Wenaxarü naxümatü ga Tupanaarü mugü 14
14
1Pema rü naxacügü pixĩgü i perü Cori ya Tupana. Rü ngẽmaca̱x rü ngẽxguma wüxi i petanüxü̃ yuxgu ¡rü taxũtáma perü ngechaü̃maxã pegü pewí rü pegü piyoeru!
2Erü pema rü perü Cori ya Tupanaarü duü̃xü̃gü pixĩgü, rü nüma rü pexü̃ naxuneta natanüwa i guxü̃ma i ñoma i naanewa maxẽxü̃ i duü̃xü̃gü nax noxrü pixĩgüxü̃ca̱x.
Naxü̃nagü i mexü̃ nax nangṍxü̃
(Lv. 11.1-47)
3-4Rü tama name i penangõ̱x i ngẽma naeü̃ ya Tupana pexna chu̱xuxü̃. Rü ñaagü nixĩ i ngẽma naeü̃gü i mexü̃ nax penangṍxü̃: rü wocagü, rü carnérugü, rü chíbugü,
5rü cowügü, rü yawegü, rü gamugü, rü chíbugü i naixnecücüã̱x, rü antíropegü, rü carnérugü i naixnecücüã̱x.
6Rü marü name nax penangṍxü̃ i ngẽma naeü̃gü i wena yoxwemügüxü̃ rü taxrepatüxü̃.
7¡Natürü taxũtáma penangõ̱x i ñaa naeü̃gü: rü caméyugü, rü conéyugü rü liébregü rü teyóü̃, erü nümagü rü woo wena nayoxwemügü natürü tama nataxrepatü. Rü ngẽma naeü̃gü rü Tupanape̱xewa rü nixãũãchi.
8Rü ngẽma cuchi rü woo nataxrepatü ¡rü taxũtáma penangõ̱x! Erü tama wena nayayoxmü̃ i nawemü. Rü ngẽmaca̱x Tupanape̱xewa rü nixãũãchi. ¡Rü taxũtáma penangõ̱x i namachi rü bai tá nüxü̃ pingógü ega nayu̱xgu.
9-10Rü name nax penangṍxü̃ i guxü̃ma i ngẽma dexácüã̱x i ãxcüraxü̃ rü ãchipáxü̃, natürü tama name nax penangṍxü̃ i ngẽma dexácüã̱x i tama ãxcüraxü̃ rü ãchipáxü̃. Erü pexca̱x rü naxãũãchi.
11Rü name nax penangṍxü̃ i guxü̃ma i ãxpe̱xatüxü̃ i tama ãũãchixü̃.
12-18Natürü ngẽma ãxpe̱xatüxü̃ ya Tupana pexna chu̱xuxü̃ nax penangṍxü̃ rü ñaagü nixĩ: rü ĩyü, rü ĩyü i büyechina̱xãwa̱xexü̃, rü ĩyü i caripira, rü ngurucu, rü miránugü, rü ĩyügü, rü cuervugü, rü abetrú, rü murutucu, rü toxõ, rü guxü̃ma i ngẽma ĩyürüxü̃ ixĩxü̃, rü ngú, rü ibí, rü cówa, rü pelícanu, rü ẽxcha, rü cotua, rü tuyuyu, rü naguxü̃raü̃xü̃ i cówagü, rü abubíya, rü chü̱xüri. Rü guxü̃ma i ngẽma rü tama name nax penangṍxü̃.
19¡Rü taxũtáma penangõ̱x i naweanegü i ãxpe̱xatügüxü̃! Erü Tupanaca̱x rü nixãũãchi.
20Natürü guxü̃ma i ngẽma ãxpe̱xatüxü̃gü i Tupanaca̱x mexü̃ rü marü name nax penangṍxü̃.
21Rü ngẽxguma nüxü̃ peyangauxgu i wüxi i naeü̃ i marü yuxü̃ rü tama name nax penangṍxü̃. Erü pema rü perü Cori ya Tupanaarü duü̃xü̃gü pixĩgü. Natürü marü name nax ngẽma duü̃xü̃ i to i nachixü̃anecüã̱x i petanüwa maxü̃xü̃na penaxãxü̃ i ngẽma namachi. Rü nüma rü marü name nax nangṍãxü̃. Rü ngẽxgumarüxü̃ ta rü name nax namaxã petaxexü̃ nüxü̃ i ngẽma to i nachixü̃anecüã̱x i ngéma üpetüxü̃. Rü ngẽxgumarüxü̃ ta nachu̱xu nixĩ nax tümaégüneniü̃wa tüxü̃ pimuxraxü̃ ya wüxi ya cabraxacü.
Diésmugüchiga
22Rü wüxichigü ya taunecügu ¡rü taxũtáma nüxü̃ perüngümae nax penetüarü otanüwa ípenaxüxüchixü̃ i ngẽma diésmu i Tupanana üxü̃!
23Rü ngẽma nachica ya Tupana nüxü̃ unetaxü̃ nax nüma nawa nangẽxmaxü̃ca̱x, rü ngéma tá penana i perü diésmu i Tupanaca̱x ípexüxüchixü̃ i perü triguwa rü bínuwa rü chíxü̃wa rü ngẽma nüxíra buexü̃ i perü wocaxacügüwa rü perü carnéruxacügüwa, nax ngéma Tupanape̱xewa penangṍxü̃ca̱x. Rü ngẽmaãcü i pema rü tá pengúe nax guxü̃gutáma Tupanaga pexĩnüexü̃ rü nüxü̃ pengechaü̃güxü̃.
24-25Natürü ngẽxguma yima Tupanapata rü pexna nayáxü̃xüchigu rü taxucürüwa ngéma penanaxgu i guxü̃ma i ngẽma perü ãmaregü, rü penaxwa̱xe nax namaxã petaxexü̃ i ngẽma perü ãmaregü rü ngẽma natanü i diẽru tá nixĩ i ngẽma nachica ya Tupana nüxü̃ unetaxü̃wa pengẽxü̃.
26Rü ngẽxguma ngéma pengugügu rü ngẽma diẽrumaxã tá naxca̱x petaxe i pewemü i wocagü, rü carnérugü, rü bínugü, rü toamachigü i nacuchíxü i ngúchia̱xü̃, rü toamachigü i penaxwa̱xexü̃ nax ngéma Tupanape̱xewa pexacügümaxã petaãẽgüxü̃ca̱x.
27¡Rü taxũtáma nüxü̃ perüngümae nax namaxã pengauxü̃ i ngẽma Lebítanüxü̃ i perü ĩanewa maxẽxü̃! Erü nümagü rü nangeane rü tama perüxü̃ nüxü̃́ nangẽxma i norü naane.
28Rü ngẽxguma norü tomaepü̱x ya taunecüwa nanguxgu rü pema rü ngẽma penetügüarü otanüwa tá ngẽma Lebítanüxü̃ca̱x ípenaxüxüchi i ngẽma diésmu. Rü perü ĩanewa ngẽxmaxü̃ i trigupataxü̃gu tá namaxã penguxü̃.
29Rü ngẽmaãcü i ngẽma Lebítanüxü̃ i ngearü naaneã̱xgüxü̃ rü ngẽma to i nachixü̃anecüã̱x i perü ĩanewa ngẽxmagüxü̃ rü tá naxãwemügü ñu̱xmata mea nüxü̃́ yangu. Rü ngẽmaãcü i nüma ya Cori ya perü Tupana rü tá pexü̃ narüngü̃xẽxẽ nawa i guxü̃ma i ta̱xacü i pexüxü̃.
Currently Selected:
Wenaxarü naxümatü ga Tupanaarü mugü 14: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
