Yoé 3
3
1Rü nüma ya Cori ya Tupana rü ñanagürü: —Rü ngẽxguma tá ínanguxgu i ngẽma ngunexü̃ rü tá chanawoeguxẽxẽ i ngẽma Yerucharéü̃cüã̱xgü rü Yudáanecüã̱xgü ga togü ga nachixü̃anegügu woonexü̃.
2Rü wüxigu tá chanangutaque̱xexẽxẽ i guxü̃ma i ngẽma togü i nachixü̃anecüã̱xgü i duü̃xü̃gü, rü Yochapáxarü doxonexü̃wa tá chanagagü. Rü ngéma tá nixĩ i nüxna naxca̱x chacagüxü̃ ga yema chixexü̃ ga chorü duü̃xü̃gü ga Iraécüã̱xgümaxã naxügüxü̃. Yerü guxü̃ ga nachixü̃anegügu nanawoone ga Iraétanüxü̃, rü ñu̱xũchi ngẽma togü nügü nayanu ga yema chorü naane.
3Rü ngẽma togü i nachixü̃anecüã̱xgü i duü̃xü̃gü rü sortéuãcü nügü nayanu ga chorü duü̃xü̃gü, rü tümamaxã nataxegü ga buxegü ga iyatüxe rü ingexe. Rü yemawena ga guxema buxegütanü rü bínugu rü ngexü̃gü ga ngĩxü̃negümaxã taxexü̃gu tüxü̃ nagu̱xẽẽgü ga guxema diẽru.
Cori ya Tupana rü tá nanapoxcue i ngẽma togü i nachixü̃anegü
4¿Rü ta̱xacü ẽ̱xna nixĩ i chomaxã penaxwa̱xegüxü̃ i pemax, Pa Tírucüã̱xgü, rü Chidóü̃cüã̱xgü, rü Firitéugü? ¿Ẽ̱xna chomaxã pegü pedaixchaü̃? ¿Ẽ̱xna penaxwa̱xe nax ta̱xacü pexü̃́ chaxütanüxü̃? Choma rü paxatáma poxcu pexca̱x íchanguxẽxẽ.
5Pemax rü naxca̱x choxü̃́ pengĩ̱xgü ga chorü diẽrumü rü chorü úiru. Rü ñu̱xũchi perü tupananetapatagüwa penana ga yema chorü yemaxü̃gü.
6Rü yáxü̃wama penagagü ga yema Yudáanecüã̱xgü rü Yerucharéü̃cüã̱xgü, rü ñu̱xũchi puracütanüxü̃xü̃ Griégugüxü̃ namaxã petaxegü.
7Natürü i choma rü ngẽma nachixü̃ane i nagu namaxã petaxegüxü̃wa tá íchayagaxü̃. Rü ngẽxguma i choma rü yematama ga ngúxü̃ ga nüxü̃ pingexẽẽgüxü̃ tá pexü̃ chingexẽxẽ.
8Rü Yudíugüxü̃ tá tümamaxã chataxe ya yíxema penegü rü pexacügü nax ngẽmaãcü i ngẽma Yudíugü rü ngẽma duü̃xü̃gü i yáxü̃guxü̃ i naanegu ãchiü̃güxü̃ i Chabéugüxü̃ tümamaxã nataxegüxü̃ca̱x. Rü choma ya Cori ya Tupana nixĩ i pemaxã nüxü̃ chixuxü̃ i ngẽma —ñanagürü.
9Rü name nixĩ i guxü̃ i nachixü̃anecüã̱xgümaxã nüxü̃ pixuxü̃ i ñaa ore. ¡Rü daica̱x pegü ípemexẽxẽ! ¡Rü penanutaque̱xe i perü churaragü! ¡Rü nua naxĩ rü inaxĩãchi i ngẽma churaragü!
10¡Rü ngẽma perü lampagüwa taragü pexügü! ¡Rü perü tríguarü wiiruü̃güwa wocaegü pexügü! Rü yíxema tama poraxe rü name i ñatagürü: “Choma rü chapora”, ñatagürü.
11Rü guxãma i pemax, Pa Nachixü̃anegü i Ngaicamagüxü̃x ¡rü paxa nua pexĩ rü nuxã peyangutaque̱xe! Rü woo i ngẽma nachixü̃ane i tama daigu rüxĩnüxü̃ rü name nax daiwa naxũxü̃.
12¡Pegü pemexẽxẽgü, Pa Nachixü̃anegüx, rü Yochapáxarü doxonexü̃wa pexĩ! Erü ngéma tá nixĩ i Cori ya Tupana i norü chixexü̃güca̱x nüxna naca̱xaxü̃ i guxü̃ma i ngẽma nachixü̃anegü i Iraéanena ngaicamagüxü̃.
13Rü yema nax poraãcü chixexü̃ naxügüxü̃, rü marü norü ngunexü̃wa nangu i ngẽma nachixü̃anegü nax penadaixü̃ ñoma trigu norü ngunexü̃wa nanguxgu nax yachexexü̃rüxü̃. Rü nagu pepugüe i ngẽma nachixü̃anegü ñoma úbagü bínuca̱x ipumüxü̃rüxü̃.
14Rü marü muxü̃ma i duü̃xü̃gü ngẽma doxonexü̃gu nangutaque̱xegü, erü marü ningaica i ngẽma ngunexü̃ i nagu Cori ya Tupana tá namaxã naxueguxü̃ i ngẽma nachixü̃anegüarü poxcu.
15Rü tá nixogü ya üa̱xcü rü tauemacü. Rü taxũtáma marü ninaigü i ẽxtagü.
16Nüma ya Cori ya Tupana rü ngẽxguma yima ma̱xpǘne ya Chióü̃ ya Yerucharéü̃wa ngẽxmanewa yadexaxgu, rü ngẽma naga rü ñoma duruanexü̃rüxü̃ nixĩ. Rü ngẽxguma i ngẽma daxũguxü̃ i naane rü ñoma i naane rü nidu̱xru. Natürü i nüma ya Cori ya Tupana rü wüxi i poxü̃ruxü̃ nixĩ naxca̱x i Iraétanüxü̃ i norü duü̃xü̃gü ixĩgüxü̃.
Cori ya Tupana rü Yudáanearü duü̃xü̃gümaxã mexü̃ naxuegu
17Rü nüma ya Cori ya Tupana rü ñanagürü: —Pemax rü tá nüxü̃ picua̱xãchitanü nax choma i perü Cori ya Tupana rü yima chorü ma̱xpǘne ya Üünene ya Chióü̃wa chamaxü̃xü̃. Rü yima ĩane ya Yerucharéü̃ rü wüxi ya ĩane ya üünene tá nixĩ. Rü tagutáma wena to i nachixü̃anecüã̱xgü nagu nachocu.
18Rü ngẽma ngunexü̃gu rü yima ma̱xpǘnegüwa tá nangẽxma ya tacü ya bínu rü lechi ñoma dexárüxü̃. Rü Yudáanearü natügüwa rü tá nata i norü dexá. Rü yima chopata ya taxü̃newa rü tá nichuxchu i wüxi i dexá i tá Chitíü̃arü doxonexü̃wa yawaianexẽẽxü̃.
19Rü Equítuane rü tá nachixe, rü Edóü̃ane rü wüxi i naane i ngextá taxúema íxãpataxü̃warüxü̃ tá nixĩ. Yerü Yudáchixü̃aneca̱x ínayaxüãchi rü nanadai ga duü̃xü̃gü ga taxuxü̃ma chixexü̃ ügüxü̃.
20-21Rü ngẽmaca̱x i choma rü tümaca̱x chanu rü tá chanadai i ngẽma Equítuanecüã̱xgü rü Edóü̃anecüã̱xgü, rü taxũtáma namaxã chixãũxãchi i ngẽma chorü duü̃xü̃güxü̃ daixü̃. Natürü ngẽma Yudáane rü yima Yerucharéü̃arü ĩane rü guxü̃gutáma duü̃xü̃gü nawa namaxẽ. Rü choma ya Cori ya Tupana rü nawa tá chamaxü̃ ya yima ma̱xpǘne ya Chióü̃ ya Yerucharéü̃wa ngẽxmane —ñanagürü ga Cori ya Tupana.
Currently Selected:
Yoé 3: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
