Norü taxre ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 9
9
Diẽru ga yema togü ga yaxõgüxü̃ca̱x ngĩxü̃ inutaque̱xecüchiga
1Rü taxuca̱xma tü̱xcüü̃ pexca̱x chanaxümatü ngĩchiga i ngẽma diẽru i ngĩxü̃ penutaque̱xegücü naxca̱x i ngẽma taenexẽgü i yaxõgüxü̃ i Yerucharéü̃wa ngẽxmagüxü̃.
2Erü marü nüxü̃ chacua̱x rü perü ngúchaü̃maxã ipenaxã i ngẽma diẽru. Rü guxü̃guma taãẽãcüma ngẽma yaxõgüxü̃ i Machedóniaanewa ngẽxmagüxü̃maxã nüxü̃ chixu nax ñuxãcü i pema i Acáyaanewa ngẽxmagüxe rü taunecü ga ngupetücügu marü ípememarexü̃ nax ngĩxü̃ ipexãgüxü̃ i ngẽma diẽru. Rü yema rümumaexü̃ ga yaxõgüxü̃ ga Machedóniaanecüã̱x, rü yexguma nüxü̃ naxĩnüegu nax ñuxãcü taãẽãcüma togüca̱x ngĩxü̃ nax ipexãgüxü̃ i perü diẽru, rü nümagü rü ta inanaxügü nax ngĩxü̃ inaxãgüxü̃.
3Rü ñu̱xma rü petanüwa chanamugü i ngẽma taenexẽgü nax nüxü̃ nacua̱xgüxü̃ca̱x nax aixcüma yixĩxü̃ i ngẽma pechiga nüxü̃ chixuxü̃. Rü ñu̱xma rü pexca̱x chanaxümatü nax aixcüma ípememarexü̃ca̱x nax ngĩxü̃ ipexãgüxü̃ i ngẽma diẽru, ngẽma taenexẽgümaxã nüxü̃ chixuxü̃rüxü̃.
4Erü ngẽxguma chi ñuxre i taenexẽgü i Machedóniaanecüã̱x rü ngürüãchi chomaxã petanüwa naxĩxgu, rü tama chanaxwa̱xe nax pexü̃ nax iyangauxü̃ nax tama aixcüma ípememarexü̃ nax ngĩxü̃ ipexãxü̃ i ngẽma diẽru. Rü toxü̃́ rü chi wüxi i ãnexüchi nixĩ, erü marüchire̱x namaxã nüxü̃ tixu nax pema rü aixcüma ípememarexü̃ nax ngĩxü̃ ipexãgüxü̃ i ngẽma diẽru. Rü pexü̃́ rü chi ta wüxi i ãnexüchi nixĩ.
5Rü ngẽmaca̱x nixĩ i cha̱u̱xca̱x namexü̃ nax naxca̱x íchaca̱xaxü̃ i ngẽma taenexẽgü nax nüxíra petanüwa naxĩxü̃ca̱x rü nümatama pexü̃ yanangü̃xẽẽgüxü̃ca̱x nax ngĩxü̃ penutaque̱xegüxü̃ca̱x i ngẽma diẽru ga ü̃pamama ngĩxü̃ pixucü. Rü ngẽmaãcü aixcüma tá íimemare i ngẽma diẽru i ngẽxguma ngéma changuxgu. Rü ngẽmaãcü togü tá nüxü̃ nadaugü nax aixcüma perü ngúchaü̃maxã yixĩxü̃ nax ngĩxü̃ ipexãgüxü̃ rü tama aüãcüma.
6¡Rü nüxna pecua̱xãchie i ngẽma dexa i ñaxü̃:
“Rü yíxema noxretama i nanetüchire itoxe, rü noxretama i norü o tayaxu.
Natürü yíxema muxü̃ i nanetüchire itoxe, rü muxü̃ma i norü o tayaxu”,
ñaxü̃!
7Rü wüxichigü tanaxwa̱xe nax ngĩxü̃ itaxãxü̃ i ngẽma ngĩgu tarüxĩnücü nax ñuxre ngĩxü̃ itaxãxchaü̃xü̃. Rü tama name i aüãcüma ngĩxü̃ itaxã rü ẽ̱xna texé tüxü̃ muãcüma ngĩxü̃ itaxã. Erü Tupana rü nüxü̃ nangechaü̃ i ngẽma duü̃xü̃ i taãẽãcüma ngĩxü̃ ixãxü̃.
8Rü Tupana rü nüxü̃́ natauxcha nax mea pexna naxããxü̃ca̱x i norü ngü̃xẽxẽ, nax guxü̃guma pexü̃́ nangẽxmaxü̃ca̱x i ngẽma pexca̱x mexü̃ rü naétü nax pexü̃́ íyaxüxü̃ca̱x nax togüxü̃ namaxã perüngü̃xẽẽgüxü̃ca̱x.
9Tupanaarü ore i ümatüxü̃wa rü ñanagürü:
“Yimá yatü ya nüxü̃ rüngü̃xẽẽcü i ngẽma ingearü diẽruã́xü̃,
rü duü̃xü̃gü rü tá guxü̃gutáma nüxna nacua̱xãchie naxca̱x i ngẽma nacüma i mexü̃”,
ñanagürü.
10Tupana nixĩ ya tüxna naxãcü ya nanetüchire nax inatoxü̃ca̱x, rü tüxna naxãcü i õna nax nangṍxü̃ca̱x. Rü nüma tá nixĩ i pexna naxããxü̃ ya guxü̃nema ya nanetüchire ya penaxwa̱xene nax ipenatoxü̃ca̱x. Rü nüma tá nanaxüxẽxẽ rü nanayaxẽxẽ ya ngẽma nanetüchire. Rü tá nanamuxẽxẽ i norü o, nax muxũchixü̃ nawa peyaxuxü̃ca̱x nax ngẽmamaxã togüxü̃ perüngü̃xẽẽgüxü̃ca̱x.
11Rü ngẽmaãcü i pema rü tá pexü̃́ nangẽxma i guxü̃ma i mexü̃ nax tauxchaãcüma nüxü̃ perüngü̃xẽẽgüxü̃ca̱x i togü. Rü ngẽxguma ngẽma taenexẽgü i Yudéaanewa ngẽxmagüxü̃xü̃tawa ngĩxü̃ tangegügu i ngẽma diẽru i naxca̱x ngĩxü̃ ipexãcü, rü nümagü rü tá poraãcü Tupanana moxẽ naxãgü ngĩxca̱x.
12Erü ngẽxguma nüxna ngĩxü̃ taxãxgu i ngẽma diẽru i nüxü̃ ngĩmaxã perüngü̃xẽẽgücü i ngẽma taenexẽgü, rü tama ta̱xacü i nüxü̃́ taxuxü̃ca̱xicatama ta nixĩ, natürü naétü i nümagü i taenexẽgü rü perü ãmaregagu tá poraãcü Tupanana moxẽ naxãgü.
13Rü nümagü i ngẽma taenexẽgü i Yudéaanewa ngẽxmagüxü̃ rü tá Tupanaxü̃ nicua̱xüü̃gü, erü ngẽma perü ãmaremaxã tá nüxü̃ penawe̱x nax aixcüma naga pexĩnüexü̃ i Cristuarü ore i mexü̃. Rü nümagü rü tá Tupanana moxẽ naxãgü naxca̱x i ngẽma perü ãmare i perü ngúchaü̃maxã nüxna pexãgüxü̃ rü guxü̃ma i ngẽma togü i yaxõgüxü̃na pexãgüxü̃.
14Rü ngẽma taenexẽgü i Yudéaanewa ngẽxmagüxü̃ rü naétü tá pexca̱x nayumüxẽgü, erü pexü̃ nangechaü̃gü. Rü Tupanana moxẽ tá naxãgü, erü nüma ya Tupana pexü̃́ nanatauxchaxẽxẽ nax nüxü̃ perüngü̃xẽẽgüxü̃ca̱x i ngẽma taenexẽgü i Yudéaanewa ngẽxmagüxü̃.
15Rü ngẽmaca̱x i ñu̱xma rü Tupanana moxẽ taxã, yerü tüxna nanamu ga Nane nax tórü ãmare yixĩxü̃ca̱x. Rü nataxuma i ore i nagu mexü̃ nax nüxü̃ ixuxü̃ca̱x nax ñuxãcü namaxã itaãẽgüxü̃ i ngẽma ãmare ya Tupana tüxna ãxü̃.
© 2022, Wycliffe Bible Translators, Inc. All rights reserved.
