Yoé 1
1
Munügü rü Iraétanüxü̃arü nanetügü nangõ̱xgü
1Ñaa nixĩ ga Cori ya Tupanaarü ore ga Petué nane ga Yoémaxã nüxü̃ yaxuxü̃.
2-4Guxü̃ma ga perü nanetügü rü munü pexü̃́ nanangõ̱x. Rü yema taxü̃ ga munügü íyaxüxẽẽgüxü̃ rü yema munügü ga ixíraxü̃ nanangõ̱xgü. Rü dücax, Pa Yaxguã̱xgü rü Guxãma i Pemax i Ñaa Nachixü̃anecüã̱xgüx, rü pexna chaca ¿rü ñuxgu nüxü̃ pedauxü̃ ga wüxi ga chixexü̃ ga ñaarüxü̃ ixĩxü̃? Rü nũxcüma ga penatügü rü taguma nüxü̃ tadau i ngẽma ñu̱xma pexü̃ ngupetüxü̃. Rü ngẽmaca̱x name i pexacügümaxã nüxü̃ pixu i ngẽma ñu̱xma pexü̃ ngupetüxü̃, rü nümagü rü tá naxacügümaxã nüxü̃ nixugügü, rü petaagü rü naxacügümaxã ta nüxü̃ nixugügü.
5Pa Ngãxẽwa̱xexü̃x ¡rü peba̱i̱xãchie! ¡Pexauxe, Pa Bínuarü Axruü̃güx! Erü ngẽma úbatüxü̃ rü tá inayarütaxu.
6Erü ngẽma munügü rü ñoma muxũchixü̃ i churaragü i poraexü̃rüxü̃ chauchixü̃anegu nachocu. Rü napütagü rü ñoma leóü̃pütagürüxü̃ nixĩgü.
7Rü ngẽma munügü rü tórü úbanecügu rü tórü igunecügu nawagüe rü nayangeatüxẽxẽ rü ngẽmaãcü nacho̱xtanümare i nachacüxü.
8Rü chorü duü̃xü̃gü rü naxauxe ngĩrüxü̃ i wüxi i pacü i ngechaü̃chirugu icu̱xcü erü ngẽma ngextü̱xücü i namaxã naxãtechaü̃xü̃ rü nayu.
9Rü ngẽma chacherdótegü rü naxauxe erü Tupanapata ya taxü̃newa rü marü nataxuma i trigute̱xe rü bínu nax ngẽma Cori ya Tupanana naxãmaregüxü̃ca̱x.
10Rü ngẽma naanegü rü nachianemare rü ngẽma waixü̃mü rü nipamare. Rü ngẽma trigugü rü nayue, rü ngẽma úbanecügü rü nipagü, rü ngẽma oribunecügü rü narüñexgü.
11Rü pema nax naanewa pepuracüexü̃ rü penatoxü̃ ga úbagü rü trigugü rü chebádagü ¡rü poraãcü pengechaü̃güãcüma pexauxe! Erü ngẽma trigu rü chebáda ga petogüxü̃ rü pexü̃́ nayue, rü ngẽmaca̱x taxuxü̃ma pibuxgü.
12Rü perü úbanecügü rü nipagü rü nayue ga perü igunecü. Rü nipagü ga perü ori̱xgü ga boxragü, rü cucugü, rü mansánagü rü guxü̃ma ga perü nanetügü ga peanewa yexmagüxü̃. Rü yemaacü nüxü̃́ inarüxo ga norü taãxẽ ga guxü̃ma ga duü̃xü̃gü.
Name i Tupanaarü ngechaü̃ca̱x nadaugü
13Rü pemax, Pa Chacherdótegü i Tupanaarü Ãmarearü Guruxü̃maxã Icua̱xgüxex, rü name nixĩ i naxchiru i témüxü̃gu picu̱xgü, rü pexauxe, erü perü Tupanapata ya taxü̃newa rü marü nataxuma i trigu rü bínu i perü ãmareruxü̃ ixĩxü̃.
14¡Rü naxca̱x pengẽma i guxü̃ma i duü̃xü̃gü nax aureãcüma nayumüxẽgüxü̃ca̱x! ¡Rü Cori ya Tupanapata ya taxü̃negu penangutaque̱xexẽxẽ i perü ãẽ̱xgacügü i yaxguã̱xgü, rü guxü̃ma i duü̃xü̃gü i ñaa nachixü̃anecüã̱xgü! ¡Rü ngéma perü yumüxẽwa Tupanana peca nax pexü̃ nangü̃xẽxẽxü̃ca̱x!
15Erü marü ningaica i Tupanaarü poxcu. Rü ngẽma ngunexü̃ rü poraãcü tá naxãũcüma erü Yimá Guxãétüwa Ngẽxmacü rü tá taxü̃ i poxcu taxca̱x ínanguxẽxẽ.
16Rü yema munügü rü tape̱xewatama tüxna nanapu ga tawemü rü yemaacü inarüxo ga Tupanapata ya taxü̃newa nax itaãẽgüxü̃.
17Rü guma nanetüchire rü nayue ga yema ínatogüxü̃wa. Rü yema trigu rü inayarüxo. Rü guma ĩpatagü ga nanetü nagu gücune rü marü ningeãcu rü nichixe.
18Rü taiyamaxã narüdoxe i wocagü. Rü natüca̱xmamare maxẽ ne nadaugü i wocagü, rü ngẽma carnérugü rü niyuetanü.
19Rü cuxna chaca, Pa Corix, erü yima maxẽgü i ngextá taxúema íxãpataxü̃wa rüxügücü, rü ñu̱xũchi ngẽma naigü i naanewa rüxügüxü̃ rü üxüxü̃ ínanagu.
20Rü woo i ngẽma naeü̃gü i naixnecücüã̱x rü cuxna nacagüe, erü nayachegü i natügü, rü ñu̱xũchi üxü ínanagu ya yima maxẽgü.
Currently Selected:
Yoé 1: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
