Lista 27
27
Là gomongen bè nili yóm bérs 1 efet kól bè bérs 11. Tulónen yóm kmò kessólól le yóm tonok le bè yóm dumu le setwoli laen dù ngaen logi.
Kélék Dwata ke Juswa mò tles Musis
12Yó udél Dwata ebè Musis, monen, “Mnegedi eta tfusù yóm bulul Abarim, tenngelem bè yó tahen yóm tonok blayu yó kem tau Israél. 13Ke deng tonem tahen yóm tonok yó, bang katayem ne lómón yóm twoguhem Aron 14abay se là nimón ye du yóm lewu ye yóm hlolou kuy bè yóm knô ye bè benwu laen hol wen tauhen boluyen Dsin. Bè yóm tehe ktalaw le ebéléu yó kem tau Israél ditu bè Miriba, là kô dog hdilô ye du lem blóng le yóm klaen dù belenu.” (Yóm Miriba yó, boluy yóm sfut él bè benwu Kadis nô bè yóm benwu laen hol wen tauhen boluyen Dsin.)
15Omin Musis mni bè Dwata, monen, 16“Ó Dwata, yóm dou gónó mogot. Uu se gónón lemwót yóm kdéen mowil. Mnihe béléem anì méléki sotu tau mò hlós malak kul ni kem tau ni, 17yóm tau gbeken malak kul ebè gida anì là mkél le bè yó kem ógóf laen dù malak kul.”
18Yó balà Dwata ke Musis, monen, “Nwitem Juswa yóm ngà Nun. Du se sotu tau gónón nô yóm dou Tulus, nnokem ta kuluhen. 19Hdaem bè solu Ilisar yóm tau gel blóng ebéléu ne bè solu yó kem tau Israél. Bè yó bè solu le heglalagem bélê le Juswa yóm mò tlesem. 20Blayem du dumu yóm kóm kwalis anì nimón yó kem tau Israél. 21Bè yóm angat kalaken tau, ke móyô temngón du yóm dou kóyô nan hol mlan bè Ilisar yóm tau gel blóng ebéléu, yóm fen gel temngón du yóm dou kóyô mlan bè ketngelen du yóm Urim ne Tumim.#27:21 Yóm Urim ne Tumim monen yó, lewu botu kufil bede lemnek gel nwit yóm tau blóng ebè Dwata. Nim lewu botu ni kun, wen ilô nô tahen ne wen se ilô nô laanen. Yó tulón yóm sotu ilô, nóyô Dwata yóm snólók le béléen. Ne yó tulón yóm sotuhen, là móyóen du Dwata yóm snólók le béléen. Ke wen snólók le bè Dwata, yó nmò yóm tau blóng ebè Dwata, tudaen eta yóm lewu botu yó ne bè yóm kebtang le elaan, bè yó gónón temngón du yóm kóyô Dwata bélê le. Bè nim nmò Juswa ni, Ilisar fen gel tmulón du ne bè yó kem tau Israél yóm mò gel nmò le.”
22Tahu se, nmò Musis yóm hlolò Dwata du. Hdaen Juswa bè solu Ilisar yóm tau gel blóng ebè Dwata ne bè solu yó kem tau Israél. 23Nnok Musis ta kulu Juswa ne heglalagen bélê le, Juswa mò tlesen hol lómón yóm deng mon Dwata mò du.
Là gomongen bè nili yóm tsaptér 28 kól bè tsaptér 30. Yó tulónen yóm hlolò Dwata yó kem tau Israél bè yóm gel kbad le du ne yóm gel dsù le ebéléen, ne yóm bud gel blay le du sentahen. Bud tulónen bè ni snéen yóm kmò le du ke wen fasad le ke Dwata.
Currently Selected:
Lista 27: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
