MATAYO 27
27
1Nyini kiyech, kïtuyö tïsï cho echön löwïr nko poyi pipö Yaudi tökïyar ngölyon nyo nömo Yeso tökïpar. 2Kïrata nyinte sïrïmtin akumït kïwö wölo mi Pilato nyo kipöytoy koronini.
Megha Yudas
(Ist 1:18-19)
3 #
Ist 1:18-19. Nyini kisïwa Yudas nyay kiwïchtö Yeso lö kikerwokyï Yeso kïma, kwotyechï kegh akuyoda kerpeschay le tömönut sömök kuyokyï tïsï cho echön nko poyi pipö Yaudi. 4Kïlenchï, “Kaghan ngokï ompöwölo kowïchtan chi nyo melö kötïng lelut kepar.” Wölo kuyokyï pïchay lö, “Melö timecha ngalechona rara nyinte!” 5Kïlösyï Yudas kerpeschay Kö pö Tororöt* akïlït sany kïwö kuket kegh. 6Kïkwagh tïsï cho echön ropïyenichoni akïlö, “Ropïyeni kisön chï, melö chömwecha Kirurutköcho ketöne Kö pö Tororöt wölay kitöni kaplawachtin cho konu pich.” 7Kikany kurwoch, kïchomnyechï lö nya kyala para chi nyo le Ighinto Tören atökïlïkwï wölo kïtïpchini to. 8Nka nyoni tökekuro paranini nko nyete le ye “Para Kisön.” 9#Sak 11:12-13. Kïpïntö nyu ngölyonto werkoyon Yeremia nyo kilö, “Kicheng pich kerpes tömönut sömök, ropïyen cho kichomnyechï pipö Israel kwala nyinte, 10akwala ropïyenichini para ighinto tören lenyini kimwowanïn Echotyon.”
Katep Pilato Yeso teput
(Mrk 15:2-5; Luk 23:3-5; Yna 18:33-38)
11Kughyongö Yeso tawu pöytoghin Pilato, kïtep nyinte lö, “Kelenyi so ochï pöytoghinto pipö Yaudi?”
Kïlenchï Yeso, “Kemwaghanyi.” 12Wölo kimeyokyïnye nyinte ngölyon tïsï cho echön nko poy ompö ngal cho kitep chane. 13Kïlenchï Pilato, “Melïmenyinye so ngalechï löwïr ngöloneninyi pich?” 14Wölo kimeyokyïnye Yeso ngölyon nyinte nyo le ompö akonga, kïtöngönchï pöytoghintö nyoman.
Kakirwokyï Yeso meghat
(Mrk 15:6-15; Luk 23:13-25; Yna 18:39–19:16)
15Kimi otöp nyo kipö pipö Yaudi nyo kichömchini pöytoghin osiswechoni kutyoköy chi nyo ratate asispa Pasaka,* chi anka tïkwïl nyo kösom chane. 16Kimi osiswechoni chi nyo kiratate nyo kinkït pich löwïr nyo kikïkuro Parapas. 17Nyini kïtuyö söpïchischini, kïtep Pilato chane lö, “Omökekwa ketyokwokwa ngo ompö pïchï le odeny? Yeso nyï kïkuro Kristo* anta Parapas?” 18Kimwa lenyoni kunkït lö kitötö chane nyinte, ompöwölo kisösöy.
19Akwotini kitökïtöpo Pilato ngacharu kirwok, kïyonta korkenyi ngölyon nyo kilenchï, “Meda kïgh chichona pö man, ompöwölo komighön nyoman amwa ompö kirwotïtogh ompö nyinte.”
20Kïkïnkïn tïsï cho echön nko poy söpïchini lö, “Atepa Pilato kutyak Parapas tökïkonï Yeso kepar.” 21Kïtep pöytoghintö chane lö, “Ngo ompö pïchï le odeny nyo omökekwa ketyoköy?” Kuyokyï lö, “Parapas!” 22Kïtep Pilato chane lö, “Odonane Yeso nyï kïkuro Kristo?” Kïlö chane löwïr, “Nya kewudochï kimurtöwon.” 23Kïtep Pilato lö, “Ompö ne, kegh ne nyo gha?” Kuteghyö tya lö, “Nya kewudochï kimurtöwon!” 24#Krt 21:6-9. Otini kisïwa Pilato lö mökunyiwunye kïgh ngalechi akirich kwar kegh pich, kïcheng pögh akuwunö morichi tawu söpïchoni akïlö, “Motïngetanye lelut ompö megha chichï pö man! Opöyunö kegh akwane!” 25Kuyokyï söpïchay kïmïkul lö, “Nya kwamecha kisönkachi akwam monecha!” 26Kutyokyï nyu Pilato chane Parapas ompö chela, otini kiwany Pilato kïmuny Yeso, kutötö kewudochï kimurtöwon.
Köpirönö askarin Yeso
(Mrk 15:16-20; Yna 19:2-3)
27Atolapay kumït askarino Pilato Yeso kutang kö pö soch, kïpka söpïch pö askarin kuwit nyinte. 28Kuchïrut nyinte akulokyï kolikö nyo pïrir, 29akïnöpchï tenta kato akulokyï mötïnyi akutö techan kïnama ewunyi nyo pö tagh akïkïtïngchï tawunyi kïnyerera kilentöy, “Takwes, Pöytoghinto pipö Yaudi!” 30Kïsïngwïlchï akïcheng lïkay kukoskosa möt. 31Kikany kuwany kïnyerera, kïngwïsa sïranay akulokyï sïrokachi akumït kïlït kiror kïpa kewudochï kimurtöwon.
Kakïwudochï Yeso kimurtöwon
(Mrk 15:21-32; Luk 23:26-43; Yna 19:17-27)
32Akwotini kimi kïpetöy, kïtuyeghö chi nyo kingwïno koro Kurene nyo kikïkuro Simon, kuchikyï nyinte kïkasan kimurtöwonto Yeso. 33Kïpka ntökwit ato kïkuro Kolkota nyo ato kïwaghach kelentöy, “Kowo Möt.” 34Kutönö nyinte atoni dipay* cho kikituyö nko tïkwïn cho ngwonöch, wölo nyini kichamcham Yeso kïmökïghanye.
35Otini kiwany kïwudochï Yeso kimurtöwon, kïpöghisyeghö chane söker kupar sïrokachi, 36atolapay kumpur ngwïny kïrïp nyinte ompö otini. 37Kukir ngal cho kikirwokyineghö nyinte akutö mötïnyi parak. Kikikir lö, “Nyï kï Yeso, Pöytoghinto pipö Yaudi.” 38Kiwudochï chane nyinte kimurtöwon nko pich odeny cho le mosï. Kiwudochï anka ewu tagh kewudochï anka ewu löt.
39Kukworyö pich Yeso cho kiweröy otini akupirpiröy mötöwekwa kïlentöy, 40“Nyi nyay kilentöy ongongöy Kö pö Tororöt, atek ompö osis sömök! Sörune kegh airökunö kimurtöwon ato ichï Wero Tororöt!” 41Kukworyö tïsï cho echön ngalechoni nko koneti kirurut tïkwïl, kïlö, 42“Kisörï pikö walaka akïmemukönye kïsöru kegh! Pöytoghinto Israel nyinte, nya kïrökunö kimurtöwon ye atökeghanacha nyinte. 43Kitwoytoy kegh nyinte Tororöt, nya kïsörï Tororöt nyinte ye ato chömo kegh nyinte, ompöwölo kilö. Ochï Wero Tororöt?” 44Kukworyö tïkwïl pkatischini kikïwudochï kimurtöwon nko nyinte.
Megha Yeso
(Mrk 15:33-41; Luk 23:44-49; Yna 19:28-30)
45Nyini kighyö asis kulum tuwïn kor kïmïkul, ntökïtenö kwitïta satïn mut nko angwan. 46Nyini kïtïta satïn mut nko angwan, kutegh Yeso tya lö, “Eloy, Eloy lama sapaktani?” Ato kïwaghach kïlentöy, “Tororötïnyu, Tororötïnyu, kölö ne tepïstanïn?” 47Kïlïm pikö walaka cho kighyongo otini, kïlö, “Atere köny kuröy Eliya!” 48Kurïp chi akong ompö chane kïwö kïcheng kïgh nyo lata rotïn akulut dipay cho ngwonöch akïrötyï kïröyö wal akutö tökïgha. 49Kïlö pikö walaka, “Pïstenö tökesïwena lö ngwïnöy Eliya kïsöru nyinte!” 50Kutegh ngat Yeso tya, atolapay kïngat akïma.
51Kïkarera ananka nyo kiporöy Kö pö Tororöt kïlïkwï odeny, kïngeta parak ntökwit ngwïny. Kurïngring korö akïkörerisyö ghatoy. 52Kïyotisyö parsïkontinö tïkwïl, kututu pipö Tororöt cho chang cho kikïmeghö. 53Otini kingetunö chane parsïkontinekwa, otini kikututï Yeso kïpa kïlïtöy kanasyan nyo tïlil, kïsïwa pich cho chang chane.
54Otini kisïwa wowïn pö askarin nko pich cho kimi nko nyinte kïripöy Yeso wölo kirïngringtö ngwïnya nko ngalechini kighisyö, kuwöghisyö nyoman akïlö, “Kïlechï Wero Tororöt chichï nyoman!”
55Kimi atoni korï cho chang cho kitopöno wölo low, cho kirïpuna Yeso Kalilaya, kimi chane kïpöghisyechini nyinte. 56Kimi kwenu pich Marya Makdalena nko Marya yoto ompö Yakopo nko Yosep nko yoto werpö Sepedayo.
Kakïtïp Yeso
(Mrk 15:42-47; Luk 23:50-56; Yna 19:38-42)
57Nyini kimön, kungwïna chi Arimatea nyo kile sïkön nyo kïkuro Yosep, ki chi nyo kile kinetana Yeso tïkwïl. 58Kïwechï Pilato akïsom kiwo kïror por pö Yeso. Kïmwatïta Pilato ketö nyinte. 59Kwip Yosep poray akïnonoghchï sïra nyo rel 60akulut pïrïmpenyi nyo rel nyo kitökïpölo ghat osiswechoni, atolapay kïmïlmïlchï kogh nyo wow kïkar kuketo pïrïmpon akïwechï kegh. 61Kimi atoni Marya Makdalena nko Marya nyay anka kumpuröy ato kïtopönö pïrïmponini.
Ripinto pïrïm
62Ato mi asïyechu, asispa Sapato,* kïpa tïsï cho echön nko Parisaytin* wölo mi Pilato 63#Mat 16:21; 17:23; 20:19; Mrk 8:31; 9:31; 10:33; Luk 9:22; 18:31-33. akïlenchï, “Kïmicha echotyon, kenonöy lö kimwa kiyay lïsinto kïtomö kïma lö, ‘Otutunonan meghat ompö osis sömök!’ 64Mwatïtena nyu kerip pïrïmpe lasiny ntökïtenö kuwer osiswechini le sömök atömachor kinetankachi akïlenchï pich kikututï nyinte. Yetu nyu lïsata nyo pö löt kïsir nyay pö tagh.” 65Kïlenchï Pilato chane, “Otïngetekwa ripï, ape oripsyenö lasiny le wölo omuktokwa.” 66Kïnget pïchay akïpa pïrïmponay akutö machey parakunyi akutö askaryon kïrip.
Kitutunöto Yeso
(Mrk 16:1-10; Luk 24:1-12; Yna 20:1-10)
Currently Selected:
MATAYO 27: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
