Norü taxre ga popera ga Cuáü̃ ümatüxü̃ 1
1
Cuáü̃ rü yaxõgüxü̃xü̃ narümoxẽ
1Pa Chauenexẽgü i Yaxõgüxe ya Tupana Pexü̃ Dexex, pexca̱x chanaxümatü i choma i Cuáü̃ i yaxõgüxü̃arü ãẽ̱xgacü nax chixĩxü̃. Choma rü aixcüma pexü̃ changechaü̃. Rü tama i chaxica, natürü guxü̃ma i ngẽma nüxü̃ cua̱xgüxü̃ i Tupanaarü ore i aixcüma ixĩxü̃, rü ngẽxgumarüxü̃ ta pexü̃ nangechaü̃gü.
2Pexü̃ changechaü̃ erü toxrüxü̃ nüxü̃ pecua̱x i ngẽma ore i aixcüma ixĩxü̃ i guxü̃gutáma tawa ngẽxmaxü̃.
3Rü chanaxwa̱xe i nüma ya Tanatü ya Tupana rü Nane ya Ngechuchu ya Cristu poraãcü pexü̃ rüngü̃xẽẽgü rü nüxü̃́ pengechaü̃tümüxü̃gü rü pexü̃ nataãẽxẽẽgü, erü nüxü̃ pecua̱x i ngẽma ore i aixcüma ixĩxü̃ rü pegü pengechaü̃gü.
4Rü poraãcü chataãxẽ ga yexguma nüxü̃ chada̱u̱xgu nax ñuxãcü ñuxre i petanüxü̃ rü aixcüma mea naga nax naxĩnüexü̃ i ngẽma ore i aixcüma ixĩxü̃, yema Tanatü ya Tupana tüxü̃ muxü̃rüxü̃.
5Rü ñu̱xmax, Pa Chauenexẽgü ya Pexü̃ Changechaü̃güxe, rü pexna nüxü̃ chacua̱xãchixẽxẽ nax namexü̃ nax yigü ingechaü̃güxü̃. Rü ngẽma rü tama wüxi i ngexwaca̱xü̃xü̃ i Tupanaarü mu nixĩ. Natürü yematama nixĩ ga mu ga noxritama peyaxõgügu peyauxgüxü̃.
6Ngẽxguma yigü ingechaü̃gügu, rü ngẽmawa nüxü̃ tacua̱x nax marü yanguxẽẽxü̃ i Tupanaarü mugü. Rü ngẽma nax pegü pengechaxü̃güxü̃ rü ngẽmatama nixĩ i mu ga noxritama peyaxõgügu nüxü̃ pexĩnüexü̃.
Cristuarü uanügü i womüxẽxẽwa̱xegüxü̃
7Guxü̃wama i ñoma i naanewa rü nanaxĩane i muxü̃ma i womüxẽẽwa̱xegüxü̃. Rü tama nayaxõgü nax Ngechuchu ya Cristu rü duü̃xü̃xü̃ yaxĩxü̃. Rü ngẽma ngẽmaãcü idexaxü̃, rü wüxi i womüxẽẽruxü̃ nixĩ, rü Cristuarü uanü nixĩ.
8¡Pexũãẽgü nax taxúema pexü̃ womüxẽxẽgüxü̃ca̱x nax tama natüca̱xma yixĩxü̃ca̱x i torü puracü i petanüwa taxüxü̃! Rü name nixĩ i peyaxõgüama nax penayaugüxü̃ca̱x i ngẽma ãmare ya Tupana pexna ãxchaü̃xü̃.
9Rü yíxema nangupetüxẽẽ́xe ga yema Cristu tüxü̃ ngúexẽẽxü̃, rü tama Tupanaxü̃ tacua̱x. Natürü yíxema tama nüxna íchoxü̃xẽ ga yema Cristu tüxü̃ ngúexẽẽxü̃, rü aixcüma nüxü̃ tacua̱x ya Tanatü ya Tupana rü Nane ya Ngechuchu.
10Rü ngẽxguma chi wüxi i duü̃xü̃ petanüwa nguxgu, rü tama yema Cristu tüxü̃ ngúexẽẽxü̃maxã pexü̃ nangúexẽẽgu, rü ¡taũtáma penayaxu i pechiü̃wa rü bai i nüxü̃ perümoxẽgü!
11Erü ngẽxguma wüxíe nüxü̃ rümoxẽgu rü ngürüãchi tá natanüxü̃ tügü tixĩxẽxẽ nawa i ngẽma chixexü̃ i naxügüxü̃.
Cuáü̃arü ore ga nawa iyacuáxü̃
12Choxü̃́ nangẽxma i muxü̃ma i ore i pemaxã nüxü̃ chixuxchaü̃xü̃. Natürü tama chanaxwa̱xe nax poperawa pemaxã nüxü̃ chixuxü̃. Erü petanüwa íchayadauxchaü̃ nax chomatama pemaxã nüxü̃ chixuxü̃ca̱x nax ngẽmaãcü wüxigu aixcüma itaãẽgüxü̃ca̱x.
13Rü ngẽma nua natanüwa changexmaxü̃ i yaxõgüxü̃ i peenexẽgü ixĩgüxü̃ ya Tupana dexü̃, rü pexü̃ narümoxẽgü.
Currently Selected:
Norü taxre ga popera ga Cuáü̃ ümatüxü̃ 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.