Wenaxarü naxümatü ga Tupanaarü mugü 9
9
Tupana tá nüxü̃ narüngü̃xẽxẽ i Iraétanüxü̃
1Moiché rü Iraétanüxü̃xü̃ ñanagürü: —¡Iperüxĩnüe, Pa Iraétanüxü̃x! Marü nawa nangu nax pichoü̃xü̃ i ngẽma natü i Yudáü̃ rü nagu pichocuxü̃ i ngẽma naane rü ípenawoxü̃xü̃ i ngẽma duü̃xü̃gütücumügü i pexü̃ rümumaegüxü̃ rü pexü̃ rüporamaegüxü̃ i nawa maxẽxü̃ ya yima ĩanegü ya itaxü̃ne ya ima̱xtapü̱xarü poxeguã̱xgüne.
2Rü ngẽma duü̃xü̃gü i ngéma maxẽxü̃ rü nipora rü nimáchane yema máchanecü ga Anáxtaagürüxü̃. Pemax rü marü nüxü̃ pecua̱x ga yema ore ga ñaxü̃: “Rü texé tapora nax ngẽma Anáxtanüxü̃ imáchanexü̃ daixe”, ñaxü̃.
3Rü ñu̱xma i pema rü marü nüxü̃ pecua̱x nax tórü Cori ya Tupana yixĩxü̃ ga gumá pepe̱xegu ixũcü, rü nüma rü ñoma üxüema i tüxü̃ imáxü̃rüxü̃ tá pepe̱xegu nada̱i̱xü̃ rü iyanamaãchitanüxẽẽxü̃ i ngẽma duü̃xü̃gütücumügü. Pemax rü noxtacüma ngẽxgumatátama ípenawoxü̃ rü penadai, yema Cori ya Tupana pemaxã nüxü̃ ixuxü̃rüxü̃.
4Rü ngẽxguma Cori ya Tupana pepe̱xewa ínawoxü̃gu i ngẽma duü̃xü̃gütücumügü ¡rü taxṹ i pegü picua̱xüü̃güxü̃ rü ñapegügüxü̃: “Ngẽma nax timexü̃gagu nixĩ ya Cori ya Tupana toxna naxããxü̃ i ngẽma naane”, ñapegügüxü̃. Rü pemaxã nüxü̃ chixu rü nüma ya Cori ya Tupana rü tá ngẽma duü̃xü̃güxü̃ ínawoxü̃ nagagu i norü chixexü̃gü.
5Rü tama nixĩ i perü mexü̃gagu rü bai nax mea pemaxẽxü̃gagu tá yixĩxü̃ i peyapu̱xü̃ i ngẽma naane. Rü nüma ya Cori ya Tupana rü ngẽma duü̃xü̃güarü chixexü̃gügagu tá nixĩ i pepe̱xewa ínawoxü̃ãxü̃ nax ngẽmaãcü yanguxẽẽãxü̃ca̱x ga yema uneta ga nũxcümaü̃güxü̃ ga perü o̱xigü ga Abraáü̃, rü Ichaá, rü Acóbumaxã nüxü̃ yaxuxü̃.
6Rü penaxwa̱xe nax nüxü̃ pecuáxü̃ nax Cori ya Tupana rü tama perü mexü̃gagu yixĩxü̃ i pexna naxããxü̃ i ngẽma naane i mexü̃, erü pema rü duü̃xü̃gü i tama ixĩnüechaxü̃xü̃ pixĩxgü —ñanagürü ga Moiché.
Tupanamaxã nanue ga Iraétanüxü̃
(Éx. 31.18—32.35)
7Rü nüma ga Moiché rü ñanagürü: —¡Taxṹ i nüxü̃ iperüngümaexü̃ nax ñuxãcü yema chianexü̃wa Cori ya Tupanaxü̃ penuexẽẽxü̃! Rü yexguma Equítuanewa ípechoxü̃xgucürüwa rü ñu̱xmata ñaa i nachicawa nax pengugüxü̃gu rü guxü̃guma tama naga pexĩnüe.
8Rü guma ma̱xpǘne ga Oréxwa rü poraãcü Cori ya Tupanaxü̃ penuexẽxẽ, rü yemaca̱x poraãcü pemaxã nanu rü wixgutaa̱x pexü̃ nadai.
9Rü yexguma ga choma rü guma ma̱xpǘnegu chaxĩnagü nax chayadexü̃ca̱x ga yema nutatachinügü ga nagu naxümatüxü̃ ga yema unetagü ga Cori ya Tupana pemaxã üxü̃. Rü 40 ga ngunexü̃ rü 40 ga chütaxü̃ tama chachibüãcüma rü tama chaxaxeãcüma yéma chayexma.
10Rü yexguma ga Cori ya Tupana rü choxna nanaxã ga yema taxre ga nutatachinü ga nümatama nagu naxümatüxü̃ ga guxü̃ma ga yema ore ga yema üxüemaarü ngãxü̃wa pemaxã nüxü̃ yaxuxü̃ ga guma ma̱xpǘnewa, ga yexguma guxãma ga yixema yexma ingutaque̱xegügu.
11Rü yema 40 ga ngunexü̃ rü 40 ga chütaxü̃ ngupetüguwena rü nüma ga Cori ya Tupana rü choxna nanaxã ga yema taxre ga nutatachinü ga norü uneta nagu ümatügüxü̃.
12Rü yexguma rü choxü̃ ñanagürü: “¡Nataegu, rü paxãma irüxĩ i nua! Erü ngẽma duü̃xü̃gü i Equítuanewa ícugaxü̃xü̃ rü poraãcü chixexü̃ naxügü. Rü paxãma nüxü̃ narüxoe ga yema mugü ga namaxã nüxü̃ chixuxü̃, rü ñu̱xũchi nügüca̱x úiruwa nanaxügü i wüxi i naxchicüna̱xã nax nüxü̃ yacua̱xüü̃güxü̃ca̱x”, ñanagürü.
13Rü nüma ya Cori ya Tupana rü ñanagürü ta choxü̃: “Marü nüxü̃ chadau i ñaa duü̃xü̃gü nax duü̃xü̃gü i tama ixĩnüechaxü̃xü̃ nax yaxĩgüxü̃.
14¡Rü taxṹ i choxna cunachu̱xuxü̃ nax chanadaixü̃ i ngẽma duü̃xü̃gü nax noxtacüma iyanaxoxü̃ca̱x i ñoma i naanewa rü taxúema nüxna cua̱xãchiexü̃ca̱x! Rü ngẽmawena rü tá cuwa chanango̱xẽxẽ i duü̃xü̃gü i ngẽma rüxoxü̃arü yexera iporaxü̃ rü muxũchixü̃”, ñanagürü.
15Rü yexguma nawa ícharüxĩ̱xgu ga guma ma̱xpǘne ga iyauracüxüne, rü cho̱xme̱xgu chayana ga yema taxre ga nutatachinü ga Tupanaarü uneta nagu ümatüxü̃.
16-17Rü yexguma pexü̃ chada̱u̱xgu nax Cori ya Tupanape̱xewa chixexü̃ pexügüxü̃, rü ñu̱xũchi wüxi ga wocaxacü nax úiruwa pexügüxü̃ rü yemaacü nax tama peyanguxẽẽxü̃ ga yema norü mugü ga pemaxã nüxü̃ yaxuxü̃ ga Cori ya Tupana, rü yemaca̱x ga choma rü yexma chanawotanü ga yema taxre ga nutatachinü ga cho̱xme̱xgu chinaxü̃. Rü pepe̱xegu nipue.
18Rü yexguma ga choma rü wenaxarü Cori ya Tupanape̱xegu chanangücuchi. Rü 40 ga ngunexü̃ rü 40 ga chütaxü̃ taguma chachibü rü taguma chaxaxe nagagu ga yema chixexü̃ ga Cori ya Tupanape̱xewa pexügüxü̃ ga namaxã penanuxẽẽxü̃.
19Choma rü namaxã chaba̱i̱xãchi ga yema norü nu ga Cori ya Tupana. Yerü noxtacüma pexü̃ nadaixchaü̃ nax wüxicana peyarüxoxü̃ca̱x. Natürü nüma rü wenaxarü nüxü̃ naxĩnü ga chorü yumüxẽ.
20Rü nüma ga Cori ya Tupana rü Aróü̃maxã rü ta poraãcü nanu, natürü ga choma rü naétüwa chachogü.
21Rü yemawena rü chanayaxu ga yema wocaxacüchicüna̱xã ga pema pexüxü̃ rü namaxã chixexü̃ pexügüxü̃ rü üxüétüwa chayata̱xcuchi. Rü yemawena rü chanawaxi ñu̱xmata naxãte̱xemare rü ñu̱xũchi yema dexá ga ma̱xpǘnewa rüyaexü̃wa chayagüete̱xe.
22Natürü ga pema rü wenaxarü Cori ya Tupanaxü̃ penuxẽxẽ ga Taberáwa, rü Macháwa, rü Quibúx-ataabá.
23Rü yexguma Cadé-banéawa Cori ya Tupana pexü̃ imuãchitanügu nax peyapuxü̃ca̱x ga yema naane ga nüma pexna naxãxü̃, rü tama naga pexĩnüechaü̃. Rü tama nüxü̃́ peyaxõgü rü tama peyangu̱xẽxẽ ga yema nüma pexü̃ namuxü̃.
24Rü yexguma noxritama petanüwa chayexmagucürüwa i pemax rü tama Cori ya Tupanaga pexĩnüechaü̃.
25Rü yexguma Cori ya Tupana pemaxã naxueguxgu nax pexü̃ nada̱i̱xü̃ rü 40 ga ngunexü̃ rü 40 ga chütaxü̃ Cori ya Tupanape̱xegu chanangücuchi ga choma.
26Rü chorü yumüxẽwa rü nüxna chachogü rü ñachagürü nüxü̃: “¡Pa Corix, taxṹ i cuda̱i̱xü̃ i ñaa duü̃xü̃gü i cuxrü ixĩgüxü̃ i curü poramaxã ícunguxü̃xẽxẽxü̃, rü ñu̱xũchi taxü̃ i curü poramaxã Equítuanewa ícugaxü̃xü̃!
27¡Rü nüxna nacua̱xãchi ya yimá curü duü̃ ga Abraáü̃, rü Ichaá, rü Acóbu! ¡Rü taxṹ i nagu curüxĩnüxü̃ i norü chixexü̃gü rü guxchagü i cupe̱xewa naxügüxü̃ i ñaa duü̃xü̃gü i tama cuga ĩnüechaü̃xü̃! ¡Rü nüxü̃́ nüxü̃ irüngüma i norü chixexü̃ i cupe̱xewa naxügüxü̃!
28Erü tama chanaxwa̱xe nax ngẽma Equítuanecüã̱x ñagüxü̃: ‘Cori ya Tupana rü taxucürüwa ngẽma Iraétanüxü̃xü̃ nagu nachocuxẽxẽ i ngẽma naane i namaxã naxueguxü̃. Rü norü Tupana rü ngẽma nax naxchi naxaixü̃ca̱x rü nua ínanagaxü̃ nax ngẽmaãcü chianexü̃gu yayuexü̃ca̱x’, ñagüxü̃.
29Natürü nümagü i ngẽma Iraétanüxü̃ rü curü duü̃xü̃gü nixĩ, rü cuma nixĩ ga taxü̃ ga curü poramaxã Equítuanewa ícunanguxü̃xẽẽxü̃” —ñanagürü ga Moiché.
Currently Selected:
Wenaxarü naxümatü ga Tupanaarü mugü 9: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
