Ãẽ̱xgacügü ga guxchaxü̃güarü mexẽxẽruü̃gü 8
8
Yedeóü̃ rü Madiáü̃tanüxü̃arü ãẽ̱xgacügüxü̃ ínayauxü̃
1Rü Yedeóü̃maxã nanue ga Efraíü̃tanüxü̃, rü ñanagürügü: —¿Tü̱xcüü̃ tama toxca̱x cungema ga yexguma noxri Madiáü̃tanüxü̃gümaxã pegü peda̱i̱xgu? —ñanagürügü.
2Rü yexguma nüma ga Yedeóü̃ rü nanangãxü̃ rü ñanagürü: —¿Tama ẽ̱xna nüxü̃ pecua̱x nax yema choma chaxüxü̃arü yexera yixĩxü̃ ga yema pema pexügüxü̃? Pema nagu perüxĩnüe nax naxãũcümaxü̃ ga yema toma taxüxü̃ rü tama naxãũcümaxü̃ ga yema pema pexüxü̃. Natürü pemaxã nüxü̃ chixu rü yema toma taxüxü̃arü yexera nixĩ ga yema pema pexüxü̃.
3Rü pema rü Tupanaarü ngü̃xẽẽmaxã ípenayauxü̃ ga Oréx rü Chéx ga Madiáü̃tanüxü̃arü ãẽ̱xgacügü. ¿Rü ta̱xacüwa chi inayexeramaexü̃ ga yema toma taxüxü̃ ega namaxã nügü nanguxgu ga yema pema pexügüxü̃? —ñanagürü. Rü yexguma ga yema Yedeóü̃arü dexaxü̃ naxĩnüegu ga Efraíü̃tanüxü̃ rü narüngüxmüe.
4Rü nüma ga Yedeóü̃ rü norü 300 ga churaragümaxã natü ga Yudáü̃wa nangugü. Rü nichoü̃ama woo poraxãcüxüchima nipae yerü norü uanügüwe nangẽgü.
5Rü yexguma ĩane ya Chucóxwa nangugügu, rü nüma ga Yedeóü̃ rü yémacüã̱xgüna õnaca̱x naca, rü ñanagürü: —Name nixĩ i ta̱xacü i ngṍxü̃ nüxna pexã i chorü churaragü erü poraãcüma nipaexüchi. Rü nawe tingẽxü̃tanü i ngẽma taxre i Madiáü̃tanü̃xü̃güarü ãẽ̱xgacü i Zéba rü Salmuná —ñanagürü.
6Natürü nüma ga Chucóxarü ãẽ̱xgacügü rü Yedeóü̃xü̃ nangãxü̃gü rü ñanagürügü: —¿Tü̱xcüü̃ chi i tanachibüexẽẽxü̃ i curü churaragü ega taxũta ícunayauxü̃gu i Zéba rü Salmuná? —ñanagürügü.
7Rü nüma ga Yedeóü̃ rü nanangãxü̃ rü ñanagürü: —Marü name, rü Tupanaarü ngü̃xẽẽmaxã tá ítanayauxü̃ i Zéba rü Salmuná. Rü ngẽxguma marü ítanayauxü̃gu rü nuxã tá ítichocu rü pexü̃ tá tuxuchacüxümaxã rü chuchuxü̃maxã tá pexü̃ ticua̱i̱xgü —ñanagürü.
8Rü yéma inaxũãchi ga Yedeóü̃ rü ĩane ga Penuéwa nangu. Rü yéma rü ta yema Chucóxwa naxca̱x ínaca̱xü̃ca̱x ínaca nüxna ga Penuécüã̱xgü. Natürü nüma ga Penuécüã̱xgü rü yema Chucóxwa Yedeóü̃xü̃ namaxã nangãxü̃güxü̃rüxü̃ nanangãxü̃gü.
9Rü yexguma nüma ga Yedeóü̃ rü nanangãxü̃ rü ñanagürü: —Ngẽxguma chataeguxgu rü charüporamaegu, rü tá chayawa̱xẽxẽ i ñaa perü ĩanearü dauxü̃taechica —ñanagürü.
10Rü nüma ga Zéba rü Salmuná rü Cacówa nayexmagü namaxã ga 15,000 ga norü churaragü yerü yexicatama nixĩ ga guxü̃ma ga norü churaragü ga éstewaama ne ĩxü̃ ga íyaxügüxü̃, yerü daigu marü nayue ga 120,000 ga norü churaragü.
11Rü nüma ga Yedeóü̃ rü yema nama ga naxnücüanepechinügu idaxü̃gu nixũ ga ĩanegü ga Nóba rü Yobeáarü éstewaama. Rü norü uanügüca̱x ínayaxüãchi ga yexguma yema norü uanügü tama nagu írüxĩnüeyane.
12Rü yexguma nüma ga Zéba rü Salmuná rü nibuxmü. Natürü nüma ga Yedeóü̃ rü nawe nangẽgü rü ínayayauxü̃. Rü guxü̃ma ga yema Madiáü̃tanüxü̃arü churaragü rü poraãcü namuü̃e.
13-14Rü nawena ga nax nügü nada̱i̱xü̃, rü nüma ga Yedeóü̃ ga Yoá nane rü Yérearü chopetüchicagu nataegu. Rü nayayauxgü ga wüxi ga ngextü̱xücü ga Chucóxcüã̱x rü nüxna naca. Rü nüma ga gumá ngextü̱xücü rü Yedeóü̃ca̱x nanaxümatü ga 77 ga Chucóxarü ãẽ̱xgacügüéga.
15Rü yexguma nüma ga Yedeóü̃ rü Chucóxwa nangu rü yémacüã̱xgümaxã nidexa, rü ñanagürü: —¿Nüxna pecua̱xãchiexü̃ nax ñuxãcü choxü̃ pecugüexü̃, rü tama choxü̃ perüngü̃xẽẽgüchaü̃xü̃? Rü pema rü tama penachibüexẽẽxü̃ ga chorü churaragü ga ipaexü̃, nagagu nax taxũta ítanayauxü̃xü̃ ga Zéba rü Salmuná. Rü dücax, ñaagü nixĩ i ñu̱xmax —ñanagürü.
16Rü yexguma nüma ga Yedeóü̃ rü nanayaxu ga tuxuchacüxü rü chuchuxü̃chacüxü, rü yemamaxã nayacua̱i̱xgü ga yema Chucóxarü ãẽ̱xgacügü.
17Rü yemawena rü nayawa̱xẽxẽ ga guma ĩane ga Penuéxarü dauxü̃taechica, rü nanadai ga norü duü̃xü̃gü ga yéma maxẽxü̃.
18Rü ñu̱xũchi nüma ga Yedeóü̃ rü Zébana rü Salmunána naca, rü ñanagürü: —¿Nañu̱xgüraü̃xü̃ ga yema yatügü ga Tabóxgu pedaixü̃? —ñanagürü. Rü nümagü rü Yedeóü̃xü̃ nangãxü̃gü rü ñanagürügü: —Yema yatügü rü nanacuraxü̃güraxü̃, rü nanaxãẽ̱xgacügüraxü̃ ga wüxichigü —ñanagürügü.
19Rü yexguma nüma ga Yedeóü̃ rü aita naxü rü ñanagürü: —Yemagü rü chauenexẽgü nixĩ ga pedaixü̃. Rü aixcüma Cori ya Tupanaégagu pemaxã nüxü̃ chixu rü yexguma taxũchima penadaixgu, rü taxũchima pexü̃ chadai —ñanagürü.
20Rü yexgumatama nüma ga Yedeóü̃ rü gumá nane ga yacü ga Yetéxü̃ namu, rü ñanagürü nüxü̃: —¡Inachi rü nadai! —ñanagürü. Natürü nüma ga Yéte rü namuü̃ rü tama nanadaixchaü̃ yerü nangextü̱xüxüchi.
21Rü yexguma ga nümagü ga Zéba rü Salmuná rü Yedeóü̃xü̃ ñanagürügü: —¡Ẽcü cumatama toxü̃ nadai! Erü wüxi i yatü i aixcüma poraxü̃ rü tama namuü̃ —ñanagürügü. Rü yexguma ga nüma ga Yedeóü̃ rü inachi rü nanadai. Rü nüxna nanade ga norü nga̱xãẽruü̃gü ga namaxã yaxãchagüxü̃ ga norü caméyugü ga Zéba rü Salmuná.
22Rü nümagü ga Iraétanüxü̃ rü Yedeóü̃xü̃ ñanagürügü: —Ñu̱xma nax toxü̃ ícunguxü̃xẽẽxü̃ i Madiáü̃tanüxü̃me̱xẽwa, rü tanaxwa̱xe i cuma rü cune rü cutaagü rü tomaxã nax ipecua̱xgüxü̃ —ñanagürügü.
23Natürü nüma ga Yedeóü̃ rü nanangãxü̃ rü ñanagürü: —Tama chanaxwa̱xe i choma rüe̱xna chaunegü nax pemaxã itacuáxü̃. Rü Cori ya Tupana tá nixĩ ya pemaxã icuácü.
24Rü ngẽma chanaxwa̱xexü̃ nixĩ nax choxna tüxü̃ pexãxü̃ ya yíxema ãneragü ya perü uanügüna tüxü̃ pepuxü̃güxe —ñanagürü. Yerü nüma ga Madiáü̃tanüxü̃arü churaragü rü úirumaxã nixãneraã̱x yerü nümagü rü duü̃xü̃gü ga úirumaxã ixaneraã́xü̃ nixĩgü.
25Rü yexguma nüma ga Iraétanüxü̃ rü Yedeóü̃xü̃ ñanagürügü: —Marü name —ñanagürügü. Rü yexma nayacha̱xüchigü ga wüxi ga naxchápenüxü̃ rü yemagu tüxü̃ nanutaque̱xegü ga ãneragü ga tüxü̃ napuxü̃gǘxe.
26Rü guxü̃ma ga ãneragü ga úirugü rü wixgutaa̱x 19 quíru nayá. Rü Yedeóü̃na nanaxãgü ta ga ngã̱xãẽruü̃gü rü naxchirugü ga dauxracharaxü̃ ga Madiáü̃tanüxü̃arü ãẽ̱xgacügü nagu icu̱xgüxü̃, rü ñu̱xũchi yema norü caméyuchagügü.
27Rü nüma ga Yedeóü̃ rü guxü̃ma ga yema úiruwa nanaxü i wüxi i chalecu, rü norü ĩane ya Ofágu nayaxǘ. Rü guxü̃ma ga Iraétanüxü̃ rü yema chalecugagu Tupanana nixĩgachi, yerü yema chalecuxü̃ nicua̱xüü̃gü. Rü yemaacü wüxi ga norü toxyepe̱xe nixĩ naxca̱x ga Yedeóü̃, rü napatacüã̱x.
28Rü yemaacü ga Madiáü̃tanüxü̃ rü Iraétanüxü̃me̱xẽwa nayexmagü rü taguma wena daigu narüxĩnüe. Rü yexguma namaxü̃xgu ga Yedeóü̃, rü 40 ga taunecü taguma nügü nadai ga guxü̃ma ga yema naanewa.
Nayu ga Yedeóü̃
29-30Rü norü ĩanewatama nayamaxü̃ ga Yedeóü̃. Rü nüxü̃́ nayexma ga 70 ga nanegü, yerü namuxma̱xüchi.
31Rü ĩane ga Chiquéü̃wa rü tayexma ta ga toguxe ga ngexe ga naxma̱xaba, rü tümawa naxãne. Rü Abimeréxgu nanaxüéga ga yema nane.
32Rü yexguma nayu̱xgu ga Yedeóü̃ rü marü nayaxüchi. Rü nanatü ga Yoá ítáxü̃gu nayata̱xgü ga Abiéchetanüxü̃arü ĩane ga Ofágu.
33Rü yexguma Yedeóü̃ yuxguwena, rü nümagü ga Iraétanüxü̃ rü wena Tupanana nixĩgachi. Rü naguxü̃raü̃xü̃ ga Baáchicüna̱xãxü̃ nicua̱xüü̃gü, rü Baá-beríxü̃ nayauxgü nax norü tupana yixĩxü̃ca̱x.
34Rü norü Cori ya Tupanaxü̃ narüngümae woo nüma ga Tupana rü naxme̱xwa ínananguxü̃xẽxẽ ga guxü̃ma ga norü uanügü ga nüxna ngaicamagüxü̃
35Rü nüma ga Iraétanüxü̃ rü tama Yedeóü̃ nanegüxü̃ nangechaxü̃gü woo nax taxü̃ ga mexü̃ naxca̱x naxüxü̃ ga Yedeóü̃.
Currently Selected:
Ãẽ̱xgacügü ga guxchaxü̃güarü mexẽxẽruü̃gü 8: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
