1 Chamué 18
18
Yonatáü̃ rü Dabí rü nügümaxã nanaxuegu nax nügümücügü yixĩgüxü̃ca̱x
1Rü yexguma Dabí Chaúmaxã igúegagu ga nügümaxã nax yadexagüxü̃, rü nüma ga Chaú nane ga Yonatáü̃ rü Dabímücüxü̃ nügü nixĩxẽxẽ, rü nüxü̃ nangechaü̃xü̃chi ñoma nügütama nangechaü̃xü̃rüxü̃.
2Rü nüma ga Chaú rü yematama ngunexü̃gu Dabíxü̃ nayaxu norü ngü̃xẽẽruü̃xü̃, rü tama nanatüca̱x nanamuegu.
3Rü Yonatáü̃ rü Dabí rü Tupanaégagu nügümaxã nanaxuegugü nax nügümücügü nax yixĩgüxü̃ca̱x yerü ga Yonatáü̃ rü Dabíxü̃ nangechaü̃ ñoma nügütama nangechaü̃xü̃rüxü̃.
4Rü ñu̱xũchi nüma ga Yonatáü̃ rü ínacuxuchi ga yema napa̱x ga nagu yacu̱xuuxü̃ rü Dabína nanaxã wüxigu namaxã ga yema norü tara rü norü würa rü norü goyexü̃.
5Rü nüma ga Dabí rü Chaúarü ngü̃xẽẽruxü̃ nixĩ, rü guxü̃guma mea nayanguxẽxẽ ga yema namuãxü̃wa. Rü yemaca̱x nüma ga Chaú rü norü churaragüarü ãẽ̱xgacüxü̃ nayangucuchixẽxẽ. Rü guxü̃ma ga yema churaragü rü naerugü rü namaxã nataãẽgü.
Nixãũxãchi ga Chaú yerü ga duü̃xü̃gü rü norü yexera Dabíxü̃ nangechaü̃gü
6Natürü yexguma nawoegu̱xgu ga churaragü nawena ga yema Firitéuxü̃ nax yamáxü̃ ga Dabí, rü guxü̃nema ga Iraéanecüã̱xgüarü ĩanegüwa norü ãẽ̱xgacü ga Chaúca̱x ínachoxü̃ ga ngexü̃gü ga taãxẽãcüma rü íyaxü̃ãchitanüãcüma rü wiyaegüãcüma rü paü̃dérugü rü árpa napagüãcüma norü ãẽ̱xgacüxü̃ rümoxẽgüxü̃.
7Rü yexguma yema ngexü̃gü wiyaegügu rü íyaxü̃ãchitanüxü̃gu, rü ñaxü̃gu nawiyaegü: —Chaú rü 1,000 i churaragü nadai, rü Dabí rü 10,000 i churaragü nadai —ngĩgürügügü.
8Rü yema wiyae nixĩ ga Chaúãẽwa ngúxü̃, rü poraãcü nanuãcüma ñanagürü: —Dabína nanaxugüe nax 10,000 i churaragü nada̱i̱xü̃, natürü choxna i 1,000 icatama. Rü ñu̱xma ngẽma taxuxü̃ nixĩ nax chauchicüxü ãẽ̱xgacüxü̃ yangucuchigüxẽẽãxü̃ —ñanagürü.
9Rü yexgumacürüwa ga Chaú rü tama Dabímaxã nataãxẽ.
10Rü moxü̃ãcü ga Tupana rü Chaúca̱x yéma nanamu ga naãxẽ ga chixexü̃ rü nüxna nangu. Rü nüma ga Chaú rü ñoma naxãũãẽxü̃rüxü̃ nixĩ ga gumá ãẽ̱xgacüpatawa. Rü yexguma ga Dabí rü norü árpa napaxü to ga ngunexü̃gurüxü̃. Rü nüma ga Chaú rü norü wocae nange.
11Rü ngürüãchi Dabíxü̃ nanacu̱x ga norü wocae nax ĩxtapü̱xmaxã yamutanüãxü̃ca̱x. Natürü nüma ga Dabí rü taxree̱xpü̱xcüna nügü ínapoxü̃ama.
12Rü nüma ga Chaú rü Dabíxü̃ namuü̃, yerü Cori ya Tupana rü Dabíxü̃ narüngü̃xẽxẽ, natürü marü tama Chaúxü̃ narüngü̃xẽxẽ.
13Rü yemaca̱x ga nügüxü̃tawa rü nayamugachi. Rü wüxitücumü ga 1,000 ga churaragüarü ãẽ̱xgacüxü̃ nayangucuchixẽxẽ. Rü yema churaragümaxã nixĩ ga Dabí ga daiwa naxũũxü̃ rü nataeguaxü̃xü̃.
14Rü guxü̃ma ga ta̱xacü ga naxüxü̃wa ga Dabí rü meama nüxü̃́ ínanguxuchi yerü Cori ya Tupana nüxü̃ narüngü̃xẽxẽ.
15Rü yemaca̱x ga nüma ga Chaú rü nüxü̃ namuü̃, yerü nüxü̃ nacua̱x ga ñuxãcü norü yexera natachigamaexü̃ ga Dabí.
16Natürü guxü̃ma ga duü̃xü̃gü ga Iraéanewa rü Yudáanewa rü Dabíxü̃ nangechaü̃gü, yerü nüma nixĩ ga namaxã inacuáxü̃ ga yexguma daiwa naxĩĩxü̃gu rü nawoeguxü̃gu.
17Rü nüma ga Chaú rü wüxi ga ngunexü̃ Dabíxü̃ ñanagürü: —Cuxna tá ngĩxü̃ chamu cuxma̱xü̃ i ngẽma chauxacü irüyamaecü i Meráx ega wüxi ya poracü quixĩxgu rü cunadaixgu i Cori ya Tupanaarü uanügü —ñanagürü. Rü nüma ga Chaú nagu narüxĩnü nax tama nümatama Dabíxü̃ yamáxü̃, natürü norü ĩnü nixĩ nax Firitéugü yamáxü̃ca̱x nagu i dai.
18Natürü ga Dabí rü nanangãxü̃ rü ñanagürü: —Taxuxü̃ma chixĩ i cupe̱xewa, rü chautanüxü̃ rü taxuxü̃ma nixĩgü i Iraéanegütanüwa nax cuxã̱xte nax chixĩxü̃ca̱x —ñanagürü.
19Natürü yexguma nawa nanguxgu ga yema ngunexü̃ nax Dabína ngĩxü̃ namuxü̃ ga naxacü ga Meráx, rü nüma ga Chaú rü ngĩxü̃ namu nüxna ga to ga yatü ga ĩane ga Meorácüã̱x ga Adriégu ãégaxü̃.
20Natürü ga yema nai ga Chaúxacü ga Micá, rü Dabímaxã ixãarüã̱x. Rü yexguma Chaúmaxã nüxü̃ yaxugügügu ga ngĩchiga, rü nüma ga Chaú rü nataãxẽ.
21Yerü nagu narüxĩnü ga Dabína ngĩxü̃ nax namuxü̃ nax Dabíma̱x yixĩxü̃ca̱x rü ngĩma Firitéugüme̱xẽgu nanguxẽẽãxü̃ca̱x. Rü yemaca̱x ga nüma ga Chaú rü wenaxarü Dabíxü̃ ñanagürü: —Rü ñu̱xmata waxi nixĩ i chauã̱xte quixĩxü̃ —ñanagürü.
22Rü yemawena rü nüma ga Chaú rü norü ngü̃xẽẽruü̃güxü̃ namu rü ñanagürü: —¡Pema rü pexicatama namaxã pidexagü i Dabí, rü namaxã nüxü̃ pixu rü choma i ãẽ̱xgacü nax chixĩxü̃ rü poraãcü nüxü̃ changechaü̃ rü guxãma i pema i chorü ngü̃xẽẽruü̃gü rü ta rü nüxü̃ nax pengechaü̃güxü̃ rü penaxwa̱xexü̃ nax nüma rü chauã̱xte yixĩxü̃, ñapegürü tá nüxü̃! —ñanagürü.
23Rü nüma ga yema Chaúarü ngü̃xẽẽruü̃gü rü yéma Dabíxü̃tawa naxĩ rü namaxã nüxü̃ nixugü ga yema ore ga Chaú namaxã nüxü̃ ixuxü̃. Natürü nüma ga Dabí rü nanangãxü̃ rü ñanagürü: —¿Ẽ̱xna pema nagu perüxĩnüegu i natauxchaxü̃ nax wüxíe ya chauxrüxü̃ ngearü diẽruã́xẽ rü taxuxü̃ma ixĩxẽ nax ãẽ̱xgacüxã̱xte tixĩxü̃? —ñanagürü.
24Rü nüma ga yema Chaúarü ngü̃xẽẽruü̃gü rü Chaúmaxã nüxü̃ nayarüxugüe ga yema ore ga Dabí namaxã nangãxü̃xü̃.
25Natürü ga nüma ga Chaú ga nagu nax naxĩnüechaü̃ ga ñuxãcü Dabíxü̃ Firitéugüme̱xẽgu nax nanguxẽẽchaü̃xü̃, rü yemaca̱x yema norü ngü̃xẽẽruü̃gümaxã ñanagürü: —¡Namaxã nüxü̃ pixu i Dabí rü tama chanaxwa̱xe i diẽru choxna ngĩxü̃ naxã ngĩxca̱x i chauxacü! Natürü ngẽma ngĩtanü i chanaxwa̱xexü̃ nixĩ i 100 i Firitéugücha̱xmüpe̱xechiraü̃gü nax nua nanaxü̃ nax ngẽmaãcü nax chanayauxtanüxü̃ca̱x i ngẽma chorü uanügüarü chixexü̃ i chomaxã naxügüxü̃ —ñanagürü.
26-27Rü nüma ga yema Chaúarü ngü̃xẽẽruü̃gü rü Dabímaxã nüxü̃ nayarüxugü ga yema Chaúarü ore. Rü nüma ga Dabí rü nataãxẽ namaxã ga yema Chaú naxca̱x íca̱xaxü̃, yerü yemaacü nüxü̃́ nanatauxchaxẽẽama nax naã̱xte yixĩxü̃ca̱x. Rü naxü̃pa ga yema ngunexü̃ ga Chaú namaxã ixunetaxü̃, rü nüma ga Dabí rü nananutaque̱xe ga norü churaragü rü inaxũãchi, rü 200 ga Firitéugü nayadai. Rü yema Firitéugücha̱xmüpe̱xechiraü̃gü rü Chaúna nayana nax yemaacü naã̱xte yixĩxü̃ca̱x. Rü yexguma ga nüma ga Chaú rü yema naxacü ga Micá Dabína ngĩxü̃ namu naxma̱xü̃.
28Natürü nüma ga Chaú rü nüxü̃ nicua̱xãchi nax nüma ga Cori ya Tupana rü Dabíxü̃ nangü̃xẽẽxü̃, rü naxacü ga Micá rü Dabíxü̃ nangechaü̃xü̃chi.
29Rü yemaca̱x yexeraãcü Dabíxü̃ namuü̃ rü namaxã narüxuanü ñu̱xmata nayumare ga Chaú.
30Rü yexguma Firitéugüarü churaragümaxã nügü nada̱i̱xü̃gu, rü nüma ga Dabí nixĩ ga guxü̃ma ga togü ga Chaúarü churaragüeruarü yexera norü uanügüxü̃ narüporamaexü̃. Rü yemaca̱x nixĩ ga guxü̃ma ga duü̃xü̃gü nüxü̃ ngechaü̃güxü̃.
Currently Selected:
1 Chamué 18: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
