Wenaxarü naxümatü ga Tupanaarü mugü 24
24
Mugü naxca̱x i taxma̱xchiga
1Rü ngẽxguma wüxi ya yatü rü wüxi i ngexü̃maxã naxãxma̱xgu, natürü yixcama chixexü̃xü̃ ngĩwa nada̱u̱xgu rü ngẽmaca̱x ngĩxü̃ ínayaxoãchi, rü tá ngĩxna nanaxã i wüxi i popera i nawa nüxü̃ yaxuxü̃ nax marü ngĩxü̃ ínatáxü̃. Rü ñu̱xũchi napatawa tá ngĩxü̃ ínamuxũchi.
2Rü nawena nax yima yatüpatawa ínaxũxũxü̃, rü marü name nax nai ya yatümaxã naxãtexü̃.
3-4Natürü ngẽxguma yimá nai ya ngĩte rü ta̱xacüca̱x ngĩxü̃ íyaxoãchigu, rü ngẽmaca̱x ngĩxna naxããgu i popera i nawa nüxü̃ yaxuxü̃ nax marü ngĩxü̃ nax ínatáxü̃ rü napatawa nax ngĩxü̃ ínamuxũchixü̃ rüe̱xna nayu̱xgu ya ngĩte, rü ngẽxguma ya yima nüxíraü̃cü ya ngĩte rü taxucürüwama wena ngĩmaxã naxãxma̱x. Erü ngĩma rü marü nai ya yatümaxã imaxü̃. Rü ngẽxguma wena ngĩmaxã naxãxma̱xgu rü Cori ya Tupanape̱xewa rü wüxi i taxü̃ i chixexü̃ nixĩ. Rü pemax rü tama name i penachixexẽxẽ i ngẽma naane i Cori ya Tupana pexna ãxü̃.
Naguxü̃raü̃xü̃ i mugü
5Rü yimá yatü ya ngexwaca ãmacü, rü wüxi ya taunecü taxũtáma daiwa naxũ rüe̱xna ta̱xacürü to i ãẽ̱xgacüarü puracü naxü nax ngẽmaãcü guxü̃ma i ngẽma ngunexgügu naxãchicaxü̃ca̱x nax napatawa nangemaxü̃ nax naxma̱xü̃ nataãẽxẽẽxü̃ca̱x.
6Rü ngẽxguma texé paxaãchi diẽruca̱x pexna caxgux rü tama name i pema rü tümaarü tríguarü camüruü̃ca̱x tüxna peca nachicüü i ngẽma diẽru i pexna naxca̱x tacaxü̃. Erü ngẽxguma ngẽmaãcü penaxü̱xgu rü ñoma tümaarü maxü̃ca̱x ípeca̱xaxü̃rüxü̃ nixĩ.
7Rü ngẽxguma nüxü̃ peda̱u̱xgu i wüxi i Iraétanüxü̃ nax wüxi ya naxrüxü̃ i Iraétanüxü̃ca̱x nangĩ́xü̃ nax norü mugüruxü̃ tüxü̃ yaxĩxẽẽxü̃ca̱x rüe̱xna tümamaxã nataxexü̃ca̱x, rü yu tá namaxã pexuegu. Rü ngẽmaãcü tá peyanaxoxẽxẽ i ngẽma chixexü̃ i nacüma i petanüwa ngẽxmaxü̃.
8Rü ngẽxguma texé chaxünemaxã ida̱xaweegu rü tanaxwa̱xe nax meama tayanguxẽẽxü̃ i ngẽma ucu̱xẽ i chacherdótegü i Lebítanüxü̃ tümamaxã nüxü̃ ixugüxü̃. Rü name nax tayanguxẽẽxü̃ i guxü̃ma i ngẽma ucu̱xẽ i chacherdótegümaxã nüxü̃ chixuxü̃.
9¡Rü nüxna pecua̱xãchi ga yema Cori ya Tupana namawa chaueya̱x ga Maríamaxã üxü̃ ga yexguma Equítuanewa ípechoxü̃xguwena!
10Rü ngẽxguma togue diẽruca̱x pexna caxgu nax yixcüra pexü̃́ ngĩxü̃ tatáeguxẽẽxü̃ca̱x, rü tama name i tümapatagu pechocu nax penayaxuxü̃ca̱x i tümaarü ngẽmaxü̃ i ngẽma diẽruchicüxü pexna taxuãxü̃xü̃.
11Rü tümapataarü düxétüwatama pengẽxmagü, rü ngéma tüxü̃ penangu̱xẽxẽ rü ñu̱xmata tümatama tayayaxu i ngẽma tümaarü ngẽmaxü̃ i ngẽma diẽru i paxaãchi pexna naxca̱x taca̱xaxü̃chicüü pexna taxãxchaü̃xü̃.
12Rü ngẽxguma wüxi ya duü̃xẽ ya ngearü ngẽmaxü̃xã́xẽ tixĩxgu, rü tümachiru pexna taxãxgu nachicüü i ngẽma diẽru i tüxna pexãxü̃, rü tama name i ngẽma chütacü cuxü̃tawa nangẽxma i ngẽma tümachiru.
13Rü ngẽxguma marü yanaxü̱xcugu ya üa̱xcü rü name nixĩ i tüxü̃ penatáeguxẽxẽ i tümachiru, nax ngẽmamaxã tügü tidüxüxü̃ca̱x i ngẽxguma chütacü tapexgu. Rü ngẽxguma ngẽmaãcü penaxü̱xgu, rü tüma rü tá moxẽ pexna taxã. Rü nüma ya Cori ya perü Tupana tá pexü̃ narüngü̃xẽxẽ, erü mexü̃ nape̱xewa pexügü.
14Rü tama name i tüxü̃ pepuracüxẽẽmare rü ñu̱xũchi tama tüxü̃́ penaxütanü i ngẽma puracü i taxüxü̃ ya yíxema duü̃xẽ ya perüxü̃ Iraétanüxü̃ ixĩxẽ ya ngearü diẽruã́xẽ. Rü ngẽxgumarüxü̃ ta name nixĩ nax mea tüxü̃́ penaxütanüxü̃ ya yíxema to i nachixü̃anecüã̱x ya wüxi ya perü ĩanegu ãpataxe.
15Rü name nixĩ i ngẽmatama ngunexü̃gu, naxü̃pa nax yanaxücuxü̃ ya üa̱xcü tüxü̃́ penaxütanü i ngẽma puracü i tüxü̃ pexüxẽẽxü̃. Erü tüma rü tangearü diẽruã̱x rü ngẽmaca̱x tanaxwa̱xe i ngẽma diẽru nax ngẽmamaxã tachibüxü̃ca̱x. Rü ngẽxguma taxũtáma ngẽmaãcü peyanguxẽẽgu rü tüma rü tá Cori ya Tupanamaxã pexü̃ tixu, rü pema rü tá nipeguãchi i ngẽma pecadu.
16Rü yíxema papagü rü taxucürüwama ngẽma tümane ügüxü̃ i pecadugagu tüxü̃ nima̱xgü. Rü ngẽxgumarüxü̃ ta i ngẽma tümanegü rü taxucürüwama nanatügü üxü̃ i pecadugagu nanadai. Rü wüxichigü rü noxrütama pecadugagu tá nayu.
17¡Rü taxũtáma chixri tümamaxã pechopetü ya yíxema to i nachixü̃anecüã̱x i petanüwa ngẽxmagüxe, rü bai ya yíxema taxcutagü! ¡Rü yíxema yutegüe rü taxũtáma tümachiruca̱x tüxna peca ega pexü̃tawa diẽruca̱x ítacaxgu nax yixcüama pexü̃́ tanatáeguxẽẽxü̃ca̱x!
18¡Rü taxṹ i nüxü̃ iperüngümaexü̃ ga pemax rü Equítuanecüã̱xarü mugüruü̃gü pixĩgüxü̃, rü nüma ga Cori ya perü Tupana nixĩ ga yéma pexü̃ ínguxü̃xẽẽcü! Rü ngẽmaca̱x i ñu̱xma rü pexü̃ chamu nax peyanguxẽẽxü̃ i guxü̃ma i ngẽma pemaxã nüxü̃ chixuxü̃.
19Rü ngẽxguma peanewa tríguarü o pibuxu̱xgu, rü ngẽxma nüxü̃ perüngümagu i wüxicüta i trigu, rü tama name i naxca̱x cuyataegu rü cuyayaxu. Rü nüetama ngẽxma naxǘ nax wüxi ya duü̃xẽ ya to ya nachixü̃anecüã̱x ya petanüwa ngẽxmaxẽ, rüe̱xna wüxi ya taxcuta, rüe̱xna wüxi ya yutexe tügüxü̃́ nayaxuxü̃ca̱x. Rü ngẽxguma ngẽmaãcü penaxü̱xgu, rü nüma ya Cori ya perü Tupana rü tá pexü̃ narüngü̃xẽxẽ i guxü̃ma i perü puracüwa.
20Rü ngẽxguma perü oribuarü o pibuxgügu, rü tama name i wena nüxü̃ pidaugü i nachacüügü naxca̱x i norü o i ngéma yaxǘgüxü̃. Rü nüetama ngéma nangẽxmagü nax yíxema to i nachixü̃anecüã̱x ya petanüwa ngẽxmagüxe nabuxuxü̃ca̱x, rüe̱xna taxcutagü rüe̱xna yutegüxe nabuxuxü̃ca̱x.
21Rü ngẽxguma perü úbaarü o pibuxgügu, rü tama name i wena nüxü̃ pidaugü i nachacüügü naxca̱x i norü o i ngéma yaxǘgüxü̃. Rü nüetama ngéma nangẽxmagü nax yíxema to i nachixü̃anecüã̱x ya petanüwa ngẽxmagüxe nabuxuxü̃ca̱x, rüe̱xna taxcutagü rüe̱xna yutegüxe tügüaxü̃́ nabuxgüxü̃ca̱x.
22Rü nüxna pecuã̱xãchie ga pemax rü ta rü mugüruü̃gü pixĩgüxü̃ ga Equítuanewa. Rü ngẽmaca̱x nixĩ i pexü̃ chamuxü̃ nax peyanguxẽẽxü̃ i guxü̃ma i ñaa mugü.
Currently Selected:
Wenaxarü naxümatü ga Tupanaarü mugü 24: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
