Juwél 2

Yóm ilô yóm angat glumfak tau bè yóm hol kun kdaw Dwata

1Huni ye yóm féw bong eles hetgama tau bè Jirusalim.#2:1 Yóm féw bong huni le yó, nmò le lemwót bè hanga safì duhen ke bè hanga kambing logi. Huni ye ta yóm dou bulul. Yake gotu ye kenkel kem tau mungol du, lemwót bè klikò ye, abay se móyón kól ne yóm kun kdaw Dwata, bè ktahuhen deng mdulen ne. 2Hol kdawen gmeeb kifu, kdawen mfól lobun ne mget kifu. Tódô muluk yó kem tey kwen le. Botong tódô baling kmifu ta yó kem bulul bè yóm ksut le. Laen deng hnikót sut he bè yóm kdaw gna ke lómónen ni ne laen se dù bud sut elem hulin kdaw.

3Hol lómó kmò le hol lómón kken ofi. Tukô gna le, hol lómón ktiloben hungul Idin ktonem du. Okóm tukô huli kul deng tódô mló, laen kô dù tonem tebel. 4Lómó ktonem kul hol lómón ke kem kudà. Ne yóm alì kehlóng le hol lómón ke yó kem kudà alì hlóng klóy le gel nwit le bè gida. 5Tenngel ye dé yóm kehkak le gu ta yó kem bulul. Hnungol ye yó kem uni lendel yó kem klitun tók nwit le bè gida ne hol lómón ke kodok ofi mken lami, duhen ke lómón lendel yó kem tey sendalù wen mit sgida.

6Bè yóm ksut le gotu le likò yóm kdéen tau, botong le lemusék. 7Tódô le muluk hol lómón ke kem sendalù alì hulung mit sgida. Gotu le mkaf bè beng hol lómón kkaf yó kem sendalù. Tódô le hekteng mógów, là kô le sekla. 8Là kô le segló bè kem dumu le, tódô sotu kun hekteng mógów. Anien ke wen seng bè lan le, sana kegehlós le. Laen kô dù bang gembek hemseng kul. 9Tey ketlasik le husek elem yóm syudad, gotu le hkak ta yó kem bengen. Gotu le mkaf elem yó kem gónô, mlan le tembó beng lómón khusek tau mnagaw.

10Bè yóm kógów le, tódô megsinsig tonok ne mningkil longit. Tódô baling kmifu yóm kdaw ne bulón ne là kô le bud mnóng yó kem blotik. 11Bè yóm igò Dwata malak kul, tódô mensag. Ya tey kwen le yó kem nwiten ne gotu nimón le yóm kdê dóken kul. Tey kenyó yóm kun kdaw Dwata, ne tey sidek. Tau du de gembek hembala du yóm kdaw yó?

Udél Dwata ebè yó kem tau anì hegsel le.

12Ni se udél Dwata, monen, “Balù yó hem igoen tolo wen dù kdaw, hotu ye nawa ye semfulék ebéléu mung du yóm kfasting ye ne kkik ye ne klangag ye. 13Hol hton ye yóm klangag ye, bede béen mlan bè keksê ye nes ye. Yake bè kebà nawa ye gónó ye hton du.” Bud ye semfulék ebè yóm sana kuy Dwata hol gónó mogot abay se wen nawahen tmóbóng kuy ne tey hulung kmodu. Là kóen mahil lembut ne tey bong nawahen tau. Móyô hmifót, abay se là nóen bè nawahen ke tô tnafaken tekuy. 14Ke semfulék ye ebéléen, déke là hendohoen du yóm tô nmoen bélê ye ne mom bud tnóbóngen yu, hwenen tbas ye ne tifas grép ye anì wen bud blay ye ebéléen yóm sana kuy Dwata hol gónó mogot.

15Huni ye yóm féw bong taba tau bè Bulul Sayun. Heglalag ye bélê le yóm sotu kdaw htólóng ye mò kdaw ye fasting mni ebè Dwata. Htaba ye yóm kdéen tau na ye gotu stifun tmaba ebè Dwata. 16Sentifun ye lu yóm kdéen tau. Eles tulón ye kul anì eles le hólós. Nwit ye yó kem tuha tau ne yó kem ngà kkólen bè yó kem hanà tolo tmutù. Balù yó kem tau lomi syehen na le tebel yóm gónó le nô anì mung le se kul. 17Yó kem tau gel blóng ebè Dwata, mdà le lem blóng yó kem tau ne yóm gónó demsù ebè Dwata igò le mkik. Yó hni le, mon le, “Ó Dwata, hol knoduhem mi yó kem tauhem. Béem nmò mi tau mò sendekà yó kem tólóng tau bè dumu benwu ke mon le, ‘Na, nô se Dwata le du? Déke là gbeken tmóbóng kul.’ ”

Kfasad Dwata yóm kehdóhen yó kem tlangas

18Ne yó bud hendem Dwata yóm tonoken ne yóm bud kkoduhen yó kem tauhen. 19Yó balaen yóm hni le, monen, “Ngem, bud henwitu yu halay ne tifas grép ne hnolo ulib ne angat tey gsengel nawa ye du. Là bud ye tau gel sendekà yó kem tólóng tau bè dumu benwu. 20Angat kóhu lem blóng ye yó kem tey lememek lemwót fi gu bwak, gotu dkolu lu mayuk ebè tum benwu là hyu menwu du. Yóm lumbuk le tukô gna, gotu dkolu ebè Mohin Héét. Yóm lumbuk le huli, dkolu ebè Mohin Miditiranyan. Tódô lenngeben nim benwu ni yóm boo bolok le.”

Tahu se, tey bong hentaw yóm deng nmò Dwata. 21Ó tonok, béi abay bud hlikò ne. Holi hligal abay se tey bong hentaw yóm deng nmò Dwata. 22Ó kem ógóf lem bnes, béen bud mónó nawa ye, abay se deng nbuten bud gulék yó kem bnes. Angat le gotu bud mungu yó kem koyu ne angat bud gengón yó kem bungu fig ne kem bungu grép. 23Ó kem tau bè Jirusalim, hol ye hligal se kuy. Hnigal ye yóm sana kuy Dwata hol gónó mogot. Yóm kulón hwiten ebélê ye mò gónón hegfan du yóm nawahen kuy. Angat bud hwiten ebélê ye yóm kulón geblà bè yóm kdaw ye mulu ne yóm kulón geblà bè yóm kdaw ye muta, lómón yóm gnan. 24Bè yóm gónó ye kmusu, angat tey sigang bong ye myón bè yó, dalang se yóm gónó ye hemyu tifas grép ne hnolo ulib, angat tódô lembés.

25Yó udél Dwata, monen, “Angat bud huléku ebélê ye yó kem hulu ye deng namà yó kem tey tlangas mfól lem yóm hilu halay. Ou se tehe hemwit du ebélê ye yó kem tey tlangas mfól alì hmayam kuy yó. 26Angat tey bud kóyów yóm ken ye ne gotu ye gemtu du. Ne angat bud dóyón ye yóm sana kuy Dwata hol gónó mogot, yóm deng mò du bélê ye yó kem tey hentaw ni. Ne laen dù bud gónó le myak ne yó kem dou tau elem hulin kdaw lómón yóm gfà le ni. 27Bè yó ne gónó ye angat temngón du yóm tendo knóu bélê ye kem dou tau Israél, tek són ou yóm sana kuy Dwata hol gónó mogot. Laen dù bud gónó le myak ne yó kem dou tau elem hulin kdaw lómón yóm gfà le ni.”

Kfasad Dwata yóm kehewaen yó kem tauhen bè yóm kdaw kkukumen tau

28Yó bud udél Dwata, monen, “Kogolen bè yó, gotu suu bè kdéen tau yóm dou Tulus. Yó kem ngà ye logi ne kem ngà ye libun, angat le baling tugodu. Yó kem tuha bélê ye, angat wen heknahu kul. Yó kem logi lomi lemnok, angat wen htonu bélê le. 29Bè yó kem kdaw yó, balù yó kem tóbóng lówó ye kewóten bè logi ne libun, angat suu bélê le yóm dou Tulus.

30Angat tey wen hentaw ton nmou bè longit dalang se dini talak tonok. Angat wen litô ne ofi ton ye, mung du yóm tey kebelen tódô mbob etta. 31Gu laanen là deng sut yóm kdaw alì knikò yó, yóm kun kdaw Dwata, angat baling kmifu yóm nóng kdaw ne yóm bulón angat tódô baling tógó hulô, lómón khulóen litô. 32Yó se htóbóng bè boluy yóm sana Dwata hol gónó mogot angat gewà. Angat wen gewà bè yó kem tau nô bè Bulul Sayun bè Jirusalim, lómón yóm deng tehe mon Dwata. Yó kem tau gewà yó, lu se yó kem tau deng kun nélék Dwata.”

Currently Selected:

Juwél 2: tbl

Highlight

Compare

Copy