Ore i mexü̃ ga Luca ümatüxü̃ 4
4
Ngechuchuxü̃ naxü ga Chataná
(Mt. 4.1-11; Mr. 1.12-13)
1Ngechuchuwa nayexma ga Tupanaãxẽ ya Üünecü. Rü yexguma Yudáü̃chíüwa ínaxü̃ãchigu ga Ngechuchu, rü Tupanaãxẽ ya Üünecü rü chianexü̃wa nanaga ga ngextá taxúema íxãpataxü̃wa.
2Rü yéma nayexma ga 40 ga ngunexü̃. Rü ngo̱xo ga Chataná rü nüxü̃ naxü. Rü yexguma yéma nayexmagu rü taguma nachibü. Rü yemawena rü nataiya.
3Rü yexguma ga ngo̱xo ga Chataná rü ñanagürü nüxü̃: —Ega aixcüma Tupana Nane quixĩxgu, rü ¡daa nutamaxã nüxü̃ ixu nax paũxü̃ nanguxuchixü̃ca̱x! —ñanagürü ga Chataná.
4Rü Ngechuchu nanangãxü̃ rü ñanagürü: —Tupanaarü ore i ümatüxü̃wa rü ñanagürü:
“Taxũtáma õnamaxãxica namaxẽ i duü̃xü̃gü, natürü guxü̃ma i Tupanaarü ore nixĩ i namaxẽxẽẽxü̃”,
—ñanagürü.
5Rü yexguma ga ngo̱xo ga Chataná rü wüxi ga ma̱xpǘnechitaeruwa nanaga. Rü yéma paxaãchi nüxü̃ nüxü̃ nadauxẽxẽ ga guxü̃ma ga nachixü̃anegü ga ñoma ga naanecüã̱x.
6Rü Chataná rü ñanagürü nüxü̃: —Choma rü chi cuxna chanaxã i pora nax guxü̃ma i ñaa nachixü̃anegümaxã rü norü ngẽmaxü̃gümaxã icucuáxü̃ca̱x. Erü choxrü nixĩ i guxü̃ma i ñaagü, rü tüxna chanaxã ya texé ya chanaxwa̱xe nax tüxna nax chanaxãxü̃.
7Rü ngẽxguma chi chope̱xegu cucaxã́pü̱xügu rü choxü̃ quicua̱xüü̃gu rü cuxrü chi nixĩ i guxü̃ma i ñaa cuxü̃ chawéxü̃ —ñanagürü.
8Natürü ga Ngechuchu rü nanangãxü̃, rü ñanagürü: —¡Choxna ixũgachi! Pa Chatanáx. Erü Tupanaarü ore i ümatüxü̃wa rü ñanagürü:
“¡Nüxü̃ icua̱xüxü̃ ya Cori ya curü Tupana, rü yimáaxü̃́xicatama napuracü!”
—ñanagürü.
9Rü yexguma ga ngo̱xo ga Chataná rü Yerucharéü̃wa nanaga. Rü Tupanapata ga taxü̃netape̱xegu nanamunagü. Rü ñanagürü nüxü̃: —Ega aixcüma Tupana Nane quixĩxgu, rü ¡nua cugü rütáe!
10Erü Tupanaarü ore i ümatüxü̃wa rü ñanagürü:
“Tupana tá nanamu i norü orearü ngẽruü̃gü i daxũcüã̱x nax cuxna nadaugüxü̃ca̱x.
11Rü naxme̱xmaxã tá cuxü̃ niyauxgü nax tama wüxi ya nutagu cunguxü̃ca̱x”,
—ñanagürü.
12Rü Ngechuchu nanangãxü̃ rü ñanagürü: —Tupanaarü ore i ümatüxü̃wa rü ñanagürü ta:
“¡Tama name i nüxü̃ nax cuxüxü̃ ya Cori ya curü Tupana!”
—ñanagürü.
13Rü yexguma marü taxucürüwama Ngechuchuxü̃ naxü̱xgu, rü nüma ga Chataná rü nüxna niña ñu̱xmata nüxü̃́ natauxcha nax wena nüxü̃ naxüxü̃.
Ngechuchu rü Gariréaanewa inanaxügü ga norü puracü
(Mt. 4.12-17; Mr. 1.14-15)
14Rü Ngechuchu rü Gariréaaneca̱x nataegu. Rü Tupanaãxẽ i Üünexü̃arü pora rü nawa nayexma. Rü ga duü̃xü̃gü rü nachiga nidexagü ga guxü̃ ga yema naanewa.
15Rü wüxichigü ga ĩanearü ngutaque̱xepataü̃güwa nangu̱xẽẽtae. Rü guxü̃ma ga duü̃xü̃gü rü namaxã nataãẽgü rü nüxü̃ nicua̱xüü̃gü.
Nacharétuwa nayexma ga Ngechuchu
(Mt. 13.53-58; Mr. 6.1-6)
16Rü Nacharétuwa naxũ ga Ngechuchu. Rü gumá nixĩ ga ĩane ga nanatü rü naé nawa nayaxẽẽgüne. Rü ngü̃xchigaarü ngunexü̃gu rü ngutaque̱xepataü̃gu naxücu, yerü yema nixĩ ga nacüma ga guxü̃ ga ngü̃xchigaarü ngunexü̃gu. Rü yéma inachi rü duü̃xü̃güca̱x nüxü̃ nadaumatü ga Tupanaarü ore ga ümatüxü̃.
17Rü nüxna nanaxãgü ga popera ga Tupanaarü orearü uruxü̃ ga Ichaía ümatüxü̃. Rü yexguma yangenaátüãgu, rü nüxü̃ inayangau ga ínaxümatüxü̃wa ga ore ga ñaxü̃:
18“Cori ya Tupanaãxẽ rü chowa nangẽxma.
Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃.
Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃.
Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.
19Rü núma choxü̃ namu nax duü̃xü̃gümaxã nüxü̃ chixuxü̃ca̱x nax Tupana tá nüxü̃ rüngü̃xẽẽxü̃”,
ñanagürü ga yema ore.
20Rü yexguma ga Ngechuchu rü nanadixcumü ga yema popera. Rü ngutaque̱xepataü̃arü dauruü̃na nanaxã rü ñu̱xũchi ínarüto. Natürü guxü̃ma ga yema ngutaque̱xepataü̃wa yexmagüxü̃ ga duü̃xü̃gü rü nüxü̃ narüdaunüecha.
21Rü yexguma ga Ngechuchu rü inanaxügü nax yadexaxü̃, rü ñanagürü: “Ñu̱xmatama nixĩ i pepe̱xewa Tupana yanguxẽxẽxü̃ i ñaa ore ga Ichaía ümatüxü̃”, ñanagürü.
22Rü guxü̃ma ga duü̃xü̃gü rü mea Ngechuchuchiga nidexagü. Rü naba̱i̱xãchiãẽgü namaxã ga yema ore ga mexü̃ ga namaxã nüxü̃ yaxuxü̃. Rü nügüna nacagü rü ñanagürügü: “¿Taux ẽ̱xna daa yixĩxü̃ ya Yúche nane?” ñanagürügü.
23Rü Ngechuchu rü ñanagürü nüxü̃: —Choma nüxü̃ chacua̱x rü tá chomaxã penaxuxuchi i ngẽma ore i ñaxü̃: “Pa Dutúrux ¡Cugütama rümexẽxẽ!” ñaxü̃. Rüe̱xna tá choxü̃ ñaperügügü: “Yema mexü̃ ga taxü̃ ga nüxü̃ taxĩnüexü̃ ga Tupanaarü poramaxã cuxüxü̃ ga Capernáü̃wa, rü tanaxwa̱xe i nua curü ĩanewa rü ta nax cunaxüxü̃”, ñaperügügü tá —ñanagürü.
24Rü nayadaxẽxẽ ga Ngechuchu nax yadexaxü̃ rü ñanagürü: —Aixcüma pemaxã nüxü̃ chixu rü guxü̃ma i Tupanaarü orearü uruxü̃, rü norü ĩanewatama i duü̃xü̃gü rü tama mea nanayauxgü.
25Rü aixcüma pemaxã nüxü̃ chixu rü Iraéanewa rü nayexma ga muxũchixü̃ma ga ngexü̃gü ga iyutegüxü̃ ga yexguma Ería maxü̃gu. Rü yexguma nixĩ ga tomaepü̱x ga taunecüarü ngãxü̃ rü taguma napuxü̃, rü poraãcü nangúxü̃ ga taiya ga guxü̃ ga nachixü̃anewa.
26Natürü ga Tupana rü tama wüxi ga Iraéanecüã̱x ga yutecüxü̃tawa Eríaxü̃ namu. Natürü ngĩxü̃tawa nanamu ga yema yutecü ga Charétacüã̱x ga Chidóü̃arü ĩanearü ngaicamagu ãchiü̃cü.
27Rü yexguma namaxü̃xgu ga Erichéu, rü Iraéanewa nayexmagü ta ga muxü̃ma ga duü̃xü̃gü ga chaxünemaxã ida̱xaweexü̃. Natürü taxuxü̃ma ga yema ida̱xaweexü̃ ga Iraéanewa yexmagüxü̃ rü naxca̱x nitaane. Rü Naamáü̃ ga Chíriaanecüã̱xicatama nixĩ ga gumá naxca̱x yataanecü —ñanagürü ga Ngechuchu.
28Rü yexguma yema orexü̃ naxĩnüegu, rü guxü̃ma ga yema duü̃xü̃gü ga guma ngutaque̱xepataü̃wa yexmagüxü̃ rü poraãcü naxca̱x nanue.
29Rü inachigü ga duü̃xü̃gü rü Ngechuchuxü̃ ínata̱xüchigü ga guma ĩanewa. Rü guma ma̱xpǘne ga guma ĩane nawa yexmanechitaeruwa nanagagü nax yéma yanataegüãxü̃ca̱x.
30Natürü ga Ngechuchu rü norü ngãxü̃tanüwa ínaxũxũãma, rü ínixũ.
Wüxi ga yatü ga ngo̱xo nawa yexmaxü̃chiga
(Mr. 1.21-28)
31Rü yexguma ga Ngechuchu rü Gariréaanearü ĩane ga Capernáü̃wa naxũ. Rü ngü̃xchigaarü ngunexü̃gu yéma duü̃xü̃güxü̃ nangúexẽxẽ.
32Rü duü̃xü̃gü rü naba̱i̱xãchiãẽgü namaxã ga norü ngu̱xẽẽtae, yerü Tupanaarü poramaxã nidexa.
33Rü guma ngutaque̱xepataü̃wa nayexma ga wüxi ga yatü ga ngo̱xo nawa yexmaxü̃. Rü aita yéma naxü, rü ñanagürü:
34—¡Toxna ixũgachi! ¿Tü̱xcüü̃ totanüwa cuxũ, Pa Ngechuchux, Pa Nacharétucüã̱x? ¿Nua cuxũ nax toxü̃ cuda̱i̱xü̃ca̱x? Choma cuxü̃ chacua̱x nax Tupana Nane ya Üünecü nax quixĩxü̃ —ñanagürü.
35Rü Ngechuchu nananga ga yema ngo̱xo rü ñanagürü: —¡Iyarüngea̱x rü ínaxũxũ nawa ya yimá yatü! —ñanagürü. Rü yexguma ga yema ngo̱xo rü duü̃xü̃güpe̱xegu nayanguxẽxẽ ga gumá yatü, rü nawa ínaxũxũ. Natürü tama nanapi̱xẽxẽ.
36Rü guxü̃ma ga duü̃xü̃gü rü naba̱i̱xãchiãẽgü. Rü nügümücügümaxãchigü nachiga nidexagü, rü ñanagürügü: —¿Ta̱xacürü ore nixĩ i ngẽma? Erü ñaa yatü rü aixcüma ngẽma ngo̱xogümaxã inacua̱x rü poraãcü nanamu. Rü nümagü rü naga naxĩnüe, rü ínachoxü̃ —ñanagürügü.
37Rü guxü̃wama ga yema naanewa rü Ngechuchuchigaxü̃ nixugüe ga duü̃xü̃gü.
Ngechuchu rü Chimóü̃ ga Pedru na̱xẽca̱x nayataanexẽxẽ
(Mt. 8.14-15; Mr. 1.29-31)
38Rü guma ngutaque̱xepataü̃wa ínaxũxũ ga Ngechuchu rü Chimóü̃patawa naxũ. Rü Chimóü̃ na̱xẽ rü poraãcü iyaxaxüne. Rü Ngechuchuna nacagüe ga ngĩxca̱x nax yataanexẽẽãxü̃ca̱x.
39Rü nüma rü ngĩxü̃tagu nayachi rü narüma̱xãchi rü nananga ga yema axüne. Rü yexgumatama iga̱u̱xãchi ga nax yaxaxünexü̃. Rü yexgumatama íirüda, rü naxca̱x inamexẽxẽ ga õna.
Ngechuchu rü muxü̃ma ga ida̱xaweexü̃ca̱x nayataanexẽxẽ
(Mt. 8.16-17; Mr. 1.32-34)
40Rü yexguma marü yanaxücuchaü̃gu ga üa̱xcü, rü Ngechuchuxü̃tawa nanagagü ga guxü̃ma ga duü̃xü̃gü ga naguxü̃raü̃xü̃ ga da̱xaweanemaxã ida̱xaweexü̃. Rü Ngechuchu rü wüxichigü ga yema duü̃xü̃güxü̃ ningõgü, rü yemaacü naxca̱x nayataanexẽẽchigü.
41Rü nanameexẽxẽ ga muxü̃ma ga duü̃xü̃gü ga ida̱xaweexü̃ ga ngo̱xo nawa yexmagüxü̃. Rü yema ngo̱xogü rü aita naxüe, rü ñanagürügü: —Cuma nixĩ ya Tupana Nane quixĩxü̃ —ñanagürügü. Natürü ga Ngechuchu rü nayangagü ga yema ngo̱xogü. Rü nüxna nanachu̱xu ga nax yadexagüxü̃, yerü yema ngo̱xogü rü nüxü̃ nacua̱xgü nax Cristu yixĩxü̃.
Ngechuchu rü nanaxunagü ga ore ga mexü̃ ga ngutaque̱xepataü̃wachigü
(Mr. 1.35-39)
42Rü yexguma noxri yangóonegu rü yema ĩanewa ínaxũxũ ga Ngechuchu. Rü wüxi ga nachica ga taxúema íxãpataxü̃wa naxũ. Natürü ga duü̃xü̃gü rü naxca̱x nadaugü rü düxwa naxü̃tawa nangugü. Rü nüxü̃ naca̱a̱xü̃gü ga tama nax ínaxũxũxü̃ca̱x ga yema norü naanewa.
43Natürü ga Ngechuchu rü ñanagürü nüxü̃: —Taxucürüwama petanügu charüxã́ũecha erü chanaxwa̱xe nax náigü ya ĩanegüwa ngẽxmagüxü̃ i duü̃xü̃gümaxã rü ta nüxü̃ chixuxü̃ nax ãẽ̱xgacü yixĩxü̃ ya Tupana. Erü woetama ngẽmaca̱x núma choxü̃ namu —ñanagürü.
44Rü yemaacü Ngechuchu nüxü̃ nixuchigü ga ore ga ngutaque̱xepataü̃güwachigü ga Yudéaanewa.
Currently Selected:
Ore i mexü̃ ga Luca ümatüxü̃ 4: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.