Popera ga Yúda ümatüxü̃ 1
1
Yema yaxõgüxü̃xü̃ narümoxẽ ga Yúda
1Choma i Yúda i Chantiáguenexẽ ya Ngechuchu ya Cristuarü puracütanüxü̃ chixĩ i pexü̃ charümoxẽxü̃ i pema nax Tanatü ya Tupana pexü̃ dexü̃ rü pexü̃ ngechaü̃xü̃ rü Ngechuchu ya Cristu pexna dauxü̃.
2Rü chanaxwaxe i guxü̃guma Tupanaaxü̃́ pengechaü̃tümüxü̃gü, rü pexü̃ nataãẽxẽẽgü, rü pexü̃ nangechaü̃gü.
Duü̃xü̃gü i doramaxã ngúexẽxẽtaegüxü̃chiga
3Pa Chauenexẽgü ya Pexü̃ Changechaü̃güxex, noxri rü poraãcü choxü̃́ nangúchaü̃ nax pexca̱x chanaxümatüxü̃ nachiga i ngẽma maxü̃ i taguma gúxü̃ i pema rü choma tüxü̃́ ngẽxmaxü̃. Natürü ñu̱xma rü chauãẽwa ínangu nax namexü̃ nax pexca̱x chanaxümatüxü̃ nax pexü̃ chaxucu̱xẽxü̃ca̱x rü ípenapoxü̃xü̃ca̱x i ngẽma ore i aixcüma ixĩxü̃ ga nũxcüma wüxicanatama Tupana norü duü̃xü̃güna ãxü̃.
4Erü ñu̱xma rü nangẽxma i ñuxre i duü̃xü̃gü i norü doramaxã petanügu chocuxü̃. Rü ngẽma duü̃xü̃gü i chixexü̃gu maxẽxü̃ rü ñanagürügü: “Tupana rü namecümaxüchi rü ngẽmaca̱x taxũtáma pexü̃ napoxcue ega woo chixexü̃gu pemaxẽgu”, ñanagürügü. Rü naétü tama nüxü̃ nacua̱xgüchaü̃ ya tórü Cori ya Ngechuchu ya Cristu ya tórü yora ixĩcü. Natürü ngẽma duü̃xü̃gü i ngẽmaãcü maxẽxü̃, rü woetama nũxcümama Tupanaarü ore i ümatüxü̃wa rü marü nüxü̃ nixu nax Tupana tá napoxcuexü̃.
5Rü woo marü nüxü̃ nax pecuáxü̃, natürü chanaxwa̱xe nax pexna nüxü̃ chacua̱xãchixẽẽxü̃ ga yema nüxü̃ ngupetüxü̃ ga yema nũxcümaü̃güxü̃ ga Iraétanüxü̃ ga Moichéwe rüxĩxü̃. Rü nüma ga Cori ya Tupana rü Equítuanewa ínananguxü̃xẽxẽ, natürü yemawena rü nanadai ga yema tama nüxü̃́ yaxõgüchaü̃xü̃.
6Rü ngẽxgumarüxü̃ ta pexna nüxü̃ chacua̱xãchixẽxẽ nax ñuxãcü namaxã nangupetüxü̃ ga yema daxũcüã̱x ga orearü ngeruü̃gü ga nügü rüyexeragüchaü̃xü̃ rü nüxna ixĩgachixü̃ ga nachica ga Tupana nagu namugüxü̃. Rü yemaca̱x ga Tupana rü ẽanexü̃wa nanawogü, rü ngẽxma nanapoxcue ñu̱xmatáta nawa nangu i ngẽma ngunexü̃ i nagu duü̃xü̃güxü̃ yacagüxü̃.
7Rü yexgumarüxü̃ ta nüxü̃ nangupetü ga gumá ĩanegü ga Chodóma rü Gomóra rü gumá ĩanegü ga norü ngaicamana yexmagü̃ne. Rü nüma ga yema duü̃xü̃gü rü nügü inaxãgü nax naxügüã̱xü̃ca̱x ga naguxü̃raü̃xü̃ ga naxü̃nearü ngúchaü̃gü. Rü yemaca̱x ga Tupana rü yema üxü i taguma gúxü̃maxã ínanagu. Rü inayanaxoxẽxẽ ga gumá ĩanegü nax wüxi ga cua̱xruxü̃ yixĩxü̃ca̱x.
8Natürü woo ngẽmaxü̃ nax nacua̱xgüxü̃ i ngẽma idoraexü̃ i petanügu chocuxü̃, natürü norü chixexü̃gu narüxĩnüẽãma. Rü poraãcü norü ngúchaü̃maxã nanachixexẽxẽ i naxü̃ne, rü tama tórü Cori ya Tupanaga naxĩnüechaü̃. Rü Tupanaarü orearü ngeruü̃gü i daxũcüã̱xmaxã naguxchigagü.
9Rü ngẽma duü̃xü̃gü i naechitamare idexagüxü̃ rü tama Tupanaarü orearü ngeruxü̃ ga Miguérerüxü̃ nügüna nadau i norü orewa. Rü gumá Miguére rü woo guxü̃ i Tupanaarü orearü ngeruü̃gü i daxũcüã̱xarü ãẽ̱xgacü nax yixĩxü̃, natürü tama Chatanámaxã naguxchiga ga yexguma Moichéxü̃neca̱x yéma nügümaxã yaporagatanücüüxgu. Natürü nüma ga Miguére rü ñanagürümare:
“Cori ya Tupana tá cuxü̃ nanga”,
ñanagürümare.
10Natürü ngẽma duü̃xü̃gü i doramaxã petanügu chocuxü̃, rü chixri nachiga nidexagü i ngẽma tama nüxü̃ nacuáxü̃. Rü ngẽma chixexü̃ i nüxü̃ nacuáxü̃ rü ñoma naeü̃gü i tama naãxẽxü̃ icuáxü̃rüxü̃, nagu namaxẽ. Natürü ngẽma chixexü̃ca̱x, rü Tupana tá nanapoxcue.
11Rü wüxi i ngechaü̃xü̃chi nixĩ naxca̱x i ngẽma duü̃xü̃gü erü Caíü̃ ga naenexẽxü̃ imáxü̃rüxü̃ nixĩgü. Rü ãẽ̱xgacü ga Balaáü̃rüxü̃ diẽruca̱x chixexü̃ naxügü. Rü Corérüxü̃ tama Tupanaga naxĩnüechaü̃, rü ngẽmaca̱x tá nayue.
12Rü ngẽxguma pema i yaxõgüxü̃ õnaca̱x pengutaque̱xegügu, rü ngẽma duü̃xü̃gü rü wüxi i ãnexüchi nixĩgü. Erü nataãẽgü, rü poraãcü nachibüe rü naxaxegü. Rü nügüguxicatama narüxĩnüe. Rü ngẽma duü̃xü̃gü rü taxuwama nime, rü ñoma caixanexü̃ i ngearü pucüã́xü̃ i buanecü ingexü̃rüxü̃ nixĩgü. Rü ñoma nanetügü i tama ixoxü̃ i ngẽxguma norü owa nanguxgurüxü̃ nixĩgü. Rü ñoma naigü i guxü̃ma i naxchúma̱xãmaxã nabe̱xgüxü̃ rü yuexüchixü̃rüxü̃ nixĩgü i ngẽma duü̃xü̃gü.
13Rü ñoma yuape i taxü̃ i norü chixixü̃ i ãũãchixü̃ naxãnacüwa yatáxü̃rüxü̃ nixĩgü, rü ngẽma naxügüxü̃ rü taxü̃ i norü ãne nixĩ. Rü ñoma woramacurigü ya nu ne naxĩmarecürüxü̃ nixĩgü. Natürü Tupana rü marü ngẽma duü̃xü̃gümaxã nanaxuegu nax ngẽma waanexü̃chixü̃wa guxü̃gutáma nawogüãxü̃.
14-15Rü gumá nüxíraü̃cü ga duü̃ ga Adáü̃ rü nawe naxü ga gumá norü 7 ga nataxa ga Enóx. Rü nüma ga Enóx rü yema duü̃xü̃güchiga nidexa ga yexguma Tupana yadexaxẽẽgu, rü ñanagürü:
“Nüxü̃ chadau ya Cori ya Tupana nax muxũchixü̃ma i norü orearü ngeruü̃gü i daxũcüã̱xmaxã núma ũcü nax duü̃xü̃güna naca̱xaxü̃ca̱x i norü maxü̃chiga rü napoxcueãxü̃ca̱x i guxü̃ma i ngẽma chixexü̃ ügüxü̃ rü namaxã guxchigagüxü̃”,
ñanagürü ga Enóx ga Adáü̃taxa ixĩcü rü yema duü̃xü̃güchiga nidexa ga yexguma Tupana yadexaxẽẽgu, rü ñanagürü:
“Rü nüxü̃ chadau ya Cori ya Tupana nax muxũchixü̃ i norü orearü ngeruü̃gü i daxũcüã̱xmaxã núma ũcü nax duü̃xü̃güna naca̱xaxü̃ca̱x i norü maxü̃chiga rü napoxcueãxü̃ca̱x i guxü̃ma i ngẽma duü̃xü̃gü i chixexü̃ ügüxü̃ rü namaxã guxchigagüxü̃”,
ñanagürü.
16Rü ngẽma duü̃xü̃gü i norü doramaxã petanügu chocuxü̃ rü ta̱xacüca̱x idexagüwa̱xexüchixü̃ nixĩgü, rü toguã̱xü̃ ixuxwa̱xegüxüchixü̃ nixĩgü. Rü ngẽma duü̃xü̃gü rü noxrütama ngúchaü̃ca̱x daugüxü̃ nixĩgü. Rü nügü icua̱xüü̃güxü̃ nixĩgü. Rü nümaxü̃ mea tümachiga nidexagüneta ya duü̃xẽgü, nax tümaxü̃tawa ta̱xacü nayauxgüxü̃ca̱xmare.
Yúda nayaxucu̱xẽgü ga yema yaxõgüxü̃
17Pa Chauenexẽgü ya Pexü̃ Changechaü̃güxe, ¡nüxna pecua̱xãchie ga yema ore ga pemaxã nüxü̃ yaxugügüxü̃ ga tórü Cori ya Ngechuchu ya Cristuarü ngúexü̃gü ga imugüxü̃!
18Rü nümagü rü ñanagürügü pexü̃:
“Ngẽxguma nagúxchaü̃gu i naane rü tá nangẽxma i duü̃xü̃gü i tá nüxü̃ cugüexü̃ i Tupanaarü ore rü noxrütama ngúchaü̃ i chixexü̃gumare maxẽxü̃”,
ñanagürügü pexü̃.
19Rü ngẽma duü̃xü̃gü nixĩ i pexü̃ itoyexü̃ nax tama wüxigu perüxĩnüexü̃ca̱x rü tama mea peyaxõgüxü̃ca̱x. Rü nümagü rü naxü̃nearü ngúchaü̃we narüxĩ, rü tama nawa nangẽxma i Tupanaãxẽ ya Üünecü.
20Natürü pemax, Pa Chauenexẽgü ya Pexü̃ Changechaü̃güxe, ¡rü pegü perüngü̃xẽxẽ̱x nax guxü̃guma yexeraãcü nagu pexĩxü̃ rü peyaxõgüxü̃ i ngẽma ore i üünexü̃ i marü peyauxgüxü̃! ¡Rü guxü̃guma Tupanaãxẽ i Üünexü̃arü ngü̃xẽẽmaxã peyumüxẽgü!
21¡Rü pegüna pedaugü nax guxü̃guma pewa nangẽxmaxü̃ca̱x i Tupanaarü ngechaü̃! ¡Rü mea ípenangu̱xẽxẽx i ngẽma ngunexü̃ i nagu tá núma naxũxü̃ ya tórü Cori ya Ngechuchu ya Cristu nax nüxü̃́ ingechaü̃tümüxü̃gügagu tüxna naxããxü̃ca̱x i maxü̃ i taguma gúxü̃!
22¡Rü pexü̃́ nangechaü̃tümüxü̃gü i ngẽma turaexü̃ i norü õwa, rü nüxü̃ perüngü̃xẽxẽgü nax mea yaxõgüãxü̃ca̱x!
23Rü togü, ¡rü norü pecaduwa ípenatúxü̃ nax namaxẽxü̃ca̱x rü tama yima üxü ya taguma ixoxü̃newa yawocuxü̃ca̱x! ¡Rü pexü̃́ nangechaü̃tümüxü̃gü i ngẽma tama yaxõgüxü̃! ¡Natürü pegüna pedaugü nax tama norü chixexü̃gu peyixü̃ca̱x! ¡Rü nüxü̃ pixo i nacüma i chixexü̃ rü woo naxchiru i norü chixexü̃maxã ãũãchixü̃!
Tupanaxü̃ yacua̱xüxü̃ãcüma inayacua̱xẽxẽ ga norü popera
24-25Rü yimá nüxicatama Tupana ixĩcü ya tórü Maxẽxẽẽruxü̃ ixĩcü, rü nüxü̃́ nangẽxma i pora nax pexna nadauxü̃ nax tama pecadugu peyixü̃ca̱x. Rü nüxü̃́ nangẽxma i pora nax iyanaxoxẽẽãxü̃ca̱x i perü chixexü̃gü nax ngẽmaãcü ngearü pecaduãcüma rü taãẽãcüma nape̱xewa pengugüxü̃ca̱x i ngextá nüma ínaxüünexü̃wa ãẽ̱xgacü íyixĩxü̃wa. Rü tanaxwa̱xe i tórü Cori ya Ngechuchu ya Cristuégagu Tupanaxü̃ ticua̱xüü̃gü, erü nüma rü naxüüne, rü guxü̃étüwa nangẽxma, rü guxü̃arü yexera napora, rü guxü̃maxã inacua̱x. Rü yemaacü nixĩ ga nũxcüma, rü ngẽmaãcü nixĩ i ñu̱xmax, rü guxü̃gutáma ngẽmaãcü nixĩ. Rü ngẽmaãcü yixĩ.
Currently Selected:
Popera ga Yúda ümatüxü̃ 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.