Kem Lingón 51
51
Lingón Dabid bè yóm knihen seflifót bè Dwata#Lingón nmò Dabid kogol yóm kudél Natan du bè kalawen ke Batsiba yehen Yuraya. Yóm Natan ni, sotu tau tugod Dwata.
1Ó Dwata, lemwót bè yóm là konol
nawahem ebéléu,
hol knoduhem ou.
Lemwót bè yóm alì kkoduhem dou,
hol kóhem béléu yó kem salau.
2Hol nolobem dou yó kem sidek deng nmou.
Hol hólósem ou bè yó kem salau.
3Tódô tngónu, Dwata, yó kem gónóhu gemsalà béléem.
Là kóen mkó bè nawahu yó kem salà deng nmou.
4Béléem nim gónóhu gemsalà ni,
deng gmou yóm kenbéem.
Yó gónóm mon, là kóen sidek ke hensalaem ou.
Bong knóón ke tnafakem ou.
5Tódô mung bè ksutu yóm óyóu mò sidek.
Nbuten bè keblolu yê dou,
eles nô béléu yóm óyô mò sidek yó.
6Okóm yó gel sen-galuhem béléu yóm klaen dù kéngu lemwót bè kedket nawahu ebéléem,
Ke yó se kóyóem béléu, Dwata,
tolokem dou sen yóm khulung hedem lemwót béléem.
7Hol kóhem dou salau anì balinge mólós.
Hol denyohem ou anì laen dù bud usingu, balù udì.
8Bud hulékem ebéléu dé yóm dou kligal.
Lómó kegnómu du ni,
lómón ke deng lenunahem ou,
ne lómón ke denge mesfu.
Bede tngónu gbekem bud hulék du ebéléu yóm kligalu.
9Béem bud snolò ne yó kem salau.
Gotu kóhem yóm kdéen sidek tonem béléu.
10Ó Dwata, suem béléu yóm nawa laen dù belenen.
Bud hnomihem dou kehedemu,
ne blayem dou yóm là konol nawahu ebéléem.
11Béem hdó ou bè soluhem.
Béem kó béléu yóm kóm Tulus.
12Hulékem ebéléu yóm kligal lemwót bè yóm tehe kehewaem dou.
Hol benlayem ou óyô mimón kóm.
13Ke yó se nmoem béléu, angat toloku yó kem kóm hlau bè yó kem tau gemsalà.
Nénégem kà angat le semfulék ebéléem.
14Ó Dwata yóm gel lemwà dou, hol hnifótem ou bè yóm tey litô deng hdanagu.
Ke yó se nmou, hligale mutóm du bè sngal yóm kehlifótem salà.
15Hol benlayem ou khulung mudél, Dwata,
anì hol dóyónu uu.
16Là kóen gsengel nawahem du
ke olohu demsù ebéléem mò bayad salau.
Senged se yóm dsù gel hkekeb me ebéléem,
là kóen gsengel nawahem du.
17Yó dé henged mò dsuu ebéléem, Dwata,
duhen yóm hol keheglaanu béléem.
Là kô nam e kenbê du yóm tau
ke heglaanen knóen ne hegsel bè salaen.
18Ó Dwata, hol tnóbóngem mi kem kóm tau bè kóm benwu bè Sayun.
Bud hefdaem yóm beng hmilol Jirusalim.
19Ke yó se kmoen, angat tey kehyu nawahem du
ke wen gel dsù me ebéléem.
Senged se yóm dsù gel hkekeb me,
tey kehyu nawahem du.
Ne angat wen kem safì tudu gel dsù me ebéléem snéen.
Currently Selected:
Kem Lingón 51: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
