Ochéa 12
12
1Ngẽma Iraéanecüã̱xgü rü natüca̱xma guxü̃ i ngunexü̃gu ngẽma nachixü̃anegü i éstewa ngẽxmagüxü̃arü ngü̃xẽẽca̱x nadau. Rü yexera nidorata̱xagü rü nimáetagü. Rü Achíriaanecüã̱xgümaxã nanaxü i unetagü, rü Equítuanewa nanamugü i ãmare i chíxü̃ nax ngẽmaãcü Equítuanecüã̱xgü nüxü̃ rüngü̃xẽẽgüxü̃ca̱x.
2Rü nüma ya Cori ya Tupana rü ngẽma Yudáanecüã̱xgümaxã nanu. Rü nacümagü i chixexü̃gagu rü tá ngẽma Acóbutanüxü̃xü̃ napoxcu. Rü ngẽmaãcü tá nayangutanüxẽẽgü naxca̱x ga yema norü chixexü̃ ga naxügüxü̃.
3Rü nũxcümacürüwa naxü̃pa nax nabuxü̃ ga perü o̱xi ga Acóbu, rü naenexẽxü̃ nanapuchica. Rü yexguma marü naya̱xgu rü Tupanamaxã nügü nawogü.
4Rü nüma ga Acóbu rü Tupanaarü duü̃xü̃ ga daxũcüã̱xmaxã nügü nawogü, rü Acóbu narüporamae. Rü nüma ga Acóbu rü naxaxu rü Tupanaarü ngü̃xẽẽca̱x ínaca. Rü Tupana rü Betégu Acóbuxü̃ nangau, rü yéma Acóbumaxã nidexa.
5Rü yemaacü Cori ya Tupana ya Guxü̃étüwa Ngẽxmacümaxã nidexa.
6¡Pa Iraétanüxü̃x, Tupanaca̱x pewoegu! ¡Rü aixcüma nüxü̃ pengechaü̃gü rü nüxü̃́xicatama peyaxõgü!
7Rü Tupana rü Iraétanüxü̃xü̃ ñanarügü: —Pemax rü taxetanüxü̃ i womüxẽẽwa̱xegüxü̃ pixĩgü. Rü ngẽmaca̱x yimá perü yáruxü̃ ya tama mecümaxã nüxü̃́ pengĩ̱x i duü̃xü̃gü.
8Rü nagu perüxĩnüe nax ngẽmaãcü pimuarü diẽruã̱xü̃chi, rü taxúetama pexü̃ cuáxü̃ nax naxca̱x pengĩ́ãcüma pexü̃́ nangẽxmaxü̃ i perü ngẽmaxü̃gü.
9Rü yexguma Equítuanewa peyexmagügucürüwatama nixĩ nax choma rü perü Tupana chixĩxü̃. Rü choma rü wena tá chianexü̃gu düxenügügu pexü̃ chapegüxẽxẽ, yexguma chianexü̃gu pexü̃ chigagügurüxü̃.
10Rü choma rü muẽ̱xpü̱xcüna chanango̱xetüxẽxẽ i chorü orearü uruü̃gü rü namaxã chidexa. Rü ngẽma chorü orearü uruü̃güwa ta̱xacügu ixuxü̃ i oremaxã pemaxã chidexa.
11Rü Garaáxanewa nangẽxma i muxü̃ma i tupananetagümare, natürü ngẽmagü rü natüca̱xmamare nixĩgü. Rü Guirigáwa rü tupananetagüca̱x nanadai rü nayagu ga muxü̃ma ga woca i yatüxü̃. Natürü ngẽma norü ãmarearü guruü̃güarü nutagü rü naanegügu tá nixãũxchitachigümare —ñanagürü.
12Rü perü o̱xi ga Acóbu ga Iraé rü Aráü̃arü naanewa naña nax yexma yaxãmaxü̃ca̱x. Rü carnérugüarü dauruü̃wa napuracü.
13Rü Tupana rü wüxi ga norü orearü uruü̃maxã Equítuanewa ínananguxü̃xẽxẽ ga norü duü̃xü̃gü. Rü Tupana rü yema orearü uruü̃maxã nüxna nadau ga yema Iraétanüxü̃.
14Natürü i ñu̱xma i ngẽma Iraétanüxü̃ rü Tupanaxü̃ nanuxẽẽgü. Rü ngẽmaca̱x i nüma rü tá nanapoxcue nagagu ga yema máetagü rü yema togü ga chixexü̃gü ga naxügüxü̃.
Currently Selected:
Ochéa 12: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
