MATAYO 8
8
1Otini kirökunö Yeso kutïngoni, kïrïp söpïchis cho chang. 2Kïlenyona kïwechï nyinte chi nyo kyamate psenkwet akïkïtïngö tawunyi akïlenchï, “Ato imökenyi, Echotyon, imukenyi isopanïn.”
3Kughïtö Yeso ewunyi akïswany akïlenchï, “Omökan, tïlilitunö!” Kïnyini lawel kïsöpö nyinte sömewononi. 4#Law 14:1-32. Atolapay kïlenchï Yeso chichay, “Tere! Memwochï chi nyonikïny ngalechï, wölo wïyö wölo mi tïsin aikany kurosinyi aitötö konutyengu le ato kiyomïs Musa pich atökunkïtï chi anka tïkwïl lö kesöpönyi.”
Sopöy Yeso mötworinto wowïn pö Rumi
(Luk 7:1-10)
5Otini kilït Yeso Kapernaum, kïtuyeghö wowïn pö askarin 6nyo kisagh nyinte lö, “Echotyon, chirate mötworintenyan nyo mi kaw, rïwöy kimeyta por, akïmemukonye ntökïnget, chirate nyoman.”
7Kuyokyï Yeso lö, “Ongwïnan osopöy nyinte.”
8Wölo kuyokyï wowïnay pö askarin lö, “Ewo, Echotyon, ochan mïnïng tya nyo melö mïchini lïtönyi konyan. Mwagha pat ngölyon atökïsöp mötworintenyan. 9Ompöwölo ochan chi nyo kïpöytenon tïkwïl atïngetan askarin cho opöytenan. Omwochinan akonga lö, ‘Wïyö,’ kïwetöy, amwochan anka lö, ‘Nyonö yi,’ kungwïnöy, amwochinan sekeyontenyu lö, ‘Igha ki,’ kwighöy!”
10Otini kilïm Yeso lenyoni, kïtöngönchï nyoman akïlenchï pïchoni kirïpöy nyinte, “Omwowokwa nyoman lö, tomönye osöchan chi koro Israel nyo tïng kighanat nyo lata nyï. 11#Luk 13:29. Omwowokwa nyoman lö pkono pich cho chang kongasis nko ta akïpka kumpur akwomisyö nko Apraam nko Isak nko Yakopo ompö Pöyunöto Yïm. 12#Mat 22:13; 25:30; Luk 13:28. Wölo kïwirchini wölo tuw pïchini kötöpöyitu Pöyunötö yïm, riryegho nyu chane wöloni akïnyagh kelat.” 13Atolapay kïlenchï Yeso wowïnay pö askarin, “Wïyö katangu, nya kwigha ompö nyi lenyini keghananyi.”
Kïsöp mötworintonay pö wowïnoni pö askarin panini.
Sopöy Yeso pich cho chang
(Mrk 1:29-34; Luk 4:38-41)
14Aki nyini kilït Yeso kö pö Petro, kïnyorï pokör pö Petro chirat rïwöy pöröy, kyamate tïnyon. 15Kïswany Yeso ewunyi, kïweghö tïnyontonay, kïnget akïpöghisyechï chane.
16Otini kimön, kemïtyï Yeso pich cho chang cho kipote oy. Kiyon oyichoni ghach ompö ngölyontenyi akusop pich löwïr cho kichirsot. 17#Isa 53:4. Kigh lenyoni atökumï kwitïta lö man ngölyonto werkoyon Isaya nyo kimwa lö,
“Kicheng nyinte nyörkölelyencha
akïkasan sömewutköcha.”
Cho mïchini kïlïku rïpanpa Yeso
(Luk 9:57-62)
18Otini kisïwa Yeso söpïch nyo kiwitwit nyinte, kïmwochï kinetankachi kïpa kwoghyö nanam antakwagh. 19Kungwïn konetinto kirurut wölo kimi nyinte akïlenchï, “Omitan kïpsach konetin arïpatinyi ompö wop anka tïkwïl wölo iwetenyi.”
20Kuyokyï Yeso nyinte lö, “Tïngeto chepkonöw pïrïmpotikwa akïtïng töritwö korikwa, wölo mötïngnye Wero Chi wölo rïwöy.”
21Kïlenchï kinetanenyi anka, “Echotyon, pïswante anyagh owö otïp paponyu.”
22Wölo kuyokyï Yeso nyinte lö, “Nya kïtïp pich cho kimeghö meghonkökwa, rïpaninyi.”
Keteghchï Yeso chepkïrïri ompö nanam kïsï
(Mrk 4:35-41; Luk 8:22-25)
23Otini kilany Yeso meli, kïpa kinetankachi nko nyinte. 24Akïtökïnyini kïkut chepkïrïri nanamay, löt tökulum pögh melinay. Wölo kirïwöy Yeso. 25Kïpa kinetankachi kunget. Kïlenchï, “Sörwech, Echotyon kakewonyecha!”
26Kïlenchï Yeso, “Ompö ne towöghisyenökwa? Akwa pïchï mïnïng kighanatenkwa!” Atolapay kïnget akuteghchï chepkiririnay nko mirtino pögh kïsisyö, kïsï nanamay lasay.
27Kïtöngönchï pïchay akïlö, “Ne chitö nyï nya terchini ompö yomöt nko mirtino pögh?”
Sopöy Yeso pich odeny cho kipote oy
(Mrk 5:1-20; Luk 8:26-39)
28Otini kiwö Yeso kwoghyö okumpö Kadaren, nanam antakwagh, kïtuyeghö pich odeny cho kipkono wölo kile parsïkontin. Kipote oy pïchoni akiköromöch chane tya ntökïmelö kitökumuköy chi ntökuwer aranoni. 29Kïnyini kuteghyö tya lö, “Kïtïngecha kegh ne nko nyi nya, Wero Tororöt? Kengwïnanyi so inyarilecha kong kïtomö kwitïta asistanyi?”
30Kimi nyu ato lekïto atoni okwot pö nkïruwen nyo kyoketïyi. 31Kïsom oyichay Yeso lö, “Ato imökenyi itulecha, iyontecha kelïte okwotara pö nkïruwen.”
32Kïchömchï Yeso chane lö, “Ape.” Kïpa akïlïtöy nkïruwenichay. Kïryagh okwotnoni pö nkïrwen kïmïkul kururtoy wölo le ngötut akïlïtöy nanam akuwonyechï wölini.
33Kïryagh mösöwechoni kiyokwïyi nkïrwenichoni kutang kanasyan akïmwochï pich lökoyechoni löwïr nko kïgh nyo kigha ompö pïchoni kipote oy. 34Kïnyini, kïngetunö pich löwïr kanasyan akïpa kïtaroch Yeso, otini kisïwa chane nyinte, kïsagh kïngeta korengwa.
Sopöy Yeso chi nyo kisipö por
(Mrk 2:1-12; Luk 5:17-26)
Currently Selected:
MATAYO 8: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
