Kem Lingón 46
46
Lingón bè yóm knô Dwata bélê tekuy#Yóm Lingón 46 ni, sotu bud lingón yó kem sfu Kura.
1Són Dwata yóm gónó tekuy e mlo,
ne béléen gónón lemwót yóm kgis tekuy.
Anien ke wen gfà sut bélê tekuy,
eles nô bè yó se kun mò tmóbóng kut.
2Duhen yó, hol bê tekuy abay hlikò,
anien ke sut linol bong megsinsig klamangen benwu,
ne ke gotu stunal elem mohin yó kem bulul.
3Baluen ke alì sidek kewók yóm mohin,
mung du yóm tey lungkulen,
ne baluen ke gotu megsinsig yó kem dumu bulul lemnek,
hol bê kuy abay hlikò.
4Ditu bè syudad Dwata, wen él mlel lemen,
gel mit kligal lem yóm kun benwu.
Bè yó se gónón nô yóm kun Gónô Dwata
yóm Dwata hol dandónen geta bè kdéen.
5Bè yóm syudad yó, yó se kun gónó nô Dwata,
ne laen kô gembek gembà du yóm kun benwu.
Hanà hlafus deng sana sut na a tmóbóng.
6Okóm yó kem tau bè dumu benwu, tey sidek klikò le
bè yóm kehsinsig Dwata yóm klamangen benwu.
Heték Dwata, ne tódô kmanas yóm tonok.
7Nô bélê tekuy yóm Dwata laen dù là gbeken du,
yóm Dwata hol gónó tekuy mogot.
Du se yóm Dwata tehe Jakub,
ne du se mò gónó tekuy e mlo.
8Géhél ye dé, nénég ye yóm deng nmò Dwata.
Nénég ye yóm tey tennga nmoen te tonok.
9Tenfloken yó kem tau sgida bè klamangen benwu.
Gotu tenfoken yó kem boho le,
ne hensideken yó kem buyus le.
Gotu nlóben yó kem klung le.
10Yó udélen, monen,
“Henek ye ne anì tngón ye ou se Dwata.
Ou se yóm hol dandónen geta bè kdéen tau,
yóm hol dandónen geta bè klamangen benwu.”
11Nô lem blóng tekuy yóm Dwata laen dù là gbeken du.
Du se yóm Dwata tehe Jakub, ne du se gónó tekuy e mlo.
Currently Selected:
Kem Lingón 46: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
