Wenaxarü naxümatü ga Tupanaarü mugü 30

Tupana rü Iraétanüxü̃maxã inaxuneta rü tá nüxü̃ narüngü̃xẽxẽ ega naga naxĩnüegu

1Rü ñanagürü ga Moiché: —Ngẽxguma tá pexca̱x ínanguxgux i guxü̃ma i ngẽma ñu̱xma pemaxã nüxü̃ chixuxü̃ i Tupanaarü ngü̃xẽxẽ rü ngẽxgumarüxü̃ ta i norü poxcu, rü ngẽxguma ngẽma perü chixexü̃gagu Cori ya perü Tupana rü togü i nachixü̃anegügu pexü̃ nawoonegu, rü ngéma tá nixĩ i nüxna pecua̱xãchiexü̃ i ñaa ore i ñu̱xma pemaxã nüxü̃ chixuxü̃.

2-3Rü ngẽxguma ñu̱xma pemaxã nüxü̃ chixuxü̃rüxü̃ aixcüma naxca̱x pewoegu̱xgux ya Cori ya Tupana, rü aixcüma naga pexĩnüegu i guxü̃ne ya perü maxü̃nemaxã rü guxü̃ i peãxẽmaxã i pema rü pexacügü, rü ngẽxguma i nüma ya Cori ya perü Tupana rü tá inanaxoxẽxẽ i ngẽma poxcu i nagu pemaxã naxĩnüxü̃, rü tá nüxü̃́ pengechaü̃tümüxü̃. Rü ngẽma nachixü̃anegü ga nagu pexü̃ nawoonexü̃wa, rü pechixü̃aneca̱x tá pexü̃ nawoeguxẽxẽ.

4Rü woo i pema i yáanegu pewoone, rü nüma ya perü Cori ya Tupana rü tá ngẽxma pexca̱x nayadau rü tá pexü̃ nawoeguxẽxẽ.

5Rü nüma ya Cori rü tá wena pexü̃ nawoeguxẽxẽ naxca̱x i ngẽma naane ga perü o̱xigü nawa yexmagüxü̃. Rü pema rü tá wena nawa pengẽxmagü rü nüma ya Tupana rü tá pexü̃ narüngü̃xẽxẽ, rü tá pexü̃ nimuxẽxẽ perü o̱xigüarü yexera.

6Rü nüma ya perü Cori ya Tupana rü peãẽwa rü petaagüãẽwa tá nayanaxoxẽxẽ i ngẽma chixexü̃ i ngéma ngẽxmaxü̃ nax ngẽmaãcü aixcüma nüxü̃ pengechaü̃güxü̃ca̱x perü maxü̃nemaxã rü peãẽmaxã nax ngẽmaãcü pexü̃́ nangẽxmaxü̃ca̱x i perü maxü̃.

7Rü nüma ya Cori ya Tupana rü perü uanügüca̱x rü ngẽma duü̃xü̃gü i pexchi aiexü̃ca̱x tá ínananguxẽxẽ i guxü̃ma i ngẽma guxchaxü̃gü ga pemaxã nüxü̃ chixuxü̃.

8Rü pema rü tá Cori ya Tupanaca̱x pewoegu rü naga tá pexĩnüe rü tá peyanguxẽxẽ i guxü̃ma i ngẽma norü mugü i ñu̱xma pemaxã nüxü̃ chixuxü̃.

9Rü ñu̱xũchi i nüma ya Cori ya Tupana rü tá pexü̃ narüngü̃xẽxẽ nawa i guxü̃ma i ngẽma perü puracü i pexüxü̃. Rü tá pexü̃ narüngü̃xẽxẽ i pexacügüwa, rü pexü̃nagüwa rü penetüarü owa. Rü ngẽmaãcü i nüma ya Cori ya Tupana rü wena taãẽãcüma tá pexü̃ narüngü̃xẽxẽ yema nũxcüma ga perü o̱xigüxü̃ nangü̃xẽẽgurüxü̃.

10Rü ngẽmaãcü tá pemaxã namecüma ega aixcüma perü maxü̃nemaxã rü peãẽmaxã naga pexĩnüegu ya Cori ya Tupana rü peyanguxẽẽgu i norü mugü i ñaa poperagu ümatüxü̃.

11Rü ñaa mugü i ñu̱xma pexna chaxãxü̃ rü tama poraãcü naguxcha nax peyanguxẽẽxü̃, rü ngẽmaca̱x i ngexerüxemare i pema rü pexü̃́ natauxcha nax peyanguxẽẽxü̃.

12Rü ngẽma mugü rü tama nixĩ i daxũguxü̃ i naanewa nangẽxmaxü̃, nax ngẽmaca̱x ñaperügügüxü̃ca̱x: “¿Texé daxũanegu naxca̱x taxĩnagü nax nua tanangexü̃ca̱x i ngẽma mugü rü ngẽmaãcü tüxü̃ nüxü̃ tacua̱xẽxẽxü̃ca̱x rü nagu imaxẽxü̃ca̱x?” ñaperügügü.

13Rü ngẽma mugü rü tama nixĩ i már arü tocutüwa nangẽxmaxü̃, nax ngẽmaca̱x ñapegügüxü̃ca̱x: “¿Texé tá tixãẽ i ngẽma már nax taxca̱x nua tanangexü̃ca̱x i ngẽma mugü rü tüxü̃ nüxü̃ tacua̱xẽxẽxü̃ca̱x, nax ngẽmaãcü nagu imaxẽxü̃ca̱x?” ñapegürügü.

14Natürü nua petanüwatama nangẽxma i ngẽma mugü. Rü pea̱xwa rü peãxẽwa nangẽxma nax ngẽmaãcü nagu pemaxẽxü̃ca̱x.

15¡Dücax! Ñu̱xma rü chanaxwa̱xe i nüxü̃ pixu i ngexü̃rüüxü̃ yixĩxü̃ i ngẽma pema penaxwa̱xexü̃. ¿Rü penaxwa̱xe i ngẽma mexü̃ i maxü̃wa tüxü̃ gaxü̃ rüe̱xna penaxwa̱xe i ngẽma chixexü̃ i yuwa tüxü̃ gaxü̃?

16Rü ngẽxguma tá naga pexĩnüegu i ngẽma mugü i ñu̱xma pexü̃ chamuxü̃, rü nüxü̃ pengechaxü̃gu ya perü Cori ya Tupana, rü nagu pexĩxgu i ngẽma nüma nanaxwa̱xexü̃, rü peyanguxẽẽgu i norü mugü rü ucu̱xẽgü, rü mucü ya taunecü tá pemaxẽ, rü tá pimu, rü nüma ya Cori ya Tupana rü tá pexü̃ narüngü̃xẽxẽ nawa i ngẽma nachixü̃ane i nawa tá pengẽxmagüxü̃.

17-18Natürü ngẽxguma taxũtáma naga pexĩnüegu i ñaa mugü, rü ngẽxguma nawe perüxĩxgu i ngẽma tupananetagü nax nüxü̃ picua̱xüü̃güxü̃ca̱x rü nape̱xegu pecaxã́pü̱xügüxü̃ca̱x, rü ñu̱xmatama pemaxã nüxü̃ chixu rü nawena nax natü i Yudáü̃wa tá pichoü̃xü̃, rü taxũtáma mucü ya taunecü ngẽma nachixü̃ane i tá penapuxü̃wa pengẽxmagü, rü paxa tá peyue erü tama Tupanaga pexĩnüe.

19Rü ñoma i ngunexü̃gu rü Tupanape̱xewa rü duü̃xü̃güpe̱xewa pexna chaca nax pematama nüxü̃ pixuxü̃ca̱x i ngexü̃rüüxü̃ tá yixĩxü̃ i penaxwa̱xexü̃, rü ngẽma maxü̃ rüe̱xna ngẽma yu. ¿Rü tá penaxwa̱xe i Tupanaarü ngü̃xẽxẽ rüe̱xna norü poxcu? ¡Ẽcü penayaxu i maxü̃ nax pema rü petaagü rü ta namaxẽxü̃ca̱x!

20¡Ẽcü nüxü̃ pengechaxü̃ ya Cori ya perü Tupana, rü naga pexĩnüe, rü aixcüma peyanguxẽxẽ i ngẽma pexü̃ namuxü̃! Erü naxme̱xwa nangẽxma i perü maxü̃ rü ngẽma perü ngunexü̃gü i nagu tá pemaxẽxü̃ nawa i ngẽma naane ga perü o̱xigü ga Abraáü̃ rü Ichaá rü Acóbumaxã naxueguxü̃ —ñanagürü ga Moiché.

Currently Selected:

Wenaxarü naxümatü ga Tupanaarü mugü 30: tcaP

Highlight

Copy

Compare