Popera ga Coróchawa yexmagüxü̃ ga yaxõgüxü̃tanüwa namuxü̃ ga Pauru 2
2
1Pa Chauenexẽgüx, chanaxwa̱xe i nüxü̃ pecua̱x nax aixcüma poraãcü pexca̱x chapuracüxü̃. Rü ngẽxgumarüxü̃ ta poraãcü chapuracü naxca̱x i ngẽma taenexẽgü i Laodichéaarü ĩanewa ngẽxmagüxü̃ rü guxü̃ma i ngẽma togü i taguma choxü̃ daugüxü̃.
2Rü ngẽmaãcü poraãcü chapuracü nax ngẽma duü̃xü̃güaxü̃́ chanangúchaü̃xẽẽxü̃ca̱x. Erü chanaxwa̱xe i guxü̃guma nügü nangechaü̃gü rü nüxü̃́ nangẽxma i ngẽma cua̱x i aixcüma ixĩxü̃ nax ngẽmaãcü meama nüxü̃ nacua̱xgüxü̃ca̱x i ngẽma ẽxü̃guxü̃ ga noxri Tupanaxicatama nüxü̃ cuáxü̃. Rü yimá rü Cristutama nixĩ.
3Rü nawa nixĩ i nangẽxmaxü̃ i guxü̃ma i cua̱xgü i mexü̃.
4Rü pemaxã nüxü̃ chixu i ngẽma, erü tama chanaxwa̱xe nax texé pexü̃ womüxẽẽgüxü̃ namaxã i ta̱xacürü ore i chixexü̃wa pexü̃ gagüxü̃.
5Rü woo tama petanüwa nax changexmaxü̃, natürü chauãẽwa rü poraãcü pegu charüxĩnü. Rü wüxi i chorü taãxẽ nixĩ nax nüxü̃ chacuáxü̃ nax mea pegümaxã ipecuáxü̃ rü tama nüxü̃ perüxoexü̃ nax Cristuaxü̃́ peyaxõgüxü̃.
Ñu̱xma nax Cristuarü ixĩgüxü̃ rü ngexwaca̱xü̃xü̃ i maxü̃ tüxü̃́ nangẽxma
6Rü ñu̱xma nax Ngechuchu ya Cristuxü̃ peyauxgüxü̃ nax perü Cori yixĩxü̃ca̱x, rü name nixĩ i mea pemaxẽ i ngẽma aixcüma Cristuaxü̃́ yaxõgüxü̃rüxü̃.
7Rü wüxi i nanetü i waixü̃müwa meama yaxũ̱xchúma̱xaxü̃rüxü̃ rü pema rü name nax meama Cristuwa peyaxũ̱xgüxü̃ i perü õwa, yema pexü̃ tangúexẽẽxü̃rüxü̃. Rü name nixĩ i guxü̃guma Tupanana moxẽ pexãgü.
8-9¡Rü naxca̱x pexuãẽgü i ngẽma duü̃xü̃gü i pexü̃ womüxẽẽgüchaü̃xü̃ namaxã i norü ore i tama aixcüma ixĩxü̃ rü taxuwama mexü̃! Rü nümagü rü tama Cristuchigaxü̃ nixugü, natürü pexü̃ nangúexẽẽchaü̃ i ngẽma nũxcümaü̃güxü̃ i nacümagü ga duü̃xü̃gü nagu ĩxü̃ rü ngẽma ngu̱xẽẽtaegü i ñoma i naanearü ixĩxü̃. Natürü nüma ya Cristu rü Tupanaxü̃chi nixĩ rü guxü̃ma i Tupanaarü pora rü Cristuwa nangẽxma.
10Rü ñu̱xmax, rü pewa nangẽxma i Tupanaarü pora erü Cristuarü pixĩgü. Rü nüma ya Cristu rü namaxã inacua̱x i guxü̃ma i naãẽgüarü ãẽ̱xgacügü i iporaexü̃.
11Rü ngẽma Yudíugü rü nügü ínawiecha̱xmüü̃pe̱xechiraü̃gu nax Tupanape̱xewa yamexü̃ca̱x. Natürü ñu̱xma nax Cristuaxü̃́ peyaxõgüxü̃ rü tama ngẽma wiecha̱xmüü̃pe̱xechiraü̃gagu nixĩ nax Tupanape̱xewa pimexü̃. Rü ñu̱xma rü nape̱xewa pime erü Cristu pexü̃ ínanguxü̃xẽxẽ nawa i pexenearü ngúchaü̃gü i chixexü̃.
12Rü yexguma ípebaiü̃gu, rü Cristu itáxü̃rüxü̃ yexma nata̱x ga nũxcümaü̃xü̃ ga perü maxü̃. Rü yema Cristu írüdaxü̃rüxü̃ rü pema rü ta penayaxu i maxü̃ i ngexwaca̱xü̃xü̃, yerü peyaxõgü ga Tupanaarü pora ga namaxã Cristuxü̃ yuwa ínadaxẽẽxü̃.
13Rü ü̃pa ga pema rü tama pexü̃́ nayexma ga maxü̃ i taguma gúxü̃ yerü pepecaduã̱xgü rü pexenearü ngúchaü̃ i chixexü̃gu pemaxẽ. Natürü i ñu̱xma rü Cristuxü̃ namaxẽẽxü̃rüxü̃ pexü̃ namaxẽxẽxẽ ya Tupana, erü Cristuarü duü̃xü̃gü pixĩgü. Rü Tupana rü marü Cristugagu pexü̃́ nüxü̃ narüngüma ga guxü̃ma ga perü pecadugü.
14Rü yexguma Cristu curuchagu yu̱xgu nixĩ ga Tupana yexma yanaxoxẽẽxü̃ ga yema mugü ga Moiché ümatüxü̃ ga guxchaxü̃ tamaxã üxü̃. Rü Tupana rü yemaacü nayanaxoxẽxẽ ga yema mugü ga yexguma curuchawa yapotagüãgu
15Rü yexguma curuchagu nayu̱xgu ga Cristu, rü yexguma nixĩ ga Tupana nüxna napuãxü̃ ga norü pora ga yema naãxẽgü ga iporaexü̃. Rü yexguma nixĩ ga guxü̃ ga duü̃xü̃güpe̱xewa naxãnexẽẽãxü̃, ñoma wüxi i churaragüarü ãẽ̱xgacü i norü uanü i nüxü̃ naporamaexü̃xü̃ naxãnexẽẽxü̃rüxü̃.
16Rü ñu̱xma rü taxuca̱xma tü̱xcüü̃ pexü̃ nixugüe i ngẽma Yudíugü naxca̱x i ngẽma õna i pengõ̱xgüxü̃ rü ngẽma axexü̃ i pixaxgüxü̃. Rü taxuca̱xma tü̱xcüü̃ pexü̃ nixugüe nachiga i ngẽma petaarü ngunexü̃gü i nümagü nagu naxauregüxü̃, rü yimá tauemacügü ya ngexwacaxü̃cü i nagu naxauregüxü̃, rü ngẽma ngü̃xchigaarü ngunexü̃gü i nagu naxauregüxü̃.
17Rü aixcüma yema nũxcümaü̃güxü̃ ga Yudíugü rü nanaxauregü ga yema nacümagü yerü ga Cristu rü tauta ínangu ga yexguma. Natürü i ñu̱xma rü marü ínangu ya Cristu rü tórü pecaduca̱x nayu nax tama nagu ixĩxü̃ i ngẽma nũxcümaü̃güxü̃ i nacümagü.
18¡Rü taxṹ i naga pexĩnüexü̃ i ngẽma duü̃xü̃gü i pepe̱xewa nügü írüxíxragüxü̃ rü daxũcüã̱x i orearü ngeruü̃güxü̃ icua̱xüü̃güxü̃! Nümagü rü nügü nixugüe nax yango̱xetügüxü̃, rü ngẽmaãcü noxrütama ĩnügümaxã nügü nicua̱xüü̃gü.
19Natürü i nümagü rü tama aixcüma naga naxĩnüe ya yimá taeru ixĩcü ya Cristu. Rü nüma ya Cristu nixĩ i tüxü̃ yamuxẽẽxü̃ rü tüxü̃ naporaexẽẽxü̃ ya guxãma ya yíxema nüxü̃́ yaxõgüxe nax guxãma wüxigu tarüxĩnüexü̃ca̱x ngẽma Tupana naxwa̱xexü̃rüxü̃.
20Rü pema rü ñu̱xma nax Cristuaxü̃́ peyaxõgüxü̃ rü marü tama name nax naga pexĩnüexü̃ i ngẽma Yudíugüarü mugü. ¿Rü tü̱xcüü̃ nixĩ i ñoma i naanecüã̱xrüxü̃ nagu pemaxẽxü̃ i ngẽma Yudíugücümagü?
21Rü nümagü i Yudíugü rü nüxü̃ nixugüe rü ñanagürügü: “Tama name i nüxü̃ quingõgü i ngẽã, rü tama name i cunangõ̱x i yea, rü tama name i cunayaxu i ngẽma”, ñanagürügü.
22Natürü guxü̃ma i ngẽma nacümagü rü paxa tá inayarüxo, erü duü̃xü̃güarü nixĩgü. Rü ngẽma pexü̃ namuxü̃ rü duü̃xü̃güarü mugümare nixĩ. Rü ngẽma pexü̃ nangúexẽẽxü̃ rü duü̃xü̃güarü ngu̱xẽẽtaemare nixĩ.
23Rü guxü̃ma i ngẽma pexü̃ namuxü̃ rü pexca̱x namexcüraxü̃ erü pexü̃ naxucu̱xẽgü nax ta̱xacü pexauregüxü̃ca̱x, rü tama pegü picua̱xüü̃güxü̃ca̱x, rü ngúxü̃maxã pexenemaxã pecuáxü̃ca̱x. Natürü guxü̃ma i ngẽma mugü rü tama pexü̃ narüngü̃xẽxẽ nax nüxü̃ perüxoexü̃ca̱x i pexenearü ngúchaü̃gü.
Currently Selected:
Popera ga Coróchawa yexmagüxü̃ ga yaxõgüxü̃tanüwa namuxü̃ ga Pauru 2: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.