Lebítanüxü̃arü puracüchiga 9
9
Aróü̃ rü inanaxügü ga norü puracü nax chacherdóte yixĩxü̃
1Rü yexguma norü 8 ga ngunexü̃wa nanguxgu rü nüma ga Moiché rü Aróü̃ca̱x rü nanegüca̱x nangema nax naxü̃tawa naxĩxü̃ca̱x. Rü yexgumarüxü̃ ta Iraétanüxü̃arü ãẽ̱xgacügüca̱x nangema.
2Moiché rü Aróü̃xü̃ ñanagürü: —¡Nua naga i wüxi i wocaxacü i yatüxü̃ i ngexwaca yaxü̃ nax pecaduarü ütanüca̱x yamáxü̃ca̱x! ¡Rü ngẽxgumarüxü̃ ta nua naga i wüxi i carnéru i yatüxü̃ i taxuwama chixexü̃, rü Cori ya Tupanaca̱x ínagu!
3¡Rü Iraétanüxü̃maxã nüxü̃ ixu nax wüxi i chíbu i yatüxü̃ nua nagagüxü̃ nax ngẽmamaxã naxütanügüãxü̃ca̱x i norü pecadugü! ¡Rü ñu̱xũchi nua nagagü i wüxi i wocaxacü i yatüxü̃ i ngexwaca yaxü̃, rü wüxi i carnéruxacü i wüxi ya taunecü nüxü̃́ ngẽxmaxü̃ i taxuwama chixexü̃ nax ngẽma taxre rü Cori ya Tupanaca̱x ícuguxü̃!
4¡Rü ngẽxgumarüxü̃ ta namaxã nüxü̃ ixu nax nua nagagüãxü̃ i wüxi i woca i yatüxü̃, rü wüxi i carnéru i yatüxü̃ nax Cori ya Tupanaca̱x nadaiaxü̃ca̱x rü ngẽmamaxã nax nangüxmüexẽẽgüãxü̃ca̱x! ¡Rü namaxã nüxü̃ ixu nax nua nangegüãxü̃ i norü ãmare i trigute̱xe i chíxü̃maxã iñumüxü̃, erü nüma ya Cori ya Tupana rü ñoma i ngunexü̃ tá pexü̃ nügü nawe̱x! —ñanagürü ga Moiché.
5Rü yema Iraétanüxü̃ rü yema Moiché namaxã nüxü̃ ixuxü̃ãcü Tupanapataarü ĩã̱xwa nanana ga norü ãmaregü. Rü guxü̃ma ga yema Iraétanüxü̃ rü yexma nangutaque̱xe. Rü yexma Tupanape̱xegu nayachigü.
6Rü yexguma ga Moiché rü ñanagürü nüxü̃: —Rü ngẽma nixĩ i Cori ya Tupana naxwa̱xexü̃ nax penaxüxü̃ nax ngẽmaãcü pexü̃ nüxü̃ nadauxẽẽxü̃ca̱x i norü pora —ñanagürü.
7Rü yemawena ga Moiché rü Aróü̃maxã nüxü̃ nixu rü ñanagürü nüxü̃: —¡Naxca̱x ixũ i ngẽma ãmarearü guruxü̃ rü ngéma Tupanana naxã i ngẽma naxü̃na i curü pecaduarü ütanüca̱x tá quiguxü̃ nax Tupana cuxü̃́ nüxü̃ narüngü̃maxü̃ca̱x i curü pecadugü rü ngẽma Iraétanüxü̃arü pecadugü, yema Cori ya Tupana chomaxã nüxü̃ ixuxü̃rüxü̃! —ñanagürü.
8Rü yexguma ga nüma ga Aróü̃ rü ãmarearü guruü̃ca̱x nixũ. Rü yexma nayawíyenaxã ga yema wocaxacü ga Tupanana naxãxü̃ norü pecaduarü ütanüruxü̃.
9Rü nüma ga nanegü rü nanayauxgü ga nagü rü Aróü̃na nanaxãgü. Rü nüma ga Aróü̃ rü nawa naxueme̱xẽ ga gumá nagü. Rü ãmarearü guruü̃pe̱xechatacu̱xregü namaxã nichagü. Rü gumá nagü ga íyaxücü rü ãmarearü guruxü̃ namaxã ínabaegu.
10Rü ñu̱xũchi nüma ga Aróü̃ rü yema Cori ya Tupana Moichémaxã nüxü̃ ixuxü̃rüxü̃ nanaxü. Rü ãmarearü guruü̃wa ínanagu ga yema naxü̃na ga pecaduarü ütanüca̱x yamáxü̃arü chíxü̃, rü norü ñuxmigü rü ñu̱xũchi yema chíxü̃ ga nacawa nadexü̃.
11Natürü ga namachi rü naxcha̱xmüxü̃ rü yema ínapegüxü̃arü düxétüwa ínayagu.
12Rü nüma ga Aróü̃ rü yexgumarüxü̃ ta nayawíyenaxã ga yema naxü̃na ga Tupanaca̱x yaguxü̃. Rü nüma ga nanegü rü nanayauxgü ga gumá nagü rü nanatü ga Aróü̃na nanaxãgü. Rü nüma ga Aróü̃ rü gumá nagümaxã yema ãmarearü guruü̃cüwagü namaxã ínabaegu.
13Rü yemawena ga nanegü rü Aróü̃xü̃tawa nanangegü ga yema naxü̃naeru rü namachigü ga íxraxü̃gu chexcuxü̃. Rü nüma ga Aróü̃ rü ãmarearü guruü̃wa ínanagu.
14Rü yemawena dexámaxã nanayaxu ga naü̃nüta rü naparagü rü ñu̱xũchi ãmarearü guruü̃wa ínanagu wüxigu namaxã ga naxü̃ne ga yema naxü̃na.
15Rü yemawena ga Aróü̃ rü Cori ya Tupanana nanaxã ga yema ãmare ga Iraétanüxü̃arü pecaduca̱x íguxü̃. Rü nanayaxu ga yema chíbu ga pecaduarü ütanüruxü̃ ixĩxü̃. Rü nayawíyenaxã rü pecaduarü ütanüca̱x ínayagu, yema ãmare ga nüxíra yaguxü̃rüxü̃.
16Rü yexguma yaguãgu ga yema ãmare ga íguxü̃, rü yema Tupana nüxü̃ ixuxü̃ãcü nanaxü.
17Rü yemawena Cori ya Tupanana nanaxã ga yema ãmare ga trigute̱xe. Rü yema trigute̱xewa nanayaxu ga wüxi ga naxme̱xãcu nax ãmarearü guruü̃wa naguãxü̃ca̱x wüxigu namaxã ga yema ãmare ga pa̱xmama Tupanaca̱x yaguxü̃.
18Rü nüma ga Aróü̃ rü yexgumarüxü̃ ta nayawíyenaxãgü ga yema woca ga yatüxü̃ rü yema carnéru ga yatüxü̃ ga Iraétanüxü̃ Cori ya Tupanana naxãgüxü̃ nax yemamaxã nangüxmüxẽẽgüãxü̃ca̱x. Rü Aróü̃ nanegü nanayauxgü ga gumá nagü rü Aróü̃na nanaxãgü. Rü nüma ga Aróü̃ rü yema ãmarearü guruxü̃ namaxã ínabaegu.
19Rü nanegü rü yexgumarüxü̃ ta nüxna nanana ga yema woca ga yatüarü chíxü̃, rü yema carnéruarü chíxü̃, rü nareü̃, rü ngẽma naü̃nütaarü chíxü̃, rü norü ñuxmigü rü ñu̱xũchi nacaarü chíxü̃.
20Rü nüma ga Aróü̃ rü yema naremümachimaxã wüxigu nananu ga yema naxü̃nagüarü chíxü̃. Rü ñu̱xũchi ãmarearü guruü̃wa ínanagu ga yema chíxü̃.
21Natürü ga yema naremümachi rü norü tügüneperema rü Cori ya Tupanape̱xewa nayachü̱xüxãcüüxẽxẽ, yema Cori ya Tupana Moichémaxã nüxü̃ ixuxü̃rüxü̃.
22Rü nüma ga Aróü̃ rü yema Iraétanüxü̃guama naxugüme̱xẽ rü yemaacü Tupanape̱xewa mexü̃ namaxã naxuegu. Rü nawena ga nax marü Cori ya Tupanana naxãxü̃ ga ãmare ga pecaduarü ütanüca̱x ixĩxü̃, rü ãmare ga Cori ya Tupanaca̱x yaguxü̃, rü ãmare ga namaxã Tupanaxü̃ nangüxmüxẽẽxü̃, rü nüma ga Aróü̃ rü nüxna nixũgachi ga yema ãmarearü guruxü̃.
23Rü yemawena ga Moiché rü Aróü̃maxã Tupanapatagu nachocu. Rü yexguma ínachoxü̃gu rü Iraétanüxü̃maxã mexü̃ naxuegugü. Rü yexguma ga Cori ya Tupana rü guxü̃ma ga duü̃xü̃güxü̃ nanawe̱x ga norü pora.
24Rü nawa ínaxũxũ ga üxüema ga yaguxü̃ ga yema naxü̃na ga yagugüchaü̃xü̃ rü yema chíxü̃ ga ãmarearü guruü̃étügu nuxü̃. Rü yexguma yemaxü̃ nadaugügu ga Iraétanüxü̃, rü norü taãẽmaxã tagaãcü aita naxüe, rü ñu̱xũchi waixü̃müanegu nanangücuchitanü.
Currently Selected:
Lebítanüxü̃arü puracüchiga 9: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
