Lista 1
1
Kwen yó kem tau Israél bè yóm tanay klista le kul
1Bè yóm gewuhen halay kogol yóm kehewà le gu bè Idyip yó kem tau Israél, hanà le tolo nô bè yóm benwu laen hol wen tauhen boluyen Sinay. Bè yóm tanay kdaw bè yóm gewuhen bulón, bud mudél ebè Musis Dwata ditu lem yóm Gónô gónóhen gel nô lem blóng le, monen, 2“Gotu lista ye lewu ye Aron yóm kdéen tau Israél. Yó kmò klista ye kul, hewót ye bè ktol le ne bè fes lówó le. Gotu lista ye boluy yóm kdéen logi 3deng lewu folò halayen duhen ke deng mukas, yó kem logi deng gbek le mung bè sendalù. 4Bè ket ktolen, mélék ye bélê le sotu tau gónó le gel galak mò tmóbóng kuy.”
Là gomongen bè nili bérs 5 efet kól bè bérs 16. Hono boluy yó kem sfolò lewu tau nélék le mò tmóbóng kul le Musis ne Aron lemista yó kem tau Israél. Ni kem sfolò lewu tau nélék le ni, hono tau gónó le gel galak lemwót le bè ket ktol yóm sfolò lewu kem ngà Jakub logi.
17Tahu se, lemwót Musis lewu le Aron ne yóm sfolò lewu kem tau deng nélék le mò tmóbóng kul, 18gotu sentifun le yóm kdéen tau Israél bè yóm tanay kdaw bè yóm gewuhen bulón. Yó gónó le gotu semtifun kul anì gotu le hsulat boluy ne bè yóm kehsulat le, hlan le bè ktolen ne hlan le bè fes lówó le. Ne yó nmò le bè yóm kdéen logi lemwót bè lewu folò halayen duhen ke deng mukas, gotu lista le lu ne gotu nsó le lu 19lómón yóm deng hlolò Dwata ke Musis. Bè yó bè yóm benwu laen hol wen tauhen boluyen Sinay gónó Musis mò du nim ni. 20-46Yó kem logi deng lewu folò halayen duhen ke mukas, yóm deng gembek mung bè sendalù, gotu hsulat le boluy le bede sal mlan bè ktol le ne bè fes lówó le. Yó kmò klista le kul lenwóten bè ból Rubén yóm ngà Jakub twogu. Ni se kwenen yóm kdéen logi lista le. Kwen logi lemwót bè ket ból le:
| Rubén | 46,500 |
| Simyun | 59,300 |
| Gad | 45,650 |
| Juda | 74,600 |
| Isakar | 54,400 |
| Sibulun | 57,400 |
| Ifraim | 40,500 |
| Manasi | 32,200 |
| Bindyamin | 35,400 |
| Dan | 62,700 |
| Asér | 41,500 |
| Naftali | 53,400 |
Yóm kwen le 603,550.
47Bong kul yó kem sfu Libay, là dog homong snulat le boluy le 48abay se deng mon Dwata mò ke Musis, 49“Ke snulatem boluy yó kem logi deng kóyów kmung le bè sendalù, hol béem homong lu kul yó kem sfu Libay. 50Yó hmoem kul, lu hogotem du yóm Gónô gónóhu nô lem blóng ye ne kdê yó kem ngom nô lemen. Bè yóm gel kógów ye, sónen lu mit du dalang se kdê yó kem ngom nô lemen. Ke bud hdà ye, sónen lu snéen bud hemdà du ne bud mò nmò lemen. Bè ket gónó ye kmamfù hol fi bè yóm dou Gónô, gónó le hemdà du yóm kul gónô. 51Kesok gel nili ye yóm gónó ye kmamfù, yó kem sfu Libay fen gel lemkas du yóm dou Gónô ne bud hemdà du bè yóm lomi gónó ye bud kmamfù. Ke wen dumu tau hloni bè yóm Gónóu yó, tódô hnatay kmò du. 52Lemwót yó kem dumu tau Israél, ke hdà le yóm kul gónô, ket ból yóm sfolò lewu kem ngà Jakub tódô le sbung honon lu ne ket kul na sotu wen flag hdà le eta mò ilô le. 53Bong kul yó kem sfu Libay hol fi bè yóm dou Gónô, gónó le seblà hemdà du yóm kul gónô anì bnentey le, anì laen dù dumu tau hloni edu mò gónóhu tmafak kul yó kem tau Israél.”
54Tahu se, gotu nmò yóm kdéen tau Israél yóm deng hlolò Dwata kul hlanen bè Musis.
Là gomongen bè nili yóm tsaptér 2. Tulónen yóm kmò gel kkamfù le hilol yóm Gónô Dwata yó kem tau Israél ekni. Bè yóm gel kkamfù le, tódô sbung yóm hono kul ból yóm sfolò lewu kem tehe ngà Jakub ekni.
Currently Selected:
Lista 1: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
