Ãẽ̱xgacügü ga guxchaxü̃güarü mexẽxẽruü̃gü 18
18
Micaía rü Dáü̃tanüxü̃chiga
1Rü yexgumaü̃cüxü ga Iraétanüxü̃ rü nangearü ãẽ̱xgacüã̱x. Rü nüma ga Dáü̃tanüxü̃ rü nataxuma ga norü naane. Rü yemaca̱x naxca̱x nadaugü ga wüxi ga naane nax yemagu naxãchiü̃güxü̃ca̱x.
2Rü yemaca̱x ga Dáü̃tanüxü̃ rü ĩanegü ga Choráwa rü Etaóü̃wa inanamuãchitanü ga 5 ga yatügü ga iporaexü̃ nax to ga naaneca̱x yadaugüxü̃ca̱x rü cúãcü nangugüanegüãxü̃ca̱x. Rü yema 5 ga ngugütaeruü̃gü rü Efraíü̃tanüxü̃arü naane ga máxpü̱xanexü̃wa naxĩ. Rü Micaíapatawa nangugü. Rü yema chütaxü̃ rü yexma napegü.
3Rü yexguma Micaíapatawa nayexmagügu rü nüxü̃ naxĩnüe ga gumá ngextü̱xücü ga Micaíapatawa yexmacü. Rü norü dexawa nüxü̃ nicua̱xãchitanü nax tóxnamanacüã̱x yixĩxü̃. Rü yemaca̱x nüxna nacagü rü ñanagürügü: —¿Texé nua cuxü̃ taga? ¿Tü̱xcüü̃ ñaa nachicawa cungexma? ¿Ta̱xacüca̱x cudau i nuxã? —ñanagürügü.
4Rü nüma ga Lebítanüxü̃ rü namaxã nüxü̃ nixu nax ñuxãcü Micaía namaxã namexẽẽxü̃ rü naya̱u̱xãxü̃ nax norü chacherdóte yixĩxü̃ca̱x.
5Rü yexguma ga nümagü rü ñanagürügü: —¡Cori ya Tupanana naca nax nüxü̃ tacuáxü̃ca̱x rü tá mea toxü̃́ ínanguxuchi i ngẽma ítaxĩxü̃wa! —ñanagürügü.
6Rü nüma ga gumá chacherdóte ga Lebítanüxü̃ rü nanangãxü̃ rü ñanagürü: —¡Ẽcü taãẽãcüma ipexĩãchi! Erü nüma ya Cori ya Tupana rü tá pexna nadau i ngextá ípexĩxü̃wa —ñanagürü.
7Rü nüma ga yema 5 ga ngugütaeruü̃gü rü inaxĩãchi rü Láiwa naxĩ. Rü yema duü̃xü̃gü ga guma ĩanecüã̱xgü rü taxuxü̃ma ga ãũcümaxü̃gu narüxĩnüe yema Chidóü̃cüã̱xgürüxü̃. Rü ínataãxẽgü rü taxuxü̃ma i guxchaxü̃ nügümaxã ínaxüe Rü taxúema ítanachixewegü, rü taxúema nagu tidauxcüraxü̃gü. Rü taxuxü̃ma nüxü̃́ nataxu. Rü Chidóü̃cüã̱xgüarü yáxü̃wa nayexmagü. Rü tama to ga duü̃xü̃gümaxã naxãmücü.
8-9Rü yema 5 ga ngugütaeruü̃gü rü ĩanegü ga Choráca̱x rü Etaóü̃ca̱x nawoegu i natanüxü̃ íyexmagüxü̃wa. Rü yexguma yéma nangugügu rü natanüxü̃ nüxna nacagü rü ñanagürügü: —¿Ñuxãcü pexü̃ nangupetü? —ñanagürügü. Rü nümagü ga ngugütaeruü̃gü rü nanangãxü̃gü rü ñanagürügü: —Nagu ítayachoegu i ngẽma naane rü namaxã itayarüxĩ nax ngẽma naane rü poraãcü namexẽchixü̃. Rü ngẽmaca̱x, ¡ngĩxã rü itaxĩãchi rü tayadai i ngẽma duü̃xü̃gü i ngéma ngẽxmagüxü̃! Tama name i nua perütogümare, taxuxü̃ma nua pexüãcüma! ¡Ngĩxã nagu tachocu i ngẽma naane rü tanapu!
10Rü ngẽxguma tá nawa ingugügu rü pema rü tá nüxü̃ ipeyangau i duü̃xü̃gü i taxuguma rüxĩnüexü̃ rü taarü naaneã̱xgüxü̃ rü taxuxü̃ma nüxü̃́ taxuxü̃. Rü Tupana rü tá pexna nanaxã i ngẽma norü naane —ñanagürügü.
11Rü Choráwa rü Etaóü̃wa inaxĩãchi ga 600 ga yatügü ga Dáü̃tanüxü̃ ga meama ixãxnexü̃.
12Rü Yudáanewa nangugü. Rü yexma napegü ga Quiriáx-yearíü̃arü oésteguama. Rü yema nachica rü ñu̱xma rü ta Dáü̃arü pegüchicagu naxãéga.
13Rü yéma inaxĩãchi nax Efraíü̃arü máxpü̱xanexü̃wa naxĩxü̃, rü Micaíapatawa nangugü.
14Rü nümagü ga yema 5 ga yatügü ga Láiarü naanewa ngugütaewa ne ĩxü̃ rü namücügüxü̃ ñanagürügü: —¿Nüxü̃ pecuáxü̃ nax ta̱xacü ngẽxmaxü̃ ya daa ĩwa? Daa ĩpatawa rü nangẽxma i wüxi i efóx rü ñuxre i tupanachicüna̱xãgü rü ñu̱xũchi wüxi i naxchicüna̱xã i naiwa üxü̃ i diẽrumümaxã tüxünexü̃. ¿Rü ta̱xacü tá pexüxü̃ i ñu̱xma? —ñanagürügü.
15Rü yexguma ga yema 5 ga ngugütaeruü̃gü rü namücügüna nixĩgachitanü, rü gumá ngextü̱xücü ga Lebítanüxü̃ ga Micaíapatawa yexmacüxü̃tawa naxĩ. Rü nüxü̃ narümõxegü.
16Rü yoxni ga yema 600 ga churaragü ga Dáü̃tanüxü̃ ga meama ixãxnexü̃ rü ĩã̱xwa nayanguxẽẽgü.
17Rü nüma ga yema Micaíaarü chacherdóte rü ĩã̱xwa nayexma namaxã ga yema 600 ga churaragü. Rü yexgumayane ga yema 5 ga ngugütaewa ĩxü̃ rü nichocu nawa ga guma Micaíapata. Rü nanayauxgü ga yema naxchicüna̱xã ga diẽrumümaxã tüxünexü̃ rü yema efóx. Rü nanade ta ga guma ĩpatacüã̱xarü tupanachicüna̱xãgü.
18Rü yexguma nüma ga chacherdóte nüxü̃ da̱u̱xgu ga yema 5 ga ngugütaeruü̃gü nax Micaíapatagu nachocuxü̃ rü nayauxgüãxü̃ ga yema naxchicüna̱xã ga diẽrumümaxã tüxünexü̃ rü yema efóx rü nax nadeaxü̃ ga natanüxü̃arü tupanachicüna̱xãgü. Rü nüma ga chacherdóte rü ñanagürü nüxü̃: —¿Ta̱xacü ípexüe? —ñanagürü.
19Nümagü rü nanangãxü̃gü rü ñanagürügü: —¡Irüngea̱x rü nua totanüwa naxũ! Rü tanaxwa̱xe nax toxü̃ curüngüxẽẽxü̃ rü torü chacherdóte quixĩxü̃ rü ñoma tonatürüxü̃ toxü̃́ quixĩxü̃. ¿Tama ẽ̱xna i curü me yixĩxü̃ nax wüxitücumü i Iraétanüxü̃arü chacherdóte quixĩxü̃ rü tama i wüxitama i duü̃xü̃arü chacherdóte nax quixĩxü̃? —ñanagürügü.
20Rü yema rü norü me nixĩ ga gumá chacherdóte. Rü nanayaxu ga yema naxchicüna̱xã ga diẽrumümaxã tüxünexü̃ rü yema efóx rü yema natanüxü̃arü tupanachicüna̱xãgü, rü nawe narüxũ ga yema Dáü̃tanüxü̃.
21Rü nüma ga Dáü̃tanüxü̃ rü namaxã inaxĩãchi rü nügüpe̱xe tüxü̃ naxĩxẽxẽ ga norü buxegü rü wocagü rü guxü̃ma ga yemaxü̃gü ga yangegüxü̃.
22Rü yexguma marü yáxü̃guma naxĩxgu, rü nüma ga Micaía rü nananutaque̱xe ga namücügü ga norü ngaixcamagu pegüxü̃ rü namaxã nawe nangẽgü.
23Rü yexguma yema Dáü̃tanüxü̃ nüxü̃ ĩnüegu ga yema Micaíatanüxü̃ ga nawe ngẽgüxü̃ rü nawe icaetanüxü̃, rü nüma ga Dáü̃tanüxü̃ rü naxca̱x nawoegu. Rü Micaíana nacagüe rü ñanagürügü: —¿Ta̱xacü cuxü̃ nangupetü? ¿Tü̱xcüü̃ towe quicaechigü poraãcü? —ñanagürügü.
24Rü nüma ga Micaía rü nanangãxü̃ rü ñanagürü: —Pemax rü chorü tupanachicüna̱xã ga choma íchaxüxüxü̃ pina, rü ñu̱xũchi peyaga ya chorü chacherdóte. Rü ngẽmaãcü taxuxü̃maama nua choxü̃ peta̱x. Rü naétü choxna pecaama rü: “¿Ta̱xacü cuxü̃ nangupetü?” ñapegüxü̃ choxü̃ —ñanagürü.
25Natürü nümagü ga Dáü̃tanüxü̃ rü nanangãxü̃gü rü ñanagürügü: —¡Taxṹ i toétü quidexaxü̃! Erü ngürüãchi totanüwa nangẽxma i duü̃xü̃gü i tama yáxna cumaxã ĩnüexü̃ rü düxwa tá pexü̃ nadai. Rü ngẽmaãcü tá cuyu wüxigu namaxã i cutanüxü̃ —ñanagürügü.
26-27Rü nüma ga Micaía rü nüxü̃ nadau nax namuxũchixü̃ ga yema Dáü̃tanüxü̃, rü yemaca̱x nachiü̃ca̱x nataegu. Rü nümagü ga Dáü̃tanüxü̃ rü inaxĩãma namaxã ga yema yemaxü̃gü ga Micaía íxüxüxü̃, rü ñu̱xmachi norü chacherdótemaxã rü ñu̱xmata Láiwa nangugü. Rü guma ĩanecüã̱x ga duü̃xü̃gü rü taxuguma ínarüxĩnüe rü tama nügüna ínadaugü. Rü yemaca̱x ga Dáü̃tanüxü̃ rü tauxchaãcü nagu nachocu. Rü taramaxã duü̃xü̃güxü̃ nadai, rü ñu̱xũchi nayagugü ga guma ĩane.
28Rü guma ĩane ga Lái rü Chidóü̃arü yáxü̃wa nayexma, rü yema duü̃xü̃gü ga yémacüã̱xgü rü taxúema toguemaxã naxãmücügü, rü yemaca̱x taxúema ítanapoxü̃gü. Rü guma ĩane rü doxonexü̃ i Bex-reóxwa nayexma. Rü yemawena ga Dáü̃tanüxü̃ rü nügüca̱x nanamexẽẽgü ga guma ĩane rü nawa namaxẽ.
29Rü noxri ga guma ĩane rü Lái nixĩ ga naéga. Natürü nüma ga Dáü̃tanüxü̃ rü norü o̱xi ga Dáü̃ ga Iraé nanegu nanaxüégagü. Rü ngẽmaca̱x i ñu̱xma rü Dáü̃ nixĩ i naéga.
30Rü yema Dáü̃tanüxü̃ rü guma ĩanegu nanaxücuchi ga yema naxchicüna̱xã ga naiwa naxügüxü̃ nax yéma nüxü̃ yacua̱xüü̃güxü̃ca̱x. Rü norü chacherdóte nixĩ ga Yonatáü̃, ga Guerchóü̃ nane ga Moiché nataxa. Rü yemawena ga Yonatáü̃ nataagü rü Dáü̃tanüxü̃arü chacherdótegü nixĩgü rü ñu̱xmata norü uanügü to ga naanewa nagagü.
31Rü yema naxchicüna̱xã ga Micaía üxü̃ rü Dáü̃tanüxü̃wa nayexma. Rü gucü ga gumá taunecügü ga Cori ya Tupanapata Chilówa yexmagu, rü gumáepü̱x ga taunecü nixĩ ga Dáü̃tanüxtanüwa nayexmaxü̃ ga yema naxchicüna̱xã ga Micaía üxü̃.
Currently Selected:
Ãẽ̱xgacügü ga guxchaxü̃güarü mexẽxẽruü̃gü 18: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
