Sikaraya 9
9
Là gomongen bè nili yóm bérs 1 kól bè bérs 8. Yó htulón Dwata ke Sikaraya bè ni kem bérs ni yóm angat gotu keglaen yó kem benwu ne syudad hemgnok yó kem tau Israél. Lenwóten bè yó kem benwu fi bwak efet kól bè yó kem benwu fi leged, duhen yóm benwu Damaskus ne Tayal ne Sidon ne Askilun, ominen yóm benwu Ikrun. Yóm kdéen dù tau mowil bè yó kem benwu Flistin genlà Dwata yó, angat le baling tau Dwata se kul. Són ebè Dwata bud gónó le tmaba ne baling le sotu bung tau bud menwu bè Juda se kul.
Bè yóm kdaw keglà Dwata yó kem benwu yó, là kô genlaen du yóm syudad Jirusalim.#9:1-8 Yóm tau fen heglà Dwata yóm benwu Flistin yó, duhen Aliksandér yóm tau alì hulung mit sfatay lemwót bè yóm benwu bong yó kem tau Grik. Gotu sulék genlaen lu yóm kdê le, okóm fen tebelen yóm syudad Jirusalim. Yakà deng mon Dwata du bè bérs 8 bè yóm tsaptér ni, monen, “Kenlungu yóm dou Gónô bè yó kem sendalù mundug. Laen dù bud tólóng tau ne mogot benwu yó kem dou tau ne hemgnok kul, yó gónóhu alì mentey yóm kekdol yó kem hohon le.”
Angat ksut yóm tau hol geta mogot yó kem tau bè Sayun
9Yó bud udél Dwata, monen, “Ó kem tau bè Sayun, hol ye hligal dé.
Hol ye hligal mensag dé, kem tau bè Jirusalim.
Ngem, sut lem blóng ye yóm tau hol geta bélê ye.
Tey tedeng kmoen ne gel gemmò bè yó kem hohonen, lelen hulung heglaan,
tódô smakay kudà asnu, snakayen yóm ngà natihen.
10Bud mon Dwata, Angat gotu kóhu bè benwu Israél yó kem klitun tók gel nwit le sgida
ne angat kóhu bè Jirusalim yó kem kudà gel nwit le ebè gida
ne angat gotu genbau yó kem ngom sfatay gel nwit le ebè gida.
Yóm tau angat geta bélê ye, du se mit kenek kbenwu bè klamangen.
Yó klamang nogoten, tódô lenngeben klamang benwu ne bud lenwóten bè Él Yufratis efet kól bè són tonok.
11Lemwót bè yóm deng tehe fasadu kuy bè yóm tehe kesfasad tekuy ne lemwót bè yóm litô yóm dsù ye fen hemget du,
angat gotu hewau yó kem tau bélê ye deng negef le,
lómón kmoen bélê le lómón ke nô le lem tum sol laen dù élen.
12Ó kem tau negef, deng wen nefet nawa ye ne ni,
hol ye bud semfulék ebè yóm sana kuy benwu, yóm benwu gónón laen dù hemen ye.
Wen fasadu kuy kemdaw ni, lewu duléku he bud hulék du ebélê ye
yóm tóbóngu kuy bè ket keglayam ye.
13Yóm benwu Juda, lómón ke bohohu.
Yó hanaku, duhen Israél ne yó sudengu, duhen Jirusalim.
Lu se hesfatayu ebè yó kem tau Grik.”
14Dwata se angat hegfan ta yó kem tauhen.
Yóm kegtien yó kem hanaken, hol lómón kal ksilà.
Angat huni yóm Dwata hol dandónen geta yóm féwen mò tabahen yó kem tauhen.
Ominen mundug yó kem hohonen hol lómón ke lenos bong mbel gu leged gu bè yóm benwu là hyu menwu du.
15Fen kenlungen yó kem tauhen yóm Dwata laen dù là gbeken du ne gotu genlà le yó kem hohon le gel hmasut kul botu.
Tey angat kehsag le bè yóm kesgida le lómón kehsag yó kem tau lengel.
Gotu namà le litô yó kem hohon le, tódô molo lómón kolo litô yó kem ógóf gel dsù le,
yóm gel snilung le mò twél le ta yóm gónó demsù.
16Bè yóm kdaw yó, angat lenwaen yó kem tauhen yóm sana kul Dwata hol gónó mogot,
lómón yóm tau semgyok ubiha, sal gel lenwaen yó kem ubihahen ke wen tô hemsidek kul.
Yó kem tau Dwata yó, tódô le gotu semkyab lem yóm kun benwu, lómón kesekyab yóm botu sminang gel sù le bè kuruna.
17Ya tey angat klendey mton kul.
Angat le kemgis yó kem lomi lemnok, logi duhen libun,
lemwót bè yóm tey halay le ne tifas grép le hanà lomi.
Currently Selected:
Sikaraya 9: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
