxe, erü ñoma i naanewa rü marü pexü̃́ nangẽxma i perü taãxẽ.
25Rü wüxi i ngechaü̃ tá nixĩ i pexca̱x i pemax i ñu̱xmax mea chibüexe erü tá petaiyae. Rü wüxi i ngechaü̃ tá nixĩ i pexca̱x i pemax i ñu̱xmax marü cugüexe, erü yixcama rü perü ngechaü̃maxã tá pexauxe.
26Rü wüxi i ngechaü̃ tá nixĩ i pexca̱x i ngẽxguma guxü̃ma i duü̃xü̃gü pexü̃ icua̱xüü̃gügu. Erü ngẽma duü̃xü̃gü i ñu̱xmax pexü̃ icua̱xüü̃güxü̃arü o̱xigü rü yexgumarüxü̃ ta nüxü̃ nicua̱xüü̃gü ga yema orearü uruü̃güneta.
¡Nüxü̃ pengechaü̃ i ngẽma pemaxã rüxuanügüxü̃!
(Mt. 5.38-48; 7.12)
27Natürü i pema i ñu̱xmax choxü̃ pexĩnüexü̃ rü pemaxã nüxü̃ chixu rü: ¡Nüxü̃ pengechaü̃ i ngẽma pemaxã rüxuanügüxü̃! ¡Rü namaxã pemecüma i ngẽma pexchi aiexü̃!
28¡Rü naxca̱x ípeca i Tupanaarü ngü̃xẽxẽ naxca̱x i ngẽma pemaxã guxchigagüxü̃! ¡Rü naxca̱x peyumüxẽgü i ngẽma chixri pechiga idexagüxü̃!
29Rü ngẽxguma texé cuxü̃ pechiwegu rü name nixĩ i tüxna cunaxã i curü tochiwe nax ngéma rü ta cuxü̃ tapechiwexü̃ca̱x. Rü ngẽxguma texé cuxü̃ napuxgu i curü gáuxü̃chiru, rü name nixĩ i tüxna cunaxã ta i curü dauxü̃.
30¡Rü ngẽxguma texé curü ngẽmaxü̃ca̱x cuxna caxgux, rü tüxna naxã! Rü ngẽxguma texé cuxna yapuxgu i curü ngẽmaxü̃, rü tama name i naxca̱x cungema.
31Rü ngẽma mexü̃ i penaxwa̱xexü̃ nax togü pemaxã naxüxü̃, rü name nixĩ i ngẽma mexü̃ namaxã pexü.
32Rü ngẽxguma pemax rü ngẽma duü̃xü̃gü i pexü̃ ngechaü̃xü̃xü̃xicatama pengechaü̃gu, rü ¿ta̱xacüwa namexü̃ i ngẽma? Erü ngẽma pecaduã̱xgüxü̃ rü ngẽmaãcü nanaxügü.
33Rü ngẽxguma ngẽma duü̃xü̃gü i cuxü̃ rüngü̃xẽẽxü̃xicatama curüngü̃xẽẽgu, rü ¿ta̱xacüwa namexü̃ i ngẽma? Erü ngẽma pecaduã̱xgüxü̃ rü ngẽmaãcü nanaxügü.
34Rü ngẽxguma ngẽma duü̃xü̃gü i diẽruã́xü̃naxicatama cunaxãxgu i curü diẽru, rü ¿ta̱xacüwa namexü̃ i ngẽma? Erü ngẽma pecaduã̱xgüxü̃ rü ngẽmaãcü nanaxügü, erü nüxü̃ nacua̱xgü rü tá nüxü̃́ nanatáeguxẽxẽ i ngẽma diẽru.
35Natürü i pema rü name nixĩ i nüxü̃ pengechaü̃ i ngẽma pemaxã rüxuanügüxü̃, rü nüxü̃ perüngü̃xẽxẽ. Rü ngẽxguma ta̱xacüca̱x pexna nacaxgu, rü name nixĩ i nüxna penaxã woo ngürüãchi taxũtáma pexü̃́ natáeguxẽẽãgu. Erü ngẽxguma ngẽmaãcü penaxü̱xgu, rü Tupana ya Guxü̃étüwa Ngẽxmacü rü ngẽmaarü yexera tá pexü̃́ nanatáeguxẽxẽ, rü naxacügü tá pixĩgü. Erü nüma rü namaxã rü ta namecüma i ngẽma taguma moxẽ nüxna ãgüxü̃ rü ngẽma chixecümagüxü̃.
36Rü name nixĩ i pexü̃́ nangechaü̃tümüxü̃gü i ngẽma togü, ngẽma Penatü ya Tupanaaxü̃́ pengechaxü̃tümüxü̃güxü̃rüxü̃.
Tama name i nüxü̃ pixu i togü
(Mt. 7.1-5)
37¡Rü taxṹ i togüxü̃ pixuxü̃! Rü ngẽxguma ya Tupana rü taxũtáma pexü̃ nixu. ¡Rü taxṹ i Tupanaarü poxcu namaxã pexueguxü̃ i togü! Rü ngẽxguma ya Tupana rü taxũtáma poxcu pemaxã naxuegu. ¡Rü nüxü̃́ nüxü̃ perüngümae i norü chixexü̃ i togü! Rü ngẽxguma ya Tupana rü tá pexü̃́ nüxü̃ narüngüma i perü chixexü̃.
38¡Rü togüna penaxã! Rü ngẽxguma ya Tupana rü tá pexna nanaxã. Rü ñoma wüxi i choca i meama napaxü̃rüxü̃ rü meama ipoocuxü̃rüxü̃ tá Tupana pexna nanaxã. Rü ngẽxguma taxü̃ togüna pexãxgu rü Tupana rü ngẽxgumarüxü̃ tá ta taxü̃ pexna naxã —ñanagürü.
39Rü Ngechuchu rü norü ngúexü̃gümaxã nüxü̃ nixu ga ñaa cua̱xruxü̃, rü ñanagürü: —¿Ñuxãcü i wüxi i ngexetüxü̃ rü to i ngexetüxü̃maxã inacua̱x? Erü ngẽma taxre i ngexetüxü̃ rü wüxi i ãxmaxü̃gu tá nügümaxã nayayicu.
40Rü taxuxü̃ma i ngúexü̃ rü norü ngúexẽẽruü̃xü̃ narüyexera. Natürü ngẽxguma mea nangu̱xgu rü tá naxrüxü̃ nixĩ ya norü ngúexẽẽruxü̃.
41¿Rü tü̱xcüü̃ i nüxü̃ cudawenüxü̃ i ngẽma íxraxü̃ i norü üxaxetü ya cuenexẽ, rü tama nagu curüxĩnügu i ngẽma naixpüta i cuxetüwa ngẽxmaxü̃?
42Rü ngẽxguma tama nagu curüxĩnügu i ngẽma naixpüta i cuxetüwa ngẽxmaxü̃ ¿rü ñuxũcürüwa i cuenexẽxü̃ cuchixewexü̃, rü ñacuxü̃ nüxü̃: “Pa Chauenexẽx, cuxü̃ chanayauxchaü̃ i ngẽma curü üxaxetüxü̃”, ñacuxü̃? Pa Duü̃xü̃ i Mea Maxnetaxü̃x, name nixĩ i cunayauxíra i ngẽma naixpüta i cuxetüwatama ngẽxmaxü̃, rü ngẽmaãcü tá mea nüxü̃ cudau nax cunayaxuxü̃ca̱x i ngẽma cuenexẽarü üxaetüxü̃.
Wüxi i nanetü rü norü owa nixĩ i nüxü̃ icuáxü̃
(Mt. 7.17-20; 12.34-35)
43Nataxuma i nanetü i mexü̃ i chixearü oóxü̃. Rü nataxuma i nanetü i chixexü̃ i mearü oóxü̃.
44Rü wüxichigü i nanetü rü norü owa nixĩ i nüxü̃ icuáxü̃. Rü wüxi i torawa rü taxucürüwa wüxi i ori̱x i mexü̃ tayaxu. Rü wüxi i chuchuxü̃wa rü taxucürüwa úba tayaxu.
45Rü wüxi ya mecü ya yatü rü mexü̃ i orexü̃ nixu, erü naãxẽwa rü aixcüma mexü̃gu narüxĩnü. Natürü wüxi i yatü i chixecümaxü̃ rü chixexü̃ i orexü̃ nixu, erü chixexü̃gu narüxĩnü. Rü ngẽma naãxẽwa ngẽxmaxü̃ i chixexü̃ nixĩ i nüxü̃ yaxuxü̃.
Ĩpata ya nutaétügu üxü̃ne rü ĩpata ya naxnücüétügu üxü̃nechiga
(Mt. 7.24-27)
46¿Tü̱xcüü̃ i pemax rü: “Pa Torü Corix”, ñaperügü choxü̃, natürü tama penaxü i ngẽma pemaxã nüxü̃ chixuxü̃?
47Rü ñu̱xma rü tá pemaxã nüxü̃ chixu nax ñuxãcü tixĩxü̃ ya yíxema chowe rüxũxẽ rü choxü̃ ĩnüxe rü naxǘxe i ngẽma tümamaxã nüxü̃ chixuxü̃.
48Rü tüma rü wüxi ga yatü ga üpatacü rü yama̱xmaü̃cü ga norü caxta ñu̱xmata nutawa nangucürüxü̃ tixĩ. Rü yexguma nama̱xgu ga taxtü rü yabaixü̃gu ga napata, rü woo nax naporaü̃chíüxü̃, rü tama niwa̱xtaü̃, yerü meama inapugüarü caxtaã̱x ga guma ĩ.
49Natürü yíxema nüxü̃ ĩnümarexe i chorü ore natürü tama naxǘxe i ngẽma tümamaxã nüxü̃ chixuxü̃, rü wüxi ga yatü ga naxnücüétügumare üpatacürüxü̃ tixĩ. Rü yexguma nama̱xgu ga taxtü, rü nibaixü̃ ga napata, rü naporaxü̃chíü. Rü niwa̱xtaü̃ ga napata, rü yexma nayarüxo ga guma ĩ —ñanagürü.
Currently Selected:
Ore i mexü̃ ga Luca ümatüxü̃ 6: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.