Lebítanüxü̃arü puracüchiga 11
11
Ngẽma mexü̃ nax nangṍxü̃ rü ngẽma tama mexü̃ nax nangṍxü̃
(Dt. 14.3-21)
1Rü nüma ga Cori ya Tupana rü Moichémaxã rü Aróü̃maxã nidexa rü ñanagürü nüxü̃:
2-3—¡Namaxã nüxü̃ pixu i ngẽma Iraétanüxü̃ rü marü name i nanangõ̱xgü i guxü̃ma i naeü̃gü i ñoma i naanewa ngẽxmagüxü̃ i wenaxarü iyoxmüwemügüxü̃ rü taxrepatüxü̃!
4Natürü ngẽma naeü̃gü i wena iyoxmüwemügüxü̃ natürü tama taxrepatüxü̃ ¡rü taxũtáma penangõ̱x! Rü ngẽxgumarüxü̃ ta i ngẽma naeü̃gü i taxrepatüxü̃ natürü tama wena iyoxmüwemügüxü̃ ¡rü taxũtáma penangõ̱x! Rü ngẽmaca̱x i ngẽma caméyu rü woo wena niyóxmüwemü natürü taxũtáma penangõ̱x, erü tama nataxrepatü. Rü ngẽmaca̱x tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃.
5Rü ngẽxgumarüxü̃ i ngẽma naeü̃ i teyóü̃. Rü ngẽma rü wena niyóxmüwemü natürü tama nataxrepatü. Rü ngẽmaca̱x tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃.
6Rü ngẽxgumarüxü̃ i ngẽma naeü̃ i conéyu rü wena niyóxmüwemü natürü tama nataxrepatü. Rü ngẽmaca̱x tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃.
7Rü ngẽxgumarüxü̃ i cuchi rü woo nataxrepatü natürü tama wena niyóxmüwemü. Rü ngẽmaca̱x tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃.
8¡Rü taxũtáma penangõ̱x i namachi i ngẽma naeü̃gü i pexna chachu̱xuxü̃, rü bai nüxü̃ pingógümarexü̃ ega nayu̱xgux! ¡Rü namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃!
9Rü natanüwa i ngẽma choxnigü i dexáwa maxẽxü̃ i márwa rüe̱xna natügüwa rü name nax penangṍxü̃ i ngẽma choxni i ãchitawemüxü̃güxü̃ rü ãchipa̱xgüxü̃.
10Natürü ngẽma choxnigü i ngechitawemü̱xü̃güxü̃ rü ngechipa̱xgüxü̃, rü tá namaxã nagu perüxĩnüe nax choxni i tama mexü̃ yixĩxü̃ nax penangṍxü̃. Rü woo márcüã̱x yixĩxgu, rüe̱xna natügücüã̱x yixĩxgu, rüe̱xna choxni i íxraxü̃ yixĩxgu, rüe̱xna choxni i taxü̃ yixĩxgu, rü tá namaxã nagu perüxĩnüe nax choxni i tama mexü̃ yixĩxü̃ nax penangṍxü̃.
11Rü tama name nax penangṍxü̃ i ngẽma choxnigü i ngechitawemü̱xü̃güxü̃ rü ngechipa̱xgüxü̃ rü tá namaxã nagu perüxĩnüe nax choxni i tama mexü̃ yixĩxü̃ nax penangṍxü̃. Rü ngẽxguma nayuemaregu rü tá nüxü̃ pexo erü nixãũãchi.
12Rü ngẽmaãcü i guxü̃ma i ngẽma dexáwa maxẽxü̃ i ngechitawemü̱xü̃güxü̃ rü ngechipa̱xgüxü̃ rü tá namaxã nagu perüxĩnüe nax choxni i tama mexü̃ yixĩxü̃ nax penangṍxü̃.
13Rü ngẽma naeü̃gü i ãxpe̱xatügüxü̃tanüwa rü tama pexca̱x name nax penangṍxü̃ i ñaa naeü̃gü: ngẽma dawü, rü ngẽma dawü i naxchina̱xãgu bügüxü̃, rü dawü i márcüã̱x,
14rü ngẽma miránu, rü guxü̃ma i ãxpe̱xatügü i dawütanüxü̃ ixĩgüxü̃,
15rü guxü̃ma i ngurucutanüxü̃ ixĩgüxü̃,
16rü abetrú, rü murutucu, rü toxõ rü naguxü̃raü̃xü̃ i ĩyügü i íxraxü̃,
17rü ngú, rü cotua, rü yawürü,
18rü patu i chisne, rü patu i pelícanu rü ẽxcha,
19rü yawürü i chigüeña, rü guxü̃ma i cówatanüxü̃, rü taruta rü nu.
20Rü guxü̃ma i ngẽma naixchinawegü igoexü̃ rü waixü̃müanegu ĩxü̃ i ãgümücüparaxü̃ rü tama pexca̱x name nax penangṍxü̃ i ngẽma naixchinawegü, erü ngẽma rü nixãũãchi.
21Natürü name nax penangṍxü̃ i ngẽma naixchinawe i igoexü̃ rü ñu̱xũchi waixü̃müanegu ixũxü̃ rü naweama nüxü̃́ ngẽxmaxü̃ ya naparagü ya namaxã yayuxnagüchigüne.
22Rü ngẽma naixchinawegütanüwa rü name i penangõ̱x i naguxü̃raü̃xü̃ i munü.
23Natürü ngẽma togümare i naixchinawe i igoexü̃ rü waixü̃müanegu ixũxü̃ rü pexca̱x rü naxãũãchi.
24Rü ngẽxguma nayu̱xgu i wüxi i ngẽma naeü̃gü rü yíxema nüxü̃ ingógüxe rü chope̱xewa rü taxãũãchi ñu̱xmata nachüta.
25Rü yíxema yangexe i wüxi i ngẽma naeü̃ i pexna chachu̱xuxü̃ i yuxü̃ rü tanaxwa̱xe nax tanayaxuxü̃ i tümachiru. Rü chope̱xewa tá taxãũãchi ñu̱xmata nachüta.
26Rü guxü̃ma i ngẽma naeü̃ i woo naxãpatü, natürü tama taxrepatüxü̃ rü tama wena nawemü iyoxmüxü̃ rü tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃. Rü yíxema nüxü̃ ingógüxe rü naxrüxü̃ taxãũãchi.
27Rü guxü̃ma i ngẽma naeü̃gü i ãgümücüparaxü̃ i nachaname̱xẽmaxã ixũxü̃ rü tá namaxã nagu perüxĩnüe nax naeü̃gü i tama mexü̃ yixĩxü̃ nax penangṍxü̃. Rü yíxema nüxü̃ ingógüxe i ngẽma naeü̃ i yuxü̃ rü chope̱xewa tá taxãũãchi ñu̱xmata nachüta.
28Rü yíxema yangexe i wüxi i ngẽma naeü̃ i yuxü̃ rü tanaxwa̱xe nax dexámaxã tanayaxuxü̃ i tümachiru. Rü tá chope̱xewa taxüxa ñu̱xmata nachüta. Rü tá namaxã nagu perüxĩnüe nax wüxi i naeü̃ i tama mexü̃ yixĩxü̃ nax penangṍxü̃.
29Rü natanüwa i ngẽma naeü̃gü i waixü̃müanegu nügü itúgüãcü ĩxü̃, rü ñaagü nixĩgü i ngẽma pexca̱x ixãũãchixü̃: ü̃ca, rü chixcüre, rü naguxü̃raü̃xü̃ i naeü̃gü i naxtanecamaxã waixü̃müanegu ixĩxü̃,
30rü toxmachanegü, rü coyagü, rü yocagü, rü ngairegü rü chenemagü.
31Rü natanüwa i ngẽma togüamachigü i waixü̃müanegu nügü itúgüãcü ĩxü̃, rü tá namaxã nagu perüxĩnüe nax naeü̃gü i tama mexü̃ yixĩxü̃ nax penangṍxü̃. Rü yixema nüxü̃ ingógüxe i wüxi i ngẽma naeü̃ i yuxü̃ rü taxãũãchi rü ñu̱xmata nachüta.
32Rü ngẽxgumarüxü̃ ta i ngexü̃rüüxü̃ i ngẽmaxü̃gü i ngẽma naeü̃ i yuxü̃étügu nguxü̃ rü naxãũãchi. Rü chi wüxi i ngẽmaxü̃ i nainaxca̱x yixĩxgu, rü chi wüxi i naxchiru yixĩxgu, rü chi wüxi i ngẽmaxü̃ i naxcha̱xmüü̃naxca̱x yixĩxgu, rü chi wüxi i choca yixĩxgu, rüe̱xna chi wüxi i ta̱xacü i namaxã ipuracüxü̃ yixĩxgu rü naxãũãchi. Rü name nixĩ i dexáwa tanatáe rü ngéma nangẽxma erü naxãũãchi rü ñu̱xmata nachüta. Rü ngẽmawena rü tá name.
33Rü ngẽxguma ngexü̃rüüxü̃mare i ngẽma naeü̃ i yuxü̃ rü wüxi ya buetare ya waixü̃münaxca̱xgu nanguxgu, rü guxü̃ma i ngẽma naãcu i nawa ngẽxmaxü̃ rü naxãũãchi. Rü ngẽxguma ya yimá buetare rü name nax wüxicana peyapuxẽẽxü̃.
34Rü ngẽma dexá ya yimá buetarewa ngẽxmaxü̃ rü ngẽxguma ta̱xacürü õnaétügu nabaxgu, rü ngẽma õna rü naxãũãchi. Rü guxü̃ma i axexü̃ ya yima buetarewa ngẽxmaxü̃ rü naxãũãchi.
35Rü ngẽxguma nayu̱xgu i wüxi i ngẽma naeü̃ rü perü ngẽmaxü̃étügu nanguxgu rü ngẽma rü tá ta pexca̱x naxãũãchi. Rü woo perü paũarü guruü̃gu rüe̱xna gueta̱xmüü̃gu nanguxgu rü name i nagu pipogü, erü pexca̱x rü naxãũãchi.
36Rü guxãma ya yíxema nüxü̃ ingógügüxe i ngẽma naeü̃ i yuxü̃ rü taxãũãchi. Natürü ngẽma puchu i dexá i axexü̃ nawa ngẽxmaxü̃ rü tagutáma naxãũãchi.
37Rü ngẽxguma ngẽma naeü̃ i yuxü̃ rü nanetüchire itogüchaxü̃negu nanguxgu rü yima nanetüchire rü tama naxãũãchi.
38Natürü yima nanetüchire rü ngẽxguma dexámaxã yawaitanügu, rü ngẽma naeü̃ i yuxü̃ natanügu nanguxgu rü ngẽxguma nixĩ i pexca̱x naxãũãchixü̃.
39Rü ngẽxguma nayumaregu i wüxi i naeü̃ i tama pexna chachu̱xuxü̃ nax penangṍxü̃, natürü yíxema nüxü̃ ingógüxe rü taxãũãchi ñu̱xmata nachüta.
40Rü yíxema nangṍxe i ngẽma naeü̃ i yumarexü̃ rü name i tanayaxu i tümachiru. Rü tá taxãũãchi ñu̱xmata nachüta. Rü yíxema yangexe i ngẽma naeü̃ i yumarexü̃ rü name i tanayaxu i tümachiru. Rü taxãũãchi ñu̱xmata nachüta.
41Rü tama name nax penangṍxü̃ i wüxi i naeü̃ i waixü̃müanegu naxtanecamaxã nügü itúchigüãcüma ixũxü̃, erü ngẽma naeü̃ rü naxãũãchi.
42Rü guxü̃ma i ngẽma naeü̃gü i waixü̃müanegu naxtanecamaxã nügü itúchigüãcüma ixĩxü̃, rü tama name nax penangṍxü̃ rü bai i wüxi i ngẽma naeü̃ nax pengṍxü̃, rü woo ngẽma naxtanecamaxã nügü itúchigüãcüma ixũxü̃, rüe̱xna ngẽma ãgümücüparaxü̃ rü muparaxü̃, erü ngẽma naeü̃gü rü nixãũãchi.
43Rü pema rü tama name nax pegü namaxã pexãũãchi i ngẽma naeü̃gü i waixü̃müanegu naxtanecamaxã nügü itúchigüãcüma ixĩxü̃.
44Erü choma nixĩ i Cori ya perü Tupana chixĩxü̃. Rü pema rü name nax pengearü ãũãchiã́xü̃ rü pexüünegüxü̃ erü choma rü chaxüüne. Rü ngẽmaca̱x nixĩ i tama namexü̃ nax pegü namaxã pexãũãchixü̃ i ngẽma naeü̃gü i waixü̃müanegu naxtanecamaxã nügü itúchigüãcüma ixĩxü̃.
45Rü choma nixĩ i perü Cori chixĩxü̃ i Equítuanewa pexü̃ íchagaxü̃xü̃ nax perü Tupana nax chixĩxü̃ca̱x. Rü ngẽmaca̱x i pema rü name nax pixüünexü̃ erü choma rü chaxüüne.
46Rü ngẽmagü nixĩ i ngẽma ucu̱xẽgü nachiga i naeü̃gü i waixü̃müanewa maxẽxü̃, rü naeü̃gü i ãxpe̱xatüxü̃, rü naeü̃gü i dexáwa maxẽxü̃, rü naeü̃gü i waixü̃müanegu naxtanecamaxã nügü itúchigüãcüma ixĩxü̃.
47Rü pemaxã nüxü̃ chixu i ngẽma ucu̱xẽgü nax ngẽmaãcü nüxü̃ pecuáxü̃ca̱x nax ngexü̃rüüxü̃ yixĩxü̃ i ngẽma imexü̃ rü ngexü̃rüüxü̃ yixĩxü̃ i ngẽma ixãũãchixü̃, rü ngexü̃rüüxü̃ yixĩxü̃ i ngẽma naeü̃gütanüwa rü mexü̃ nax penangṍxü̃ rü ngexü̃rüüxü̃ yixĩxü̃ i ngẽma naeü̃gü i tama mexü̃ nax penangṍxü̃ —ñanagürü ga Tupana.
Currently Selected:
Lebítanüxü̃arü puracüchiga 11: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
