Nüxíraxü̃xü̃ ga popera ga ãẽ̱xgacügüchiga 9
9
Tupana rü Charomóü̃maxã inaxüga
(2 Cr. 7.11-22)
1-2Yexguma Charomóü̃ marü yanguxẽẽgu ga Cori ya Tupanapata ga taxü̃ne, rü guma ãẽ̱xgacüpata, rü guxü̃ma ga togü ga naxüxchaü̃xü̃, rü Cori ya Tupana rü wenaxarü Charomóü̃ca̱x nango̱x yema Gabaóü̃wa naxca̱x nango̱xgurüxü̃.
3Rü ñanagürü nüxü̃: —Nüxü̃ chaxĩnü i ngẽma curü yumüxẽ rü ngẽma choxü̃ nax cuca̱a̱xü̃xü̃. Rü marü chanaxüünexẽxẽ ya yima chopata ya taxü̃ne ya cuxüxü̃ne nax guxü̃guma ngéma changexmaxü̃ca̱x. Rü guxü̃gutáma nüxna chadau rü namaxã chataãxẽ.
4-5Rü ngẽxguma cunatü ya Dabírüxü̃ mea chope̱xewa cumaxü̱̃xgu rü quixaixcümagu rü guxü̃gutáma naga cuxĩnügu i chorü mugü, rü choma rü guxü̃gutáma Iraéanewa ãẽ̱xgacügüxü̃ chayaxĩgüxẽxẽ i cunegü rü cutaagü, yema cunatü ga Dabímaxã ichaxunetaxü̃rüxü̃ ga yexguma namaxã nüxü̃ chixuxgu nax tagutáma nataxuxü̃ i nataagü i Iraéanecüã̱xgüarü ãẽ̱xgacü ixĩxü̃.
6-7Natürü ngẽxguma chi pema rü pexacügü choxna pixĩgachigu, rü tama peyanguxẽẽgu i ngẽma chorü mugü i pexna chaxãxü̃, rü to i tupanagüwe perüxĩxgu rü ngẽmaxü̃ picua̱xüü̃gügu, rü choma rü tá Iraétanüxü̃xü̃ íchawoxü̃ nawa i ñaa naane ga pexna chaxãxü̃. Rü tá nüxna chixũ ya yima chopata ya taxü̃ne ya chaugüca̱x chaxüünexẽẽ́ne. Rü ngẽxguma i guxü̃ma i togü i nachixü̃anecüã̱xgü rü tá pexü̃ nacugüeecha.
8Rü daa chopata ya taxü̃ne rü ngẽma naxtapü̱xgü tá nügüétü nayi, rü guxü̃ma i ngẽma ngéma üpetüxü̃, rü tá namaxã naba̱i̱xãchi rü nüxü̃ tá nacugüe rü tá ínaca: “¿Tü̱xcüü̃ ya Tupana rü ngẽmaãcü namaxã nanangupetüxẽxẽ i ñaa nachixü̃ane rü daa napata ya taxü̃ne?” ñanagürügü tá.
9Natürü ngẽma ngãxü̃ga rü ñanagürügü tá: “Ngẽma Iraéanecüã̱xgü rü ngẽmaãcü nüxü̃ nangupetü erü nüxna nixĩgachi ya yimá norü Tupana ga norü o̱xigüxü̃ Equítuanewa ínguxü̃xẽẽcü, rü togü i tupananetagüwe narüxĩ rü nüxü̃ nicua̱xüü̃gü. Rü ngẽmaca̱x ya Cori ya Tupana rü guxü̃ma i ñaa chixexü̃ naxca̱x ínangu̱xẽxẽ”, ñanagürügü tá —ñanagürü ga Tupana.
Togü ga norü puracügü ga naxüxü̃ ga Charomóü̃
(2 Cr. 8.1-18)
10Rü 20 ga taunecü nangupetü nax Charomóü̃ naxüxü̃ ga guma taxre ga ĩpata ga Tupanapata ga taxü̃ne, rü napata ga nüma nawa ãẽ̱xgacü yixĩne.
11Rü guma taxre ga ĩpatagüca̱x nixĩ ga ĩane ga Tíruarü ãẽ̱xgacü ga Iráü̃ rü Charomóü̃xü̃ narüngü̃xẽxẽ namaxã ga ocayiwapütagü rü pínupütagü, rü ñu̱xũchi guxü̃ma ga úiru ga nüma nanaxwa̱xexü̃. Rü nüma ga Charomóü̃ rü Iráü̃na nanaxã ga 20 ga ĩanegü ga Gariréaanewa yexmagüne.
12Natürü yexguma íyadauxãgu ga Iráü̃ rü tama norü me nixĩ ga guma ĩanegü, rü yemaca̱x ñanagürü:
13—¿Ta̱xacünearü ĩanegü nixĩ ya choxna cunaxü̃ne, Pa Chauenexẽx? —ñanagürü. Rü yemaca̱x ga yema naane ga nawa nayexmagüxü̃ ga guma ĩanegü rü Cabúgu nanaxüéga.#9.13 Rü Cabú rü taxuwama mexü̃ ñaxü̃chiga nixĩ. Rü ñu̱xma rü ta rü ngẽmatama nixĩ i naéga.
14Rü yema úiru ga Charomóü̃na naxãxü̃ ga Iráü̃ rü 3,960 quíru nixĩ.
15Rü ñaa nixĩ ga yema puracügü ga ãẽ̱xgacü ga Charomóü̃ duü̃xü̃güxü̃ üxẽẽxü̃. Rü wüxi nixĩ ga Tupanapata ga taxü̃nearü ü, rü to nixĩ ga napataarü ü, rü waixü̃müarü mexẽẽane, rü ĩane ga Yerucharéü̃arü poxeguxü̃tapü̱xarü ü. Rü ñu̱xũchi nanamu nax yamexẽẽgüãxü̃ ga ĩanegü ga Achóx, rü Meguídu, rü Guéche.
16Yerü Faraóü̃ ga Equítuanearü ãẽ̱xgacü, rü ĩane ga Guéchegu naxücu. Rü nanadai ga guxü̃ma ga Canaáü̃tanüxü̃ ga yexma ãpatagüxü̃, rü ñu̱xũchi nayagu ga guma ĩane. Rü yemawena rü naxacü ga Charomóü̃ naxma̱xü̃ namaxã naxãmareã̱x ga guma ĩane.
17-18Rü yemawena ga Charomóü̃ rü wenaxarü nanaxü ga guma ĩanegü ga Guéche, rü ñu̱xũchi Bex-oróü̃ ga doxonewa yexmane, rü Baará, rü Tamára ga Yudáanearü chianexü̃wa yexmagüne.
19Rü yexgumarüxü̃ ta nayamexẽẽgü ga guxü̃nema ga guma ĩanegü ga õnagü nagu nanutaque̱xegüne, rü ĩpatagü ga churaraweü̃gü ga carugü ga daixruü̃gü nagu nucune, rü ĩpatagü ga cowarugü ga dairuü̃gü nawa yexmagüne. Rü nanaxü ga guxü̃ma ga yema Yerucharéü̃wa rü Líbanuwa naxüxchaü̃xü̃. Rü yexgumarüxü̃ ta rü guxü̃ma ga naane ga naxme̱xwa yexmaxü̃wa nanaxü ga yema naxüxchaü̃xü̃.
20-21Rü yemaca̱x ga Charomóü̃ rü puracü ga yáxü̃wa nanapuracüexẽxẽ ga yema tama Iraétanüxü̃ ixĩgüxü̃ ga Amoréutanüxü̃, rü Itítanüxü̃ rü Ferechéutanüxü̃, rü Ebéutanüxü̃, rü Yebuchéutanüxü̃ ga Iraéanewa yexmagüxü̃. Rü yema nixĩ ga nataagü ga nawena Iraéaanewa yaxǘgüxü̃ ga Iraétanüxü̃ tama guxẽẽxü̃ nanada̱i̱xü̃. Rü ngẽmaãcü nixĩ i woo i ñaagü i ngunexü̃gügu.
22Natürü nüma ga Charomóü̃ rü tama Iraétanüxü̃xü̃ namu nax mugüruü̃gü yaxĩgüxü̃. Rü yema nagu namugüãxü̃ nixĩ nax churaragü yaxĩgüxü̃, rü churaragüarü ãẽ̱xgacügü yaxĩgüxü̃, rü carugü ga churaragüweü̃gü ga dairuü̃gümaxã icua̱xgüxü̃ yaxĩgüxü̃ rü yema churaragü ga cowaruétü ĩxü̃arü ãẽ̱xgacügü yaxĩgüxü̃.
23Rü yema Charomóü̃arü puracümaxã icua̱xgüxü̃ ga duü̃xü̃gü, rü 550 nixĩ. Rü yemagü nixĩ ga duü̃xẽgüxü̃ mugüxü̃ nawa ga yema puracü ga naxüxü̃.
24Rü Faraóü̃xacü rü ixũxũ ga Dabíarü Ĩanewa, rü ĩpata ga Charomóü̃ ngĩxca̱x üxü̃newa ixũ. Rü nüma ga Charomóü̃ rü yéma toxṍõneacü nanamexẽẽane.
25Rü Charomóü̃ rü tomaepü̱xcüna nixĩ ga wüxichigü ga taunecügu ga naxü̃nagü Tupanaca̱x nada̱i̱xü̃ rü yema guruxü̃ ga Cori ya Tupanaca̱x üxü̃wa ínanagu nax yemaacü Tupanaxü̃ nangüxmüxẽẽxü̃ca̱x. Rü yexgumarüxü̃ ta pumara ga yixichixü̃ nigute̱xe Cori ya Tupanape̱xewa. Rü yemaacü nayanguxẽxẽ ga nax naxügüãxü̃ ga Tupanapata ga taxü̃ne.
26Rü Charomóü̃ rü wapurugü naxü nawa ga guma ĩane ga Echióü̃-guébewa. Rü guma ĩane rü Eráxarü ĩanearü ngaixcamana nayexma ga Már i Dauchíüxü̃cutüwa ga Edóü̃arü naanewa.
27Rü Iráü̃ rü guma wapurugüwa nanamu ga norü churaragü ga marínugü nax Charomóü̃arü churaragü ga marínugümaxã inacua̱xgüxü̃ca̱x nawa ga guma wapurugü. Yerü nümagü ga Iráü̃arü churaragü rü meama nüxü̃ nacua̱xgü nax márwa wapurugu naxĩxü̃.
28Rü inaxĩãchi rü Ofíanewa nangugü. Rü yéma Charomóü̃ca̱x nüxna nanana ga wixgutaa̱x 14,000 quíru naguxü̃ ga úiru ga namaxã nawoeguxü̃.
Currently Selected:
Nüxíraxü̃xü̃ ga popera ga ãẽ̱xgacügüchiga 9: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
