Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 5
5
Wüxi i yatü i chixri maxü̃chiga
1Rü duü̃xü̃gü nüxü̃ nixugügü rü wüxi i yatü i petanüwa rü naérücümaxãtama naxãxma̱x. Rü ngẽma nixĩ i pecadu i poraãcü chixexü̃chixü̃, rü woo ngẽma duü̃xü̃gü i tama yaxõgüxü̃tanüwa rü tama ngẽmaãcü namaxẽ.
2¿Rü ñuxãcü i pema rü pegü picua̱xüü̃güamaxü̃ i ñu̱xma? Narümemae chi nixĩ nax pegümaxã pengechaü̃güxü̃. Rü ngẽma yatü i ngẽma chixexü̃ üxü̃ ¡rü ípenata̱xüchixü̃ i petanüwa!
3Rü woo tama petanüwa changexmagu i chomax, natürü chorü ĩnüwa guxü̃guma petanüwa changexma. Rü ñoma pexü̃tawa changexmaxü̃rüxü̃ rü tórü Cori ya Ngechuchu ya Cristuégagu pemaxã nüxü̃ chixu nax petanüwa ípenata̱xüchixü̃ i ngẽma yatü.
4Rü ngẽxguma Cristuégagu pengutaque̱xegü rü choma rü tá ta petanüwa changexma i chauãẽwa. Rü nüma ya tórü Cori ya Ngechuchu rü tá napetanügu nax norü poramaxã pexü̃ naporaexẽẽxü̃ca̱x.
5Rü ngẽmaãcü tórü Cori ya Ngechuchuégagu rü tá name nax Chatanána penamuxü̃ i ngẽma yatü nax Chataná ngúxü̃ nüxü̃ ingexẽẽxü̃ca̱x i naxü̃ne. Natürü naãxẽ rü tá namaxü̃ i ngẽxguma wena núma naxũxgu ya tórü Cori ya Ngechuchu.
6¡Rü tama name i pema rü pegü picua̱xüxü̃ naxca̱x i ngẽma pexüxü̃! ¿Tama ẽ̱xna nüxü̃ pecua̱x i ngẽma ore i ñaxü̃: “Wüxi i íxraxü̃ i paũarü pu̱xẽẽruxü̃ rü taxü̃ma i paũchara nipu̱xẽxẽ”, ñaxü̃?
7Rü ngẽmaca̱x name nixĩ i nüxü̃ perüxoe i guxü̃ma i ngẽma nũxcümaü̃xü̃ i pecüma i pexü̃ chixexẽẽxü̃. Rü ngẽxguma ngẽma pexü̱xgu, rü ñoma paũ i ngexwaca̱xü̃xü̃ i paũcharawa üxü̃rüxü̃ tá pixĩgü. Rü pema rü ñoma paũ i ngearü pu̱xẽẽruü̃ã́xü̃ i Üpetüchigaarü petawa ingṍxü̃rüxü̃ tá pime. Rü ñu̱xma i pema rü aixcüma ngexwaca̱xü̃xü̃ i duü̃xü̃gü pixĩgü, yerü Cristu rü tórü Üpetüchigaarü carnéru ixĩxü̃ rü marü tórü pecaduca̱x nayu.
8Rü ngẽmaca̱x nüxü̃ tarüxoe i nũxcümaü̃xü̃ i tacüma i chixexü̃gü rü taxü̃nearü ngúchaü̃gü i ñoma paũ i pu̱xẽẽruxü̃ã́xü̃rüxü̃ ixĩxü̃. Rü tanaxüchiga i tórü Üpetüchiga namaxã i tórü maxü̃ i aixcüma mexü̃ i ñoma paũ i ngearü pu̱xẽẽruxü̃ã́xü̃rüxü̃ ixĩxü̃.
9Nüxíraxü̃xü̃ ga chorü poperawa rü pemaxã nüxü̃ chixu nax tama namaxã pexãmücügüxü̃ i ngẽma duü̃xü̃gü i ngexü̃gü i ngĩxü̃nemaxã taxexü̃we rüxĩxü̃.
10Natürü yexguma yema ñachagu pexü̃, rü tama pemaxã nüxü̃ chixu nax nüxna pixĩgachitanüxü̃chixü̃ i ngẽma duü̃xü̃gü i ñoma i naanewa ngexü̃gü i ngĩxü̃nemaxã taxexü̃we rüxĩxü̃, rüe̱xna ngẽma duü̃xü̃gü i guxü̃ma i ta̱xacü nügüna nugüchaü̃güxü̃, rüe̱xna ngĩ́ta̱xagüxü̃, rüe̱xna ngẽma duü̃xü̃gü i tupananetachicüna̱xãxü̃ icua̱xüü̃güxü̃. Erü ngẽxguma chi na̱xcha̱xwa ípechoü̃gu i ngẽma duü̃xü̃gü, rü chi taxucürüwa i ñoma i naanewa pengẽxmagü.
11Natürü yexguma pemaxã nüxü̃ chixuxgu nax tama namaxã pexãmücügüxü̃ i ngẽma duü̃xü̃gü i chixexü̃gu maxẽxü̃, rü nachiga chidexa i ngẽma duü̃xü̃ i nügü ixuxü̃ nax peenexẽgü i yaxõxü̃ nax yixĩxü̃, natürü nai i ngexü̃maxã maxü̃xü̃, rüe̱xna aüxü̃, rüe̱xna tupananetachicüna̱xãxü̃ icua̱xüü̃xü̃, rüe̱xna oregüta̱a̱xü̃, rüe̱xna ngãxẽwa̱xexü̃, rüe̱xna ngĩ́ta̱xaxü̃. Rü ngẽma duü̃xü̃gü nixĩ i pemaxã nüxü̃ chixuxü̃ nax tama namexü̃ nax namaxã pexãmücügüxü̃ rü bai i namaxã nax pechibüexü̃.
12-13Rü tama cho̱xme̱xwa nangẽxma nax nüxna chacaxü̃ i ngẽma duü̃xü̃gü i tama Tupanaaxü̃́ yaxõgüxü̃. Rü Tupana tá nixĩ ya nüxna cacü i ngẽma duü̃xü̃gü. Natürü i pema rü peme̱xwa nangẽxma nax nüxna pecaxü̃ i ngẽma peenexẽgü i yaxõgüxü̃ i tama mea maxẽxü̃. Rü name nixĩ i petanüwa ípenamuxũchi i ngẽma yatü i chixexü̃gu maxü̃xü̃.
© 2022, Wycliffe Bible Translators, Inc. All rights reserved.
