Lebítanüxü̃arü puracüchiga 3
3
Ãmaregü i Tupanaarü ngüxmüxẽẽruü̃chiga
1Rü ngẽxguma texé tümaarü woca i ngexü̃ rüe̱xna yatüxü̃ Cori ya Tupanana taxãxgu nax naxca̱x tayamáxü̃ca̱x rü tayaguxü̃ca̱x nax ngẽmamaxã tanangüxmüxẽẽxü̃ca̱x ya Cori ya Tupana, rü name i wüxi i naxü̃na i taxuwama chixexü̃ nax yixĩxü̃.
2Rü yíxema ãmare ixãxẽ rü tá naerugu tanuxme̱x i ngẽma tümaarü ãmare i Tupanana taxãxü̃. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü. Rü yimámaxã tá nanama̱xcugü i nacüwagü i ngẽma ãmarearü guruxü̃.
3-4Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name i Cori ya Tupanaca̱x tayagu i norü chíxü̃ i naü̃nütawa ngẽxmaxü̃, rü yima taxre ya norü ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.
5Rü nüma i chacherdótegü tá nixĩ i ãmarearü guruü̃arü üxü i yauranewa ínaguaxü̃ wüxigu ngẽma naxü̃namaxã. Rü ngẽma naema i ngẽma ãmare, rü Cori ya Tupana rü tá namaxã nataãxẽ.
6Rü ngẽxguma texé tümaxü̃natanüwa Cori ya Tupanana naxãxgu i wüxi i carnéru nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name nax wüxi i naxü̃na i yatüxü̃ rüe̱xna ngexü̃ i taxuwama chixexü̃ nax yixĩxü̃.
7-8Rü ngẽxguma texé choxna namuxgu i wüxi i carnéru, rü yíxema ãmare ixãxẽ rü tá naerugu tingõgü i ngẽma tümaarü ãmare i Tupanana taxãxü̃. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü. Rü yimámaxã tá nanama̱xcugü i nacüwagü i ngẽma ãmarearü guruxü̃.
9-10Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name i Cori ya Tupanaca̱x tayagu i norü chíxü̃, rü narexü̃ i nawemüxü̃ íyacuáxü̃gu idaene, rü norü chíxü̃ i naü̃nütawa ngẽxmaxü̃, rü yimá taxre ya ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.
11Rü ñu̱xũchi ngẽma chacherdóte rü ãmarearü guruü̃étüwa tá ínanagu i guxü̃ma i ngẽma ãmare. Rü ngẽma ãmare rü õna i Cori ya Tupanaca̱x íguxü̃ nixĩ.
12-13Rü ngẽxguma texé choxna namuxgu i wüxi i cabra, rü yíxema ãmare ixãxẽ rü tá naerugu tingõgü i ngẽma tümaarü ãmare. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü, rü yimámaxã tá nanama̱xcugü i nacüwagü i ngẽma ãmarearü guruxü̃.
14-15Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x rü tayaguxü̃ca̱x, rü name i Cori ya Tupanaca̱x tayagu i guxü̃ma i norü chíxü̃ i naü̃nütawa ngẽxmaxü̃, rü yimá taxre ya ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.
16Rü ñu̱xũchi ngẽma chacherdóte rü ãmarearü guruü̃étüwa tá ínanagu i guxü̃ma i ngẽma ãmare. Rü ngẽma ãmare rü õna i Cori ya Tupanaca̱x íguxü̃ nixĩ. Rü ngẽma naema i ngẽma õna rü Cori ya Tupana rü tá namaxã nataãxẽ. Rü guxü̃ma i ngẽma chíxü̃ rü Cori ya Tupanaarü nixĩ.
17Rü ngẽma nixĩ i wüxi i mu i guxü̃gutáma ngẽxmaechaxü̃ i pexacügüwa rü petaagüwa pexüexẽẽchigüxü̃ i ngextá ípemaxẽxü̃wa. ¡Rü taxũtáma penangõ̱x i ngẽma chíxü̃ rü yimá nagü! —ñanagürü.
Currently Selected:
Lebítanüxü̃arü puracüchiga 3: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
