2 Chamué 7

Tupana rü Dabímaxã mexü̃ naxuegu

(1 Cr. 17.1-27)

1Rü nüma ga ãẽ̱xgacü ga Dabí rü nitocuchi nawa ga guma ãẽ̱xgacüpata rü nüma ga Cori ya Tupana rü guxü̃ma ga norü uanügü ga Iraéanena ngaicamagüxü̃maxã inanangüxmüxẽxẽ.

2Rü yemawena rü nüma ga Dabí rü gumá Tupanaarü orearü uruxü̃ ga Natáü̃xü̃ ñanagürü: —Dücax i choma rü wüxi ya mexẽchine ya ĩpata ya ocayiwanaxca̱x ixĩxü̃newa changexma. Natürü ngẽma baú i Tupanaarü mugü nawa ngẽxmagüxü̃ rü wüxi ya ĩpata ya naxchirunaxca̱xmare ixĩxü̃newa nangẽxma —ñanagürü.

3Rü nüma ga Natáü̃ nanangãxü̃ rü ñanagürü: —¡Ẽcü naxü i ngẽma nagu curüxĩnüxü̃! Erü Cori ya Tupana rü ínamemare nax cuxü̃ nangü̃xẽxẽxü̃ —ñanagürü.

4Natürü yematama chütaxü̃gu rü nüma ga Cori ya Tupana rü Natáü̃xü̃ ñanagürü:

5—¡Naxü̃tawa naxũ ya chorü duü̃ ya Dabí rü namaxã idexa rü namaxã nüxü̃ ixu i choma i Cori ya Tupana nax chixĩxü̃ rü ñacharügü: “Taxũtáma cuma nixĩ i cha̱u̱xca̱x cunaxüxü̃ ya yima ĩpata ya taxü̃ne ya nawa tá changexmane!

6Rü yexguma noxritama Equítuanewa íchananguxü̃xẽẽ̱xgu ga Iraétanüxü̃, rü yexgumacürüwa rü taguma wüxi ga ĩpata ga mürapewanaxca̱xtüü̃wa chayexma, natürü ĩpata ga naxchirunaxca̱xtüü̃wa nixĩ ga chayexmaxü̃.

7Rü guxcüma ga gumá taunecügü ga nagu Iraétanüxü̃maxã ichixũcü, rü taguma nüxna chaca ga wüxi ga norü ãẽ̱xgacü nax cha̱u̱xca̱x wüxi ga ĩpata ga ocayiwanaxca̱x naxüxü̃ woo choma nax chayangucuchixẽxẽ ga yema ãẽ̱xgacügü nax Iraétanüxü̃maxã inacuáxü̃ca̱x.

8Rü ngẽmaca̱x ¡namaxã nüxü̃ ixu ya chorü duü̃ ya Dabí rü choma ya Cori ya Tupana ya Guxãétüwa Ngẽxmaxe, rü ñacharügü nüxü̃! ‘Yexguma carnérugüarü dauruxü̃ quixĩxgu rü yea naanewa nüxna cuda̱u̱xgu, rü choma cuxü̃ chayaxu nax ñaa chorü duü̃xü̃gü i Iraétanüxü̃arü ãẽ̱xgacü nax quixĩxü̃ca̱x.

9Rü cuxü̃ íchixümücü ga ngextá ícuxũxü̃wa, rü cuxü̃ nüxü̃ charüporamaexẽxẽ ga guxü̃ma ga curü uanügü ga cumaxã nügü daixü̃. Rü cuxü̃ chatachigaxẽxẽ naxrüxü̃ i ngẽma yatügü i tachigaxü̃ i ñoma i naanewa.

10-11Rü ñu̱xũchi wüxi ga naane naxca̱x chamexẽxẽ ga yema chorü duü̃xü̃gü i Iraétanüxü̃. Rü yéma chanangugüxẽxẽ nax noxrütama naanewa namaxẽxü̃ca̱x i ngextá taxúema nachixeãẽgüxü̃wa rü woo chixexü̃ i duü̃xü̃gü tama nagu idauxcüraxü̃güxü̃wa ga noxrirüxü̃ ga yexguma nüxü̃ chaxunetagu ga ãẽ̱xgacügü ga guxchaxü̃arü mexẽẽruü̃gü. Rü tá cumaxã ichanangüxmüexẽxẽ i guxü̃ma i ngẽma curü uanügü nax tama cuxoegaãẽxü̃ca̱x. Rü tá cuxü̃́ nangẽxma i cutaagü.

12Erü ngẽxguma cuma tá cuyu̱xgu, rü wüxi ya cune tá chanamu nax Iraéanecüã̱xgüarü ãẽ̱xgacü yixĩxü̃ca̱x. Rü ngẽma ãẽ̱xgacü rü tá napora erü chomatátama chanaporaxẽxẽ.

13Rü nüma tá nixĩ i wüxi ya chopata ya taxü̃ne naxüxü̃. Rü choma rü guxü̃gutáma nüxü̃ charüngü̃xẽẽxü̃ nax duü̃xü̃gümaxã inacuáxü̃ca̱x.

14Choma rü tá nanatü chixĩ rü nüma rü tá chaune nixĩ. Rü ngẽxguma nüma chixexü̃ naxü̱xgu, rü choma rü tá chanapoxcu rü tá nüxna chanacuaixca ngẽxgumarüxü̃ i guxü̃ma i papa rü nanena nacua̱i̱xcaxü̃rüxü̃.

15Natürü tagutáma nüxü̃ charüchau nax nüxü̃ changechaü̃xü̃, rü tagutáma íchanamuxũchi yema Chaúxü̃ íchamuxuchixü̃rüxü̃ nax nachicüxü cuxü̃ chimucuchixü̃ca̱x.

16Rü cutaagü rü guxü̃gutáma ãẽ̱xgacü nixĩgü erü choma rü tá nüxna chadau. Rü ñu̱xma nax ãẽ̱xgacü quixĩxü̃ i cumax, rü ngẽxgumarüxü̃ ta rü tagutáma nataxu nax wüxi i cutaxa cuchicawa rütoxü̃ nax ãẽ̱xgacü yixĩxü̃’ ” —ñanagürü ga Tupana.

17Natáü̃ rü meama Dabímaxã nüxü̃ nixu ga guxü̃ma ga yema nüxü̃ nadauxü̃, rü ñu̱xũchi yema nüxü̃ naxĩnüxü̃.

18Yexguma ga ãẽ̱xgacü ga Dabí rü yema baú ga Tupanaarü mugüchixü̃ íyexmaxü̃gu naxücu rü Cori ya Tupanape̱xegu nacaxã́pü̱xü rü ñanagürü: —¿Texé chixĩ i chomax, Pa Corix, rü ta̱xacüwa name i chautanüxü̃ rü ngẽmaca̱x i ñu̱xmax, rü ãẽ̱xgacüwa choxü̃ cunguxẽxẽxü̃?

19Rü tama ngexicatama nixĩ i choxna cuxuaxü̃xü̃, Pa Corix, natürü naétü nüxü̃ quixu rü tá nüxü̃ curüngü̃xẽxẽ i chautaagü i choma nax curü puracütanüxü̃ chixĩxü̃. Nataxuma i yatü i curüxü̃ ixĩxü̃, Pa Corix.

20¿Ta̱xacü chi i to i cumaxã nüxü̃ chixuxü̃, Pa Corix, erü cuma rü meama choxü̃ cucua̱x i choma nax curü puracütanüxü̃ chixĩxü̃?

21Guxü̃ma i ñaa mexü̃gü icuxüxü̃ rü yema cunaxueguxü̃ãcüma rü cunaxwa̱xexü̃ãcüma cunaxü nax nüxü̃ chacuáxü̃ca̱x i chomax.

22Rü ngẽmaãcü, Pa Chorü Cori ya Tupanax, rü nataxuma i ta̱xacü i curüxü̃ ixĩxü̃. Erü nataxuma i to ya Tupana i curüxü̃ ixĩxü̃, rü cuxicatama nixĩ i aixcüma Tupana quixĩxü̃ yema tochixẽmaxãtama nüxü̃ taxĩnüexü̃rüxü̃.

23-24Rü nataxuma i totücumü i duü̃xü̃gü i ngẽma curü duü̃xü̃gü i Iraétanüxü̃rüxü̃ ixĩgüxü̃. Rü natanüwa i ñoma i naanecüã̱x i nachixü̃anegü rü Iraétanüxü̃xicatama nixĩ i cuxunetaxü̃ nax curü duü̃xü̃gü yixĩxü̃güxü̃ca̱x. Rü cuma rü cunatachigaxẽxẽ ga yexguma natanüwa cunaxü̱xgu ga taxü̃ ga mexü̃gü. Rü yema curü duü̃xü̃gü ga Equítuanewa ícunguxü̃xẽẽxü̃pe̱xewa ícunawoxü̃ ga yema togü ga nachixü̃anegü namaxã ga norü tupanagü. Erü cuma rü nüxü̃ quixu nax guxü̃gutáma curü duü̃xü̃gü yixĩxü̃ i Iraétanüxü̃, rü ñu̱xũchi cumax, Pa Corix, rü guxü̃gutáma norü Tupana tá quixĩ.

25Rü ngẽmaãcü, Pa Chorü Tupanax, cuxna naxca̱x chaca nax tagutáma nüxü̃ icurüngümaxü̃ nax cuyanguxẽẽxü̃ ga yema curü uneta ga curü duü̃maxã rü natanüxü̃maxã nüxü̃ quixuxü̃.

26¡Rü cuéga rü guxü̃gutáma natachiga! ¡Ẽcü nüxü̃ yaxugügü nax nüma ya Cori ya Tupana ya Guxãétüwa Ngẽxmacü yixĩxü̃ ya Iraétanüxü̃arü Tupana ixĩcü! Rü cuxna naxca̱x chaca nax nüxna cudauxü̃ i chautaagü nax guxü̃gutáma Iraétanüxü̃arü ãẽ̱xgacügü yixĩgüxü̃ca̱x.

27Cumax, Pa Cori ya Guxãétüwa Ngẽxmaxex, rü marü choxü̃ nüxü̃ cucua̱xẽxẽ rü tá nüxna cudau i chautaagü nax guxü̃gutáma Iraétanüxü̃arü ãẽ̱xgacügü yixĩgüxü̃ca̱x. Rü ngẽmaca̱x i choma nax curü duü̃xü̃mare chixĩxü̃ rü chaugü ícharüpora nax cupe̱xewa curü ngü̃xẽẽca̱x íchaca̱xaxü̃.

28-29Cumax, Pa Corix, rü Tupana quixĩ rü ngẽma curü ore rü aixcüma nixĩ. Rü choma i curü duü̃xü̃ nax chixĩxü̃ rü chomaxã nüxü̃ quixu nax poraãcü chomaxã cumecümaxü̃. ¡Rü ẽcü mexü̃ namaxã naxuegu i ngẽma chautaagü nax guxü̃guma curü ngü̃xẽxẽtüxü̃wa nangẽxmagüxü̃ca̱x! Cumax, Pa Cori Pa Tupanax, rü choma i curü duü̃xü̃ nax chixĩxü̃ rü marü chomaxã nüxü̃ quixu rü guxü̃gutáma nüxü̃ curüngü̃xẽxẽ i ngẽma chautaagü nax mexü̃ nüxü̃ üpetüxü̃ca̱x —ñanagürü ga Dabí.

Currently Selected:

2 Chamué 7: tcaP

Highlight

Copy

Compare