ISAYA 40
40
Makuva gi Lisuuvirizwa
1Nyasaye wiitu avoora, “Muleminye imioyo ja avandu vange, muvaleminye
2mudinyirizi avandu va Jerusalemi.
Muvavoolere ndi uvusaaliri vwavo vumali kohera
na kalunu mali kuvasamiiha uvwoni vwavo vwosi,
kandi mali kuhaana mageri gange kuvo
kigira uvwoni vwavo vwosi.”
3Mwoyo gwu mundu guhanzukaa mwigendanyama nigovoora,
“Mulombe inzira ya Yahova mwigendanyama!
Mulungikizi inzira ya Nyasaye mu changarangwi!
4Mudiguluri amavoona goosi; mwikizi vigulu viosi.
Tugulu twosi tulikizwa,
kandi lirova liosi liachama lilalungikizwa,
kandi amagiki goosi galaleng'anywa.
5Maku uvukumi vwa Yahova vulaloreka na vandu vosi valavolola.
Yahova mwene umali kulaga yaga.”
6Mwoyo gwu mundu guhanzukaa nigovoora, “Ulandizi Likuva!”
Ndateeva, “Likuva ki lianandiza?”
“Ulandizi ndi avandu vosi mukivala vaveeye kuli uvunyasi;
kandi vaveeye kuli vimuli viamaua gu muvulimu.
7Vunyasi vuniara kandi vimuli vivunguluka,
lwa Yahova atumaa imbuza kuhuuza kuvio.
Avandu sivanyala kwikuzira ligali kuli uvunyasi mba.
8Yaga gaveeye agiligali, kigira uvunyasi vuniara, namaua guuma,
navuzwa Likuva lia Nyasaye lilamenya mihiga ni mihiga.”
9O, Munyi avandu va Jerusalemi, mwanigiri kuzia ku kiguru kitambi na mulandizi Likuva lilahi!
Munyi avandu va Ziyoni, mulandizi nu mwoyo munene likuva lilahi!
Mulandizi na mutatia mba, muvoolere avandu va madara gi Ivuyuda ndi,
“Nyasaye wavo yaazaa.”
10Yahova Wuvunyali yaazaa kwamiiha ni zinguru,
kandi alaza kuhaana amadanyi ku yavo avayahonyia.
11Yahova alalinda avandu veve, kuli umwayi alindaa nu kwaya chayo chiche.
Alavungiza vimeme via amagondi geege harara,
kandi alagavugula mu makono geege,
na alagaginga ku kiritu chiche.
Alalinda nu kwaya amagondi geege novohooma.
Nivwaha weleng'anyia ku Nyasaye wa Isiraeli
12Mundu anyala kogera amazi gi inyanza ku luhi lwumukono gwigwe,
anoho kogera ligulu namakono geege?
Mundu anyala kogera amalova gi kivala mu kekombe,
anoho kubima vigulu kandi tugulu mu zikilo?
13Mundu anyala kovoolera Yahova aganyala kokora?
Mundu anyala kumwigiza,
anoho kumuha zing'anagani?
14Nivwaha wa Nyasaye anyala kwenya kuye zing'anagani,
aduuki kwiga nu kumanya
kandi kumanyiriza kuli vindu vinyala kokoleka?
15Zihiiri ziosi ziveeye ku Yahova kuli ingelageliza ya mazi mu isiongo,
kandi zivalizwa kuva kuli luguchi ku zigero.
Ivisulu viosi vie inyanza viveeye kuye kuli muyeke.
16Zinyama ziosi ziu mumilitu ja Lebanoni si ziduukanaa kuva
kuli kisiuviriru imbiri wa Nyasaye wiitu mba,
kandi misaala sijiveeye midukiru ju kuhambiza muliru mba.
17Zihiiri ziosi siziveeye kindu imbiri wa Yahova mba,
zivaliziiywi kuye kuva kuli mwika vuzwa.
18Nyasaye anyala koleng'anywa na vwaha?
Anoho anyala kufananywa na kindiki?
19Nyasaye siaveeye kifananyi chu musiza yalomba,
chu muturi yahoma ni zahabu,
kandi ni minyororo jie zahabu mba.
20Mundu utaveeye ni ifeza anoho zahabu,
atovoraa musaala mulahi kandi mudinyu ugunyala kuvula kuguunda,
kandi yenya umusiza unyala kolomba kifananyi kitanyala kusundwa.
21Munyi mukikiri kumanya?
Munyi mukikiri kuhulira?
Munyi mukikiri kovolerwa kutura mu litanga?
Mukikiri kumanyiriza kutura lirova nililombwa?
22Nyasaye yalomba lirova niyikaye kondeve yeye yu vwami,
igulu wi lirova kandi igulu wi ligulu.
Vandu vaveeye haasi ku lirova valoreka kuva kuli madagalia.
Nyasaye yavambula ligulu kuli inguvu yukukinga,
kandi kuli lihema liokomenya mu.
23Nyasaye yikizaa vana va vami kuva vuzwa,
kandi akolaa avamihi vizingulu ku lirova kuva vuzwa.
24Vaveeye kuli vitagwa vidoto, kandi vimera,
navuzwa vikikiri kuhila imiri.
Lwa Yahova atuumaa imbuza, vimanya viniara ma viuma,
ma kihuzuzi kikihuuza kuli vunyasi vwumu.
25Nyasaye Mutakatifu anyala koleng'anywa ku vwaha?
Aveeye ho nu mundu wundi woosi unyala koleng'anywa naye?
26Heenzi igulu mu Ligulu!
Nivwaha walomba viosi viveeye mu?
Ni oyo uviemiliraa kuli iliihi liu vulwani,
yamanya ni vianga via yalomba,
kandi yamanya lieta lia vuli kelombe!
Kigira aveeye wizingulu kandi wuvunyali,
sihakaveeye ho ne kelombe kali kilala ikinyala kogota mba.
27O, munyi avandu va Isiraeli, kigira ki mwiliriraa ndi Yahova
siamanyi uvudinyu vwinyu mba,
kandi siahendaa mwoyo lwa muvura
konyoora likalaga lirungi mba?
28Munyi mukikiri kuhulira?
Kandi mukikiri kumanya?
Yahova aveeye Nyasaye wi mihiga ni mihiga;
uwalomba ligulu ni lirova.
Sialuhaa anoho siakuzaa umwoyo mba.
Siaveeye ho mundu umanya zing'anagani zizie mba.
29Yahova ahaanaa zinguru kuyavo avaveeye avadedekere,
kandi adinyirizaa yavo avakuzaa mioyo.
30Kali avang'erere valava avadedekere,
kandi avasoleri valaluha ligali.
31Navuzwa yavo avasuuviraa mu Yahova kigira vokonyi valanyora zinguru ziavo uvuhia.
Valaburuka nizimbaha kuli kihungu;
valanyagula na si valaluha mba,
valagenda na sivalava vadedekere mba.
©Bible Society of Kenya, 2019