Amúx 5
5
Tupana rü Iraétanüxü̃na naxu nax naxca̱x nawoeguxü̃ca̱x
1Nüma ya Cori ya Tupana rü ñanagürü: —¡Pa Iraétanüxü̃x, nüxü̃ pexĩnüe i ñaa chorü ore! ¡Rü nüxü̃ pexĩnüe i ñaa poraãcü changechaü̃ãcüma pemaxã nüxü̃ chixuxü̃!
2Rü ngẽma Iraéane ga noxri mexẽchixü̃ rü marü chixexü̃gu nangu rü taxucürüwa ínarüda. Rü chixexü̃wa nangẽxma rü marü tataxuma nax texé ínadaxẽẽxü̃ rü namexẽẽxü̃ —ñanagürü.
3Rü nüma ya Cori ya Tupana rü Iraétanüxü̃xü̃ ñanagürü: —Rü ngẽxguma wüxi ya ĩane rü 1,000 i yatü daiwa namugügu rü 100 ica tátama nixĩ i maxẽxü̃ woeguxü̃. Rü ngẽxguma wüxi ya ĩane rü 100 ngéma mugügu rü 10 ica tátama nixĩ i woeguxü̃ —ñanagürü.
4Rü nüma ya Cori ya Tupana rü Iraétanüxü̃xü̃ ñanagürü: —¡Cha̱u̱xca̱x pexĩ rü tá pemaxẽ!
5¡Rü taxṹ i Betéarü tupananetachicüna̱xãca̱x peyadauxü̃! ¡Rü taxṹ i Guirigáwa pexĩxü̃! ¡Rü taxṹ i Bechébagu pichocuxü̃! Erü ngẽma Guirigácüã̱xgü rü to i naanewa tá nagagü, rü yima Beté rü tá nagu napogüe —ñanagürü.
6¡Cori ya Tupanaca̱x pewoegu rü tá pemaxẽ! Rü ngẽxguma taxũtáma naxca̱x pewoeguxgu, rü nüma rü tá Iraéanewa nanamu ya üxü. Rü Betéarü ĩanewa rü nataxutama nax texé yaxoxẽẽxü̃.
7Rü ngẽma duü̃xü̃gü i pexü̃tawa ĩxü̃ nax penamexẽẽxü̃ca̱x i norü guxchaxü̃gü rü pema, Pa Ãẽ̱xgacügüx, rü tama aixcüma nüxü̃́ penamexẽxẽ. Rü ngẽmaca̱x tama nataãxẽ i duü̃xü̃gü erü tama mugü nüxü̃ ixuxü̃ãcüma penaxü.
8Rü nüma ya Cori ya Tupana nixĩ ga naxüxü̃ i ngẽma ẽxtagütücumü i Préyadegu ãégaxü̃ rü ngẽma ẽxtagütücumü i Orióü̃gu ãégaxü̃. Rü ngẽxguma nachütagu rü nüma ínanangu̱xẽxẽ i ngóonexü̃. Rü ngẽxguma nangóonegu rü nüma rü ínanangu̱xẽxẽ i chütaxü̃. Rü nüma nixĩ i caixanexü̃xü̃ yanguxuchixẽẽãxü̃ i már arü dexá nax dauxü̃ naxĩxü̃ca̱x rü ñu̱xũchi ñoma i naanegu nax napuxẽẽãxü̃ca̱x. Rü naéga rü Cori ya Tupana nixĩ.
9Rü nüma nixĩ i yawa̱xgüxẽẽãxü̃ ya yima ĩanearü poxeguxü̃gü rü nagu napogüxü̃ i norü poxü̃chicaxü̃gü.
10¡Rü pegümaxã pengechaxü̃gü i pema nax tümachi pexaixü̃ ya yíxema ãẽ̱xgacüpe̱xewa ínapoxü̃́xe i ngẽma duü̃xü̃ i aixcümaxü̃ ixuxü̃! Rü pema rü tüxü̃ pexoe ya yíxema aixcümaxü̃ ixuxe.
11Rü pemax, Pa Ãẽ̱xgacügüx, rü chixri tümamaxã ipecua̱x ya yíxema ingearü diẽruã́xẽ. Rü naétü tüxna peca nax tümaarü trigumaxã pexü̃́ tanaxütanüxü̃ca̱x naxca̱x nax penamexẽẽgüxü̃ i tümaarü guxchagü. Rü ngẽmaca̱x i pema rü taxũtáma nawa pemaxẽ ya yima ĩpatagü ya nutagümaxã pexüxü̃ne, rü bai tá peyaxagüxü̃ ya yimá bínu i peanegu petogüxü̃ i úbagüwaxü̃cü.
12Choma nüxü̃ chacua̱x nax nataxü̃ i perü chixexü̃gü, Pa Ãẽ̱xgacügüx. Rü ngẽma perü pecadugü rü tama inayacua̱x. Rü ngẽxguma duü̃xü̃gü pepe̱xewa norü guxchaxü̃gü yamexẽẽgüchaü̃gu, rü yíxema aixcümaxü̃ ixuxe rü tama tüxü̃́ ipexĩnüe. Natürü nüxü̃́ ipexĩnüe i ngẽma diẽrumaxã pexü̃́ naxütanüxü̃ nax naétüwaama pechogüxü̃ca̱x. Rü ngẽmaãcü i pemax, Pa Ãẽ̱xgacügüx, rü ngẽxma tüxü̃́ ipeyanaxoxẽxẽ i ngẽma guxchaxü̃ i pexü̃tawa naxca̱x taxũxü̃ ya yíxema ngearü diẽruã́xẽ.
13Rü ngẽmaca̱x ya yíxema tümaãẽxü̃ cuáxe rü tangeã̱xmare erü ñomaü̃cüxü rü nataxüchi i chixexü̃.
14Rü dücax, Pa Ãẽ̱xgacügüx, rü name nixĩ i mexü̃ pexü rü nüxü̃ perüxoe i ngẽma chixexü̃, rü tá pemaxẽ. Rü ngẽmaãcü tá aixcüma Tupanape̱xewa pime ngẽma pegü pixugüxü̃rüxü̃. Rü nüma ya Cori ya Tupana ya Guxãétüwa Ngẽxmacü rü aixcüma tá petanüwa nangẽxma.
15¡Rü naxchi pexaie i ngẽma chixexü̃! ¡Rü nüxü̃ pengechaxü̃ i ngẽma mexü̃! ¡Rü aixcüma mea penamexẽxẽ i tümaarü guxchaxü̃ i ngẽxguma texé pepe̱xewa tayamexẽxẽchaü̃gu! Rü bexmana ngẽmaãcü tá nixĩ ya Cori ya Tupana ya Guxãétüwa Ngẽxmacü rü tümamaxã yaxãũxãchixü̃ ya yíxema Iraétanüxü̃ ya íyaxügüxe.
16-17Rü ñanagürü ya Cori ya Tupana ya Guxãétüwa Ngẽxmacü: —Ngẽxguma tá ngéma chaxũxgu nax chayapoxcuexü̃ca̱x i ngẽma duü̃xü̃gü i chixexü̃gu maxẽxü̃ rü guxü̃ ya ĩanegüarü plazagüwa rü duü̃xü̃gü tá naxauxe. Rü namagüwa rü duü̃xü̃gü rü tá nixaixcha erü poraãcü nüxü̃́ nangu̱x. Rü tá tümaca̱x nangema ya yíxema naanewa puracüexe. Rü ngẽxgumarüxü̃ tá ta naxca̱x nangema i ngẽma auxewa diẽru ngĩxü̃ yauxgüxü̃. Rü guxü̃ma i úbanecügüwa rü tá naxauxe i duü̃xü̃gü i ngẽxguma petanüwa chaxũxgu nax pexü̃ chapoxcuexü̃ca̱x —ñanagürü ya Cori ya Tupana.
18¡Rü pegümaxã pengechaxü̃ i pema i penaxwa̱xexü̃ nax paxa petanüwa changuxü̃! Natürü tama nüxü̃ pecua̱x nax ta̱xacü tá pexü̃ ngupetüxü̃ i ngẽma ngunexü̃gu. Rü ngẽma ngunexü̃gu rü tá nawaane rü taxũtáma nangóone.
19Rü ngẽma ngunexü̃ rü ñoma texé wüxi i leóü̃cha̱xwa iñaxgu rü wüxi i osumaxã itarüñaxü̃rüxü̃ tá nixĩ. Rü ngẽma ngunexü̃, rü ñoma wüxíe rü tümapatagu taxücu rü naxtapü̱xgu tingõgügu rü ãxtape tüxü̃ ngṍxü̃rüxü̃ tá nixĩ.
20Rü ngẽma ngunexü̃ ya Tupana nagu pexü̃ poxcuexü̃ rü wüxi i ngunexü̃ i ẽanexü̃ tá nixĩ i pexca̱x, rü marü taxũtáma ngóonexü̃wa pengẽxmagü. Rü poraãcü tá pexca̱x nawaanexü̃chi rü bai i wüxi i ta̱xacürü ngóonexü̃ tá nangẽxma.
21Rü Cori ya Tupana rü ñanagürü pexü̃: —Choma rü naxchi chaxai rü nüxü̃ chaxo i ngẽma taxü̃ i peta i chauégagu pexüxü̃. Rü tama namaxã chataãxẽ i ngẽma perü ngutaque̱xegü i cha̱u̱xca̱x pexüxü̃.
22Rü tama chanaxwa̱xe i naxü̃nagü cha̱u̱xca̱x nax ípeguxü̃. Rü woo i ngẽma perü ãmare i trigu rü tama chanaxwa̱xe. Rü taxũtáma chanayaxu i ngẽma wocaxacügü i ngüexü̃ i cha̱u̱xca̱x pedaixü̃ nax ngẽmamaxã choxü̃ perüngüxmüexẽẽxü̃ca̱x.
23¡Rü choxna pixĩgachi namaxã i ngẽma perü wiyaegü i namaxã choxü̃ penaxocáü̃marexü̃! Tama nüxü̃ chaxĩnügachaü̃ i ngẽma perü paxetaruxü̃ i árpagü.
24Natürü ngẽma pexü̃́ chanaxwa̱xexü̃ nixĩ nax guxü̃guma pemücügümaxã pixaixcümaxü̃ ñoma natü i guxü̃guma nagoxü̃chiüechaxü̃rüxü̃. Rü chanaxwa̱xe i ñoma dexá i chuxchuxü̃ i taguma gúxü̃rüxü̃ guxü̃guma mexü̃ nax pexüxü̃.
25Rü dücax, Pa Iraétanüxü̃, rü yexguma 40 ga taunecü ínachianexü̃wa peyexmagügu, rü tama cha̱u̱xca̱xicatama penadai rü ípenagu ga naxü̃nagü. Rü tama choxnaxicatama ãmare pexãgü.
26Natürü peyanaama ta ga yema perü tupananetachicüna̱xãgü ga Chicúx rü woramacurichicüna̱xã ga Quiyú ga pematama pexüxü̃ nax nüxü̃ picua̱xüü̃güxü̃ca̱x. Rü ñu̱xma rü ta rü ngẽmaãcü penaxü.
27Rü ngẽmaca̱x i choma rü ĩane ya Damácuarü yáxü̃wa tá pexü̃ chawogü. Rü choma ya Cori ya Tupana ya Guxãétüwa Ngẽxmacü nixĩ i ngẽma ñachaxü̃. Rü ngẽma nixĩ i chauéga —ñanagürü.
Currently Selected:
Amúx 5: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
