Kem Lingón 44
44
Lingón yó kem sfu Kura
1Ó Dwata, deng hol kum klingu se
mungol
du yóm tehe tulón le kum yó kem fù me,
duhen yóm kdê deng gendengem bè yóm tehe kul kdaw ekni.
2Yóm deng gotu kehdóhem yó kem tau là hemtahu béléem ta yóm kul tonok
anì blayem bè yó kem fù me yóm tonok le.
Gotu genlaem yó kem hohon yó kem fù me,
okóm kul yó kem fù me yó, fen hbegelem lu.
3Ke mlan bè sudeng yó kem fù me,
là kô guta le du yóm tonok yó.
Yóm kegmò le, là lemwóten bè kekgis le,
okóm mlan bè yóm tey kegbekem.
Yó gónó le gemmò, hol lemwót bè yóm kbong nawahem kul
ne bè yóm kehyu nawahem ebélê le.
4Uu se yóm Hol Geta, ne uu se dou Dwata.
Deng oluhem eta me kem sfu Jakub yóm kegmò me.
5Mlan bè kfasangem gónó me gembek mlo kul yó kem hohon me.
Mlan bè boluyem gónó me gembek mdà kul elaan.
6Là kô snaligu du bohohu.
Là kô snaligu du sudengu ke mò lemwà dou.
7Okóm uu se, Dwata, hegmò kum bè yó kem hohon me.
Uu se hemyak yó kem tau kmutó nawa kum.
8Ó Dwata, senflós me tendo dmóyón kóm.
Laen kô dù tul sónen yóm kdóyón me yóm kóm boluy.
9Okóm ni, deng mom kenbéem mi, ne heglaanem mi.
Là bud nalakem kul ne yó kem sendalù me ebè gida.
10Là bud hegmoem kum bè yó kem hohon me,
ne deng lusem lu anì negef le yó kem kimu me.
11Lómón kmoem kum, lómón ubiha mò tnétê.
Deng gotu senklahem mi ebè yó kem tólóng benwu.
12Mi kem kóm tau,
lómón ke deng hbaluem mi glaan ne laen kô dù bud btes me.
13Deng ton yó kem benwu hmilol kum yóm nmoem bélê me.
Yó gónó le semdekà kum, lel le kmuli kum.
14Deng nmoem mi mò utóm yóm gel knuli le.
Deng me baling hennê yó kem tau bè klamangen benwu.
15Tódô knoyungen kdaw yóm tendo kyaku,
là kô bud gbeku temngel ebè kem dumuhu
16lemwót bè yóm udél le tendo hemyak dou
ne hemnê dou yó kem hohonu móyô meles dou.
17Gbunù me nim ni igò me sem là deng kmifót kóm.
Là sem deng nulé me du yóm deng senfasad tekuy.
18Là kô knogol me kóm.
Là se deng senya me du yóm kóm lan.
19Okóm deng genlaem mi bè yóm benwu laen hol wen tauhen.
Tódô bayaem mi bè yó lem yóm tey kifu mget.
20Ke deng knogol me Dwata,
ne ke deng me mból hólól mni ebè yó kem tólóng dwata,
21kaem deng tngón Dwata ne,
yakà gotu tngónen du yóm kdê nô lem but blutut tau.
22Okóm lemwót bè yóm klolò me kóm, Dwata,
gónó le tendo tô hmatay kum ket kdaw.
Hol me mkél bè yóm ubiha gel hnatay le.
23Btiki, Dwata. Moen du ke tlek kóm tungô?
Géhéli btik. Béem abay kenbê mi laen dù tul sónen.
24Béem abay henbnos mi.
Béem abay tódô klifót yóm tey keglayam me ne yóm kehegnok le kum.
25Deng me tódô masà lem kfung,
tódô me lemokob te tonok.
26Yó ne, Dwata, géhél tnóbóngem mi.
Lemwót bè yóm là konolen yóm kbong nawahem kum, géhél lenwaem mi.
Currently Selected:
Kem Lingón 44: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
