Norü taxre ga popera ga Timutéuca̱x naxümatüxü̃ ga Pauru 2

Ngechuchu ya Cristuarü puracütanüxü̃ i mexü̃chiga

1Rü ñu̱xma, Pa Chaune, Pa Timutéux, ¡rü cugü naporaxẽxẽ namaxã i ngẽma pora ya Ngechuchu ya Cristu tüxna ãxü̃!

2Yema ore ga chauxü̃tawa nüxü̃ cuxĩnüxü̃ ga yexguma muxü̃ma ga duü̃xü̃güpe̱xewa nüxü̃ chixuxgu, rü chanaxwa̱xe i ñu̱xma cuxí ngẽma oremaxã cunangúexẽxẽ i togü i yatügü i mea naãẽxü̃ cua̱xgüxü̃ nax nüxĩ́ togüxü̃ nangúexẽẽxü̃ca̱x namaxã i ngẽma ore.

3Rü cuma nax Ngechuchu ya Cristuarü churara i mexü̃ quixĩxü̃, rü name nax ícumemarexü̃ nax Ngechuchu ya Cristuarü oregagu ngúxü̃ quingexü̃.

4Rü wüxi i churara rü taxucürüwama to i puracü i tama churaraarü ixĩxü̃gu narüxĩnü. Erü ngẽma norü ãẽ̱xgacü nagu namuxü̃gu nixĩ i naxĩnüxü̃ nax norü ãẽ̱xgacüxü̃ nataãẽxẽẽxü̃ca̱x.

5Rü ngẽxgumarüxü̃ ta wüxi i duü̃xü̃ i wüxi i ĩnücawa ixücuxü̃, rü taxuacüma nanayaxu i norü ãmare ega tama nagu yaxũxgu i ngẽma ĩnü̃caarü mugü.

6Rü yíxema naanewa puracüxe rü name nixĩ i tüxíra tanabuxu i tümanetüarü o.

7¡Rü nagu rüxĩnü i ñaa cumaxã nüxü̃ chixuxü̃! Erü nüma ya Cori ya Ngechuchu rü tá cuxü̃ nüxü̃ nacua̱xẽxẽ i guxü̃ma i ngẽma cumaxã nüxü̃ chixuxü̃.

8¡Rü nüxna nacua̱xãchi ya Ngechuchu ya Cristu ya Dabítanüxü̃ ga yuwa írüdacü! Rü yimáchiga nixĩ i ngẽma ore i mexü̃ i duü̃xü̃gümaxã nüxü̃ chixuxü̃.

9Rü ngẽma Tupanaarü oregagu nixĩ i ngúxü̃ nax chingexü̃ rü ñoma wüxi i máetaxü̃rüxü̃ núma poxcupataü̃wa cadénamaxã chichotaxü̃. Natürü Tupanaarü ore, rü guxü̃wama nanguama rü taxucürüwama texé tayachota.

10Rü ngẽmaca̱x yáxna namaxã chaxĩnü i ngẽma ngúxü̃ i chingexü̃ naxca̱x i ngẽma duü̃xü̃gü ya Tupana dexü̃. Erü chanaxwa̱xe i nümagü rü ta Ngechuchu ya Cristuaxü̃́ nayaxõgü, rü ngẽmaãcü nax nayauxgüãxü̃ca̱x i ngẽma maxü̃ i mexü̃ i taguma gúxü̃.

11Rü ngẽma ore i cumaxã nüxü̃ chixuxü̃ rü aixcüma nixĩ. Rü ngẽxguma Cristu yuxü̃rüxü̃ iyuegu, rü naxrüxü̃ tá ta wena tamaxẽ nax nüma ínangexmaxü̃wa imaxẽxü̃ca̱x.

12Rü ngẽxguma ñoma i naanewa yáxna namaxã ixĩnüegu ega ngúxü̃ ingexgu, rü daxũguxü̃ i naanewa rü wüxigu namaxã tá ãẽ̱xgacügü tixĩgü. Natürü ngẽxguma tama Cristuxü̃ icuáxchaü̃gu i ñoma i naanewa, rü nüma rü tá ta taxũtáma tüxü̃ nacuáxchaü̃ i daxũguxü̃ i naanewa.

13Natürü woo muẽ̱xpü̱xcüna yixema tama aixcüma yanguxẽẽgu i ngẽma Tupanamaxã ixunetaxü̃, natürü nüma ya Tupana rü guxü̃guma nayanguxẽxẽ i ngẽma tamaxã inaxunetaxü̃, erü taxuacüma nügütama nawomüxẽxẽ.

Wüxi i mexü̃ i puracütanüxü̃ i Tupana namaxã taãẽxü̃chiga

14Rü ngẽma yaxõgüxü̃ i cuxü̃tawa ngẽxmagüxü̃, rü name nixĩ i Tupanaégagu nüxna nüxü̃ cucua̱xãchixẽxẽ nax tama ngẽma ore i taxuwama mexü̃ca̱x nügümaxã nax yaporagatanücüüxü̃ca̱x. Erü ngẽma rü guxchaxü̃ ínanguxẽxẽ tümaca̱x ya yíxema nüxü̃ ĩnüexe.

15¡Rü mea naxü i Tupanaarü puracü nax cumaxã nataãẽxü̃ca̱x i ngẽxguma nape̱xewa cunguxgux rü ngẽmaãcü taxuca̱xma cuxãnexü̃ca̱x i ngẽxguma nüma cuxna nacaxgu naxca̱x i curü puracü! Rü ngẽmaca̱x name i aixcüma mea namaxã cungúexẽẽtae i ngẽma ore i mexü̃ i aixcüma ixĩxü̃.

16¡Rü nüxü̃ rüxo i ñoma i naanecüã̱xarü dexagü i taxuwama mexü̃! Erü ngẽma duü̃xü̃gü i ngẽma dexagügu ĩxü̃, rü guxü̃guma yexeraãcü chixexü̃gu nayi.

17Rü ngẽma norü ngu̱xẽẽtae i ngẽma duü̃xü̃gü, rü ñoma wüxi i da̱xaweane i tüxü̃ iyixmachixẽẽxü̃rüxü̃ nixũchigü. Rü yema nixĩ ga nüxü̃ ngupetüxü̃ ga Imenéu rü Firétu.

18Yerü nümagü rü nidoragümare ga nüxü̃ nax yaxugüexü̃ rü marü nax nangupetüxü̃ i yuetaarü dachiga. Rü yemaacü nanawomüxẽẽgü ga ñuxre ga duü̃xü̃gü nax tama noxrirüxü̃ yaxõgüãxü̃ca̱x i Tupanaarü ore.

19Natürü Tupanaarü ore rü taguma inayarüxo rü taguma naxüchicüü. Rü ngẽma norü orewa rü ñanagürü:

“Tórü Cori ya Tupana nüxü̃ nacua̱x i texé tixĩ ya norü duü̃xü̃gü ixĩgüxe.

Rü guxãma ya yíxema nüxü̃ ixuxe nax Ngechuchu ya Cristu rü tümaarü Cori yixĩxü̃, rü name nixĩ i nüxna tixĩgachi i guxü̃ma i chixexü̃”,

ñanagürü i ngẽma norü orewa.

20Wüxi i duü̃xü̃ i diẽruã̱xü̃chixü̃ rü napatawa nangẽxma i poratu i úirunaxca̱x rü diẽrumünaxca̱x. Rü nangẽxma ta i poratu i nainaxca̱x rü waixü̃münaxca̱x. Rü ngẽma poratu i úirunaxca̱x rü diẽrumünaxca̱x rü mexü̃ i norü õnaca̱x nixĩ. Natürü ngẽma poratu i nainaxca̱x rü waixü̃münaxca̱x rü guxchirechixü̃ nixĩ.

21Rü ngẽxguma wüxi i yaxõxü̃ nügüna dauxgu i norü maxü̃wa rü nataxuxguma i norü chixexü̃, rü ñoma wüxi i ngẽmaxü̃ i mexẽchixü̃rüxü̃ nixĩ. Rü Tupanape̱xewa tá naxüüne rü tá nüxü̃́ name nax naxüaxü̃ca̱x i naguxü̃raü̃xü̃ i puracü i mexü̃.

22¡Nüxü̃ rüxo i guxü̃ma i ngẽma chixexü̃ i ngextü̱xücügü nagu rüxĩnüexü̃! ¡Rü mea Tupanape̱xewa namaxü̃ rü nüxü̃́ yaxõ! ¡Rü duü̃xü̃güxü̃ nangechaü̃ rü taxṹ i namaxã cunuxü̃! ¡Rü Tupanape̱xewa mea namaxü̃ wüxigu namaxã i guxü̃ma i ngẽma yaxõgüxü̃ i aixcüma Cori ya Tupanape̱xewa imexü̃ rü mexü̃ i norü ĩnümaxã yumüxẽgüxü̃!

23¡Rü taxṹ i naga cuxĩnüxü̃ i ngẽma dexagü i taxuwama mexü̃! Erü ngẽma dexagügagu rü duü̃xü̃gü rü düxwa nügümaxã nanue.

24Rü wüxi i Tupanaarü puracütanüxü̃ rü tama name nax texémaxã nuca̱x nadauxü̃. Rü name nax guxãmaãma namecümaxü̃ rü ínamemarexü̃ nax yáxna namaxã naxĩnüãcüma duü̃xü̃güxü̃ nangúexẽxẽ i Tupanaarü ore.

25Rü wüxi i Tupanaarü puracütanüxü̃ rü name nax yáxna namaxã naxĩnüãcüma mea nayaxucu̱xẽgüãxü̃ i ngẽma duü̃xü̃gü i tama irüxĩnüechaü̃xü̃. Rü name i ínanangu̱xẽxẽ nax Tupana nüxü̃ rüngü̃xẽẽgüxü̃ i ngẽma duü̃xü̃gü nax naxca̱x nawoeguxü̃ca̱x rü nüxü̃ nacua̱xãchitanüxü̃ca̱x i ngẽma ore i aixcüma ixĩxü̃.

26Erü Tupana nanaxwa̱xe nax naãẽxü̃ yacua̱xãchitanüxü̃ i ngẽma duü̃xü̃gü rü na̱xcha̱xwa yabuxmüxü̃ca̱x i ngẽma chixexü̃ i ngo̱xo i Chataná nagu nayixẽẽxü̃ nax ngẽmaãcü norü ngúchaü̃ ngẽma duü̃xü̃gümaxã naxüxü̃ca̱x i Chataná.

Currently Selected:

Norü taxre ga popera ga Timutéuca̱x naxümatüxü̃ ga Pauru 2: tcaP

Highlight

Copy

Compare