1 Chamué 3
3
Tupana rü Chamuéxü̃ naca
1Rü nüma ga ngextü̱xücü ga Chamué rü Cori ya Tupanaaxü̃́ napuracü yema Erí namuxü̃ãcüma. Rü yexguma ga Tupana rü ñuxguacürica texémaxã nidexa. Rü ñuxguacürica texéca̱x nanango̱xẽxẽ ga ẽxü̃guxü̃.
2Rü nüma ga Erí rü marü naya rü yemaca̱x marü nixoxetüchigü rü tama mea ta̱xacüxü̃ nadau. Rü wüxi ga chütaxü̃gu rü norü ucapuwa ínape ga Tupanapatawa.
3Rü nüma ga Chamué rü Tupanapatagu nape yema baú ga Tupanaarü mugü nawa yexmaxü̃xü̃taguama. Rü yema norü omü ga yema nachica ga üünexü̃ rü nanaiecha.
4Rü nüma ga Cori ya Tupana rü Chamuéxü̃ naca rü ñanagürü: —Pa Chamuéx —ñanagürü. Rü nüma ga Chamué rü nanangãxü̃: —Daxe chixĩ —ñanagürü.
5Rü ñu̱xũchi Erí íyexmaxü̃wa naña, rü ñanagürü: —Daxe chixĩ rü nua changexma. ¿Rü ta̱xacüca̱x cha̱u̱xca̱x cuca? —ñanagürü. Rü nüma ga Erí rü nanangãxü̃ rü ñanagürü: —Taguma nixĩ i cuxca̱x chacaxü̃. ¡Ẽcü nataegu rü yape! —ñanagürü. Rü yexguma ga nüma ga Chamué rü nataegu rü nayape.
6Natürü nüma ga Cori ya Tupana rü wenaxarü Chamuéna naca rü ñanagürü: —Pa Chamuéx —ñanagürü. Rü nüma ga Chamué rü ínarüwa̱x, rü Erí íyexmaxü̃wa naña rü ñanagürü: —Daxe chixĩ rü nua changexma. ¿Ta̱xacüca̱x cha̱u̱xca̱x cuca? —ñanagürü. Rü nüma ga Erí rü nanangãxü̃ga rü ñanagürü: —Taguma nixĩ i cuxca̱x chacaxü̃, Pa Chaunex. ¡Ẽcü nataegu rü yape! —ñanagürü.
7Rü nüma ga Chamué rü tauxta Cori ya Tupanaxü̃ nacua̱x yerü taguma namaxã nidexa.
8Natürü nüma ga Cori ya Tupana rü norü tomaepü̱xcüna Chamuéna naca. Rü nüma ga Chamué rü ínarüda rü Eríxü̃tawa naña rü ñanagürü: —Daxe chixĩ, rü nua changexma. ¿Rü ta̱xacüca̱x cha̱u̱xca̱x cuca? —ñanagürü. Rü nüma ga Erí rü nüxü̃ nicua̱xãchi ga Cori ya Tupana nax yixĩxü̃ ga gumá Chamuéna cacü.
9Rü nüma ga Erí rü Chamuéxü̃ ñanagürü: —¡Ẽcü, yape! Rü ngẽxguma Cori ya Tupana wena cuxna caxgux ¡rü nangãxü̃ rü ñacuxü̃ tá: “Idexa rü yimá curü duü̃ rü nüxü̃ naxĩnü nixĩ”, ñacuxü̃ tá! —ñanagürü. Rü yexguma nüma ga Chamué rü nataegu rü nayape.
10Rü yemawena rü yéma nangu ga nüma ga Cori ya Tupana. Rü yexma nachi rü wenaxarü Chamuéna naca yema noxri nüxna nacagurüü̃tama, rü ñanagürü: —Pa Chamuéx, Pa Chamuéx —ñanagürü. Rü nüma ga Chamué rü nanangãxü̃ rü ñanagürü: —¡Idexa! Rü cuxü̃ chaxĩnü nixĩ i choma nax curü puracütanüxü̃ chixĩxü̃ —ñanagürü.
11Rü nüma ga Cori ya Tupana rü ñanagürü nüxü̃: —Ñu̱xma rü Iraéanecüã̱xgütanüwa tá chanaxü i ta̱xacü i guxãtáma nüxü̃ ĩnüexü̃ rü tá namaxã tangu̱xmachi̱xẽ.
12Rü ngẽma ngunexü̃gu rü taxũtáma chanangupetüxẽxẽ i guxü̃ma ga yema Erímaxã nüxü̃ chixuxü̃ ga nanegüchiga.
13Yerü marü namaxã nüxü̃ chixuchire̱x rü poxcu i taguma guxü̃gu tá chanapoxcue i ngẽma nanegü naxca̱x i ngẽma chixexü̃ i nüma marü nüxü̃ nacuáxü̃. Yerü ga nanegü rü chixexü̃ chomaxã nixugüxe rü nüma rü tama nüxna nachogü naxca̱x ga yema chixexü̃ ga naxügüxü̃.
14Rü ngẽmaca̱x i ñu̱xma rü Erí nanegümaxã chanaxuegu nax taxũtáma nüxü̃́ nüxü̃ icharüngümaxü̃ i norü chixexü̃gü woo naxü̃nagü cha̱u̱xca̱x ínaguxgu rüe̱xna ãmaregü choxna naxãgügu —ñanagürü ga Tupana.
15Rü yemawena ga Chamué rü nape ñu̱xmata moxü̃ãcü yangune. Rü yexguma ínadaxgu rü nayawãxnagü ga Tupanapataarü ĩã̱xgü. Natürü nüma ga Chamué rü namuü̃ ga Erímaxã nüxü̃ nax yaxuxü̃ ga yema ore ga Tupana namaxã nüxü̃ ixuxü̃.
16Natürü nüma ga Erí rü Chamuéca̱x naca rü ñanagürü nüxü̃: —Pa Chaunex, Pa Chamuéx —ñanagürü. Rü nüma ga Chamué nanangãxü̃ rü ñanagürü: —Daxe chixĩ —ñanagürü.
17Rü nüma ga Erí rü Chamuéna naca rü ñanagürü: —¿Ñuxũ ñaxü̃ yixĩxü̃ cuxü̃ ya Cori ya Tupana? ¡Rü guxü̃xü̃táma chomaxã quixu, rü taxuxü̃táma iquicu̱x! ¡Rü Tupana poraãcü cuxü̃ poxcux ega taxũtáma guxü̃ i ngẽma cumaxã nüxü̃ yaxuxü̃xü̃ chomaxã quixuxgu! —ñanagürü.
18Rü nüma ga Chamué rü guxü̃xü̃ma Erímaxã nixu rü taxuxü̃ma inicu̱x. Rü nüma ga Erí rü naba̱i̱xãchi rü ñanagürü: —Nüma nixĩ i Cori ya Tupana yixĩxü̃. ¡Ẽcü naxü i ngẽma naxca̱x rümemaexü̃! —ñanagürü.
19Rü nüma ga Chamué rü niyachigü. Rü Cori ya Tupana rü nüxü̃ narüngü̃xẽxẽ. Rü guxü̃ma ga norü uneta ga Chamuémaxã nüxü̃ yaxuxü̃ rü nayanguxẽxẽ.
20Rü Dáü̃wa inaxügü, rü ñu̱xmata Bechébawa nangu rü guxü̃ma ga Iraéanecüã̱x nüxü̃ nacua̱xgü nax aixcüma Tupanaarü orearü uruxü̃ yixĩxü̃ ga Chamué.
21Rü nüma ga Cori ya Tupana rü wenaxarü Chamuéca̱x nügü nango̱xẽxẽ nawa ga guma Tupanapata ga Chilówa yexmane, yerü yéma nixĩ ga Tupana Chamuémaxã nüxü̃ yaxuxü̃ ga norü ore.
Currently Selected:
1 Chamué 3: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
