Lista 23
23
1Yó mon Balaam mò ke Balak, “Moi bè ni hitu gónó demsù ebè Dwata bede hono botu sensodoem. Ne miti dou edini hitu safì tudu ne hitu se ubiha logi.” 2Tahu se, gotu nmò Balak yóm hmò Balaam du yó. Lewu le Balaam Balak demsù ebè Dwata sotu safì tudu ne sotu ubiha logi bè ket yó kem gónó demsù yó koni.
3Omin Balaam mon du mò ke Balak, “Mdai bè ni, nunungem nim dsù hkekebem ebè Dwata ni. Ne fene hlayuk udì bè tuu dou naw hnénég ke ston do Dwata duhen ke là. Angat gotu tulónu kóm kdeng yó kem tulónen dou.” Tahu se, tek sotu Balaam mógów etu ta yóm ngà bulul 4ne bè yó gónó Dwata semlong du. Yó mon Balaam mò ke Dwata, “Deng wen hitu gónó demsù hmou ne denge se semket demsù ebéléem sotu safì tudu ne sotu ubiha logi.”
5Ne gotu tulón Dwata ke Balaam se yó kem mò htulónen du bè Balak ne ominen hulék ke Balaam etu bè Balak. 6Tahu se, bè yóm kulék Balaam sana tolo kdà Balak klohok yóm dsù hkekeben ebè Dwata, mung le mdà bè yó se kul yó kem tau genlal bè Muab. 7Yó udél htugod Dwata ke Balaam, monen,
“Yó hfangay do lemwót bè Sirya, gu bè yó kem bulul fi dmata kdaw duhen Balak yóm tau hol geta bè Muab.
Yó tinoken ebéléu, monen, ‘Nam mógów do edini, nam mudél do. Henmulaem lu do yó kem tau Israél.’
8Blaem tedu se tô kehmulau kul du yó kem tau là henmulà Dwata kul?
Ne tedu se kmò ktuledu kul du yó kem tau là tnuled Dwata kul?
9Lenwótu ta yó kem léhék geta, gotu tonu lu.
Tenngelu lu lemwót gu ta yó kem ngà bulul.
Lu se sotu but tau htólóng Dwata bè yó kem dumu tau.
Tódô tngón le yóm deng kehetfing Dwata kul bè yó kem dumu tau.
10Yóm kul sfu yó kem tau Israél, hol lómón kwen le kfung.
Tey kwen le, botong là gbekem msó kul.
Ke hgesónem yóm dou klowil, Dwata, yake heskélem bè kgesón klowil yó kem kóm tau.
Uu he hol bemlay do kenek nawa bè yóm katayu lómón yóm katay yó kem tau tedeng nmò le.”
11Omin Balak hebkó mudél ebè Balaam, monen, “Moen du ke lómón ni nmoem béléu? Yó gónów hangay kóm anì nam e henmulà lu dou yó kem hohonu. Okóm deng mom yó nmoem, deng mom nuyagem lu.”
12Okóm yó balà Balaam du, monen, “Olohu tmulón yóm htugod Dwata do.”
Yóm gewu htugod Dwata ke Balaam
13Omin Balak bud mon du mò ke Balaam, “Budi mung dou bè yóm dumu gónón mfatu, bè yóm seblà bud gónóm mton yó kem tau Israél bede olon dumun yóm tonem. Henmulaem lu dou bè yó.” 14Omin Balak mit ke Balaam etu bè gónó mò hulu Sufim bè ta tfusù yóm Bulul Pisga. Ne bud wen hitu gónó demsù hdà Balak bè yó ne senket densuen ta le sotu safì tudu ne sotu ubiha logi.
15Yó bud mon Balaam mò ke Balak, “Mdai bè ni, nunungem nim dsù hkekebem ebè Dwata abay se naw ston ke Dwata bè tuu.”
16Tahu se, ston ke Balaam Dwata ne gotu tulón Dwata du yó kem mò tulónen. Omin Dwata hulék du ebè Balak anì tulónen du yó kem deng htulónen du yó koni.
17Tahu se, mulék Balaam ne tonen sana tolo kdà Balak klohok yóm dsù hkekeben ebè Dwata, mung le mdà bè yó se kul yó kem tau genlal bè Muab. Omin Balak smólók du bè Balaam ke tedu yóm deng mon Dwata mò du.
18Yó htugod Dwata ke Balaam, monen,
“Hlonihi edini, Balak yóm ngà Sipur.
Hol hnungolem yóm tulónu kóm.
19Yóm Dwata kun, là kóen mkél bè tau gel mò kéng.
Là mkélen bè tau gel mesfili kehedemen.
Ke wen fasad Dwata, sal gel dnohoen.
Ke wen udélen, sal dohò.
20Yó hmoen do mò fen gel muyag.
Yóm Dwata ke wen tau nuyagen, là kô gbeku temles du.
21Yó kem tau Israél, deng eles tonu yóm angat tey kehyuhen yóm kul klowil elem hulin kdaw ne laen dù sidek angat glumfak le.
Tendo seflós nô bélê le yóm sana Dwata hol kul gónó mogot.
Ne deng gel heglalag le se kul, Dwata yóm geta bélê le.
22Deng nit Dwata lu hewà gu bè Idyip.
Du se mò mit sfatay bè yó kem hohon le, hol lómón ke safì tudu alì sidek klóbóen.
23Ni kem tau Israél ni, laen kô dù tau gembek hemmulà kul, laen kô dù gmò le bélê le yó kem tau demwata.
Ne nim kmoen ni, yó mon yó kem tau gbak ebè yó kem tau Israél,
‘Tenngel ye dé yóm deng nmò Dwata bélê le.’
24Yó kem tau Israél, hol lómón ke yóm liyun alì lóbô.
Là kóen tagad hegnô ke là nan wen kenfóen ne gotu nséken ne nimuhen litóen.”
25Omin Balak mon du mò ke Balaam, “Kihu se ke là móyói hemmulà kul yó kem tau Israél syan ke hol béem abay nuyag lu.”
26Yó balà Balaam du, monen, “Igou sem deng mon du mò kóm, olohu mò yóm hmò Dwata do.”
Yóm getlu htugod Dwata ke Balaam
27Yó bud mon Balak mò ke Balaam, “Budi mung dou ebè yóm dumu gónón gedwóng. Déke bè yó gónó Dwata móyô anì henmulaem lu dou yó kem tau Israél.”
28Tahu se, nwiten Balaam ete tfusù yóm Bulul Piyor yóm bulul gedwóng eta yóm benwu laen hol wen tauhen. 29Yó mon Balaam mò ke Balak, “Budi hemdà dou bè ni hitu gónó demsù ne miti do edini hitu safì tudu ne hitu ubiha logi.” 30Tahu se, gotu nmò Balak yóm hmò Balaam du ne semket demsù ebè Dwata na sotu safì tudu ne sotu ubiha logi ta yó kem gónó demsù yó koni.
Currently Selected:
Lista 23: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
