Ochéa 10
10
Nagu tá napogüe i ngẽma ãmarearü guruü̃gü i Iraéanecüã̱xgü norü tupanachicüna̱xãgüca̱x naxügüxü̃
1Rü Ochéa rü ñanagürü: —Ngẽma Iraéanecüã̱xgü rü ñoma úba i muarü oṍxü̃rüxü̃ nixĩgü. Natürü yexguma Tupana yexera nüxü̃ rüngü̃xẽẽgu ga yema Iraéanecüã̱xgü, rü yexera norü tupananetagüca̱x ãmarearü guruxü̃ naxügü. Rü yexguma yexera namexgu ga nachixü̃ane rü yexera nanamexẽẽgü ga guma nutagü ga namaxã natupanaã̱xgücü.
2Ngẽma Iraéanecüã̱xgü rü namuarü ĩnüã̱xgü, rü tama Tupanaguxica narüxĩnüe. Rü ngẽmaca̱x i ñu̱xma rü ngẽma norü chixexü̃gagu rü tá napoxcue. Rü nüma ya Cori ya Tupana rü tá inanaxoxẽxẽ i ngẽma ãmarearü guruü̃gü i norü tupananetagüca̱x naxügüxü̃. Rü tá nayapuexẽxẽ i ngẽma nutagü i nüxü̃ yacua̱xüü̃güxü̃.
3Natürü nüma i ngẽma duü̃xü̃gü rü ñanagürügü tá: “Nataxuma ya tórü ãẽ̱xgacü nagagu nax tama Cori ya Tupanaxü̃ ingechaü̃güxü̃. ¿Natürü ta̱xacüwa chi tüxü̃́ namexü̃ i wüxi ya ãẽ̱xgacü?
4Rü yexü̃cürü nidexaechamare rü natüca̱xmamare tamaxã inaxuneta rü nanaxunagü i mugü natürü taguma nayanguxẽẽgü. Rü ngẽmaca̱x i tatanüwa rü duü̃xü̃gü rü nügümaxã nanue rü ñoma wüxi i nanetü i nawa iyuxü̃rüxü̃ nangẽxma i chixexü̃ i tatanüwa”, ñanagürügü.
5Rü ñu̱xma i ngẽma Chamáriaanecüã̱x i duü̃xü̃gü rü nidu̱xrue, rü naxauxe naxca̱x i ngẽma wocaxacüchicüna̱xã i Bex-abéü̃wa rütaxuxü̃. Rü naxca̱x nangechaü̃gü i duü̃xü̃gü rü ngẽma chacherdótegü erü marü narütaxu ga yema namaxã nataãẽgüxü̃.
6Rü ngẽma wocaxacüchicüna̱xã i Iraéanecüã̱xgü nüxü̃ icua̱xüü̃güxü̃ rü Achíriaanearü churaragü rü nachixü̃anewa tá nanangegü nax norü ãẽ̱xgacüna naxãgüãxü̃ca̱x. Rü tá naxãnee i ngẽma Efraíü̃tanüxü̃, yerü marü nataxuma ga norü naxchicüna̱xã ga nüxü̃́ yacua̱xüü̃güxü̃. Rü ngẽxgumarüxü̃ ta i guxü̃ma i ngẽma Iraéanecüã̱xgü rü ãne tá ningegü.
7Rü ngẽma Chamáriaanearü ãẽ̱xgacü rü tá narütaxu ñoma wüxi i naixtüchi i dexá ichaxẽẽxü̃rüxü̃.
8Rü tá nagu napogüe i napatagü i ngẽma tupananetagü ga Iraéanecüã̱xgü chixexü̃ nawa ügüxü̃. Rü ngẽma norü ãmarearü guruü̃güétüwa tá narüxügü i chuxchuxü̃gü rü toragü. Rü nüma i ngẽma duü̃xü̃gü rü tá ngẽma ngüchitaerugüxü̃ ñanagürügü: “¡Toétüwa pebuemügü!” ñanagürügü. Rü yima ma̱xpǘnegüxü̃ tá ñanagürügü: “¡Toétügu peyi!” ñanagürügü —ñanagürü ga Ochéa.
Tupana rü Iraéanecüã̱xgümaxã poxcu naxuegu
9Rü Tupana rü ñanagürü: —Pa Iraétanüxü̃x, pema rü tama nüxü̃ perüxoe nax chixexü̃ pexügüxü̃. Rü yexguma Guibeáwa penaxügügumama nixĩ nax pecadu pexügüechaxü̃, rü ñu̱xma rü ta rü tama nüxü̃ perüxoeéga. Rü ngẽmagagu rü Guibeágu tá daigu nayue i ngẽma chixexü̃gu maxẽxü̃.
10Rü choma rü ngẽma ngunexü̃ i chanaxwa̱xexü̃gu tá chanapoxcu i ngẽma Iraéanecüã̱xgü. Rü ngẽma ngunexü̃gu rü tá naxca̱x naxĩtaque̱xegü i ngẽma togü i nachixü̃anegü nax ínayauxü̃ãxü̃ca̱x. Rü ngẽmaãcü tá chanapoxcu i ngẽma Iraéanecüã̱xgü naxca̱x i norü chixexü̃gü.
11Ngẽma Iraéanecüã̱xgü rü ñoma wüxi i woca i puracüruxü̃ i ngexwaca yáxü̃rüxü̃ nixĩ nax tauxchaxü̃ i puracü i tríguarü puwa napuracüxü̃. Natürü i ñu̱xma rü tá guxchaxü̃wa chanangexmagüxẽxẽ i ngẽma Iraéanecüã̱xgü. Rü ngẽma Yudáanecüã̱xgü rü ta rü taxũtáma na̱xcha̱xwa nibuxmü i ngẽma guxchaxü̃gü.
12Choma rü marüchire̱x pemaxã nüxü̃ chixu rü ñachagürü pexü̃: “Ngẽxguma aixcüma mexü̃ pexügügu rü tá pexna nangu i chorü ngechaü̃. ¡Penamexẽxẽ i perü maxü̃! Erü marü nawa nangu nax cha̱u̱xca̱x pedaugüxü̃ ñu̱xmatáta petanüwa changu nax peétügu chayabaxü̃ca̱x i chorü pora i namaxã pexü̃ íchapoxü̃xü̃”, ñachagürü.
13Natürü i pema rü nagu pemaxẽ i chixexü̃, rü ngẽma ne naxũ nax chixri pegümaxã ipecuáxü̃ rü doragu nax pemaxẽxü̃. Rü pema rü pegü namaxã íperüpora i ngẽma muxü̃ i perü churaragü rü yimá peweü̃gü ya daiwa namaxã pexĩxü̃ne.
14Rü ñu̱xmax rü tá inaxügü i ngẽma dai rü ngẽmaca̱x nanaxĩ̱xãchiãẽgü i duü̃xü̃gü. Rü guxü̃ma ya yima ĩanearü poxeguxü̃tápü̱xgü rü tá niwa̱xgü. Rü yema ĩane ga Bex-abéwa ngupetüxü̃ ga yexguma ãẽ̱xgacü ga Charmáü̃ nadaixgurüxü̃ tá nixĩgü. Rü yexguma ga guxema mamagü rü tümanegümaxã tayue.
15Rü pemax, Pa Betécüã̱xgü, rü ngẽxgumarüxü̃ tátama pexü̃ nangupetü erü ngẽma perü chixexü̃gü rü nataxüchi. Rü ngẽma Iraéanearü ãẽ̱xgacü rü marü yangunechaü̃gu tá nayu —ñanagürü.
Currently Selected:
Ochéa 10: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
