Wenaxarü naxümatü ga Tupanaarü mugü 7

Tupana rü Iraétanüxü̃maxã nüxü̃ nixu nax tama Canaáü̃anecüã̱xgüarü tupananetachicüna̱xãgüwe naxĩxü̃ca̱x

(Éx. 34.11-17)

1Rü ñanagürü ga Moiché: —Nüma ya Cori ya perü Tupana rü tá nagu penachocuxẽxẽ i ngẽma naane i tá pexrü ixĩxü̃. Rü pepe̱xewa tá ínanawoxü̃ i ngẽma 7 i natücumügü i pexü̃ rümumaegüxü̃ rü pexü̃ rüporamaegüxü̃ i Itítanüxü̃, rü Guerguechéutanüxü̃, rü Amoréutanüxü̃, rü Canaáü̃tanüxü̃, rü Ferechéutanüxü̃, rü Ebéutanüxü̃ rü Yebuchéutanüxü̃.

2Rü ngẽxguma Cori ya perü Tupana pexme̱xgu nayixẽẽgu i ngẽma natücumügü i duü̃xü̃gü, rü ngẽxguma pema rü marü nüxü̃ perüporamaegügu ¡rü noxtacüma tá penadai rü taxũtáma ta̱xacürü unetamaxã pexü̃ narüngüxmüexẽxẽ rü bai tá i pexü̃́ nax nangechaxü̃tümüxü̃güxü̃!

3Rü ngẽxgumarüxü̃ tá ta ¡rü taxũtáma namaxã pixãxma̱xgü i ngẽma norü ngexü̃gü, rü bai tá i penegü rü naxacügümaxã peyaxüxma̱xgüxü̃ rü pexacügü rü nanegümaxã peyaxütegüxü̃!

4Erü ngẽxguma tá ngẽmaãcü penaxü̱xgu rü nümagü i ngémacüã̱x rü tá penegüxü̃ rü pexacügüxü̃ Cori ya Tupanana nixĩgachixẽxẽ. Rü ngẽmaãcü tá norü tupanagüxü̃ pexü̃ nicua̱xüü̃güxẽxẽ, rü ngẽmaca̱x tá poraãcü pemaxã nanu ya Cori ya Tupana, rü noxtacüma tá pexü̃ nadai, rü ngẽxma tá ipeyarüxo.

5Rü ngẽmaca̱x tá penaxwa̱xe i noxtacüma nagu pepogüe i ngẽma ãmarearü guruü̃gü i ngextá ngẽma duü̃xü̃gü norü tupanagüca̱x naxü̃nagü nawa ínaguxü̃. Rü ngẽxgumarüxü̃ tá ta nagu pepogüe ya yimá norü nutagü rü naigü i namaxã natupanaã̱xgüxü̃. Rü tá ípenagu i norü tupanachicüna̱xãgü.

6Erü pema rü wüxi i duü̃xü̃gütücumü i woetama Cori ya Tupana pexü̃ dexe pixĩgü. Rü nüma ya Tupana rü guxü̃ma i nachixü̃anecüã̱xgütanüwa pexü̃ naxuneta nax norü duü̃xü̃gü pixĩgüxü̃ca̱x.

Cori ya Tupana rü Iraétanüxü̃xü̃ narüngü̃xẽxẽ rü nanaxwa̱xe nax naga naxĩnüexü̃ca̱x

7Rü tama nixĩ nax guxü̃ma i duü̃xü̃gütücumüxü̃ perümumaexü̃ca̱x yixĩxü̃ nax Cori ya Tupana pexü̃ ngechaü̃xü̃ rü pexü̃ dexü̃. Rü pema rü aixcüma guxü̃ma i duü̃xü̃gütücumüxü̃ perünoxremae.

8Rü nüma ga Cori ya Tupana rü pexü̃ nangechaxü̃ rü nayanguxẽẽchaü̃ ga yema uneta ga nũxcümaü̃güxü̃ ga perü o̱xigümaxã naxueguxü̃. Rü yemaca̱x pexü̃ ínagaxü̃ ga Equítuanewa ga ngextá mugüruü̃gü ípixĩgüxü̃wa. Rü taxü̃ ga norü poramaxã pexü̃ ínanguxü̃xẽxẽ naxme̱xwa ga Equítuanearü ãẽ̱xgacü ga Faraóü̃.

9Rü ngẽmaca̱x penaxwa̱xe nax nüxü̃ pecuáxü̃ nax nüma ya Cori ya Tupana rü aixcümaxü̃chi Tupana yixĩxü̃. Rü woo 1,000 e̱xpü̱xcüna yamuxgu i duü̃xü̃gü rü nüma ya Tupana rü guxü̃guma nayanguxẽxẽ i norü uneta i naxüxü̃ naxca̱x i ngẽma duü̃xü̃gü i ingóetanüxü̃ i nüxü̃ ngechaü̃güxü̃ rü yanguxẽẽgüxü̃ i norü mugü.

10Natürü yíxema naxchi aiexe rü tüxü̃ nadai nagagu i tümaarü chixexü̃gü. Rü aixcüma noxtacüma tüxü̃ nadai erü chixexü̃ taxügü.

11Rü ngẽmaca̱x name nixĩ nax peyanguxẽẽxü̃ i ngẽma mugü, rü ngu̱xẽẽtaegü, rü ucu̱xẽgü i ñoma i ngunexü̃gu pemaxã nüxü̃ chixuxü̃ nax nagu pexĩxü̃ca̱x.

Mexü̃ tayaxu ega Cori ya Tupanaga ixĩnüegu

(Lv. 26.3-13; Dt. 28.1-14)

12Rü nawena nax nüxü̃ pexĩnüexü̃ i ñaa mugü, rü ngẽxguma aixcüma peyanguxẽẽgu rü nagu pexĩxgu i ñaa mugü, rü nüma ya Cori ya Tupana rü aixcüma tá nayanguxẽxẽ ga yema norü uneta ga nügüégagu perü o̱xigümaxã nüxü̃ yaxuxü̃.

13Rü pexü̃ tá nangechaü̃, rü pexü̃ tá narüngü̃xẽxẽ rü ñu̱xũchi pexü̃ tá nimuxẽxẽ. Rü tá nüxü̃ narüngü̃xẽxẽ i penegü, rü tá nayamuxẽxẽ i penetügüarü o rü perü tríguarü o, rü tá pexü̃́ nangẽxma i perü bínu rü perü chíxü̃gü, rü tá namu i perü wocaxacügü rü perü carnéruxacügü. Rü ngẽmaãcü tá pexü̃ narüngü̃xẽxẽ nawa i ngẽma naane i nũxcümaü̃güxü̃ ga perü o̱xigümaxã naxueguxü̃ nax pexna tá naxããxü̃.

14Rü nüma ya Cori ya Tupana rü guxü̃ma i togü i duü̃xü̃güarü yexera tá pexü̃ narüngü̃xẽxẽ. Rü petanüwa rü nataxutama i ngexü̃ i ngexacüxü̃ rü yatüxü̃ i ngexacüxü̃, rü woo i ngẽma perü wocatanüwa rü nataxutama i ngexü̃ rü yatüxü̃ i ngexacügüxü̃.

15Rü nüma ya Cori ya Tupana rü pexna tá nayaxũgachixẽxẽ i guxü̃ma i da̱xaweanegü, rü ngẽma ãũcümaxü̃ i da̱xaweanegü ga nüxü̃ pedaugüxü̃ ga Equítuaneca̱x ínanguxẽẽxü̃. Natürü guxü̃ma i perü uanügü rü ngẽma da̱xaweanegümaxã tá ngúxü̃ nüxü̃ ningexẽẽgü.

16Natürü penaxwa̱xe nax penadaixü̃ i guxü̃ma i ngẽma duü̃xü̃gü i Cori ya Tupana pexme̱xwa ngẽxmaxẽẽgüxü̃. ¡Rü taxṹ i pexü̃́ nangechaü̃tümüxü̃güxü̃! ¡Rü taxṹ i norü tupanagüxü̃ picua̱xüü̃güxü̃! Erü ngẽxguma ngẽma pexü̱xgu rü tá ipeyarütauxe.

17Rü bexmana ñaxü̃gu tá perüxĩnüe: “Ñaa duü̃xü̃gü rü tüxü̃ narümumaexü̃chi ¿rü ñuxãcü tá ínawoxü̃xü̃?” ñapegürü.

18¡Rü taxṹ i nüxü̃ pemuü̃exü̃! ¡Rü nüxna pecua̱xãchie ga yema Cori ya perü Tupana Faraóü̃maxã rü ñu̱xũchi guxü̃ma ga yema Equítuanecüã̱xmaxã naxüxü̃!

19¡Rü nüxna pecua̱xãchi ga yema taxü̃ ga guxchaxü̃gü rü cua̱xruxü̃gü ga Equítuanewa nüxü̃ pedaugüxü̃, rü yema pora ga Cori ya Tupana pexü̃ wéxü̃ ga yexguma Equítuanewa pexü̃ ínagaxü̃gu! Rü nüma ya perü Cori ya Tupana rü ngẽmatátama namaxã naxü i guxü̃ma i ngẽma duü̃xü̃gü i ñu̱xma pema nüxü̃ pemuü̃exü̃.

20Rü ñu̱xũchi nüma ya Cori ya Tupana rü ngẽma perü uanügüca̱x tá ínanangugüxẽxẽ ya maxẽ. Rü guxü̃ma i ngẽma perü uanügü i íyaxügüxü̃ rü icu̱xgüxü̃ rü tá nayue.

21¡Rü ngẽmaca̱x taxṹ i nüxü̃ pemuü̃exü̃! Erü yimá perü Cori ya Tupana rü Tupana ya poraxüchicü rü ãũcümaxü̃chicü nixĩ, rü nüma rü petanüwa nangẽxma.

22Rü nüma ya Cori ya Tupana rü íxrarüwachigü tá ínayawoxü̃etanü i perü uanügü. Rü pemax rü taxũtáma wüxixü̃cüxü penadai, erü ngẽxguma wüxixü̃cüxü penadaixgu rü ngẽma aigü i ngẽma naanepechinüwa ngẽxmagüxü̃ rü tá nimu rü pexü̃ chi nangõ̱xcu.

23Natürü i nüma ya perü Cori ya Tupana rü pexme̱xgu tá nanayixẽxẽ i ngẽma duü̃xü̃gü rü tá nanaxĩ̱xãchiãẽgüxẽxẽ rü ngẽmaãcü tá peyagúetanüxẽxẽ.

24Rü ngẽma norü ãẽ̱xgacügü rü Tupana rü tá pexme̱xgu nanayixẽxẽ. Rü pema rü tá ngẽxma peyanaxoxẽxẽ rü ñu̱xmatáta ñoma i naanewa taxúema wena nüxna cua̱xãchigü. Rü taxuxü̃táma i nümagü rü pexü̃ narüporamaegü, rü ngẽmaãcü i pema rü guxü̃xü̃táma ipeyarüxoxẽẽgü.

25Pemax rü tá ípenagu i ngẽma norü tupananetachicüna̱xãgü, natürü taxũtáma pegüaxü̃́ penade i ngẽma úiru rü diẽrumü i namaxã yatüxünexü̃. Erü ngẽxguma pegüaxü̃́ penadexgu rü wüxi i taxü̃ i chixexü̃ tá pexü i Cori ya Tupanape̱xewa.

26Rü ngẽmaca̱x ¡taxṹ i pepatawa penangexü̃ i ngẽma úiru rü diẽrumü ya Tupana pexna chu̱xuxü̃ nax tama ipeyarüxogüxü̃ca̱x i pema rü ta! Rü ngẽmagü rü tá ípenagu. Erü Tupana naxchi naxai i guxü̃ma i ngẽma tupananetachicüna̱xãgü rü ngẽxgumarüxü̃ ta i pema rü penaxwa̱xe nax nüxü̃ pexoexü̃ —ñanagürü ga Moiché.

Currently Selected:

Wenaxarü naxümatü ga Tupanaarü mugü 7: tcaP

Highlight

Copy

Compare