Flipay 4

Kehlau Pol kul

1Duhen yó, kem dumuhu setwoli, tey kogot nawahu ebélê ye, ne tey khahuu kuy. Lelen tey wen gónó ye hefligal do, ne tey kehyu nawahu du yóm gel kmò ye. Ke lolò ye ni kem tulónu kuy ni koni, kem dumuhu sogot nawa, ni se gónón mbegel yóm klolò ye du yóm gónó tekuy mogot.

2Ni wen udélu ebè yó kem lewu libun Iyudiya ne Sintika. Yó hol kóyóu bélê ye ke géhél ye sotun lemwót bè yóm kesetwoli ye bè yóm gónó tekuy mogot. 3Ne uu snéen, Wè, yóm tau là monol nawahen tmóbóng dou, yake uu hol tmóbóng kul anì géhél le sefyu. Tey tehe khotu le nawa le tmóbóng do ekni bè yóm kehbólu yóm Tulón Hyu. Tehe le gel mung ke Klémén ne yó kem dumu gel tmóbóng dou. Yóm kul boluy deng gotu nô bè yóm bok Dwata, duhen yóm bok lowil.#4:3 Yóm bok lowil monen yó, yó se yóm bok gónó le smulat du ditu bè longit yóm boluy yó kem tau gmuta du yóm klowil laen dù sónen.

4Hol ye tendo gel hligal dé lemwót bè yóm deng kessotu ye bè yóm gónó tekuy mogot. Bud nulitu bélê ye yóm monu yó koni, hol ye gel hligal dé. 5Hol hen-ganag ye nawa ye bè yóm kdéen tau. Móyónen kól ne yóm gónó tekuy mogot.

6Béen gel tafa nawa ye balù kihu gel sut bélê ye. Okóm bè yóm gel kni ye bè Dwata, gotu hni ye béléen yóm wen mu ye du. Ne eles hmung ye du se yóm gel kdóyón ye du. 7Ke ni se gel nmò ye, gnóm ye yóm kenek nawa lemwót bè Dwata. Yóm kenek nawa yó, là gbek tekuy hmingón du yóm mò kmoen. Ke deng gnóm ye, là kóen bud sbeweg ne kehedem ye, baling menek kegnóm ye du lemwót bè yóm deng kessotu ye bè Krays Jisas.

8Ni mò sónu du bélê ye, kem dumuhu setwoli. Yake hol sù ye lem hendem ye dé yóm hyu, ne yóm knóón bang dóyón. Tey hyu ke són gel hendem ye yóm tahu ne yóm tedeng ne yóm mólós, ne yóm minggel ne yóm knóón nadat. 9Hol gel nmò ye yó kem deng dnalang ye lemwót bè yóm deng gungol ye ne yóm deng ton ye béléu. Ke yó se nmò ye, hlós nô bélê ye Dwata, yóm tendo henek nawa tekuy.

Keslamat Pol bélê le bè yóm tóbóng hwit le ebéléen

10Lemwót bè yóm kessotu me yóm gónó tekuy mogot, tey bong kligalu bè yóm tóbóng ye bud sut béléu. Tngónu yóm gónó ye là géhél hemwit ebéléu, là lemwóten bè yóm là kehedem ye do, okóm lemwót bè yóm klaen dù lan ye hemwit du ebéléu.

11Là kô yó du gónóhu mon du yó koni ke mone gónóhu tmulón du kuy yóm kélélu. Deng hónô dnalangu dou yóm kegsengel nawa balù kihu nô béléu. 12Deng kem hónô lanu ne dou yóm élél, ne deng lanu se yóm kwen gónóhu wen. Deng dnalangu ne dou nim kegsengel nawa ni, balù kihu gónóhu nô, ne kihu kdaw. Gsengel nawahu ke gemtuhe duhen ke bitile, ke wen gónóhu wen duhen ke éléle. 13Laen dù là gbeku du lemwót bè yóm kfasang Krays béléu. 14Okóm tey hyu se yóm kwen hwit ye ebéléu bè yóm igou glayam.

15Deng hónô tngón ye se kuy, yu kem tau bè Flipay, yóm le kuléku gu dyó bè kuy prubinsya Masdunya bè yóm tehe kbutu tmolok lem blóng ye yóm Tulón Hyu, sónen yu se yó kem hemtahu bè yó gel tmóbóng dou. Laen kô dù dumu tau fen tmóbóng do bè filak, són sem yu. 16Bè yóm tehe kwen gónóhu élél bè yóm tolo knóu bè syudad Tisalunika, là olon tek sulék du yóm tehe kehwit ye tóbóng ebéléu.

17Là kô yó du sen-galuhu ke hol gel wen blay ye dou, okóm yó hol sen-galuhu ke temnù yóm ofol blay Dwata kuy.

18Duhen yó, ni sii mò lesibuhen yóm kdê deng blay ye do, botong wen lukasen béléu lemwót bè yóm blay ye do yó. Laen kô dù hendeenu ni kmoen ni lemwót bè yóm blay ye dou hlan ye bè Ipafruditus. Ni kem blay ye dou ni, hol lómón yóm gel dsù le alì minggel boohen gel blay le ebè Dwata, yóm dsù gel henmóyóen, ne yóm gónón gel hyu nawahen. 19Ke Dwata kun, lemwót bè yóm tey kendengenen, gotu blayen kuy yóm gónó ye élél hlanen bè Krays Jisas. 20Hol bê tekuy abay nmò sónen yóm kdóyón tekuy ke Dwata yóm Mà tekuy.

Hol són udél Pol ebélê le

21Tey gel kólómu kul yó kem kun tau Dwata bè yó, yó kem tau deng nfun Krays Jisas. Dalang se ni kem dumu tekuy setwoli bè ni, tey gel kólóm le kuy. 22Tódô kdê ni kem tau Dwata bè ni, tey kul kólóm kuy snéen, hol néen ni kem tau mò nmò bè yóm gónô bong yóm tau hol geta bè klamangen.

23Yó hem gónó tekuy mogot Jisas Krays hol tendo tmóbóng kuy.

Currently Selected:

Flipay 4: tbl

Highlight

Copy

Compare